Luk 2
2
Mibotsh’dj mi Yish
(Mataay 1.18-25)
1A matu makun, Kayis Ogust kum anen a ben a Loom kabokaan nkieetsh ane, bât bakim badiphuuns miin a shin mikim a Loom. 2Aku, ambaak phweet bukoos adiphuuns miin, a itaang imbaak, Kilinis nguph’lanoph a Suliy. 3Bât bakim bamayeen ikaam iphuuns miin mabaan, mun mwoot ilwootshaan.
4Ngwoon, Yosef iyaan, amatow a bol bu Nazalet, a nuung mu Ngaleel, kieenaan a Yudey, a Betelephem, a imbet ibotsh’dj baan kum Davidj; ngwoon, iyaan ambaak mun ilwootshaan. 5Yosef kieenaan i yeek’liaan Maliy, ikaam adiphuuns miin, Maliy, ambaak i dieem, 6ambaak baan a Betelephem, matu ma ibotsh kayeem’l maan. 7Kabotaan mwânaan bukoos a nuung, kankophaan bishaan, amambey a idieel i nyam, ikaam i mbè a mbûl a bientshambaang kayimbaak imbet mbi.
Bantshol basos babek ba phaang
8A yaas ikun intshiin, imbabaak babek ba phaang, bashik a buseph, besabak phaang ibaan butu. 9Phweet mintshiin ntshol abol Kum kasolaan akol a baan, buum bu Kum bumabangaam’s, bamanwook butet bubwiik, 10ek ntshol kabalwoosaan ane: “Kabutshiin’k mbi, ikaam namanyi bulaas nswoos musek mulayeek bât bakim nshaas mubwiik. 11Butu bulwool, a bol bu Davidj bamabubos Phaans; ntshaan Kilist Kum! 12Lieen anyeeny ying’t yil’bwiin ato nyeeph: butokatotaan, mwân akoph bishaan, abetsh imbet isadia nyam.”
13Phweet mintshiin, twoong mayol ma to dik, kakwoom’kiin i ntshol, besasem’l Ntshièm besietwootsh ane:
14“Buum bwaal abol Ntshièm a dik,
i nkit’l mwaal a shin a maan abol bât besaan amuk!”
15Bantshol antobaan ikaam ikal a dik, babek ba phaang kadilwoos baan ane: “Tieen anyeeny a Betelephem, tielieen dweey diku dinkeph’t, dimwitalwoos Kum.”
16Ngwoon kieen baan bwaas, katobaan ataan Maliy baan’i Yosef, i mwân abetsh a idieel i nyam. 17Amon baan mwân, katetsh baan abol ntshik mumbaak ntshol abalwoos idik di mwân aku. 18Bât bakim bawok’dj mwooy mambaak babek ba phaang besatwoot, kakam’l baan. 19Ek Maliy ambaak asuk mwooy maku makim a ntemwaan kamotsh ambaak ambok lakeny labwiik a ntem. 20A mbis akun, babek ba phaang kakaal baan. Katetsh baan asem’l bunen bu Ntshièm, ikaam i mwooy makim mawok’dj baan akol ma mamwoony baan, mbok abalwoos’dj ntshol.
Yish anyey diin diaan
21 #
Lew 12.3; Lk 1.31. Amweem’l matu inaan ambis ibotshaan, itaang kayeem’liin ikaam ikel mwân nkaan, kamweek baan diin ane Yish, mbok mintshiin atwoot’dj ntshol a bos bu mbè inanaan kataadiy dieem mbi.
Yish banak a Ntuum mu Ntshièm
22 #
Lew 12.6-8. Matu amweem’l maan ikaam i mbè Yosef baan’i Maliy badikut’l, mbok ambaak nkieetsh mu Moos. Kaphet baan i mwân a Yelushalem ikaam inak abol Kum, 23#Eks 13.2; 12.ikaam baphuun a nkieetsh mu Kum ane: “Mwân a nuung aku nkim a bukoos, bel’kanièm’l abol Kum.” 24Banaph’dj kalièm’l kamotsh ilaam mbok mintshiin ambaak nkieetsh mu Kum musalwoom, bimbieeng biphey bi bwaany, aal’k bân baphey ba bimbieeng.
