Luka 24
24
Kuhinduka kwa Yesu
Matayu 28:1-10; Maliku 16:1-8; Yohana 20:1-10
1Ijumapili, lichuwa lya mtumbulo lya wiki, malawila pee, wala wadala wayendili kulimambi wakipapa ghala uvumba na manungilo wayandalili. 2Wakalola lila liganga livikilwi ku mlyango wa limambi lihukumulilwi mmbali gha mmambi. 3Pawayingila mghati, walola ng'ogha higha wa Bambu Yesu. 4Pawawelili wambila wangulikangasa mhambu hula, bwitu wandu waivili wavala nguu zing'alili nesu, wakagholoka pabehi na weni. 5Wala wadala wakayingila holu, wakaghondama wuso ghao pahi kulutupi. Ndiwa wala wandu wakawalongela, “Kwa kyani mnguhakula avile angulama kuwahovili?” 6Kabaha ng'ogha, kahinduka kala. Mkumbuki vila awalongelili paawelili kula Galilaya. 7“Lasima Mwana wa Mundu ahumiswe kuyeghwa mumawoko gha wandu wavile na sambi, wamuvambi mulipingika na lichuwa lya itatu ahinduki.”
8Hinu pala wala wadala wakumbukili milando ghaki ailongelili Yesu. 9Wakahuya ukaya kuhuma kumamambi, wakawapegha wala wandumindumi ikumi na mmonga na wandu ghangi milando gha mighalu ghala hyogha. 10Wala wadala walongile milando hila kwa wandumindumi ni Maria Magidalena na Yoana na Malia nyongo wa Yakobu, pamonga na wadala ghangi wakonganilili pamonga. 11Wandumindumi wa Yesu wayatolili ghala milando handa vindu vya kupughanyika, hinu wakasindwa kukwinila. 12Ila Petelo akahuma, akayenda mbilo mbaka kumamambi. Na paaghondama kulola mghati, akalola nguu mbulete wamtindilisilili Yesu wekayaki. Akahuya ukaya kunu akilikangasa kwa ghala yahumilili.
Mwanja wa kuyenda Emau
Maliku 16:12-13
13Lichuwa lilalila, wandu waivili paghati gha wavulwa wa Yesu wawelili mumnjila wakiyenda kimbwani kimonga lihina lyaki Emau, kiwelili kutali handa kilomita ikumi na imonga kuhuma Yelusalemu. 14Wawelili wakilongela ghala hyogha yahumilili. 15Pawawelili wakilongelana, Yesu mweni akahumila kuulongolo, akatyanga pamonga na weni. 16Wamlolili kwa mihu, ila wammanyili ng'ogha . 17Yesu akawakonya, “Mngulonga kyani ikiva mngutyanga mnjila?”
Na weni wagholokili nuu, kuwuso kulolesa luhungu. 18Mmonga wa weni lihina lyaki Kileopa, akayanga, “Ghuli, wenga ni mundu mhenja wekahela ku Yelusalemu unguwoneka umanya ng'ogha yahumilili machuwa hagha.”
19Na mweni akawayanga, “Mighalu liki?”
Weni wakamyanga, “Mighalu imkolili Yesu wa Nazaleti.” Mweni awelili Mlota wa Sapanga mweni uweso wa kughola na kuvula kuulongolo gha Sapanga na kuulongolo gha wandu wogha. 20Watambika wakulu na wakulu wa twenga wamyeghili atoswe kuhova, wamvambili mumapingika. 21Ila twenga tuwachilili yiwa mweni ndiwa atewakombola Izilaeli. Hinaa lelo lihika lichuwa lya itatu kuhuma mighalu hila kugholeka. 22Kangi, wadala ghangi wa baha watulilimulili pawayenda malawila pee kumamambi, 23na kulola ng'ogha higha wa Yesu. Wakahuya na kulonga yiwa wahumililwi na Watumikila wa kundumba wa Sapanga na wakawalongela yiwa Yesu avile angulama. 24Wamonga gha twenga wayendili kumamambi wakalola ghala wayalongili wala wadala, ila mweni wamlola ng'ogha.
25Hinu Yesu akawalongela, “Mwenga muwasihisihi wa nagha, na mvile na utopehu wa mioyu kwa nagha kuyikwinila mighalu hyogha yalongilwi na walota wa Sapanga! 26Ghuli, impala ng'ogha Kilisito kuhakilwa kwa njila hazi, ili ayingile kuukulu ghaki?” 27Akawalongela lipalalipala mighalu hyogha impalili kumuhumila mweni ku Mayandiko gha Musa apeghilwi na Sapanga na walota wa Sapanga yayandikilwi kwa kumlongela mweni.
