Yohana 15
15
Yesu ni msabibu wa chakaka
1“Nenga ni handa msabibu wa chakaka, na Tati wa nenga ni mtukutula.” 2Kila liputila mghati ghangu lyeni kulema kulela matungula mweni angulihumisa na kila liputila lyeni kulela angulipungulila lipati kulela nesu. 3Mwenga muhululika kala kwaikiva mkwinila mavulo ghangu. 4Muyendileli kulikala mghati gha nenga, na nenga niteyendelela kulikala mghati gha mwenga. Handa vila miputila inguwesa ng'ogha kulela matungula weka ghaki bila kutama kumsabibu, hinu muwesa ng'ogha kughola ghala anguyapala Sapanga bila kulikala mghati gha nenga.
5“Nenga ni msabibu, mwenga ni miputila. Mweni kulikala mghati mwa nenga, na nenga paniwela mghati mwa mweni, hayu ateghola mighalu mitangala gha kumhekelesa Sapanga, kwaikiva pamleka kulikala na nenga mtelepelela kughola chochosi.” 6Ikiwela mundu kaleka kulikala mghati mwa nenga, hayu ni handa liputila lyeni kudangwa na kuyuma na wandu wangulikungula na kulinyanya lyoto na kuyalamika. 7Handa pamkala mghati mwa nenga na milando ghangu ikakala mghati mwa mwenga, hinu myupi Tati chochosi kila mngukipala na mweni atewapegha. 8Hinu wandu watemanya vila Tati ghangu kawela mkulu, kwa mwenga kughola ghala anguyapala Sapanga na mtewela wavulwa ghangu chakaka. 9Handa Tati vila angunipala nenga na nenga hilahila niwapala mwenga, mlikali kwa kulongoswa na upalo ghangu. 10Pamkola malaghilo ghangu mtelikala kuupalo ghangu, handa vila nenga nikola malaghilo gha Tati ghangu na kulikala kuupalo ghaki.
11Hagha niwalongela ili luheku lwa nenga lutami mghati mwa mwenga na liheku lwa mwenga lipati kuwela likulunga nesu. 12Laghililo ninguwalaghila ni hali mpalani mwenga kwa mwenga handa vila nenga ninguwapala mwenga. 13Njila ngulu kulangiha yiwa unguwapala waghanja ghako ni kuhova kwaikiva gha weni. 14Hinu mwenga ni waghanja wa nenga pamteghola yala ninguwalaghila. 15Kwa nagha nenga niwakema ng'ogha mwenga wahusutu ghangu, kwaikiva mtumikila kamanya ng'ogha kila angukighola bambu ghaki. Ila nenga ninguwakema mwenga waghanja kwaikiva niwamanyisa hyogha yala Tati kanilongela nenga. 16Mwenga mnihaghula ng'ogha, ila nenga niwahaghula na kuwayegha myendi kuwaghola waghangi wanikwinili, na wandu hagha wayendileli machuwa hyogha bila mwihu. Na chochosi mkiluwa kwa lihina lya nenga Tati apati kuwapegha. 17Hinu, ninguwalaghila kila mundu na ampali myaki.
Wandu wa kumlimawogha wanguwahekelelela ng'ogha wakwinila
18Ikiwela wandu wa mlima wogha wanguwahekelelela ng'ogha mwenga, mkumbuki yiwa watumbulili kuleka kunihekelela nenga. 19Handa mwenga mngaliwela wandu wa mlima wogha hau, mlima wogha hau ungaliwapala handa wandu ghaki. Mwenga ng'ogha wa mlima wogha kwaikiva nenga niwahaghula kuhuma kumlimawogha, ndiwa kwaikiva mlima wogha unguleka kuwahekelelela. 20Mkumbwiki yala niwalongelili yiwa, “Mtumikila kamkulu ng'ogha kupiti bambu ghaki.” Ikiva wanihakili nenga, watewahakila na mwenga hilahila, na ikiva walikola lilando lyangu, watelikola na lilando lya mwenga. 21Ila hagha hyogha watewagholela mwenga kwaikiva mnikovekela nenga, kwaikiva wammanya ng'ogha yula mweni kunilaghila. 22Ingaliwela nileka kuhika na kulongela na weni, wangaliwela ng'ogha na sambi, ila hinaa wanguwesa ng'ogha kulitetela yiwa wawela ng'ogha na sambi. 23Yula mweni kunihekelelela ng'ogha nenga hayu atemhekelelela ng'ogha na Tati ghangu. 24Handa wangalilola ng'ogha mighalu niigholile yeni kuwesa ng'ogha kugholwa na mundu ghangi, wangaliwela ng'ogha na kunihekelela ng'ogha ila hinaa wayalola niyagholile weni wangulema kutuhekelelela nenga na Tati ghangu. 25Ila hali lihumila lukani kutimila lila lilando kulaghililo lya Musa lyeni kulongela, “Waleka kunihekelelela yaghi.”
26“Nitemyegha Mpumulo kuhuma kwa Tati na mweni atewalangiha kila kya uchakaka. Mpumulo hayu atewatanga na kuwalongela uchakaka weni kunongelela nenga.” 27Kangi na mwenga mtenilongelela kwa wandu kwaikiva niwelili na mwenga kuhuma mtumbulo.
ទើបបានជ្រើសរើសហើយ៖
Yohana 15: NTMbBL2025
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The New Testament in Mbunga @The Word for The World International and Mbunga Language translation, 2025. All rights reserved.
