Job 30
30
1Lakini ponopa vakuseka vana yivavelili vadokwa kwa nenga,
vana vala vatati vawu ndawonili vakujakwa chindu ha.
vatati vawu vajakwili ha hata kuvalolela vagalu na vafungami vangu.
2Dambati liki kufuma kwa veni,
vandu yivangajila liwovi
3Vaghanda doli kwanongwa ya njala,
vayendiyenda kusaka filivi mumlima myumu,
ngengileka yingajila chindu.
4Valili mihali kucheja na mihamba kundeveli,
valili hata mikigha ya mibiki.
5Vavingivingiwi kutali na vandu,
vandu vavakuvilili njova kucha vakuvakuvila vefi.
6Vadayiliwili kwikala mumbaku na mumbengu siyumili,
mumyowu na mumigonguveli mikomi.
7Aku kumidasi valilili kucha van'gongolu,
vayikungashili pamu pasi ya midasi.
8Veni vavelili vana va yivabedaliwili na vandu vangajila kujumiliwa,
vavingivingiwili mumlima.
9Ponopa vana vawu vakugolela machwegha kwa kusomulela misambu,
ndaveli mundu wa kubedaliwa kwa veni.
10Vakunyekwa na kubava,
pavang'ona vakundemela mita kuwushu.
11Kwanongwa Chapanga kasoshuvasha na kundaya chindipa,
vava pekesu kugolela chila chivadayila.
12Mwambu wangu wa mlilu vandu vakumbundangila,
vandeghela luwoyi mukuwulu na vakushengeta vang'ulaghi
likumbundangila na kugola nduvi.
13Vakulimba deha yangu,
na veni vakunyeghela gobuleku,
kwahela hata mundu yumu wa kundanga.
14Vanyisila kucha mundu yapita muluwa lumanukili,
vakumbundangila mulibowubowu.
15Chipwembwi chikomi chingola,
ndundamilu yangu yiwuka kucha uyegha,
na fila yifimbata fikuwuka kucha mafundi.
16Ponopa unofu wangu wuva chingomeku,
majuva va kugobuleka vangola.
17Pamihi mipava yangu yonda yikutama,
na matami vangu vakusika ha.
18Kwa liwovi lyaki likomi Chapanga kava kucha fwali,
kayimata na nenga kucha luviniku lwa gwanda yangu.
19Kadangila mumitika,
na nenga ndiva kucha lifu lya pachikoshu na lifu lya uganga.
20Ngukulilila yuwi Chapanga lakini ukundanga ha,
ng'oloka kukudadava lakini ukumbikanila ha.
21Yuwi kung'alambuka kuva makuluu kwa nenga,
ukundesha kwa liwoku lyaku livelili na liwovi.
22Kudangila kuuyegha na kunyeyesha,
lingukumbi likomi likudanga kunu na kunu.
23Manya kucha dawung'ulaghi
kila mundu yaikala dasovi.
24Wuli, mundu papundangiliwa akuholosha ng'odu liwoku?
Wuli, mundu paghava dabadaba akuluva ng'odu utangi?
25Wuli, nenga ndavalililili ng'odu vala yivelili mugobuleku?
Wuli, ndakoliwili ng'odu na lihingili kwanongwa ya vagaju?
26Lakini pashuvililili mbati findu finofu, findu fya wafu fing'ona,
pametili ngesha chisi chinyisila.
27Ndima yangu yikulyangalyanga wala yikusika ha,
majuva va gobuleku vamvika.
28Utami ndi wuugola njimba yangu yivi nditu, lijuva ha ligolili kuva nahawu.
Nguwoloka palikungashu kuluva utangi.
29Ngulila kucha fingekembi,
nenga na litui twileka ha.
30Njimba yangu yiva tyoo, na yikwilyuva,
mipava yangu yikukang'anda kwa msusa.
31Liwombu lyangu liva lya kulilila chivembu,
Liluli lyangu liva na lishu lya chivembu.
ទើបបានជ្រើសរើសហើយ៖
Job 30: OTNdambBL
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The Old Testament in Ndamba @The Word for The World International and Ndamba Language translation. All rights reserved.