Yohana 19
19
1Hinu, Pilatu akamuhumisa Yesu na kuwalongela watovangondo wamtovi hyatu gha ngosi. 2Watovangondu wakapota likokoma lya mihomi, wakamvika kumutu ghaki, na kumvalisa lihabiti lya sambalau, 3wakawela wanguhika kuulongolu ghaki na kulonga, “Jambu Bambo, wenga Nkosi wa Wayahudi!” Kunu wangumtova kuwuso ghaki.
4Pilatu akahuma panji kangi, akalilongela lila lipinga lya wandu weni kulikungula pala, “Mloli, ningumyegha mundu hayu kwa mwenga ili mpati kumanya yiwa nenga nilola ng'ogha uhakata kwa mundu hayu.” 5Hinu Yesu wakamuhumisa panji wakiwela kavwala likokoma lya mihomi na lihabiti lya sambalau. Pilatu akawalongela, “Mumloli! Mundu mweni ni hayu!”
6Watambika wakulu na wagholokela pawamlola wakatova lilowi. “Umvambi kulipingika! Umvambi kulipingika!”
Pilatu akawalongela, “Mumtoli mwa weni, mkamvambi kulipingika, kwaikiva nenga baha nilola ng'ogha uhakata ghaki.”
7Wayahudi wakamuyanga, “Twenga tuwela na laghililo lya Musa na kukovekelana na lilaghilo hali, angupalwa ahovi kwaikiva alikemili yiwa mweni ni Mwana wa Sapanga.”
8Pilatu pakahyoghanila milando hila, hinu akatila nesu. 9Pilato akayingila kangi mghati gha lighuta ghaki akamkonya Yesu, “Wenga unguhuma kugha?”
Ila Yesu kamyanga ng'ogha lolosi. 10Pilatu akamlongela, “Ghuli, kwakyani unguniyanga ng'ogha? Ungumanya ng'ogha yiwa nenga niwela na uweso wa kukulekesela au kukuvamba kulipingika?”
11Yesu akamyanga, “Wenga uwela na uwesa kunani gha nenga nikwaikiva upeghwa na Sapanga, ila yila mweni kuniyegha haku kaghola hindu ihakata nesu.”
12Hinu Pilatu pakahyoghanila ghala akawela anguhakula njila gha kumlekesela, ila Wayahudi wakawela wangutova lilowi, “Handa ungumuwoposela mundu hayu hinu wenga utewela ng'ogha ghanja wa nkosi wa Waloma mwenikukemwa Kaisali. Mundu yoyosi mwenikujighola yiwa kankosi angumngingama Kaisali.”
13Pilatu pakahyoghanila milando hila akamyegha Yesu panji, akatama kukikalilu kya utoso, pala penikukemwa, “Payandaswa maganga” au kwa kiebulaniya “Gabata.” 14Lichuwa lila liwelili lichuwa lya mayandalilo gha mhambu wa Pasaka. Hinu paihika isaa isita pamuhi. Pilato akawalongela Wayahudi, “Hayu baha Nkosi wa mwenga!”
15Weni wakatova lilowi likulunga, “Umkomi! Umkomi! Mumvambi”
Pilatu akawakonya, “Ghuli, nimvambi Nkosi wa mwenga?”
Watambika wakulu wakayanga, “Twenga tuwela ng'ogha na nkosi ghangi ila Nkosi mkulu wa Loma.”
16Hinu, Pilatu akawapegha Yesu ili wamvambi.
Yesu anguvambwa kulipingika
Matayu 27:32-44; Maliku 15:21-32; Luka 23:26-43
Hinu wakamtola Yesu . 17Yesu akahuma akiwela kapapa lipingika lyaki mbaka kumahala wangupakema, “Lifufu lya mutu.” Kwa kiebulaniya wangukema Goligota. 18Pakahika mahala pala wakamvamba kulipingika, hilahila pala wawavambili wandu waghangi waivili, mmonga na lipingika ghaki mbandi gha liwoku lya kuliyila na mghangi liwoku lya shotu na Yesu akawela paghati ghao. 19Pilatu akayandika litangaso na kulaghila livikwi kunani gha lipingika lya Yesu liyandikilwi, “Yesu wa Nazaleti, Nkosi wa Wayahudi.” 20Hinu kwaikiva pala pawelili pabehi na mmbwani wa Yelusalemu Wayahudi watangala wakawesa kusoma litangaso lila, kwaikiva litangaso lila liwelili liyandikwa kwa luga gha Kiebulania, Kilatini na Kigiliki. 21Watambika wakulu wakamlongela Pilatu, “Ukotoho kuyandika, ‘Nkosi wa Wayahudi,’ ila uyandiki ‘Yula mweni kulikema Nkosi wa Wayahudi.’ ”
22Pilatu akayanga, “Kila niyandika kitehighala handa kiwela.”
