Luk 8
8
Baat bambaak kienieentsh i Yish
1A mbis akun, Yish kieenaan a mangaan baan’i mal ikaam ishaang’l nswoos musek mu bunyim bu Ntshièm. Bieentsh baan ishieeng baphey bambaak besienieentshaan, 2#Mt 27.55-56; Mak 15.40-41; Lk 23.49.ngwoon baat bieek’dj bambaak baphaan a mieen mibey, kamotsh bambaak bawok busek: Maliy (ambaak baan abok mbel ane Maliy ma Magadala) akun atwoodj mieen mibey shaam’l; 3yek’dj ambaak Yoaan mwam’s a Tshusa, ambaak esabak biket bibol kum Helood; Susaan akol ibiek’dj bamotsh babwiik. Baat bakun bambaak besakel ngun ikaam iyaas Yish akol bieentsh i biket bibaan.
Nkwoon mu nshaang’l a shaang
(Mataay 13.1-9; Maak 4.1-9)
4Bât bambaakiy abol Yish to mal makim. Twoong minen a bât kakwoom’kiin akolaan, Yish kabokaan nkwoon muku:
5“Mbieetsh mangwoon kieenaan ikaam ishaang’l shaang. Esaan ashaang’l, shaang ikieek kabwaakiin a ndieeng a mbok: kayinyak baan mateem i phul kayitwoot’liin. 6Shaang iyiek’dj kabwaakiin a shin a mbôk: ameniin, kalieeng’liin ikaam i mbè shin kayimbaak busek mbi. 7Shaang iyiek’dj kabwaakiin adik di kieeng, kameniin itaang intshiin i minaam, kakoph’tiin minaam mikun. 8Ek shaang iyiek’dj kabwakiin a shin misek; kameniin kamotsh katoyiin ndwoom: naam mukun mumbaak munto ndwoom phweet kam.”
Amanaan atwoot ngwoon, Yish katwootaan angon ane. “Tak mwoot edi mato ikaam iwuok, awok!”
Yish esabobok mikwoon ikaam i yey
(Mataay 13.10-17; Maak 4.10-12)
9Bieentsh kamuul baan Yish ikaam iyeeph mbokesatwoot nkwoon mukun, 10#Yesh 6.9-10 (LXX).Yish kabakal’laan ane: “Bamaabulwoos mbok ayeeph mwooy ma bunyim bu Ntshièm mashwuèy; ek abol bât biek’dj kabia ngwoon mbi. Bikun bes’balwoos ibiin a mikwoon, ikaam i mbè bedi miish kabesamon mbi, bedi mato kabeswook mbi.
Yish esalak nkwoon mu nshaang’l a shaang
(Mataay 13.18-23; Maak 4.13-20)
11“Wokanyeeny mbokesatwoot nkwoon muku: shaang, isalak dweey di Ntshièm. 12Shaang ibwaak’dj a ndieeng a mbok; bât baswok dweey di Ntshièm, ek diabol amwiy ikaam itey dweey di Ntshièm a mitem mibaan antshik lakadj’k ikaam i mbè kabayim’sk kamotsh kabamon’k mwoony mu yoyoo mbi. 13Shaan ibwaak’dj a shin a mbôk, bât besaal mbè bawok dweey di Ntshièm bamadinyey i nshaas; ek dweey di Ntshièm kadisaphik miidj a mitem mibaan mbi, bamwim’s itaang ikieek, ambis akun bamwa yim’s phiim a itaang i maphetsh. 14Shaang isabwaak a dik di kieeng isalak bât besawok, ek besashaam’s itaang a mwooy mabwiik ma shin a maan, a budiy bu shin itaang, ek kayisato ndwoom isek mbi. 15Shaang isabwaak a shin misek, isalak bât besawok dweey di Ntshièm i ntem musek, bamadisuk, banto ndwoom a yiintsh ibaan.
Nkwoon mi mbwoon
(Maak 4.21-25)
16 #
Mt 5.15; Lk 11.33. Mwoot mbè motsh kakwok’dj atieem’s mbwoon ikaam imukwiik a shin a nsheet aal’k a shin ilak mbi. Ek, bamwaak bamutshik a dik di meens, ikaam i mbè bât besaying’l bamon baph’l.
17 #
Mt 10.26; Lk 12.2. “Mwooy makim ma busweem matokatow a baph’l, i mwooy makim ma nkaan matokatow a baph’l kamotsh melaal ka ndieeng a mwaany.
