Luk 13
13
Akal’l bikelel’l bibey mbè bukal awa
1A itaang ikun inaa, ibambaak bât biek’dj aphiing baan kiy baan ibos Yish ntshik mbok ambaak Pilaat adiaak ben a Ngaleel itaang imbaak baan alieem’l minaam abol Ntshièm. 2Yish kabakal’laan ane: “Busabok lakeny ane ben Ngaleel baku badiaak’dj baan, bedi bweph bwalek bât ibiek’dj bakim ba Ngaleel, ikaam i mbè bamon maphetsh mangwoone? 3Ndes’bulwoos mbè mbi! Ek, mbè kabusamuk akal’l ntwoong’liin mibey mbi, buwakawa bakim mbok mintshiin. 4Mbok mintshiin i bât baku ishieeng inaan baweedj a shin ibieen i mbûl itadj i Silow, busabok lakeny ane bambaak bât babey baalek bakim bel a Yelushalem? 5Ndes’bulwoos mbè mbi! Ek, mbè kabusamuk akal’l ntwoong’liin mibey mbi, buwakawa bakim mbok mintshiin.”
Nkwoon mu ntey mwaaph’i ndwoom.
6Yish kababok’saan nkwoon muku: “Mwoot ambaak i ntey mu fiink muwoonydiaan a ngwoon a nviny. Amwiyaan iswoot ndwoom, kamon mbi. 7Iphontshi, kalwoosaan mun a ngun mu ngwoon a nviny ane: ‘Lieen, bisho biset biashaam, namwaak namwiy ikaam iswoot ndwoom a ntey muku, kanamon’k mbi. Musheeng anyeeny! Musadia indiy i bukal idik di yey?’ 8Ek mun a ngun kankal’laan ane: ‘Ntaang’dj, man mulieem’l ntshi muku kamotsh; ndel’katshim a mashin ma muun, nambok biket. 9Ngwoon, phweetiek’dj mutokato ndwoom, mbè bukal umamusheeng.’”
Yish abo ngaat ikuny lasu la Nsabat
10Lasu lamotsh la Nsabat, Yish ambaak esalwoong’s a mbûl a Ntshièm. 11Andwoon, ambabaak ngaat a ntshak i bwaal aakel bisho ishieeng inaan, ambaak ikuny, kambaakamon bwaany busheem’t mbi. 12Yish amonaan ngaat akun, kambokaan mbel esanwoos ane: “Ngaat, bwaal bwaa bwashil!” 13Ngwoon, kanyeengaan mio miaan a latok laan, itaang ikun intshiin, bwaal kashil buun, kasheem’taan katetshaan mbok asem’l Ntshièm. 14#Eks 20.9-10; Dtn 5.13-14.Ek kum a mbûl a Ntshièm kawokaan kaph ikaam Yish abo mwoot lasu la Nsabat. Kalwoosaan twoong a bât ane: “Matu me mashiaam’l ikaam ikel ngun; iyanyeeny budibo matu makun, ek lasu la Nsabat mbi!”
15Kum kabakal’l ane: “Bu bât ba mas maphey! Lasu la Nsabat, mwoot aku nkim kantieek ngweemiaan a nkoph ikaam inyoos maase. 16Ek ngaat aku, ntshwakaan abol Abalapham, ankaan baan abol sataan andieeng mitshi ishieeng inaan, kabimbaak’dj busek antuung’l a mwaan muku lasu la Nsabate?” 17Itaang imbaakaan esatwoot ngo, bashaang’dj kawok baan busony bubwiik; ek twoong mikim imbaak i nshaas ikaam i mwooy masek mambaakaan akel.
Nkwoon mu lashaang la ntey mu mutaal
(Mataay 13.31-32; Maak 4.30-32)
18Yish kawuulaan ane: “Bunyim bu Ntshièm busaphwaans i yey? Nakwok’dj buphwaans i yeye? 19Bumun lashaang la mutaal lakieek, lantol baan abol mwoot alabok a ngwoonaan: lamen, lampil ntey munen, i phul insol mayaantsh a phak i muun.”