23Watovangondo pawayomola kumvamba Yesu, wakatola nguu zyaki, wakazilekanisa kumapinga manjechi, lipinga limonga kwa kila mtovangondo, wakatola hilahila na lihabiti ghaki, lihabiti hali liwelili lifumilwi na kuwela kindu kimonga kuhuma kunani mbaka pahi. 24Hinu, wala watovangondo wakalongilana, “Tukotoho kuibalula, ila tuihinisili gudugudu ili tumanyi yiwa litewela lya ghani.” Mghalu hau ugholekili ili mayandiko yatimili yala yalongili,
“Wapeghanili nguu zya nenga,
na lihabiti lya nenga wakalihinisila gudugudu.”
Hinu ndiwa wagholili wala watovangondo.
25Pabehi na lipingika lya Yesu wawelili wagholoka nyongu ghaki, na nyongu mnung'una wa Yesu, Malia mdala wa Kileopa na Malia kuhuma Magidala. 26Yesu pamwonili nyongo ghaki mahala pala pamonga na yula mvulwa ampalili wagholoka pabehi, akamlongela nyongo ghaki, “Nyongu, uloli, hayu ndiwa mwana ghako.”
27Hinu akamlongela yula mvulwa, “Uloli, hayu ndiwa nyongu ghako.” Na kuhumila lipindi lila yula mvulwa akamtola nyongo ghaki Yesu akayenda nayu ukaya ghaki.
Yesu anguhwega
Matayu 27:45-56; Maliku 15:33-41; Luka 23:44-49
28Hinu Yesu akamanya yiwa kayomola mahengu ghaki gha kuwahumisa wandu kuhuma mlwisa na kuwayegha kumhana akalonga, “Ninguyumilila.”
29Pala pawelili na kyombu kimema divai ikalipa yeni kusasa. Hinu wakavika lidodoki mula mudivai, wakalitumbika mulidengi na kumvikila Yesu kumlomu. 30Yesu pakayomola kuyesa hila divai akalonga, “Itimila kala!”
Hinu, akayinamisa mutu, akahova.
Yesu anguhomwa mgoha mulubafu
31Kwaikiva iwelili lichuwa lya kuyandala lichuwa lya kupumulila, Wayahudi wapalile ng'ogha mihigha ihighali pala palipingika kulichuwa lya kupumulila kwaikiva lichuwa hali ni likulunga nesu kwa Wayahudi. Hinu wakamluwa Pilatu maghulu gha wandu wala wavambilwi yavetulwi na mihigha ghao ihumiswi kuhuma mulipingika. 32Kwa nagha watovangondo wakayenda wakavetulwa maghulu gha mundu wa mtumbula na yula wa ivili wenikuwela wavambwa pamonga na Yesu. 33Ila pawamyendili Yesu wamwonili kahova kala kwa nagha wamtenyula ng'ogha maghulu ghaki. 34Ila mtovangondo mmonga kampoyola mulubafu kwa mgoha, na bwitu ikahuma mwahi na masi. 35Mundu alolili mighalu hila igholekili pala ndiwa mweni kulongelela mghalu hula, angumanya yiwa ghala ayalongile ni chakaka, na mweni angulongela ili na mwenga hilahila mpati kukwinila. 36Mighalu hai igholekili lukani Mayandiko gha Sapanga yapati kutimila, “Kwahela hata mhupa mmonga utevetuka.” 37Kangi kuwela na mayandiko maghangi yenikuyandikwa, “Watemlola yula wampoyolili kwa mgoha.”
Yesu angusikwa
Matayu 27:57-61; Maliku 15:42-47; Luka 23:50-56
38Badili gha hagha, Yusufu, mwenikaya wa Alimatayu, amluwili Pilatu atoli higha wa Yesu. Yusufu awelili mvulwa wa Yesu, ila kwaikiva awatilile watambika wa Wayahudi. Hinu, Pilatu akampegha, nagha Yusufu akayenda kutola mhigha wa Yesu. 39Nikodemu, yula mwenikuwela lipindi litenu amyendelili Yesu uhiku, akahika akiyegha mhanganyu wa manimani na manungilu, yatangala gha kilo iselasini. 40Hinu, wandu hagha waivili wautolili mhigha wa Yesu, wakaubindilila nguu mbuleti gha kusikila pamonga na kuupakala yala manungilu. Handa wasyovelela Wayahudi kukusika. 41Na pala paavambiliwi Yesu pawelile na kitawa na kukitawa kila kuwelile na limambi lya hyonu lisikwa ng'ogha mundu. 42Hinu, wakamsika Yesu kulimambi lila kwaikiva liwelili pabehi na Wayahudi wawelili wakiliyandala na lichuwa lya kupumulila.
ទើបបានជ្រើសរើសហើយ៖
Yohana 19: NTMbBL2025
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The New Testament in Mbunga @The Word for The World International and Mbunga Language translation, 2025. All rights reserved.
