LUK - NUMANA 12
12
Gbaŋatɔŋ ben nek lɛ
1Ne me, ndi ntsan aneshir tetɛk ne tuŋ abiŋ, te zen turo akpa mɛn, Yesɔ ne kuti lɛ ben abɛ zeu na ndum amaa te di: <<Zhin bɛ hria ayi ne yist kɛ Ferisawa, abaŋ ndi ana iyik ayi. 2Ba kiyiŋ ndi ne kuyi ndi ba tei bui ba, kɔ ki yiŋ ndi ne sui ayir ndi ba tei yigǝ ba. 3Ikiyiŋ ndi izhin blai ne bu atei wɔi aririk, ben kiyiŋ ndi zhin lɛ ne tɔŋ ne miŋ ki atei blai ne bɛm.
4<<Mbla zhin akpa amuŋ, kǝr zhin bɛ te sisik abaŋ ndi atei ŋun kpa ankyak batei na kinuŋ ba. 5Amɛ M tei ntsar zhin waŋ ndi zhin tei te sisik maa: Tǝ zhin sisik waŋ ndi atei ŋun kpamin ayi ne mgbyamgbyaŋ kɛ baŋ zhin tyak zhɔk ne lu. mbla zhin, te zhin sisik maa. 6Ba alɛb amwɔcice amɛ atuŋ ne azɔb ayaa kai? Arik bane ŋuro suk ne zhin ba. 7Fena, ne zhi kli kɛ mfumfuk tu min. Kǝr zhin bǝ te sisik ba; izhin yi ne shaga ayi naŋ amɔ cice tetɛk.
8<<Mbla zhin, waŋ ndi te ta nyɛmɛ bene bɛm ne ti kɛ aneshir, Izu Neshir atei tsar ta nyɛmɛ ne atɔ maa ne ti kɛ abɛ shar Arik. 9Waŋ ndi te kyak zhim ne min aneshir atei na kyak zhiu ne ti kɛ abɛ shar abɛ Arik. 10Waŋ ndi ate lǝlɛ mimin ne tu ayi Zu Neshir atei zu gu azhɔk, fe waŋ ndi ate tun ne mgbyamgbyaŋ yi Izhu Tsetser ayi Arik ba tei zu gu azhɔk ba.
11<<Te yi ndi ne gli zhin anyɛ Akabaŋkɔŋ ne angus ayi angɔŋgɔŋ bene abɛ yi ne mgbyamgbyaŋ, kǝr zhin bǝ lɛ ne susun ndi zhin tei ta akpa min zhɔk ba, ben ki yiŋ ndi zhin tei blai, 12te Izhu Tsetser atei bla zhin kiyiŋ di zhin tei blai.>>
Nkanlɛ yi neshir ndi ayi ne dudunki tena yi bliblik
13Nuŋ ne min kɛ aneshir tetɛk adi Yesɔ, <<Ne tsar, bla zumɔr abɛ gab kiyiŋ ndi ayime neyi bene bɛm.>>
14Yesɔ adiu, <<Neshir, ŋɔwa ne hriam te myi ne ŋas kɔ myi ne gab zhin kiyiŋ ndi tetɛɛ mɔr ne ku te duŋ ta neyi?>> 15Fe adi ba, <<Hria zhine ayi! Sɔŋ zhin awa ne tu kiyi tik ayi; ba ai adudunki yi gɔŋmimi tetɛk iyi itei nek neshir vli ba.>>
16Ankyak abla ba nkanlɛ yiŋɛ: <<Ahwaŋ ayi ner nuŋ ne rɛ kili ŋgɔŋ. 17Ne di tu maa, <M tei na kikin? Bam yi ne wun yi nyak kili muŋ ba.>
18<<Fe adi, <Waŋai kiyiŋ ndi M tei nai. M tei nzir wun muŋ te mee wun ngɔngɔŋ, te nyak kili muŋ ndi yi tetɛk. 19Fe M tei ndi tu muŋ, <<U yi ne kiki didik tetɛk ndi tei te ase tetɛk. Sɔŋ sik; te li, te so te zhɔk susun.>>>
20Ankyak Arik adiu, <<Uyi bliblik! Nǝ bu yiŋɛ atei baŋ vli mi. Ne me ŋɔwa atei vu kiki yiŋ ndi une nyak tu mi ne yi?>
21<<Waŋai kiyiŋ ndi itei yime ben waŋ di aŋyak tu maa kiki ndi ba yi ne kinuŋ bene Arik ba.>>
Duŋ lɛ ne susun ba
22Fe Yesɔ ne di abɛ zeu tsǝne amaa: <<Fe na mbla zhin, kǝr zhin bǝ lɛ ne susun amin te di, ta tei li anii; kɔ ne kpa min, tei suu anii. 23Isɔŋ didik kɛ goŋ mimi inaŋ kili, ikpa naŋ nkluŋklu. 24Tɔ zhin aŋliŋlɔ: ba tib ba ba sɛr ba, ba yi ne wun ba; ne me Arik ayok ba. Amɛ ba zhin shak ayi naŋ aŋliŋlɔ ka! 25Ŋɔwa ne miŋ mine ne lɛ susun maa atei nek tu maa mkpaŋ zhin? 26Te yi ndi ba zhin tei na ki vǝtsɔb yiŋɛ ba, te zhin lɛ susun ne nki kime tǝ ni?
