Luk 7

7
Yish esabo nso abol kum mayol ato Loom
(Mataay 8.5-13)
1A mbis a mbè Yish aman mbokalwoos twoong a bât imbakamwom’k, Yish kieenaan bos a Kapenum. 2Andwoon, ambabaak kum yeek’dj a mayol, ambaak i muna ngunaan ambakaan amuk bwiik; muna ngun ambaak i bwaal bunoon’l bu iwa. 3Awok’dj kum mayol besatwoot dweey di Yish, kantom’saan bakom’l bakieek ba to Yuud ikaam imwoong mbokabo muna ngunaan. 4Antwool baan akol a Yish kamwoong baan a ngon ane: “Tes’kalwoom mbè ungaas. Mbok mintshiin esaan alwoom. 5Ikaam’i mbè esamuk bol bwiit, ntshaan amataphik’s mbûliit a Ntshièm.”
6Ngwoon Yish kieenaan i baan. Antwoolaan akolakol, kum mayol katomaan bambey baan ikaam inwoos ane: “Kum, kuwaak i nyeen mbi. Kandesayeem’l ikaam i mbè uyiing’l a mbûlieem mbi, 7ntshiin akun ambel miim mbokiy a bol bwaa. Ek twoot dweey dimotsh ikaam i mbè muna ngunieem awok busek. 8Minamieet ndesatuk mikieetsh mi bakum bieem kamotsh ndedi mayol mel a shin mikieetsh mieem. Mbè nalwoos imotsh ane: ‘Yaak!’ El’kieen; mbè nalwoos iyiek’dj ane: ‘Ya!’ El’kiy, kamotsh mbè nalwoos mun’a ngunieem ane: ‘Kel ngo!’ Es’kakel.”
9Yish awok’diaan mwooy maku, kakam’laan bwiik idik di kum mayol. Kakaph’diaan bos a twoong’a bât ambakienaph ane: “Ndes’bulwoos anu kanatshikamon yim’s imbot aku mbi, aal’k akat Isaleel mbi!”
10A mbis akun, bantom kakal baan a mbûl abol kum mayol, katobaan ataan mun’a ngun busek.
Yish esabuum’l mwân a nuung abol ngaat a ngweel to iwa
11Aphieen akun, Yish kieenaan bos a bol bu Nayin; bieentsh baan i twoong a bât bambabaakiaan. 12A itaang insem’s baan akol ikwiik i mabieen ma bol buku, ambabaak bât besilaatsh ndju ikaam imuley, ambaak mwân a nuung motsh abol ngaat a ngweel. Ntshey a bât babwiik ba bol buku bambabaakiaan. 13Amamon Kum, mweeng mumangaat kalwoosaan ngaat a ngweel ane: “Kulel’k mbi.” 14A mbis akun kasem’saan, kawam’laan ital; bât bambaakienaatsh kayem’t baan. Yish katwootaan ane: “Ilanuung, ndes’kalwoos mbè, wuum a shin!” 15Ilanuung kawuumiin, katetshiin mbok atwoot itaang intshiin. Yish kamwekaan inanaan.
16Bakim kawook baan butet; kasem’l baan Ntshièm bietwootsh ane: “Ngaang a Ntshièm anen asol aphingiit; kamotsh Ntshièm anyiyaas bât baan!”
17Yudey mikim akol mangaan ma kolakol kawok baan nswoos mu Yish.
Bantom ba Yoon Mubatiis
(Mataay 11.2-19)
18Bieentsh babol Yoon kabos baan ntang’dj mubaan ntshik mukun mukim. Yoon kabokaan bieentsh baphey mbel 19kabatomaan abol Kum ikaam imuul mbè ane: “Ntshween weliy mbè key telakwoong mwoot yeek’dj?”
20Antwool baan akol a Yish, kanwoos baan ane: “Yoon Mubatiis amakatatom ikaam iwuul mbè ane, ntshween weliy mbè key telakwoong mwoot yeek’dj.” 21Itaang ikun intshiin, Yish kabowaan bât babwiik bambaak i maal, akol bitwiim, kabateyaan mieen mibey, bambaak i miish mawa kamon baan. 22#Yesh 35.5-6; 61.1.Ngwoon, kakal’laan bantom ba Yoon ane: “Yaak anyeeny bwelwoos Yoon bimon bwiin akol bi bimwook bwiin ane: bât baaph i miish bamon, bitwiim biayem’t, ben badj banwook busek, babieel bashaam’dj, bât baaph i mato besawok, midju miabuum to iwa, ben a ntaan bawok lashaang lasek. 23Nshaas mwaal abol mwoot akun mbè kensambok miaang mbi!”