Nkwoon mu lweven
(Mataay 13.33)
20Yish katwoot kamotsh ane: “Bunyim bu Ntshièm busaphwaans i yey? 21Busaphwaans i lweven lantol baan abol ngaat a ntshak antuph’s i phuuph abwiik a budit’l bu mashaphey shaam’l, suk elaphet ntok mukim.”
Ikwiik ikieek
(Mataay 7.13-14; 21.23)
22Yish ambaak esiebwing a maal baan’i mangaan, yelwoong’s kamotsh yenieentsh bos a Yelushalem. 23Mwoot kamuulaan ane: “Kum, bât bakieek babel aphaane?”
Yish kabakal’laan ane: 24“Kelanyeeny mbok mikim ikaam iying’l a ikwik ikweek; ikaam, ndes’bushaak’s mbè, babwiik bakiekakieek mbokaying’l ek kabelayeedj mbi. 25Itaang ilakat kum a mbûl, elaan kaang ikwiik i seph, bulaal ka buseph, butekatetsh mbokakum a ikwik buntwoot ane: ‘Kum, tadiph’s ikwiik i mbûl!’ El’kabukal’l ane: ‘Kandesayeeph kotsh es’bwiniy mbi!’ 26Ntshiin, bwiin bunwokanwoos ane: ‘Tamadia kamotsh tanyo yaa, umalwoong’s a mioong’l mi mal miit!’ 27#Ntm 6.8.El’k bukal’l kamotsh ane: ‘kandasayeeph kotsh es’bwiiniyi mbi. Tow anyeeny akolieem, bwiin bakedj a mwooy mabey!’ 28#Mt 22.13; 25.30.#Mt 8.11-12. Ntshiin itaang yil’bwiin alel kamotsh bumadisum’s miin, itaang yil’bwiin amon Abalapham, Isaak, Yakob akol bangaang a bunyim bu Ntshièm, ek andaan bwiin babuphul a buseph! 29Ntshey a bât bel’kiy to matwoodj ma itaang baan’i makit’l ma itaang, to tieen baan’i ngèl banshim’k i Ntshièm a nshaas mu bunyim bwaan. 30#Mt 19.30; 20.16; Mak 10.31.Ngwoon, ibiek’dj bel a mbis, bel’kaal ba ba bukoos, kamotsh ba ba bukoos, bel’kaal ba ba mbis.”
Yish esalel idik di Yelushalem
(Mataay 23.37-39)
31A itaang ikun, bafal’s bakieek kasem’s baan akol a Yish besanwoos ane: “Tow a imbet iku, yaak a kotsh iyiek’dj ikaam Elood esaswoot mbok adiaak.”
32Yish kabakal’laan ane: “Yaakanyeeny bwelwoos ngieeng mukun ane: ‘Ndesabieeng mieen mibey kamotsh nambo bât alwool baan’i phieen, lasu lanseet namaans ngun mweem.’ 33Ek, alwool aku ndel’kakel ngun mweem, aphieen baan’i lasu lakun lamotsh, ikaam kabisayem’l mbè ane badiaak ngaang a Ntshièm a indiy yek’dj yaaph mbè ka Yelushalem mbi.
34“Yelushalem, Yelushalem, ween usadiaak bangaang ba Ntshièm kamotsh undiaak bât bantom baan abol Ntshièm i mbôk! Phweet mbadikey inaaph’miim akweek bân akolieem, mbok mintshiin amwaak kok ankweek bân baan a shin a maam maan, ek ween kumuk’dj alwoong mbi! 35#Ntm 118.26; Yel 22.5.Lieen, mbûliin ilashaal bwaang. Ndes’bulwoos mbè: ‘Kabulakas ambon shaang lasu leliy itaang yil’bwiin atwoot ane: “Ntshièm ashak’s mwoot eliy a diin di Kum!’”
ទើបបានជ្រើសរើសហើយ៖
Luk 13: KPBT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
