Yohana 5
5
Yesu angumlamisa mundu kulibosi lya Betizata
1Badili gha hagha Yesu akayenda kumbwani wa Yelusalemu kwaikiva gha mhambu wa Wayahudi. 2Haku Yelusalemu, pabehi na mlyango ungukemwa mlyango wa kondolu, kuwelili na libosi lya masi lingukemwa kwa kiebulania Betizata, liwelili litindilwa na mikuta maitano. 3Hamu mikuta muwelili na wavina watangala, wangali kulola na walemafu na wapolili vikongonu. Wawelili wakilindila masi yatimbulilwe, 4kwaikiva lipindi litenu mtumikila wa kundumba wa Sapanga awelili akihuluka mlibosi na kuyatimbula ghala masi na yula mvina wa mtumbulo kuyingila mghati badili gha masi kutimbuka angulama uvina kawela nau. 5Hinu, pala pawelili na mundu mmonga awelili mvina kwa machuva iselasini na inane. 6Yesu paamlolili yula mundu kawonja na akimanya awelili kawela mvina kwa lipindi litali akamkonya, “Ghuli ungupala kulamiswa?”
7Yula mvina akamyanga, “Bambu, nenga nahela mundu wa kunivika ku libosi, masi payatimbulwa lipindi paniyesa kuyingila, mundu ghangi angunilongolela kuyingila mlibosi.”
8Yesu akamlongela, “Ugholoki, ulitwiki lihinda lyaku uyendi.” 9Bwitu hayu mundu akalama, akatola lihinda lyaki akatyanga,
matendu hagha yagholeka lichuwa lya kupumulila. 10Hinu vilongosi wa Wayahudi wakamlongela yula mundu alamisilwi, “Lelu ni lichuwa lya kupumulila, laghililo lingukulekesela ng'ogha wenga kupapa lihinda.”
11Ila mweni akawalongela, “Yula mundu anilamisili ndiwa kanilongela, ‘Ulitwiki lihinda lyaku’ na uyendi.”
12Hinu wakamkonya, “Hayu mundu akulongilili, ulitwiki lihinda lyako uyendi ni ghani?”
13Ila mweni kammanya ng'ogha yula mundu amlamisili, kwaikiva Yesu awelili kahuka kala mahala pala, na hilahila pawelili na lipinga likulunga lya wandu.
14Ila kuulongolo mayaghani Yesu akamlola yula mundu mghati gha Lighuta lya Sapanga, akamlongela, “Hinaa ulama kala, ukotoho kughola sambi kangi, ili ukotoho kuhikilwa na mghalu mghangi mhakata upiti hau.”
15Hayu mundu akayenda, akawalongela vilongosi wa Wayahudi yiwa Yesu ndiwa kanilamisa. 16Wayahudi wakatumbula kumghasa Yesu kwaikiva agholile mghalu hula lichuwa lya kupumulila. 17Yesu akawayanga, “Tati ghangu angughola lihengu lipindi lyogha hata lelo, na nenga ningughola lihengu bila kuleka.”
18Kwaikiva gha milando hagha, vilongosi wa Wayahudi wakahyoma nesu, wakatumbula kuhakula njila gha kumkoma Yesu, ng'ogha kwaikiva atenyulile laghililo lya lichuwa lya kupumulila weka, ila hilahila alongili yiwa Sapanga ni Tati ghaki na hinu kuighola handa Sapanga.
Uweso wa Mwana wa Sapanga
19Yesu akawalongela, “Uchakaka ninguwalongela, Mwana anguwesa ng'ogha kughola lolosi mwenibaha, ila mweni anguwesa kughola lila amlolile Tati ghaki akighola. Kwaikiva lolosi angulighola Tati, Mwana hilahila angughola.” 20Tati angumpala Mwana na angumlangiha kila kindu angukighola mweni baha, kangi atemlangiha mighalu mikulunga na kuighola kupiti hagha na mwenga mtekangaswa nesu. 21Handa vila Tati anguhindula wahovili na kuwapegha ukomu, hilahila na mweni Mwana anguwapegha ukomu wala anguwapala. 22Tati angumtosa ng'ogha mundu yeyosi, ila kamghola Mwana awatosi wandu wogha. 23Ili wandu wogha wapati kumtundamila Mwana handa vila wangumtundamila Tati. Yeyosi mweni kumtundamila ng'ogha Mwana, kanguwesa ng'ogha kumtundamila yula mweni kumlaghila.