24Amween bantom babol Yoon, Yish katetshaan mbok alwoos twoong a bât dweey di Yoon ane: “Bumwem bos imbet yaaph bât ikaamiemon yey? Ikaam ilieen ntet’l mus’baan anyiing abol muung, mbè mbony? 25Ek buniphiemon key? Mwoot adiing mindel miseke? Ek bakun besadiing mindel mi ngaang besatwoos ka mambet masek bantwoos’k kamotsh a ngat a mambûl ma bakum! 26Ek buniphiemon key? Ngaang a Ntshièm mbè? Ikakaam, ndes’bulwoos mbè ane, aan wey alek ngaang a Ntshièm. 27#Mal 3.1. Ikaam’i mbè idik di Yoon aphuun’dj baan ane: ‘Ndekatom antom i mikieetsh a bos bwaa, ikaam ilodj mbok.’ 28Ndes’bulwoos mbè ane: “Andieeng a bât babotsh’dj baan abol baat, kabatshik abot mwoot anen ngo Yoon mbi; ek mwân ankieek a bunyim bu Ntshièm wey alek Yoon bunen.”
29 # Mt 21.32; Lk 3.12. Bât bakim bambaak besawoom’k Yish, aal’k bakweek minaam awok’dj baan mwooy makun, kayim’s baan ane Ntshièm wey akwook, kabataam’s baan abol Yoon. 30Ek baphal’s i bayeeph mikieetsh kabel baan imuk i Ntshièm kamotsh kabel baan ikaam iditaam’s abol Yoon.
31Yish katwootaan kamotsh ane: “Ndes’buwuul mbè ane, bât ba nkil muku besaphwaans i nyeeny? Bemun banyeeny? 32Bemuna bân bakieek bashik a imbwoom, besabok bakidj ba baan bietwootsh ane: ‘Tabubiees ngom i nshaas, ek kabusamin mbi. Tabuyeem’s ntshieem i mashièy kabusalel mbi!’ 33A ntwootsh’dj misek, Yoon Mubatiis amwiyaan, kambaak adia diaamp, kambaakony maan, kanwool bwiin ane: ‘Edi mween mubey!’ 34Mwân a Mwoot amwiyaan, kadiawaan kamotsh kanyowaan, kanwool bwiin ane: ‘Lienanyeeny mwoot aku idièy inen, inywey inen, nkidj bakweek minaam baan’i bakedj a mwooy mabey!’ 35Ek bakim bamwim’s bwaany bu Ntshièm besayieeph ane bu bukwokwook.”
Yish abol Simoon Muphal’s.
36Lasu liek’dj muphal’s kabokaan Yish mbel ikaam idiayaan. Ngwoon, Yish kieenaan a mbûl abol muphal’s, kashim’kaan a meens ikaam idia. 37#Mt 26.7; Mak 14.3; Yn 12.3.A bol bukun, ambabaak ngaat nkedj a mwooy mabey anen. Amwookaan ane Yish esadia a mbûl abol muphal’s, kiyaan i nwoon muyool tô i mananaansh ma ngaang a ngat 38kayem’taan ambis a Yish, a mateem maan. Ambaak esalel yenyok’s mateem ma Yish i bios’dj biaan; ambis akun abinum’l i phu yaan, anyut mateem ma Yish, amankol mananaansh. 39Mufal’s ambaak abok Yish mbel amonaan ngwoon, katwotaan a ntemwaan ane: “Tshik mbè mwoot aku aal ngaang a Ntshièm akwokwook, anaph’kayeeph mbè ane ngaat key aku esampwaam’l, ankasayeeph kamotsh ane ngaat aku amampwaam’l, wey ambey!”
40Yish kalwoosaan Simoon ane: “Simoon ndedi dweey dilwoos.” Simoon kankal’laan ane.
“Ntaang’dj ndwoos i diin.”
41Yish katwootaan ane: “Mwen bungangaang ambaak i ben a mbatiaan baphey; motsh anaph’dj kamweek phas kam itaan imbaak i ngaang abwiik, iyek’dj phalaang masataan. 42Mbok aku mbè mpween mubaan kabambaak i phas imweek mbi; ngwoon, kabawok’saan mweeng. Mwoot key a mpween mubaan elabomuk bwiik?”
43Simoon kakal’laan ane: “Ndesabok lakeny mbè ane, wey akun edi mbat abwiik.”
Yish kanwoosaan ane: “Wasuw.” 44A mbis akun kakaph’diaan bos a ngaat, kalwoosaan Simoon ane: “Wamon ngaat akuwe? Namaying’l abol bwaa, kumpieek’dj maas mawool’l mateem mieem mbi. Ek aan, amampwees mateem i bios’dj biaan kamotsh abinum’l i phu yaan. 45Ween kuntshieedj muna nkidiaa mbi, ek aan to taan amwing’l miim ayè, kesalèy mbokanyuut mateemieem mbi. 46Ween kunkoodj sedj a ntshwey mweem mbi, ek aan amankol mananaansh a mateemieem. 47Ntshiin es’miim alwoos mbè ane, bweph bwaan bukim ndabudim’s, ikaam i mbè alak imuk ibwiik. Ek mwoot akun es’baan awok’s mweeng mukieek esalak imuk ikieek.”
48Yish kalwoosaan ngaat ane: “Bweph bwaa bwashil.”
49Bât bambaakiaan a meens katetsh baan mbokatwoot banamieet ane: “Mwoot key aku esadim’s bweph?”
50Ek Yish kalwoosaan ngaat ane. “Yim’shaa yaphaans, yaak i nkit’l.”

ទើបបានជ្រើសរើសហើយ៖

Luk 7: KPBT

គំនូស​ចំណាំ

ចែក​រំលែក

ចម្លង

None

ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល