Malukusa 9
9
1Yesus okwa twikila ko ta ti, “Oshili, andi mu lombwele, opu na yamwe yomumba ya fikama mha, ihaa si, mhanga inaa mona ouhamba waKalunga ta wuuya neenghono vao.”
Yesus ta lunduluka
(Mateusa17:1-13; Lukasa9:28-36)
2Omasiku yahamano nhyi ya pita po, Yesus okwa kufa Peetulusa, Yakopo naYohanesa, ndee okwe ya fala kondudu ondeka, ye ke ikalela. Manga ye li ngho, Yesus okwa lunduluka monhaneho yawo, 3ndele noikutu yaye oya avima yatoka tootoo, nokombada yevu kaku na nande omunhu ta vulu oku yi tokifa. 4Ndele aalongwa mba yatatu oya mona Elia naMoses taa popi naYesus. 5Peetulusa okwa lombwela Yesus ta ti, “Mulongi, poima mha opwe tu opalela okukala. Atu ka vika po omatwali yatatu, limwe olyoye, limwe olyaMoses nalimwe olyaElia.” 6Peetulusa nayakwao oya li ya tila neenghono, na kali eshii nhyi e na okutya.
7Oshikoo oshe ya ndele ashi ya siikile, nomoshikoo nhyo omwa za ewi lya ti, “Ingu oye Omonamati Wange Omuholike, mu uveni!”
8Ndele viyaviya nhyi ya keyauka, kaya li ye wete po ali umwe, oYesus ike e li nayo.
9Ndele nhyi ya li taa londoloka kondudu, Yesus okwe ya kumaiva, opo inaa popya nande okomunhu nhyi ya mona, mhanga Omonamati wOmunhu ina umuka kousi.”
10Oya tambulako elombwelo ndyo, ndele oya kala taa pulafana kombiga yokuumuka kousi nhyi ashi ti. 11Oya pula Yesus ya ti, “Omolwashike aalongimhango taa ti kutya Elia ote ke ya tango kuKilistus?”
12Yesus okwe ya yamukula a ti, “Eeno, Elia ote ya tango, ye ta longekiva ayihe. Ndele ongeepi hano, Omonamati wOmunhu a shangwa kutya oku na okuhepekwa omahepeko omendji nokwaanywa? 13Ndele andi mu lombwele, Elia okwe uya, ndele oye mu ningila kehe nhyi ya li ya hala okumuningila, nganhyi sha shangwa momishangwa.”
Yesus ta yeluva omumati ena omhepo ya kaka
(Mateusa17:14-20; Lukasa9:37-43)
14Ndele Yesus naPeetulusa, naYohanesa naYakopo nhyi ye ya kaalongwa yakwawo, oye ya hanga ye li mokati kaanhu oyendji, naalongimhango yamwe oya li taa tu eemhata nayo. 15Aanhu nhyi ya mona Yesus, oya kumwa ko, noya matukile kuye ye mu kunde. 16Yesus okwa pula aalongwa a ti, “Amu tu eemhata ova shi nayo?”
17Wumwe womongudu okwe mu yamukula, “Mulongi, onda eta kooye omumwangemati ena omhepo ya kaka ndji ye mu ninga a kale iha popi. 18Shaa omhepo ya kaka nhyi tayi mu ponokele, ota yi mu vege pohi, ndele ta zi onhutu mokanya, nokwiikeha komayoo, ye te yi kukutile. Onda li nda lombwela aalongwa yoye, ye yi temo, ndele oya nyengwa.”
19Yesus okwa ti kuyo, “Onye epipi kali na eitaelo, siyo onaini andi kala punye? Siyo onaini ndi noku mu ivivimikila? Eteni omumati kwaame.” 20Oye mu eta ku Yesus.
Nhyi omhepo ya kaka ya mona Yesus, oya mbugaambuga omumati, ndele te ivege pevu, ta alangata, ye ta zi onhutu mokanya. 21Yesus okwa pula he yomumati,
“Okwa kala nasho efimbo li fike peni?” He yomomati okwa ti, “Okuza kounona waye. 22Olundji omhepo ya kaka oya kambavala oku mu vipaa, oku mu undulila momundilo nomomeya. Ndele oye nge oto vulu okuninga po sha, tu sila onghenda, oye u tu kwafe!”
23Yesus okwa ti kuye, “Omolwashike to ti, nge andi shi vulu? Kehe shimwe ashi vulu okuningilwa omunhu ngu a itaela.”
24Meendelelo, he yomumati okwa ingiva a tya omahovi, “Ondi na eitaelo, ndele eshona, kwafa okuhaitayela kwange!”
25Yesus nhyi a mona aanhu taa ngudumanene po, okwa hanyena omhepo ya kaka a ti, “Mhepo oye iho popi oye iho uvu ko, za mo muye, na ino ya mo ali muye nande!”
