Yohana 7
7
Yesu na walongu ghaki
1Badili gha mighalu hagha, Yesu atyangili kumahala wekaweka gha kumlima wa Galilaya. Kalema kuyenda ku Uyahudi kwaikiva vilongosi wa haku wapalili kumkoma. 2Hilahila lipindi lya mhambu wa Wayahudi weni kukemwa mhambu wa vibimilo uwelili pabehi. 3Hinu walongu ghaki Yesu wakamlongela, “Uhuki haku, uyendi Yudasia, ili wavulwa ghako wawesi kulola lihengu lyaku lila ungulighola.” 4“Kwaikiva kwahela mundu kangupala kuwela mkola mlima akaghola mighalu ghaki kwa kulihigha, ikiva angupala kuwela mkola mlima ingumpala agholi mighalu ghaki lipalalipala, hinu ujihighilisi kumlimawogha kwa kila ungukighola.” 5Walongo ghaki wailongile nagha kwaikiva pamonga na yiwa weni ni walongo ghaki ila wamkwinilili ng'ogha.
6Ndiwa Yesu akawalongela, “Lipindi lya nenga lyambila kuhika kuyenda haku Yelusalemu, ila mwenga mnguwesa kuyenda lipindi lolosi.” 7Wandu wa mlima wogha hau wanguwesa ng'ogha kuwahyomela mwenga, ila nenga wangunihyomela kwaikiva nenga ninguwalongela chakaka kwaikiva gha matendu ghao mahakata. 8“Mwenga myendi kumhambu hau, nenga ninguyenda ng'ogha kumuhambu hau kwaikiva lipindi lyangu lyambila kuhika.” 9Yesu pakayomola kulongela hagha akahighala kumlima wa Galilaya.
Yesu kumhambu wa vibimilo
10Badili gha walongu ghaki kulongola kuyenda kumuhambu hilahila na Yesu akayenda ila kwa kifisu. 11Lipindi lya mhambu vilongosi wa Wayahudi wawelili wakimuhakula wakikonya wandu, “Kakugha mundu hayu wangumkema Yesu?”
12Amonga gha wandu paghati gha lipinga lya wandu lyeni kuwela pala wakawela wangulipwepa wakilonga, “Huyu mundu kamaha,” na waghangi wakawela wakilonga, “Ng'ogha anguwabyodosa wandu.” 13Hinu kukawela ng'ogha mundu mweni kuwesa kumlongilela kwa lilowi likulunga, kwaikiva wawelili wanguwatila vilongosi wa Wayahudi.
14Mhambu hau pauhika paghati, Yesu akayingila Kulighuta lya Sapanga, akatumbula kuvula. 15Hinu Wayahudi wakalikangasa nesu na kulonga, “Mundu hayu katola kugha mavulo hagha na mweni kayenda ng'ogha kushuli?”
16Hinu Yesu akawayanga, “Mavulo hagha ninguyavula ghanenga ng'ogha ila yanguhuma kwa Sapanga mweni kuniyegha.” 17Mundu mweni kupala kughola ghala angupala Sapanga, atemanya yiwa mavulo ghangu yanguhuma kwa Sapanga au ninguilongela mweni handa mweni. 18Mundu mweni kulongela mweni handa mweni angupala asifilwi mwenibaha, ila yula mwenikupala yula kanilaghila asifilwi, hayu mundu ni mchakaka na ng'ogha mhwangi. 19Ghuli, “Musa kawapegha ng'ogha laghililo? Hata nagha kwahela hata mundu mmonga paghati gha mwenga kakola hagha malaghilo. Kwa kyani mngupala kunikoma?”
20Bahala lila lipinga lya wandu likamyanga, “Uwela na lihoka wenga. Ghani angupala kukukoma?”
21Yesu akawayanga, “Nigholili mkangasu mmonga kulichuwa lya kupumulila na hau uwakangasili mwenga.” 22Musa awapeghili mwenga laghililo lya kuyingiswa jandu wana wa mwenga walumi, kiuchakaka laghililo hali lihuma ng'ogha kwa Musa, ila kwa mambui wa mwenga. Ila mwenga munguyingisa wana wa mwenga jandu hata kulichuwa lya kupumulila. 23Hinu Ikiwela, mundu anguyingiswa jandu lichuwa lya kupumulila lukani laghililo likotoho kutenyulwa, kwa kyani mngunihyomela kwa kumlamisa mundu lichuwa lya kupumulila? 24“Mumtosi mundu kwa chakaka na vila ingupalwa kumtosa.”
Ghuli Yesu ndiwa Kilisito?
25Wamonga gha wandu wa Yelusalemu wakonyili, “Ghuli hayu ng'ogha yula mundu vilongosi wa twenga wangupala kumkoma?” 26Mloli hinaa, angulongela lipalalipala na kwahela mundu kalongela lolosi. Ghuli, inguwesekana vilongosi wangumanya uchakaka yiwa hayu ndiwa Kilisito? 27Kilisito paatehika, “Kwahela mundu atemanya kahumila kugha, ila twenga tungumanya yiwa hayu mundu anguhuma kugha.”
