Luka 18
18
Mdala ahovitiliwi na mlumi ghaki na mlamula
1Kuulongolo, Yesu akawapegha wavulwa ghaki mlandano ili walole wangupalwa kuyupa machuwa hyogha kwa kukotoho kutenyuka moyu. 2Akawalongela, “Kumbwani mmonga kuwelili na mtosa mmonga avile kamyitikila ng'ogha Sapanga na ng'ogha kumtundamila mundu.” 3Kummbwani hau hilahila kuwelili na nyongo mmonga ahovitiliwi na mlumi ghaki, hayu nyongo ayendili kwa yula mtosa mihanja ngoo akimuluwa akilonga, “amtangi ili awese kupokela vindu ghaki kuhuma kwa mhakata ghaki.” 4“Kwa lipindi litali yula mlamula akanilili. Ila kuulongolo akalonga mmoyu ghaki, ‘Pamonga na nenga nimyitikila ng'ogha Sapanga na ng'ogha nimtundamila mundu, 5Ila kwaikiva hayu ahovitiliwi na mlumi angunighasa, nitemtanga apokeli vindu ghaki, ili akotoho kuyendelela kunighasa na kumwihu nitetoka.’ ”
6Hinu, Bambu akayendelela kulonga, “Mumhyoghanili vila ailongile hayu mtosa mhakata. 7Ghuli, Sapanga atewagholela ng'ogha maheli wala awahaghulili, wavile wangumlilila pamuhi na uhiku? Ghuli, hatehika kwa kuloposela kuwatanga? 8Ninguwalongela atewagholela kwa kuloposela wala wangumlilila. Hata nagha, ghuli, atelola wandu wa kukwinila mlima wogha lipindi Mwana wa Mundu paahika?”
Mlandano wa Mfalisayo na mkungula usulu
9Yesu akawapegha mlandano hau kwa wala weni kukwinila yiwa weni ni wandu wa maha na kuwapughanya ghangi. 10“Wandu waivili wayendili kulighuta lya Sapanga kuyupa, mmonga paghati gha wala awelili Mfalisayo na ghangi awelili mtola usulu.”
11Yula Mfalisayo, akiva kagholoka weka hela, akayupa nagha, “Sapanga, ningukushukwile kwaikiva nenga nilandana ng'ogha na wandu waghangi. Wapokola na wahwangi na wangongola na nenga nilandine ng'ogha handa hayu mtola usulu.” 12“Nenga ninguwopa mulyo mihanja miivili kwa machuwa isaba, ninguyegha litambiku gha lipinga lya ikumi gha hindu ghangu.”
13Ila yula mtola usulu akagholoka kwa utali, kayesa ng'ogha hata kuyinula wuso ghaki kulola kundumba, ila ajiyavisili kukitivi na liwoku akigondama akilonga, “Sapanga, uniwoneli luhungu nenga mghola sambi.” 14“Ninguwalongela, hayu mtola usulu ahuyili ukaya akiva kalekeselwa kala uhakata. Ila yula ghangi, kalekeselwa ng'ogha uhakata. Kwaikiva kila yula mweni kujighola yiwa mkulu ateghuluswa, na kila ajighola mnung'una atekweleswa.”
Yesu anguwahighila wana wanung'una
Matayu 19:13-15; Maliku 10:13-16
15Lichuwa limonga wandu wamonga wamyeghilili Yesu wana wanung'una ili awayavise wahighiliwe. Wavulwa pawalola ghala, wakawakalipila wandu wala. 16Ila Yesu akawakema wala wana wahiki kwa mweni, akalonga, “Muwaleki wana wanung'una wahiki kwa nenga, wala mkotoho kuwakanisa, kwaikiva Unkosi wa Sapanga ni wa wandu handa hagha wana. 17Ninguwalongela chakaka, mundu yeyose kaupokela ng'ogha Unkosi wa Sapanga handa hagha wana wanung'una, ateyingila ng'ogha ku Unkosi hau wa Sapanga.”
Avile na hindu ngoo mmonga
Matayu 19:16-30; Maliku 10:17-31
18Mkulu mmonga, Myahudi, amkonyili Yesu, “Mvula wa maha, nigholi niki ili niwese kupokela ukomu wa machuwa hyogha bila mwihu?”