27Tɔ zhin awu ndi aflu. Ba na ndum ba ba tyak aruru ba. Amɛ me mbla zhin, Solɔmɔn ne yi ne ki tetɛk yi goŋ mimi bane duŋ anaŋ awu ayiŋɛ ba. 28Ate yi ndi Arik aduŋ agǝga ayi zizik, ndi ayime aliŋ, amblɛ atuge ashur ne lu, te izhineba abɛ ta nyɛmɛ wa watsɔb, bai su zhin nkluŋklu kai? 29Ne mee, kǝr zhin bǝ nek susun min ne kiyiŋ ndi zhin tei li tena so, kɔka izhin bǝ lɛ ne susun ba. 30Ndi abɛ yaŋ zǝ Arik abɛ goŋ mimi aklu agɔŋɔri te wɔb kiyiŋɛ menyi, Tetɛɛ min ne zhi te zhin wɔb kiki yiŋɛ. 31Amɛ wɔb zhin kɔb Arik ne liŋ te atei na nek zhin kiki me.
32Kǝr zhin bǝ te sisik ba, izhineba muen awanta, Tetɛɛ min ne shu anyɛr tǝ wa bɛ nek zhin kɔb Arik. 33Vu zhin kiki yi gɔŋmimi min lɛb te nek abɛ yaŋǝ, wɔb zhin atɔ min mgbɔ ndi batei rus ba, kiki yi shu ndi batei klei ba, ndi abɛ zhib batei zhibǝ ba kɔ nkis batei lii ba. 34Amkpa waŋ ndi kiki yi gɔŋmimi mi yime, amɔ wa susun mi yime.
Sɔŋ Shur Ayi
35Kpa zhin atiŋ kɛ na ndum te duŋ lu min bǝ laŋ, 36ndi agɛn abaŋ ndi asɔŋ aŋub atukɔ amen te kama nyak ne gyaŋ yi kpa ŋa, fe ndi te nyɛ te kpyaŋ ankɔŋ atei lu andanda te kɔte buu ankɔŋ. 37Itei rɛ te agɛn abaŋ ndi atukɔ amen te yik ba akɔ sɔŋ ashur ayi. Mbla zhin lɛ didik, atei te duŋ ba zǝ sɔŋ te gab kili. Te kama den asɔŋ ne mben ŋgɔŋ yi sak kili. 38Itei rɛ ngɔŋ te abaŋ ndi atukɔ amen te nyɛ yik ba akɔ sɔŋ ashur ayi, kate nyɛ ne tsutsu bu kɔ ne nyɛ ŋan bɛr. 39Zhin bɛ zhi kiyiŋɛ: Te yi ndi akiki ne kɔbɔ ate zhi mkpaŋ keŋ ndi abɛ zhib atei nyɛ, ba tei ta nyɛmɛ abɛ nyɛ cɔk ankɔŋ ala te yiru kɔb ba. 40Jineba minyi izhin bɛ sɔŋ shur ayi, Izu Neshir atei nyɛ ne nkpaŋ kɛŋ ndi ba zhin ne zhi ba.>>
41Biturus arib, <<Ŋgɔŋ, U bla taba kǝŋ lɛ yiŋɛ kɔ aneshir bɔbɔk ni?>>
42Ŋgɔŋɔ adi, <<Ayi ŋɔwa ŋgɔŋ ne na didik te nayi mgbemgbeb, ndi ŋgɔŋ amaa te nǝgu ŋgɔŋ ne tɔ agɛn amaa te bɛ ya ba azɔb ayi li kili ne kpaŋ anenen? 43Itei rɛ te gen waŋ ndi atukɔ amaa te nyɛ te yigu ana amɛ ndi te nyak. 44Mbla zhin lɛ didik, atei nǝgu Gli kiki yi gɔŋmimi maa bɔbɔk. 45Ankyak te yi ndi igen waŋa adi tu maa, <Atukɔ amuŋ atei baŋ mkpaŋ lǝlɛ teshe nyak,> Fe akɔ tsik nki agɛnɛ, alulum ben amba, te li te so te hwa. 46Atukɔ ayi gen waŋa atei nyɛ ne bɛr yiŋ ndi bai nkpaŋ kɛŋ ndi bane zhi ba. atei tseu amkpomkpok te baŋu tyak azhɔk ne amkpa waŋ ndi abɛ yaŋ ta Arik ayime.