18 #
Mt 25.29; Lk 19.26. “Ngwoon bwaalanyeeny i bwaany a mpwok’liin! Ikaam’i mbè mwoot edi iket, bekamweek kamotsh iyiek’dj; ek mwoot aaph iket, batakantaam’l aal’k bukieek bulaan ibuun.”
Inaan akol babinaan ba Yish
(Mataay 12.46-50; Maak 3.31-35)
19Inaan akol babinaan ba Yish kiy baan bosaan, ek kabamon mbok atwool akolaan mbi ikaam i ntshey a bât. 20Mwoot kalwoosaan Yish ane: “Nyo akol bananyo bayeem a buseph, bedi nyiing amon.”
21Ek Yish kankal’laan ane: “Meey akol banameey, ba besawook dweey di Ntshièm bamaditshik a ikelel.”
Yish aayeem muung munoon’l
(Mataay 8.23-27; Maak 4.35-41)
22Lasu liek’dj, Yish kabanaan a bwaat akol bieentsh baan es’balwoos ane. “Tasaphanyeeny a yaas iku imotsh i idiph.” Kasaph baan. 23Ambaak baan eyeentsh, Yish ambaak abetsh ntweeng. Itaang intshiin, muung munoon’l i maphaak bimatetsh anyiing idiph, maas mamatetsh aying’l a bwaat, bambaak a maphetsh ma iwa. 24Bieentsh kasem’s baan akol Yish besamuum’l i minwool ane: “Ntaang’dj, Ntaang’dj tel’kawa!”
Yish amuumaan, kaphaang’saan muung akol maphaak ma maas; kataam’t biin. Kashaal biin phol. 25Yish kawuulaan bieentsh ane: “Yim’shiin ikwey?”
A butet i baan i makam’l, kadiwuus baan banamieet ane: “Aku mwoot key? Antom’s muung i maas dweey bimamwoom’k!”
Yish esabo mwoot ambaak i mieen mibey
(Mataay 8.28-34; Maak 5.1-20)
26Yish i bieentsh baan antwool baan i bwaat bu baan a shin a Gelaseen a yaas i idiph, bialieens i Ngaleel. 27Yish ankumaan to bwaat, nuung a to bol buku kiyaan a bos bwaan, ambaak i mieen mibey mibwiik. To kaany kambaak adiing mindel mbi kamotsh kambaak abet a mbûl mbi, ek ambaak ambet aphiing a biaan bi midju. 28Amonaan Yish, kabokaan nwool, kabwakaan a bos bu mateemaan, katwootaan i dweey dinoon’l ane: “Usanswoos dweey key, Yish Mwân a Kum a dik? Ndawoong kuntshaak i nyeen mbi!” 29Yish katom’saan mween mubey dweey ikaam i mbè mutow a latok la mwoot aku, mween muku mumampetsh phweet ibwiik. Bambaak bamankaan mio i mikol ikaam insuk, ek ambaak ambat’l misuk miaan i mween mubey mumanaat a mandiy maaph bât.
30Yish kamuwuulaan ane: “Diin dia unyeeny?” Nkakal’l muun ane.
“Diin dieem nde ‘Twoong.’” Ikaam’i mbè, mieen mibwiik mimbaak miayiing’l a mwoot aku to kaany. 31I mieen mibey miku kawoong miin Yish ikaam i mbè kamitom’k a mbieem mitadj yaaph i mom.
32Andaan ibambaak twoong a ngul isaswoot bi bidia a nkwootsh. Mieen mibey kawoong miin Yish ikaam bamitom a ngul. Yish kamitomaan. 33Itaang intow mieen mibey to mwoot aku, kayiing’l miin a ngul. Ngul ikim kawooph’diin mbaang to dik di nkwootsh shaang a ndieeng a maas kaleph’tiin.
