Job 27
27
1Pambeli Ayubu kayendilela kudeta,
2Ngwilapa kwa Chapanga yavelili mnofu, yang'ushilili haki yangu,
Chapanga yagolili gobuleku mumfuki wangu.
3Ngwilapa kucha wunyendilela kwikala,
na mfuki wa Chapanga pawuva wakali mugati yangu,
4Mlomu wangu dawudeti fya udesi kandi ha,
wala lulimi lwangu daludeti fya ufyangu ha.
5Nenga jumili ha kucha afi fimudeta fiva nakaka,
hata pasova ngudeta ndivahela mbatiwa.
6Danyendileli kudeta kucha nenga nduvahela mbatiwa,
natilu yangu dayihighi ha mungalilu yangu.
7Chimdwama wangu apati asabu nga mwafu,
na yula yandesha alatuliwi nga mwafu.
8Yangajila kumdadava Chapanga kana shuvililu liki,
Chapanga pamuwushila unofu waki?
9Wuli, Chapanga dapikani chivembu chaki,
chipindi cha gobuleku pachifika?
10Wuli, mundu mwafu akuwesha kumsekilela Chapanga,
majuva vosi damdadavi ha Chapanga?
11Dandivawuli liwovi lya Chapanga wulivelili,
dandivafifi ha fyayilata Chapanga muna liwovi.
12Mwaveni muchimanyi chilongochi unofu,
topi nongwa liki mukuywanga findu fya chisisihi?
Sofali akumyangula Ayubu
13Achi ndi Chapanga chamvikilili mundu mwafu,
na achi ndi dachiyangi muteshi wa vandu kwa Chapanga muna liwovi.
14Hata leki vana vaki pavatangala wuliwuli davawulayiwi kumgoha,
chileli chaki dachivi na filivi fitangalili ha.
15Vana vawu yivananili munjifwa, davasovi kwa matami makomi,
na vangalimlyangu vawu davavalilili chivembu ha.
16Hata pavalundika madini va mbiya kucha lifu,
na fwali kucha lilundu lya muhanga,
17alundiki hela, lakini vandu goleki ndi davafwali,
na vandu vangajila mbatiwa davavaghani madini vaki va mbiya.
18Nyumba yajenga mwafu yiva nga undandambuli,
kucha chindimililu cha mdimi kufitava.
19Mweni akuwonja kunu kava mlundamali, lakini dawonji kandi naha ha,
payimuka hela ulundamali wosi kwahela!
20Mikapusha yikumuhomukela kucha lilava,
pamihi akutoliwa na lingukumbi.
21Liyegha likomi kufuma kundamba likumkukusha na kuyaghamila nakamu,
na kumyegha kutali na nyumba yaki.
22Liyegha ali likumgubika ngajila lusungu,
dayeshi kulituva lakini aweshi ha.
23Liyegha dalimyovileli paatuva,
na kumuyovishela awuki pala paghaveyi.
ទើបបានជ្រើសរើសហើយ៖
Job 27: OTNdambBL
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The Old Testament in Ndamba @The Word for The World International and Ndamba Language translation. All rights reserved.