Lukasa 12
12
Lukasa 12
Kotokeleni aanaineya
(Mateusa10:26-27)
1Aanhu omayovi nomaovi oya ongala noya li ya finana, taa lyatafana. Yesus okwa tameke tango okupopya naalongwa yaye ta ti, “Kotokeleni omalongo kaena oushili yAafalisai, shaanhyi mbo owo omukalo wao wokupukifa aanhu. 2Kapu na shimwe sha siikilwa ashi ka kala ina shi suukulwa, no kapu na oshiholekwa ihashi ka kala inashi shiikwa. 3Kehe nghaa nhyi mwa popya momilaulu, ashi ka uvikwa mouyelele. Nanhyi mwa nyongofolela aanhu meholeko meenduda va ivilwa, ashi ka ingivwa kuza kombada yeenduda.”
Olye ena okutilika
(Mateusa10:28-31)
4“Ookaume kange, andi mu lombwele, inamu tila mba taa vipaa olutu, ndele ihaa vulu ali ku ninga sha shimwe. 5Andi mu ulikile ngu e na okutilika; tileni Kalunga ngu ena eenghono nepangelo vokuvipaa nokuundulila moheli. Eeno, mu tileni.” 6Hamba oonamusheshe yatano ihaa landwa nomapeni yaali? Ndele natango Kalunga ina vibwa nande umwe womuyo. 7Neehuki veni vokomutwe ova yalulwa avihe. Inamu tila, nye omuna ongushu mu vule oonamusheshe oyendji.
Okutambula nokwaanya Kilistus
(Mateusa10:32-33; 12:32; 10:19-20)
8“Andi mu kwashilipaleke, kehe ngu ta tambula nge momeho yaanhu, nOmona wOmunhu ote ke mu tambula momeho yaayengeli yaKalunga. 9Ndele kehe ngu te ivibike nge moipafi yaanhu, nOmona wOmunhu oteke mu ivibika monhaneho yaayengeli yaKalunga.”
10Ngu ta popi eli omhinge nOmona wOmunhu ota viminwapo, ndele ngu ta sheke Omhepo Ondjapuki iha viminwa po. 11“Nge amu falwa meeshinagoga nenge koipala yomalenga noyeehamba noyaapangeli, inamu kala muna oshimhwiyu kutya, amu ka popya shi. 12Oshonhyi Omhepo Ondjapuki otayi mu longo nhyi mu na okutya pefimbo opo tuu mho.”
Eele lyomuyamba elayi
13Wumwe womongudu yaanhu okwa ti kuYesus, “Mulongi, lombwela mumwameme omukulunhu, tu topolelafane naye oufiye weliko lyatate.”
14Yesus okwe mu yamukula a ti, “Kaume kange, olye a ufa nge ndi ninge omupanguli woufiye weni?” 15Yesus okwa ti kuyo, “Hangaleni nye mu kotokele ouhalu kehe, oshonhyi okukalamwenyo kwoshili komunhu inaku ningwapo keliko lyaye.” 16Yesus okwe ya lombwele eyele a ti, “Epya lyomuyamba wonhumba olya vala nawa. 17Omuyamba okwa vilaavila nhyi, “Kandina mha a ndi siikilile oilikolomwa yange. Andi ningi ngeepi? 18Andi ningi ngaanhyi. Andi hanauna po omaanda yange, ndele andi tungu po yamwe omanene, mu andi ka siikilila mo oilya noilikolomwa yange ayihe. 19Nena andi lombwele omwenyo wange kutya, Munelao oye! Owa siikilililwa ashihe nhyi wapumbwa mefimbo lyeevula ovidji komeho. Onghee fuva, ndee to li ndee to mu, ndee toihafifa!’ 20Ndele Kalunga okwa ti kuye, “Shilayi oye! Ousiku mbu wonena, omwenyo woe oto wu kufwa; nganhyi oinima ayihe mbi we ilikolela otai ningi yalye?’
21Nhyi osho ashi ka ningilwa kehe ngu te ikongele omaliko, ye keshi omuyamba koshipala shaKalunga.”
Inekela muKalunga
(Mateusa6:25-34)
22Yesus okwa ti kaalongwa yaye, “Onghee andi mu lombwele, inamu kala mu na oshimhwiyu kutya amu li shi opo mu kale muna omwenyo, nenge oshimhwiyu sholutu kutya amu zala shi. 23Oshonhyi okukala nomwenyo oku vule oikulya, nolutu oluvule omizalo. 24Taleni omakola, ihaa kunu yo ihaa teya, yo kaye na eenduda vokusiikilila nenge omaanda, ndee Kalunga ohe ya palufa. Ndele nye omuna ongushu mu vule eevila. 25Olye womunye ta vulu okuweva ko nande owili imwe konghalamwenyo yaye noshiho shaye? 26Nonge nani ihamu vulu okuninga oshiima oshishona nganhyi nhyi, omolwashike mu na okukala mwa sa oshiho shoinima yimwe? 27Taleni nye vivilikeni nghee eengala vomoihwa havi koko. Ihavi longo vo ihavi iningile omizalo. Ndele andi mu lombwele, naSalomo moukengeli wae ina zala a fe nande yimwe yomuvo. 28Hano Kalunga nge ota zike omwiivi, mbu u li po ike nena, ndele mongula awu umbilwa meziko. Kalunga iheke mu sila oshiho shi vulife eengala? Yanhu nye yeitaelo eshona! 29Inamu kala muna oimhwiyu kutya amu li shi nenge amu mu shi. 30Shaanhyi mba inaa shiwa Kalunga oyo haa kala yena oimhwiyu mbi. Ndele nye, Kalunga keni okushi shii kutya omwei pumbwa. 31Ndele komeho lyaayihe mbi, kongeni tango Ouhamba waKalunga, naKalunga ote ke mu pa ayihe mwe yi pumbwa.