34Bât bambaak besabak ngul amwoony baan dweey diku, katshiin baan mbaang, kieen baan i nswoos bos a bol baan’i mal miek’dj ma nkol mukun. 35Bât kieen baan ikaam imon mwooy mankeph’t. Antwool baan akol a Iish, kato baan ataan mwoot akun atieedj baan mieen mibey, ashik a mateem ma Yish pholoo, adiing mindel, kamotsh ambaak i lakeny lasek. Bât bakim kawok baan butet. 36Bât bamwoony mwooy maku makim, kabol baan ntshik mbok atwoodj mween mubey to mwoot i mbok awok’diaan busek. 37Ntshiin bât bakim ba bol bu Gelaseen bamwoony mwooy makun, kalwoom baan Yish ikaam i mbè atow a bol bubaan, ikaam i mbè bambaak i butet bubwiik. Ngwoon, Yish kabanaan a bwaat kieenaan. 38Mwoot akun atieedj baan mieen mibey kawoongaan Yish ane: “Namuk mbè tieniaa.”
Ek Yish kabelaan esanwoos ane: 39“Kal a bol bwaa, welwoos bât bakim mbok amakes Ntshièm.”
Mwoot kieenaan ikaam yelwoos bât ba bol bukim mbok ankes’dj Yish.
Mwân a ngaat abol Yayilo akol ngaat awaam’dj Yish a ndel
(Mataay 9.18-26; Maak 5.21-43)
40Itaang inkal Yish bos a yaas iyiek’dj i idiph, twoong a bât kanyeyiin i nshaas, ikaam bât bakim bambaak besankwoong’l. 41Mwoot iyiek’dj diin diaan Yayilo katwoolaan. Ambaak motsh a bakum ba mbûl a Ntshièm. Kabwakaan a mateem ma Yish kamwoongaan ikaam i mbè yeen a mbûlaan, 42ikaam mbè ambaak i mwân a ngaat amotsh, ambaak i mitshi akolakol i ishieeng miphey, ambaak akolakol iwa.
Itaang imbaak Yish yesheem bos a bol bu Yayilo, twoong a bât kayoliin biaas bikim. 43Imbabaak ngaat yeek’dj i bwaal bu makel to mitshi ishieeng miphey. Ambaak akaph bikim bimbaakaan i biin abol ba ngangabuk, ek mwoot mbè motsh kayeedj mbokamaans bwaal bukun mbi. 44Kasem’saan akol a Yish ambisaan, kamwaam’laan a mindel miaan. Itaang intshiin makel kabat maan. 45Yish kawuulaan ane. “Nyeeny amampwaam’l?”
Bakim katon baan, ek Petelo kanwoosaan ane: “Ntaang’dj, twoong a bât kayiy yayool i mbis i bos bwaa.”
46Ek Yish katwootaan ane: “Mwoot amampwaaml, ikaam i mbè ndawok ngon yatow to miim.” 47Ngaat akun amonaan mbè ane bansol’l. Kiyaan i butet bukim, kabwakaan a mateem ma Yish. Esanwoos a bos bu bât bakim, mbok ambaakaan amwaam’l kamotsh mbok amwokaan busek imbet intshiin. 48Yish kankal’laan ane: “Mwânieem a ngaat; yim’shaa yaphaans. Yaak i nkit’l.”
49Mbok aku mbè Yish ambaak esatwoot kamotsh, ntom motsh a ben a mbûl a shinangoong kiyaan to bol kum Yayilo, kalwoosaan mwoot aku ane: “Mwânaa amawa,” “lieem’l akas adiaak Ntaang’dj i nyeen.”
50Ek Yish kamwookaan, kalwoosaan Yayilo ane: “Kwaal’k i butet mbi, yim’s bukal, mwânaa aphakaphaan.”
51Itaang intwool Yish a mbûl a Yayilo, kalwoong ikaam iying’l i mwoot mbè motsh mbi, atey Petelo, Yoon, Shaak akol ishaan a mwân i inanaan babol mwân a ngaat. 52Bakim bambaak besalel kamotsh bamwaaph idik di mwân. Yish kabalwoosaan ane: “Kabulel’k mbi. Mwân kaweedj mbi, abetsh ntweeng!”
53Ek bât kansèy baan, ikaam bambaak besayeeph ane mwân amawa. 54Ek Yish kayaataan mwân a lo, katwootaan i dweey dinoon’l ane: “Ilieeng a ngaat, wuum a shin!” 55I lakeny kiy luun ikadj, mwân kawuumaan itaang intshiin a shin. Yish kabalwosaan ikaam bamweek bishim. 56Babotsh baan kakam’l baan, ek Yish kabakinyaan ane kabulwoos’k mwoot mbè motsh mwooy mankeph’t mbi.
ទើបបានជ្រើសរើសហើយ៖
Luk 8: KPBT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