28Pawakihikila pabehi kila kimbwani wawelili wangukiyendela, Yesu akaghola handa anguyendelela na mwanja. 29Ila weni wakamluwa wakilonga, “Ulikali pamonga na twenga, kwaikiva lijuwa linguhonga, na uhiku unguhika.” Hinu, akayingila kukimbwani, akatama pamonga na weni. 30Paatama kulyegha mulyo pamonga na weni, akatola libumunda, akauhighili Sapanga na akaumetula na kuwapegha. 31Bwitu mihu ghao ghakaghalambuliwa, hinu wakammanya yiwa mweni ni Yesu ila mweni akahuka paghati mwaweni. 32Hinu, wakalongelana, “Ghuli, mioyu gha twenga ijakamulilwi ng'ogha lipindi awelili akitulongela lipalalipala Mayandiko Mambulete nesu kula mnjila?”
33Wakahuka lisaa lilalila, na kuhuya Yelusalemu, wakawalola wala wandumindumi ikumi na mmonga na wala ghangi wawelili pamonga na weni walikungulili. 34Wakawalongela wavulwa waivili,“Kwa chakaka Bambu kahinduka, kamuhumila Simoni.”
35Hinu, wala wavulwa waivili wakawalongela yala yawahumilili mnjila, na vila wammanyili pawameghili libumunda.
Yesu anguwahumila wayitikila ghaki
Matayu 28:16-20; Maliku 16:14-18; Yohana 20:19-23; Matendu 1:6-8
36Pawawelili wakiwalongela ghala, Yesu mweni akagholoka paghati gha weni, akawalongela, “Kuponga ilikali na mwenga.”
37Wakalikangasa na kukolwa na holu na wakiliwachila walola mpumulo. 38Ila mweni akawalongela, “Kwa kyani mngunyengemala? Ghuli mvile na holu kumioyu? 39Mlole mawoko na maghulu gha nenga, yiwa ni mundu. Mniyavisi mlole, kwaikiva mpumulo livile ng'ogha na higha na mihupa handa mnilola.”
40Kuulongolo paayomola kulonga ghala, akawalangiha mawoko na maghulu ghaki. 41Wawelili na luheku nesu kunu wakilikangasa hata kusindwa kukwinila yiwa iwesekana ng'ogha, kwa vila walikangasana, akawakonya, “Mvile na mulyo wowose baha?” 42Wakampegha kipandi kya homba wa kunyanywa. 43Akakitola, akalyegha, wogha wakimlola.
44Hinu akawalongela, “Hali ndiwa lihengu niwalongelili panivile pamonga na mwenga, yiwa iwelili lasima kuhumila hyogha yayandikilwi kwaikiva gha nenga kulilaghilo lya Bambu ampeghili Musa na kuhitabu vya walota wa Sapanga na kuhitabu kya Zabuli.”
45Hinu akawagubutulila luhala gha weni ili wawesi kumanya mayandiko. 46Akawalongela, “Ndiwa iyandikiliwi, yiwa Kilisito atehakilwa na lichuwa lya itatu atehinduka kuhuma kukihu, 47na yiwa ni lasima, kwa lihina lyaki, milima hyogha kutumbula na Yelusalemu, yatangasiwi yiwa wandu wangupalwa kuleka mahakata na kumhyukila Sapanga ili kulekeselwa sambi. 48Mngupalwa kuwalongela wandu ghangi kila kiloleka kumihu gha mwenga. 49Na nenga nitemyegha kunani kwa mwenga Mpumulo wa Sapanga yula Tati alaghilili atewapegha, ila mlindili haku kumbwani mbaka mpati ghala makakala yahuma kunani.”
Yesu anguyenda kundumba
Maliku 16:19-20; Matendu 1:9-11
50Hinu akawalongosa wavulwa ghaki kuyenda panji gha mbwani Betania, akayinula mawoko ghaki kunani, akawahighila. 51Paawelili akiwahighila, akawaleka, akatolwa kuyenda kundumba. 52Weni wakatova manung'una na kumyupa, hinu wakahuya Yelusalemu wakiva na luheku likulunga. 53Wakalikala lipindi lyogha Mulighuta lya Sapanga na kumuhighili Sapanga.
ទើបបានជ្រើសរើសហើយ៖
Luka 24: NTMbBL2025
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The New Testament in Mbunga @The Word for The World International and Mbunga Language translation, 2025. All rights reserved.