24“Ninguwalongela chakaka, yula angulihyoghanila lilando lya nenga, na kumkwinila yula aniyeghili nenga, hayu kana ukomu wa machuwa hyogha bila mwihu, atetoswa ng'ogha, kahubhuka kala kuhuma kukihu na kuyingila kuukomu wa machuwa hyogha bila mwihu.” 25Ninguwalongela chakaka, lipindi linguhika na kangi lihika kala, wala wabhaghulwa kutali na Sapanga wateyoghanila lilowi lya Mwana wa Sapanga, na weni kuhyoghanila, watelama machuwa hyogha bila mwihu. 26Handa vila Tati kawela na makakala gha kuwapegha wandu ukomu, hilahila kamghola Mwana awapeghi wandu ukomu. 27Kangi Sapanga kampegha Mwana ghaki makakala gha kutosa kwaikiva mweni ni Mwana wa Mundu. 28Mkotoho kulikangasa kuhyoghanila hagha, kwaikiva lipindi linguhika wandu wogha wa mmambi wateliyoghanila lilowi lyaki. 29Weni watehinduka na kuhuku kumamambi ghao wala weni kughola matendu maha na kulama, na wala wagholili uhakata watehinduka na kutoswa.
Yesu anguilongela mweni kwa ghala anguyaghola
30Yesu akayendelela kulonga, “Nenga ninguwesa ng'ogha kughola mghalu wowosi weka ghangu. Nenga ningutosa vila nihyoghanila kuhuma kwa Tati, na utoso wa nenga ni wa chakaka. Lukasini lwa nenga ng'ogha kughola nilipala mwenibaha, ila lila angulipala yula aniyeghili.”
31“Ikiva ninguilongela mweni, milando ninguilongela itewoneka ng'ogha yiwa ni gha chakaka.” 32Ila kuwela na mundu ghangi mweni kulongela habali zya nenga kwa mwenga, nenga ningumanya yiwa hyogha ayalongile kwa habali gha nenga ni chakaka. 33Mwenga mlaghilili wajumbi kwa Yohana na mweni kila awalongelili kwa habali gha nenga ni chakaka. 34Nenga nipala ng'ogha kulongelelwa na mundu, ila ningulongela milando hai lukani mpati kulokolwa. 35Yohana awelili handa limbamba liwelili likiyaka na kulangasa mhana, na mwenga kwa lipindi mayaghani mhekelelili mhana ghaki. 36Ila kuwela na mghulu mkulunga nesu weni kulangiha yiwa nenga ni ghani kupiti ghala awelile kalongela Yohana Mbatisa . Mghalu weni ni ghala mahengu anipeghili Tati niyagholi. Hagha hyogha yangulangiha yiwa nenga ni ghani na yangulangiha yiwa Tati ndiwa mweni kunilaghila. 37Mweni Tati aniyeghili kangunilongelela nenga na ghani, ila mwenga mpata ng'ogha kuhyoghanila lilowi lyaki wala kulola vila kawela. 38Mwenga mvika ng'ogha lilando lyaki kumioyu kwaikiva mumkwinila ng'ogha yula amyeghili kwa mwenga. 39Mwenga mnguyangala kuyalolesa Mayandiko gha Sapanga mkiwachila yiwa mghati ghaki mtepokela ukomu wa machuwa hyogha bila mwihu, na mayandiko hagha yangunilongelela nenga. 40Ila mwenga mngupala ng'ogha kuhika kwa nenga ili mpokeli hau ukomu.
41“Lukasini lwangu ng'ogha kusifilwa na wandu. 42Ila ninguwamanya mwenga vila muwela kumioyu yiwa mungumpala ng'ogha Sapanga mumioyu gha mwenga. 43Ila nenga nihika kwa uweso wa Tati ghangu, mwenga mnipokela ng'ogha, ila mundu ghangi paahika kwa uweso ghaki mweni, mtempokela. 44Mwenga munguwesaghuli kunikwinila ikiva mungupala kulisifila weni kwa weni, na mleka kuhakula utundamilu weni kuhuma kwa Sapanga mweni? 45Mkotoho kuliwachila yiwa nenga nitewasitaki kwa Tati. Ila Musa yula mwenga mungumtegemela ndiwa atewasitaki. 46Handa chakaka mungalimkwinila Musa, mungalinikwinila na nenga kwaikiva Musa ayandikile habali gha nenga. 47Ila handa mukwinila ng'ogha ghala ayandikili Musa, hinu mtewesaghuli, kukwinila milando gha nenga?”
ទើបបានជ្រើសរើសហើយ៖
Yohana 5: NTMbBL2025
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The New Testament in Mbunga @The Word for The World International and Mbunga Language translation, 2025. All rights reserved.