25Ambabaak nuung maphel a Yelushalem, diin diaan Shimeoon; ambaak mwoot ansek a miish ma Ntshièm, ambaak antshin Ntshièm. Imbaak esakwoong’l mishaang’l mu Isaleel. Mween Musek mumabaakiaan 26Mween Musek kanwoos muun ane, ween kulawa aaph mbè kumwoony Kilist mwân a Kum mbi. 27Shimeoon kieenaan a Ntuum a bunoon’l Mween Musek. Itaang imbaak babotsh ba Yish banyiyaan ikaam iyeedj nkieetsh mu Moos, 28Shimeoon amansheetsh mwân a mio, kasem’laan Ntshièm, katwootaan ane:
29“Kum, iphontshi wayeedj ilakiaa,
ukwook’dj alieem’l muna ngun mwaa awa a nkit’l.
30Ikaam’i mbè miish mieem mamon mwoony mwaa,
31mwoony mumbaakween walodj a bos bu bât bakim:
32 #
Yesh 42.6; 49.6; 52.10. Muun mwaany mulalak a malwootsh makim,
mulaal buum bu bât baa ba Isaleel.”
33Ishanaan baan’i inanaan bambaak besakam’l ikaam mwooy mambaak atwoot Shimeoon idik diaan. 34A mbis akun Shimeoon amabashaak’s, kalwoosaan Maliy inaan abol Yish ane: “Mwân aku abwekabwees kamotsh ankat’l bât babwiik a Isaleel. El’kaal ying’t i Ntshièm ilaswoot miaang aphiing a bât 35kamotsh atshikatshik a baph’l bwaany bwaswaam a mitem mi bât babwiik. Ek ween Maliy, susudj yil’kakweet a ntem muna mbaam mu ituum.”
36-37Ambabaak ngaang a Ntshièm mu ngaat, diin diaan ambaak Ane, mwân abol Fanwel, nshi ilwootsh ibol Ashey. Ambaak inun, ambaak ashaal mitshi shaam’l i nwimiaan ato bulieeng bwaan, ambis akun amashaal ngweel suk mitshi masa inaan biney. Kambaak atow a Ntuum mbi; ek ambaak ankes Ntshièm ngun butu i mwaany, ankin biliees kamotsh anwoom Ntshièm. 38Itaang ikun intshiin antwoolaan, katetshaan asem’l Ntshièm. Ambaak anwoos bât bakim dweey di mwân, baku bambaak besakwoong’l mbè Ntshièm aphaans Yelushalem.
Babotsh ba Yish bakal a Nazaleet
39 #
Mt 2.23. Amaans’dj Maliy i Yosef mwooy makim ma mikieetsh mi Kum, kakal baan bos a nuung mu Ngaleel, a bol bu baan bu Nasalet. 40Mwân ambaak esienaang a latok baan’i lakeny. Ambaak ayool tô i bwaany, i mweeng mu Ntshièm mumabaak a dik diaan.
Yish a Ntuum
4141 #Eks 12.1-27; Dtn 16.1-8.Mun ntshi mukim, babotsh ba Yish bambaak bamween a Yelushalem ikaam i nshaas mu Pasak. 42Yish amwediaan mitshi isheeng miphey, kaphet baaniaan bos a Yelushalem mbok mintshiin ankel’k baan a bol baan idik di nshaas mukun. 43Anshil matu ma nshaas, kakal baan, Yish, mwân a baan kashalaan a Yelushalem; ek babotsh baan kabambaak ayeeph mbi; 44bambaak besaphis mbè ane, Yish elaphiing a bât bambaak i baan a mbok a lieen. Iphontshi katetsh baan answoot aphiing ilwootsh i bakidj baan lasu la ibwoon’k. 45Ek kabamon mbi. Ngwoon, kakal baan bos a Yelushalem ikaam inswoot. 46A mbis matu maset, katobaan antaan a Ntuum, ashik aphiing bayeeph mikieetsh, es’bawoom’ka kamotsh amabawuul miwuul. 47Bât bakim bambaak besamwoom’k, bambaak besakam’l ikaam i lakeny laan, i mbok ambakaan bakal’l. 48Babotsh baan amabaan amon, bamakam’l; inanaan amamuul ane: “Mwânieem, umatakel ngo iyey? Ishô i miim taswoot i yiintsh ibwiik.”
49Amabawuul ane: “Bumbanswoos key? Kabusayeeph mbè ane, ndel’kaal a mbûl a Tatieeme?” 50Ek kabawok mbok ambaakaan abalwoos mbi.
51Yish kakalaan i baan a Nazalet. Ambaak amabawom’k. Ek inanaan amaasuk mwooy maku makim a ntem mwaan. 52#1 Sam 2.26; Mik 3.4.Yish amanaang. Yenaang’tsh a bwaany, yewoodj butadj, ambaak mwoot ansek a miish ma Ntshièm akol miish ma mwoot aku nkim.
ទើបបានជ្រើសរើសហើយ៖
Luk 2: KPBT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