47<<Igen waŋ ndi ne zhi susun kɛ atukɔ amaa te ba ne sɔŋ shurɔ yi ba kɔ ba ne na kiyiŋ ndi atukɔ maa awɔb atei sagu iyah ngɔŋ. 48Te yi ndi waŋ ndi ba ne zhi ba te na kiyiŋ ndi atei nǝgu iyah tena tsǝgu watsɔb. Waŋ ndi te nǝgu tetɛk, atei wɔb tetɛk bene bɔu; waŋ ndi ate nǝgu tetɛk amɛ atei na wɔb tetɛk ben bau.
Sik susun ba yi ame ba ayi ŋar aneshir
49<<Mne nyɛ zhɔk lu ne gɔŋmimi, ne yik muŋ ilumɔ bǝ zen ta! 50Me sɔŋ ŋub isu yi ya ndi itei nyɛm, ndim wɔi ne kpa muŋ te bǝ klɛ! 51Izhin yik te di mǝne Gli sik susun nyɛmɛ ne gɔŋmimi? Ba yeme ba, mbla zhin, mne nyɛ ŋar aneshir. 52Vuŋ rɛ azizaŋa kɔb zhin itei gab te yaa, aneshir atuŋ ne kɔb zhin, amɛ tar bene ayaa, ayaa bene atar. 53atei ŋar akpa, Tetɛɛ atei kyak zu maa, izu atei kyak Tetɛɛ maa, iyah atei kyak Va maa, Va atei kyak Iya maa, azhi men atei kyak wa zu maa, iwazu atei kyak azhi men.
Izhi mkpaŋ
54Yesɔ adi ba: <<Zhin te yik akpa alu akli ne gar kɛ anzaŋ, zhin di alu atei kuh,> Ana kuh. 55Zhin tena yik ŋguŋgu te fuk rɛ shin izhin di, <Abɛm atei wu,> Ana wu. 56Abɛ na iyik ayi! Izhin zhi bla kiki yiŋ ndi ite na ne gɔŋmimi ben gbarshu. Zhin na kikin te ba zhin ya bla ikiyiŋ ndi ite na ne mkpaŋ kɛ azizaŋ kai?
57<<Anii duŋ zhin yaŋ bla akpa min ki didik ka? 58Ate yi ndi izhin tsǝn gar amkpa ne ŋas, lɛ ben waŋ ndi zhin te antam bene bɔu, kam nyak te tsǝn zhin ankun azhiin, te kǝr abɛ baŋu Gli gar ben ne te ŋas, fe ne te ŋas abaŋ zhin anǝk ŋgɔŋ ne ku aneshir ate ku ne jaru. 59Mbla zhin, izhin ba tei ru ba, atei duŋ zhin yaa azɔbɔ bɔbɔk neliŋ teshe ru zhin.
ទើបបានជ្រើសរើសហើយ៖
LUK - NUMANA 12: NAA
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The word for the World International and The word for the World Nigeria