19Yesu akamyanga, “Kwa kyani ungunikema wa maha? Kwahela mundu yeyose avile wamaha ila Sapanga weka hela. 20Unguyamanya malaghililo gha Musa, ‘Ukotoho kughola ngongola, ukotoho kukoma, ukotoho kughola wihi, Ukotoho kulonga ulangihi wa ughwangi, uwatundamili tati ghako na nyongo ghako.’ ”
21Yula kilongosi akayanga, “Malaghililo hagha gha Musa hyogha ninguyaghola kuhuma uwana ghangu.”
22Yesu paahyoghanila ghala, akamlongela, “Ungupalwa kangi kughola kindu kimonga, uwusi kila kindu ghako, uwapeghi wandu wakapuku hagha mapesa, kwa kughola nagha na wenga utevika na ngoko kundumba, ndiwa uhiki unikovekeli.” 23Paahyoghanila lilando hali, anyengemalili nesu kwaikiva awelili mundu avile na hindu ngoo.
24Yesu akamlola akalonga, “Uloli vila ivile ikamala kwa mundu avile na mapesa kuyingila ku Unkosi wa Sapanga kiyuhuyuhu. 25Hinu ni yuhuyuhu nesu kwa likokolo walikema ngamia kuyingila kulilanga lya sindanu kupiti mundu avile na hindu ngoo kuyingila ku Unkosi wa Sapanga.”
26Wala wandu pawahyoghanila ghala, wakalonga, “Hinu ghani, atelamiswa?”
27Yesu akayanga, “Ghala yawesekana ng'ogha kwa mundu, ila yanguwesekana kwa Sapanga.”
28Na Petelo akamkonya, “Na twenga, ghuli? Tuleka vindu vyogha tukakukovekela.”
29Yesu akayanga, “Ninguwalongela chakaka mundu alekili lighuta ghaki, au mdala au walongo au walela au wana kwaikiva gha Unkosi wa Sapanga, 30atepokela vindu vitangala lipindi hali lya hinaa na ukomu wa machuwa hyogha bila mwihu kumlima wogha kulipindi lila litehika.”
Yesu angulongela kangi kihu kyaki lihanja lya itatu
Matayu 20:10-19; Maliku 10:32-34
31Yesu akawatola mmbali wala wayitikila ikumi na ivili, akawalongela, “Mhyoghanili. Tunguyenda Yelusalemu na haku kila kindu kiyandikiliwi na walota wa Sapanga kulongela Mwana wa Mundu kitegholeka. 32Kwaikiva ateyeghwa na kukamulwa kwa wandu wawela ng'ogha Wayahudi na weni watemghola uhakata na kumuhunyila mata. 33Watemtova hilatu na kumkoma, ila lichuwa lya itatu atehinduka.”
34Ila hagha wayitikila wamanyili ng'ogha lilando lila, kwaikiva kumamyika kwaki kuwelili kuhighwa kwa weni, hinu weni wamanyili ng'ogha yiwa Yesu awelili akilongela kyani.
Yesu angumlamisa mundu angalimihu
Matayu 20:29-34; Maliku 10:46-52
35Lipindi Yesu paatyanga na kahika pabehi na Yeliko, kuwelili na mundu mmonga angalimihu kalikala mnjila akiluwaluwa wamtangi. 36Mundu angalimihu hayu pakahyoghanila lilowi lya lipinga lya wandu likityanga, akakonya, “Kuvile na kyani?”
37Wala wandu wakamlongela, “Yesu wa Nazaleti angutyanga.”
38Akatova lilowi, akilonga, “Yesu, mwana wa Daudi, uniwoneli luhungu!.”
39Wala wandu walongololili kuulongolo wakamkalipila wakimlongela akotoho kulonga, ila mweni akayendelela kutova lilowi, “Mwana wa Daudi, niwoneli luhungu!.”
40Yesu akagholoka, akawalaghilila wamyeghi mundu yula kwa mweni. Paahikili pabehi, Yesu akamkonya, 41“Ungupalwa nikugholeli kyani?” Na mweni akamyanga,
“Bambu, ninguluwa mbati kulola.”
42Yesu akamlongela, “Lola kukwinila haku kukulamisa.”
43Akawesa kulola lisaa lilalila, akamkovekela Yesu, kunu akimyinula Sapanga. Wandu wogha pawalola ghala, na weni wakamyinula Sapanga.
ទើបបានជ្រើសរើសហើយ៖
Luka 18: NTMbBL2025
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The New Testament in Mbunga @The Word for The World International and Mbunga Language translation, 2025. All rights reserved.