Luka 24
24
Kuhinduka kwa Yesu
Matayu 28:1-10; Maliku 16:1-8; Yohana 20:1-10
1Ijumapili, lichuwa lya mtumbulo lya wiki, malawila pee, wala wadala wayendili kulimambi wakipapa ghala uvumba na manungilo wayandalili. 2Wakalola lila liganga livikilwi ku mlyango wa limambi lihukumulilwi mmbali gha mmambi. 3Pawayingila mghati, walola ng'ogha higha wa Bambu Yesu. 4Pawawelili wambila wangulikangasa mhambu hula, bwitu wandu waivili wavala nguu zing'alili nesu, wakagholoka pabehi na weni. 5Wala wadala wakayingila holu, wakaghondama wuso ghao pahi kulutupi. Ndiwa wala wandu wakawalongela, “Kwa kyani mnguhakula avile angulama kuwahovili?” 6Kabaha ng'ogha, kahinduka kala. Mkumbuki vila awalongelili paawelili kula Galilaya. 7“Lasima Mwana wa Mundu ahumiswe kuyeghwa mumawoko gha wandu wavile na sambi, wamuvambi mulipingika na lichuwa lya itatu ahinduki.”
8Hinu pala wala wadala wakumbukili milando ghaki ailongelili Yesu. 9Wakahuya ukaya kuhuma kumamambi, wakawapegha wala wandumindumi ikumi na mmonga na wandu ghangi milando gha mighalu ghala hyogha. 10Wala wadala walongile milando hila kwa wandumindumi ni Maria Magidalena na Yoana na Malia nyongo wa Yakobu, pamonga na wadala ghangi wakonganilili pamonga. 11Wandumindumi wa Yesu wayatolili ghala milando handa vindu vya kupughanyika, hinu wakasindwa kukwinila. 12Ila Petelo akahuma, akayenda mbilo mbaka kumamambi. Na paaghondama kulola mghati, akalola nguu mbulete wamtindilisilili Yesu wekayaki. Akahuya ukaya kunu akilikangasa kwa ghala yahumilili.
Mwanja wa kuyenda Emau
Maliku 16:12-13
13Lichuwa lilalila, wandu waivili paghati gha wavulwa wa Yesu wawelili mumnjila wakiyenda kimbwani kimonga lihina lyaki Emau, kiwelili kutali handa kilomita ikumi na imonga kuhuma Yelusalemu. 14Wawelili wakilongela ghala hyogha yahumilili. 15Pawawelili wakilongelana, Yesu mweni akahumila kuulongolo, akatyanga pamonga na weni. 16Wamlolili kwa mihu, ila wammanyili ng'ogha . 17Yesu akawakonya, “Mngulonga kyani ikiva mngutyanga mnjila?”
Na weni wagholokili nuu, kuwuso kulolesa luhungu. 18Mmonga wa weni lihina lyaki Kileopa, akayanga, “Ghuli, wenga ni mundu mhenja wekahela ku Yelusalemu unguwoneka umanya ng'ogha yahumilili machuwa hagha.”
19Na mweni akawayanga, “Mighalu liki?”
Weni wakamyanga, “Mighalu imkolili Yesu wa Nazaleti.” Mweni awelili Mlota wa Sapanga mweni uweso wa kughola na kuvula kuulongolo gha Sapanga na kuulongolo gha wandu wogha. 20Watambika wakulu na wakulu wa twenga wamyeghili atoswe kuhova, wamvambili mumapingika. 21Ila twenga tuwachilili yiwa mweni ndiwa atewakombola Izilaeli. Hinaa lelo lihika lichuwa lya itatu kuhuma mighalu hila kugholeka. 22Kangi, wadala ghangi wa baha watulilimulili pawayenda malawila pee kumamambi, 23na kulola ng'ogha higha wa Yesu. Wakahuya na kulonga yiwa wahumililwi na Watumikila wa kundumba wa Sapanga na wakawalongela yiwa Yesu avile angulama. 24Wamonga gha twenga wayendili kumamambi wakalola ghala wayalongili wala wadala, ila mweni wamlola ng'ogha.
25Hinu Yesu akawalongela, “Mwenga muwasihisihi wa nagha, na mvile na utopehu wa mioyu kwa nagha kuyikwinila mighalu hyogha yalongilwi na walota wa Sapanga! 26Ghuli, impala ng'ogha Kilisito kuhakilwa kwa njila hazi, ili ayingile kuukulu ghaki?” 27Akawalongela lipalalipala mighalu hyogha impalili kumuhumila mweni ku Mayandiko gha Musa apeghilwi na Sapanga na walota wa Sapanga yayandikilwi kwa kumlongela mweni.