28Hinu, Yesu paawelili anguvula kulyugha lya lighuta lya Sapanga, akalonga kwa lilowi likulunga, “Mwenga mngunimanya na mungukumanya kula ninguhuma. Nenga nihika ng'ogha kwa kuliyegha mweni, ila yula kaniyegha ni wachakaka na mwenga mungummanya ng'ogha.” 29“Ila nenga ningummanya kwaikiva ninguhuma kwa mweni, na mweni ndiwa kanilaghila.”
30Ndiwa, wandu wakahakula kumkola, ila kwahela mundu ayesili kumkamula kwaikiva lipindi lyake liwelili lyambila kuhika. 31Wandu watangala kulila lipinga wamkwinilili, wakalonga, “Ghuli kilisito paatehika ateghola vilangihi vikulunga nesu kupiti havi anguvighola hayu?”
Wagholokela wangulaghilwa kumkamula Yesu
32Mafalisayo wayoghanilili wandu wakipwepa milando hila yeni kumlongelelela Yesu. Hinu, weni pamonga na watambika wakulu wakawalaghila wagholokela wamkamuli Yesu. 33Yesu akalonga, “Nambila niwela na mwenga kwa lipindi mayaghani, na kuulongolo nitehuya kwa yula anilaghilili. 34Mtenihakula ila mtewesa ng'ogha kunilola, na pala mahala nitewela, mwenga mtewesa ng'ogha kuhika.”
35Wakulu wa Wayahudi wakalongelana weni kwa weni, “Mundu hayu ateyenda kugha hata tuwesi ng'ogha kumhakula na kumlola? Ghuli ateyenda kula kumimbwani gha Ugiliki penikuwela wayetu wangulikala na kuwavula Wagiliki? 36Ghuli, hayu kangupala kutulongela niki paangulonga, ‘Mtenihakula ila mtenilola ng'ogha na mahala pala nitewela, mwenga mtewesa ng'ogha kuhika?’”
Milweni gha masi yeni kuyegha ukomu
37Lichuwa lya mwihu lya muhambu hula liwelili lichuwa likulunga. Yesu agholokili kuulongolo gha lila lyugha, akalonga kwa lilowi likulunga, “Mula mweni kuyumilwa ahiki kwa nenga anyweghi. 38Handa iyandikwa ku Mayandiko gha Sapanga, ‘Yula angunikwinila nenga, atewela na uhimbuko wa masi gha ukomu kumoyu ghaki.’ ” 39Yesu alongili nagha akimaanisa Mpumulo wa Sapanga yula mwenikuwela wala wenikumkwinila watempokela kuulongolo, lipindi lila hayu Mpumulo awelili kambila kuhika kwaikiva Sapanga awelili kambila kulangiha ukulu wa Yesu paluagha. kuyinulwa kuukulu.
Wandu wangulekanika kwaikiva gha Yesu
40Wamonga wa wandu kulila lipinga pawayoghanilili milando hai wakalonga, “Uchakaka mundu hayu ndiwa yula mlota wa Sapanga!”
41Wamonga wakalonga, “Hayu ndiwa Kilisito!”
Ila wamonga wakalonga, “Inguwesekana ghuli Kilisito akahumila kumlima Galilaya? 42Ghuli, Mayandiko gha Sapanga yangulongaghuli? Yangulonga, Masihi atehumila kuukolu wa Daudi na atewelekwa ku Betilehemu, mmbwani alikalili Daudi.” 43Hinu, kukahumila mlekanu kukumlongelela Yesu kulila lipinga lya wandu. 44Wamonga wa wandu wapalili kumkamula Yesu, ila kwa hela mundu kayesa kumkamula.
Vilongosi wa Kiyahudi wangumkwinila ng'ogha Yesu
45Kuulongolo wala wagholokela wakahuya kangi kwa watambika wakulu na Mafalisayo, na weni wakawakonya, “Kwa kyani mumkamula ng'ogha na kumyegha Yesu?”
46Wagholokela wakawayanga, “Katu kwahela mundu kawesa kulonga milando handa ailongile mundu hayu!”
47Mafalisayo wakawayanga, “Ghuli mwenga hilahila kawangonga?” 48Ghuli, mungummanya kilongosi yeyosi au Falisayu mweni kumkwinila hayu? 49“Ila lipinga lya wandu weni kumkwinila wangulimanya ng'ogha malaghililo gha Musa, walapilwa na Sapanga.”
50Mmonga wa Mafalisayo awelili Nikodemo yula amyendelili Yesu lichuwa limonga uhiku, na mweni akakonya, 51“Ghuli, malaghilo gha twenga yangutukanisa ng'ogha kumtosa mundu pambila gha kumuhyoghanila huti na kumanya ghala agholile?”
52Weni wakamyanga, “Ghuli wenga hilahila unguhuma kumlima wa Galilaya? Hinaa kalolesi ku Mayandiko gha Sapanga mweni utelola yiwa Galilaya katu kuwesa ng'ogha kuhumila mlota wa Sapanga!” 53Badili gha hagha, wogha wakahuka, kila mundu akayenda ukaya.
ទើបបានជ្រើសរើសហើយ៖
Yohana 7: NTMbBL2025
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The New Testament in Mbunga @The Word for The World International and Mbunga Language translation, 2025. All rights reserved.
