MRK - NUMANA 12
12
Nkan lɛ aner abɛ na ndum azɔb
1Yesɔ ne lɛ ben abɛ na ndum amaa ne nkan lǝlɛ: <<Iner nuŋ ne shi kuŋkun inebi ne ahwaŋ amaa. Te kam kɛ zǝk ne adampem, ane ka dudu kɛ yi ama inebi me. Ankyak ne baŋ ahwaŋa asak aner anuŋ ne aŋɔk te gar tsǝn. 2Ndi mkpaŋ kɛ kye idɔ inebi ne te ne shar izhin ne miŋ kɛ agɛn amaa ben abɛ na ndum ne ahwaŋa te abɛ te ta wa idɔ inebi nuŋ ben abɛba. 3Ama abɛ na ndum ne ahwaŋa ne vuŋu, te tsǝgu te yaru te duŋu akama kɔmɔ aŋɔk akluklu. 4Fe ne na shar igen nuŋ ben abɛba; abɛ na ndum ne ahwaŋa ne vuŋu te tsǝgu ne tu te sagu iyah te duŋu akama kɔmɔ ne shisha. 5Nǝ na shar igen nuŋ, abɛ na ndumo atsǝgu aŋun. Nǝ shar agɛn tetɛk; ne tsik anuŋ te aŋlɔk anuŋ.
6<<Ayi ne zhin ndi ne dǝk, iwaŋ ndi ayi zu maa ankyak, ndi anyɛru. Nǝ shar ine klɛ ŋɔk, te di, <atei nugu ŋgɔŋ tei ayi izu muŋ.>
7<<Ama abɛ na ndum ne ahwaŋa adi akpa amen, <<Waŋa ayi ne li gadu maa. Nyɛ zhin, te tabǝ ŋunu, te gadu mɔ bǝ yi mɔr.> 8Ankyak avuŋu te tsegu aŋun, te baŋu tyak azhɔk ne goŋ ahwaŋa.
9<<Ine ahwaŋa atei na anii? Iner ne ahwaŋa atei nyɛ te tsik abɛ na ndum ne ahwaŋa a ŋlɔk te baŋ ahwaŋa anǝk anuŋ. 10Ba zhin tɔ cɛr yiŋɛ ka:
<<<Mkpaŋ yiŋ ndi abɛ me ne kyagǝ
Iyi ne nyage ne nju ki;
Arik wa nena iki yiŋɛ,
Waŋa ai ki sak ŋɔk ne anu ne ayi mɔr>?>>
11Arik wa nena iki yiŋɛ,
Waŋa ai ki sak ŋɔk ne anu ne ayi mɔr>?>>
12Fe awɔb ankɔŋ ne vuŋu Yesɔ te zhi ne lɛ keŋ lǝlɛ yiŋɛ ne atu men. Ama ne te sǝsǝk ntsan aneshir; ankyak akama tibɛ te duŋu te kɔmɔ.
Iyah Kaisar gandu
13Ndi ne kɔmɔ ne te shar anuŋ abɛ Ferisawa ben aneshir abɛ Hirudus te bɛ kɔte ten Yesɔ ne lɛ maa. 14Nǝ nyɛ ben abɔu te di, <<Ine Tsar, ta ne zhi te uyi ner waŋ ndi anugu ngɔŋ. Bau tanyɛme ben nuŋ te kyak nuŋ ba, bau nek tu mi ben anuŋ ba; ama utsar ne ankɔŋ ayi Arik ne ankɔŋ adidik. Ire te abɛ nek Kaisar gandui ka ta bǝ yaa kaisar ka tabǝ duŋ ini? 15Tabǝ yaa ka tabǝ duŋ ini?>>
Ama Yesɔ ne zhi kam gli mǝne. Arib ba te di, <<Aye nii te izhin wɔb ten me?>> <<Glime zhin azɔbɔ tem tɔ kɛ.>> 16Nǝ gliu izɔb zinariya, ankyak arib ba te di, <<Igɔŋ izɔb zinariya kǝŋe ne cɛr sak kɛ ŋɔwai? Ai izhu iŋɔwa ne sage ne miŋe?>>
Adi, <<iyi kɛ Kaisar.>>
17Ankyak Yesɔ adi, <<Nǝk zhin kaisar iki yiŋ ndi iyi maa tena nek zhin Arik iki yiŋ ndi iyi Arik.>>
Ankyak asak aŋɔk ne anu ne atu yi Yesɔ.