26Ndele omhepo ya kaka oya ingiva, yo ta yi mu mbugaambuga neenghono, ndele ta yi zi mo muye. Konima, omumati okwa li a fa ke na omwenyo, naanhu oyendji oya ti, “Okwa sa.” 27Ndele Yesus okwe mu kwata monyala yaye, te mu yambiviva a fikame.
28Konima yefimbo nhyi Yesus a ya meumbo, aalongwa yaye oye mu pula mhanga ye li oyo ayeke ya ti, “Omolwashike twa nyengwa oku ta mo omhepo ya kaka ndjo?”
29Yesus okwa ti kuyo, “Oluvi lwomhepo ya fa ndji, ihayi tewa mo kusha shimwe, okeyalikano alike.”
Yesus ta popi natango eso lyaye
(Mateusa17:22-23; Lukasa9:43-45)
30Yesus naalongwa yaye oya za ko, ya pitila muGalilea. Yesus ka li a hala aanhu ya shiwe mha e li, 31shaanhyi okwa li ta longo aalongwa yaye. Okwe ya lombwela kutya, “Omonamati wOmunhu ota ka yandjwa momake yaanhu mba ta ye ke mu vipaa, konima yomasiku yatatu, ota ka umuka.”
32Ndele ka ya li ye uvite ko kutya okwa hala okutya shi, noya li ya tila okumu pula.
Omunene olye?
(Mateusa18:1-5; Lukasa9:46-48)
33Yesus naalongwa yaye nhyi ya fika muKapelenaum, okwa ya meumbo nokwa pula aalongwa ya ye ta ti, “Omwa li amu kundafana shike mondjila?”
34Ndele oya kala ya mwena, shaanhyi mondjila oya li ta yeyi pula kutya olye omunene e vule yakwawo ayehe. 35Yesus okwa kala omutumba, ndele ta ifana aalongwa omulongo nayaali, ndele ta ti kuyo, “Ngu a hala, a kale wotango, na kale wa huunina kwaayehe nomuyakuli waayehe.” 36Okwa kufa okaana, ndele te ka fikameke komeho yao, okwe ka papatela, nokwa ti kuyo, 37‘Kehe tuu ngu ta tambula ko okaana ngha mevina lyange, ota tambula nge, nangu ta tambula nge, haame auke ta tambula, ndele ota tambula nangu a tuma nge.”
Ngu ke li omhinge nase okwa ama kuse
(Lukasa9:49-50)
38Yohanesa okwa ti kuYesus; “Mulongi, otwa mona omunhu umwe ta te mo eemhepo va kaka mevina lyoye, ndele otwe mu keelela, shaanhyi ka li womongudu yetu.”
39Yesus okwe ya yamukula a ti; “Inamu mu keelela, shaanhyi kaku na ngu ta longo oilonganghono mevina lyange, nokonima yefimbo ota popile nge mouyi. 40Oshonhyi kehe ngu ke li omhinge nase, okwa ama kuse. 41Ame andi mu lombwele oshili, kehe ngu te mu pe omeya yokumwa molwanhyi eshii kutya nye oya Kilistus, iha kala ina pewa ondjabi yaye.”
Elondovo kombiga yokuhongolola omunhu a nyone
(Mateusa18:6-9; Lukasa17:1-2)
42Kehe ngu ta hongolola kamwe komoushona mbu wa itaela nge ka nyone, oshiwa a mangelwe emanya eviyu mofingo yaye, ndele ta umbilwa mefuta. 43Onyala yoye nge ota yi ku hongolola u nyone, yi teta ko. Oku ya momwenyo waaluhe ushilema oku hwepo, ku vulife okukala neenyala mbali, ndele to yi moheli, mo mu na omundilo ihau vimi po aluhe.#9:43 Omafatululo yamwe oya weva mo ovelise. Mo nomainyo taa li ombelela yawo, ihaa si, nomu na omundilo ihau vimi po siyo aluhe 45Nomhavi yoye nge otayi ku hongolola u nyone, yi teta ko. Okuya momwenyo waaluhe u na omhavi yimwe oshihwepo shi vulife oku kala neemhavi mbali oye to umbilwa moheli.#9:45 Omafatululo yamwe oya weva mo ovelise 46: Mo omainyo taa li ombelela yawo, yo ihaa si, nomu na omundilo ihau vimi po siyo aluhe. 47Neiho lyoye nge ota li ku hongolola u nyone, li tsipula mo. Okuya mouhamba waKalunga u na eiho limwe okuhwepo ku vulife okukala nomeho yaali oye to umbilwa moheli, 48mo omainyo ihaa si, nomu na omundilo ihau vimi po siyo aluhe.
49Omunhu kehe oku na okuyelifwa nomundilo nganhyi efikiloyambo ha li yelifwa nomongwa.
50“Omongwa omuwa, ndele omongwa nge tau tutuka, otau vulu ngeepi oku fingalekwa ali?
“Kaleni mu na oukwatya wa fa womongwa, nye mu kale mu na ombili nayakweni.”
ទើបបានជ្រើសរើសហើយ៖
Malukusa 9: MBTP
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The Word For The World International