28Pawakihikila pabehi kila kimbwani wawelili wangukiyendela, Yesu akaghola handa anguyendelela na mwanja. 29Ila weni wakamluwa wakilonga, “Ulikali pamonga na twenga, kwaikiva lijuwa linguhonga, na uhiku unguhika.” Hinu, akayingila kukimbwani, akatama pamonga na weni. 30Paatama kulyegha mulyo pamonga na weni, akatola libumunda, akauhighili Sapanga na akaumetula na kuwapegha. 31Bwitu mihu ghao ghakaghalambuliwa, hinu wakammanya yiwa mweni ni Yesu ila mweni akahuka paghati mwaweni. 32Hinu, wakalongelana, “Ghuli, mioyu gha twenga ijakamulilwi ng'ogha lipindi awelili akitulongela lipalalipala Mayandiko Mambulete nesu kula mnjila?”
33Wakahuka lisaa lilalila, na kuhuya Yelusalemu, wakawalola wala wandumindumi ikumi na mmonga na wala ghangi wawelili pamonga na weni walikungulili. 34Wakawalongela wavulwa waivili,“Kwa chakaka Bambu kahinduka, kamuhumila Simoni.”
35Hinu, wala wavulwa waivili wakawalongela yala yawahumilili mnjila, na vila wammanyili pawameghili libumunda.
Yesu anguwahumila wayitikila ghaki
Matayu 28:16-20; Maliku 16:14-18; Yohana 20:19-23; Matendu 1:6-8
36Pawawelili wakiwalongela ghala, Yesu mweni akagholoka paghati gha weni, akawalongela, “Kuponga ilikali na mwenga.”
37Wakalikangasa na kukolwa na holu na wakiliwachila walola mpumulo. 38Ila mweni akawalongela, “Kwa kyani mngunyengemala? Ghuli mvile na holu kumioyu? 39Mlole mawoko na maghulu gha nenga, yiwa ni mundu. Mniyavisi mlole, kwaikiva mpumulo livile ng'ogha na higha na mihupa handa mnilola.”
40Kuulongolo paayomola kulonga ghala, akawalangiha mawoko na maghulu ghaki. 41Wawelili na luheku nesu kunu wakilikangasa hata kusindwa kukwinila yiwa iwesekana ng'ogha, kwa vila walikangasana, akawakonya, “Mvile na mulyo wowose baha?” 42Wakampegha kipandi kya homba wa kunyanywa. 43Akakitola, akalyegha, wogha wakimlola.
44Hinu akawalongela, “Hali ndiwa lihengu niwalongelili panivile pamonga na mwenga, yiwa iwelili lasima kuhumila hyogha yayandikilwi kwaikiva gha nenga kulilaghilo lya Bambu ampeghili Musa na kuhitabu vya walota wa Sapanga na kuhitabu kya Zabuli.”
45Hinu akawagubutulila luhala gha weni ili wawesi kumanya mayandiko. 46Akawalongela, “Ndiwa iyandikiliwi, yiwa Kilisito atehakilwa na lichuwa lya itatu atehinduka kuhuma kukihu, 47na yiwa ni lasima, kwa lihina lyaki, milima hyogha kutumbula na Yelusalemu, yatangasiwi yiwa wandu wangupalwa kuleka mahakata na kumhyukila Sapanga ili kulekeselwa sambi. 48Mngupalwa kuwalongela wandu ghangi kila kiloleka kumihu gha mwenga. 49Na nenga nitemyegha kunani kwa mwenga Mpumulo wa Sapanga yula Tati alaghilili atewapegha, ila mlindili haku kumbwani mbaka mpati ghala makakala yahuma kunani.”
Yesu anguyenda kundumba
Maliku 16:19-20; Matendu 1:9-11
50Hinu akawalongosa wavulwa ghaki kuyenda panji gha mbwani Betania, akayinula mawoko ghaki kunani, akawahighila. 51Paawelili akiwahighila, akawaleka, akatolwa kuyenda kundumba. 52Weni wakatova manung'una na kumyupa, hinu wakahuya Yelusalemu wakiva na luheku likulunga. 53Wakalikala lipindi lyogha Mulighuta lya Sapanga na kumuhighili Sapanga.
ទើបបានជ្រើសរើសហើយ៖
:
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The New Testament in Mbunga @The Word for The World International and Mbunga Language translation, 2025. All rights reserved.