Nŋa ndi ate lu ne bɛ
18Fe Sadukiyawa, abaŋ ndi adi ilu ne bɛ ba yime ba, anyɛ ben Yesɔ ne rib bu. 19Te di, <<Ine Tsar>>, Musa ne cɛr ta te di waŋ ndi izumen te ku te duŋ iwa maa ama ba ne yi ne amumun ba, izumen abɛ ta iwama kɔ atei duŋu aŋli zumen amumun. 20Neme amunwa nuŋ amɛ ataŋgba. Nǝ kuti ne tawa ma te ku ba ne yi ne amumun ba. 21Fe ne zeu ma ne ta iwa maa, te na ku, yaŋ ŋli amumun. Ina yi amɛ ben ne ntar ma. 22Le didik, Itaŋgba mǝne ba nuŋ ne yi ne amumun ba. Nǝ klɛtu, iwama ne ku mayi. 23Ndi te lu ne bɛ iwama atei yi ayou ŋɔwai, te Itaŋgba mǝne ne tau?>>
24Yesɔ adi ba, <<Ba zhin ne dur ka izhin ne zhi lɛ kɛ Arik ben mgbyamgbyaŋ mai? 25Abɛ kuti te lu ne bɛ, ba atei ta amba ba, ba tei na duŋ amba aŋa ba; atei yi ndi abɛ shar abɛ Arik ne Gbarshu. 26Fe ne atu ayi abɛ lu ne bɛ, ba zhin ne tɔ cɛr yi Musa ka, ne miŋ zizik, ndi Arik ne diu, <Myi Arik ayou Ibrai, Arik ayou Ishaku, ben Arik ayou Yakubu>? 27Ba yi Arik abɛ ku ba, ama ayi Arik abɛ vli. Izhin ne dur ngɔŋ!>>
Le ngɔŋ kɛ nek
28Inuŋ ne tsar cɛr yi Musa ne nyɛ te wɔ ba zen nga aŋa. Te wɔ Yesɔ ne nek ba lɛ anenen, te rib Yesɔ te di, <<Nǝ lǝlɛ yiŋɛ bɔbɔk, itakɛ iyi ngɔŋɔi?>>
29Yesɔ adiu, <<Ilɛ didik ngɔŋɔ,>> <<kǝkɛŋ,>> <Wɔ zhin, aner abɛ Isrela, Arik amɔr Ngɔŋ, Arik ayi zhin. 30Tanyɛme ben Arik ami ne susun mi bɔbɔk ben ikpa mi ben izhi mi ben mgbyamgbyaŋ mi bɔbɔk.> 31Iyi yaa iyi yiŋɛ, <Tanyɛme ben ikpami ndi tu mi.> Ilɛ nuŋ ngɔŋ ba naŋ kǝkɛnɛ ba.>>
32<<Une bla anenen, ne tsar,>> ine tsar cɛr yi Musa adi Yesɔ. <<Ubla lǝlɛ didik ndi udi Arik ayi zhiin inuŋ ba ayime ba anaga yi wa kiki maa. 33Ubɛ tanyɛme ben Arik ne susun mi bɔbɔk, ben izhi mi ben iklik mi, te na tanyɛme ben ikpa mi ndi itu mi ire naŋ ubɛ na ikiki yiŋɛ inaŋ ndi ubɛ tsik Arik ibaŋ yi narum goŋ ben yi yak.>>
34Ndi Yesɔ ayigu ne lɛ ne Mgbemgbeb, adiu, <<Bau yi shaan ne kɔb Arik ba.>> Vuŋ rɛ mkpaŋ yuŋɔ ba nuŋ ne na rib Yesɔ ilɛ nuŋ ba.
Ne rib ayi ŋɔwa ayi Kristi me
35Ndi Yesɔ ne zen tsar ne miŋ Akabaŋkɔŋ, ne rib bu te di, <<Tǝ ayi anii duŋ ne tsar cɛr yi Musa adi Kristi ayi izu Doda? 36Doda wa tu maa, Izhu tsetser ne duŋ lɛ, te di:
<<<Arik ne di Arik amuŋ:
<<Zisɔŋ ne ŋɔk li muŋ
M tei duŋ abɛ te zor ben abɔu
Asɔŋ ne aza mi.>> >
37Doda wa ne tu maa ne zhɔu te <Ŋgɔŋ.> Tǝ wa atei na kikin teyi zu maa?>>
Ntsan aneshir ne wɔu te nyɛr.
38Nǝ tsar maa, Yesɔ ne di, <<Izhin bǝ te zee bǝn abɛ tsar icɛr yi Musa. Atsǝn ne nkluŋklu goŋgɔŋ te wɔb te aneshir abɛ tek ba ne dub, 39te na wɔb sɔŋ ne mben didik ne akaba bǝn amkpa ane na igyaŋ. 40A vu iki ambakɔ> te na baŋ mkpaŋ tetɛk te ben Arik. atei sak aner abaŋa iyah ngɔŋ.>>
Iwakɔ ne nek Arik anini ayaa
41Yesɔ ne zǝ sɔŋ ne kɔnsa gbahir ne mgbɔ iyi shur azɔb te zen tɔ aneshir ne nek azɔb ne akabaŋkɔŋ. Aneshir abɛ yi ne adudunki anǝk azɔb tetɛk. 42Ankyak iwakɔ ne te iyah ne anyɛ nek anini ayaa, mgbalak zɔb zhiin.
43Yesɔ ne zhɔ abɛ na ndum amaa, te di ba, <<mbla zhin lɛ didik, iwakɔ waŋa ne nek tetɛk anaŋ nki aneshire. 44Aba ne nek ne miŋ kɛ adudunki amen; ama iwakɔ waŋa, ne iyah maa ne nek iki yiŋ ndi ayime neyi bɔbɔk ne sɔŋ maa kɛ gɔŋmimi.>>
ទើបបានជ្រើសរើសហើយ៖
MRK - NUMANA 12: NAA
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The word for the World International and The word for the World Nigeria