Yohana 14
14
Yesu ndiwa njila gha kuyenda kwa Tati
1Yesu akawalongela, “Mkotoho kunyengemala. Mngumkwinila Sapanga, munikwinili na nenga hilahila.” 2Ukaya kwa Tati wa nenga kuwela na fyumba fitangala. Handa ingawelili ng'ogha nagha, ningaliwalongela kala, hinaa ninguyenda kuwayandalila mahala. 3Na paniteyenda na kuyandala mahala kwaikiva gha mwenga, nitehuya na kuwatola, ili na mwenga muwesi kuwela pala niwela nenga. 4“Mwenga munguimanya njila gha haku ninguyenda.”
5Tomasi akamkonya, “Bambu, twenga tumanya ng'ogha kula unguyenda, hinu tutemanyaghuli hai njila?”
6Yesu akamyanga, “Nenga ndiwa njila na chakaka na ukomu. Kwahela mweni kuwesa kuyenda kwa Tati ila kwa kupitila nenga. 7Ikiwela mngunimanya nenga, mngummanya na Tati hilahila. Na kutumbula hinaa mngummanya na kangi mumlola kala.”
8Filipu akamlongela, “Bambu, utulangihi Tati hai itetubaka.”
9Yesu akamyanga, “Filipu nilikala na mwenga lipindi lyogha hali, na wenga Filipu uwesa ng'ogha kunimanya nenga? Yula kunilola nenga kamlola kala Tati. Hinu kwa kyani ungunikonya, ‘niwalangihi Tati?’ 10Ghuli, wenga ukwinila ng'ogha yiwa nenga namghati gha Tati, na mweni Tati kamghati gha nenga? Hai milando ningulongela ningulonga ng'ogha handa ningupala nenga, ila Tati angughola lihengu mghati mwa nenga. 11Mngupalwa kunikwinila panilonga nenga namghati mwa Tati na Tati kamghati mwa nenga. Handa ng'ogha nagha hinu mukwinili ghala mahengu ninguyaghola. 12Ninguwalongela chakaka, yula mweni kunikwinila nenga ateghola mighalu hila ninguighola nenga, na ateghola hata makulu nesu, kwaikiva nenga ninguyenda kwa Tati. 13Pamyupa chochosi kwa lihina lyangu, hali nitelighola, ili Mwana amyegheli Tati utundamilu. 14Handa mteniyupa chochosi ku uwesa wa nenga niteghola.
Yesu angulonga atewayeghela Mpumulo wa Sapanga
15Handa chakaka mngunipala mkoli malaghilu ghangu. 16Nenga nitemyupa Tati awayegheli Mpumulo wa Sapanga na hayu atewela pamonga na mwenga machuwa hyogha bila mwihu. 17Mpumulo hayu atewagubutilila wandu uchakaka. Wandu weni kumkanila Sapanga wanguwesa ng'ogha kumpokela Mpumulo hayu, kwaikiva wangumlola ng'ogha, kangi wangummanya ng'ogha. Ila mwenga mngummanya Mpumulo wa Sapanga kwaikiva angulikala pamonga na mwenga, kangi atewela mghati mwa mwenga.
18Panitehuka, nitewaleka ng'ogha weka yenu, nitehika kangi kwa mwenga. 19Lyambila lipindi mayaghani hela wandu wa mlima wogha hau watenilola ng'ogha kangi, ila mwenga mtenilola na kwaikiva ningulama, na mwenga hilahila mtelama. 20Lichuwa lila palihika mtemanya yiwa nenga niwela mghati mwa Tati, na mwenga mwamghati mwa nenga, hilahila nenga mghati mwa mwenga.
21Mundu yula mweni kupokela na kukola malaghililo ghangu, hayu ndiwa angunipala na hayu mwenikunipala nenga Tati ghangu atempala mundu hayu na nenga nitemghola animanyi.”
22Hinu Yudasi, ila ng'ogha Yudasi Isikalioti akakonya, “Bambu inguwesekanaghuli utugholi twenga tukumanyi na ng'ogha wandu wa mlima wogha wakumanyi?”
23Yesu akamyanga, “Mundu yeyosi mweni kunipala atelikovikela lilando lyangu na Tati ghangu atempala, nenga na Tati tutehika kwa mweni na kulikala na mweni.” 24Ila wala wogha weni kunipala ng'ogha watekola ng'ogha kila niwalongilile, na milando nilongilile yanguhuma ng'ogha kwa nenga, ila yahumilili kwa Tati aniyeghili.
25“Niwalongela milando hai nikiwela nambila pamonga na mwenga.” 26Ila Mpumulo wa Sapanga, yula Tati atemlaghila kwa mwenga kulihina lya nenga, ndiwa hayu atewavula na kuwakumbusa hyogha ghala niwelili niwalongela.
27“Ninguwalekela kuponga kweni kuyeghwa na nenga, kulikala kwa kuponga haku ninguwapegha ng'ogha handa kula mlima wogha unguwapegha. Mkotoho kunyengemala kangi wala mkotoho kutila chochosi.” 28Mnihyoghanilili nikilonga, “Ninguyenda, ila nitehuya kangi kwa mwenga.” Handa munganipala mungahekelela kwa vila ninguyenda kwa Tati, kwaikiva Tati wa nenga ni mkulu kupiti nenga. 29Nenga niwalongela mighalu hai hinaa, pambila gha kuhumila chochosi, ili payahumila mpati kukwinila. 30Nitelonga ng'ogha na mwenga mighalu itangala, kwaikiva yula mhakata mweni kulongosa mlima wogha hau anguhika, mweni kahela makakala kupiti nenga. 31Ningughola hagha hyogha handa Tati vila anilaghilile kughola, ili wandu wa mlima wogha wamanyi yiwa ningumpala Tati,
“Hinaa mgholoki ili tuyendi.”
ទើបបានជ្រើសរើសហើយ៖
Yohana 14: NTMbBL2025
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The New Testament in Mbunga @The Word for The World International and Mbunga Language translation, 2025. All rights reserved.