Eliko meulu
(Mateusa6:19-21)
32“Inamu tila, okangudu okashona nye! Oshonhyi Ho weni okwa hala oku mu pa Ouhamba. 33Landifeni po omaliko yeni, ndee oimaliwa amu yi pe eehepele. Ilikoleleni oumhunda woimaliwa mbu ihau kulupa. Punguleni eliko lyeni meulu, mu ihamu yi eembuvi, neenyiki ihavi vulu oku li nyona po. 34Oshonhyi nghu kuna eliko lyoye, oko ku na omutima woe.
Kaleni oupafi
35“Kaleni mwe ilongekivila oilonga, neelamba veni va tema, 36onga aanhu ya teelela mwene wao ta zi koshitufi shohango. Nge eya ndee ta konghola, otaa vulu oku mu yeulula meendelelo. 37Aanelao aapiya mba, mwene wao nge teya, ota hanga ye li opafi. Oshili andi mu lombwele, ota vula mo ondjafa yaye, ndee te ya yakula. 38Yo aanelao ngeepi, nge teya hanga ye li oupafi nande neuye mokati kousiku nenge keengulasha. 39“Ndele shi shiweni, mwene weumbo ngeno nge okushii efimbo ombuvi tai ya okuyaka, ngeno iha efa eumbo lyaye li tewe. 40Nanye kaleni mwe ilongekiva, shaanhyi Omona wOmunhu oteya efimbo inamu mu teelela.”
Omupiya omuviinini nangu keshi omuuviinini
(Mateusa24:45-51)
41Peetulusa okwa ti “Omwene, eyele ndi ose to li lombwele nenge aanhu ayehe?” 42Omwene okwa yamukula, “Olye hano omupiya omuviinini nomunanduge? Oye ngu mwene wae te mu pe oshilonga shokutonatela eumbo lyaye, ye ta pe aapiya ooyakwawo oikulya pefimbo lyao. 43Omunelao omupiya ngu mwene wae nge te ya, temu hanga ta ningi ngaanhyi. 44Oshili, andi mu lombwele, mwene wae otemu pe a tonatele oinima yaye ayihe. 45Ndele omupiya ngo nge ote ilombwele ye mwene momutima ta ti, ‘Mwene wange ihe ya viya, ndee ta tameke okuvega aapiya yakwawo aalumenhu naakiinhu ndele ta li, ndele ta mu, ndele ta kolwa, 46mwene womupiya ngu, ote ya esiku ndi ine mu teelela nefimbo ndi ina shiwa. Mwene ote mu handukila, pamwe noonakuhavulika yakwao.
47Ndele omupiya ngu eshii nhyi mwene wae a hala a ninge ndele ineshi ninga, otaka handukilwa unene. 48Ndele omupiya ngu ina shiwa nhyi mwene wae a hala, ndee ta ningi epuko, ota vegwa kashona. Oshonhyi kehe ngu a pewa oshindji, ota ka pulwa oshindji; nangu a pewa oshindji unene, ota ka pulwa oshindji unene.”
Yesus omweetifi wetopoko
(Mateusa10:34-36)
49Ame onde ya okutema omundilo kombada yevu, nonda hala nokuhalelela ngeno owa hwama nale. 50Onda teelela eshasho lyemono lyoihuna, onghee onduuvite ouviyu siyo ali wanifwa. 51Amu vilaavila kutya onda eta ombili kombada yevu? Ahawe, kaishi ombili, ndele etopoko. 52Okuza mha, aanhu yatano yomeumbo limwe otaa ka topoka ngaanhyi; yatatu otaa twilafana ondubo nayaali, nayaali otaa ka twilafana ondubo nayatatu. 53Oyanamati otaa ka kala yeli omhinge noohe, noohe otaa ka kala omhinge noyanamati. Oyanakavona otaa ka kala yeli omhinge nooyina, nooyina otaa ka kala yeli noyanakavona. Oshitenya shomukiinhu ashi ka kala shili omhinge nayinamweno, nayinamweno otaka kala eli omhinge noshitenya shaye.”
Okuuvako efimbo
(Mateusa16:2,3)
54Yesus okwa ti kongudu yaanhu, “Nge mu wete oikoo tayi zi mouninginino, ohamu ti aku lokwa, ndee osho ashi ningwa. 55Nge omhepo tayi zi koumbuwanhu a mu ti, aku zi oluteni, sho osho ashi ningwa. 56Aanaineya nye! Omushii okutala kevu nokewangandjo okutengeneka onghalo yomhepo, ndele kamu shii ku vivilika efimbo ndi.”
Uvafaneni kumwe naatamaneki yeni
(Mateusa5:25-26)
57“Omolwashi ihamu i pangula nye yene pauyuuki? 58Nge opu na ngu teku fala komhangu, kambavala wu pukulule epuko lyoye mhanga ina mu fika komhangu, opo ineku yandja nefiminiko komupanguli, omupanguli e ku yandje komumbala, omumbala te ku evilile movologo. 59Andi ku lombwele, ku na mha to yi mhanga ino mana okufuta okapeni kahwiinina kehandukilo lyoye.
ទើបបានជ្រើសរើសហើយ៖
Lukasa 12: MBTP
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The Word For The World International
