मर्क 9
9
1आलै येसुई ख्युकाङ्मोः र्वाबो, “तेम्माई, ङा ङेनकाङ्मोः र्वाचे, स्यीह् थाङथाङ छ्युङ्पावन बर्ग कान-कान ङ्याह्, सुई परमेस्वरन राज्य सक्तिग स्वापा मरङ्न बेर तै खेखेई सिह्नान मह्या।”
येसुन खरि फिप्पो
(मत्ती १७:१-१३; लुक ९:२८-३६)
2मन्न रुर्यान ङिक येसुई पत्रुस, याकूब रे यूहन्नाः नुन ङ्याबो वव्वै ला किमदीग वप्पो। स्याह् ख्यु मात्र ङ्याह्, ख्युई सेन्तौसेन्तौ येसुन खरि फिप्पो।#२ पत्र १:१७-१८ 3आलै नुन घोलाङ ताह्म रे मिह्दा पाह्ल्म रह्बो, झाःम कि पिर्थीबी सुई र्वार्वा थुथु अकेःन पाह्ल्म धोङ मतैनान। 4तब चेला सुमपाई एलिया रे मोसा येसुन ङ्याबो ल्होई र्वापाई छ्युङ्पा रङ्बो। 5पत्रुसजै येसू र्वाबो, “गुरुज्यू, ङि स्यीह् रह्पा लः रह्बो। ङि स्यीह् आति सुम दोङ्मता, ती नान भिह्तु, ती मोसान भिह्तु रे ती एलियान भिह्तु।” 6ख्यु यामयाम ङिन्पान कारनजै पत्रुसग तै र्वाचे र्वार्वा क्युई मरह्बो।
7आलै नमलूदी स्वास्वा ख्युकाङ्मोः कप्पो, रे नमलूलै झाःम केह्ःदी गेप्पो, “अन ङन स्याङ्पान ङोह्जो जेङ्पा, ङेनकोजै नुन ल्होई ङ्याना।”#मत्ती ३:१७; मर्क १:११; लुक ३:२२; २ पत्र १:१७; भजन २:७
8आलै हतपत धेँवछोँ सेन्तौ ख्युई जेँन ङ्याबो येसू नङ्म घङ सुई मरङ्बो।
9ख्यु लालै धुल्तौ येसुई ख्युकाङ्मोः “सिमिन ङोह्जो सिह्पालै सम्पु मग्युर्न बेर ख्युई तै रङ्पा ङ्याह् मन सुई नर्वा र्वार्वा आग्या बिम्बो।”
10ख्युई अन ल्होई समग नाह्म्बो, जेङ्नै सिह्पालै सम्पु ग्युर्नान र्वापा चन तै जेङ्पा र्वार्वा राह्ङराङ्साः ल्होई र्वामः जाःबो।
11आलै ख्युई नू झाःम र्वार्वा लोप्पो, “ङू एलिया स्वा त्वानान र्वार्वा कानुन्न कानुन लन्नान्न सिमिव तैङ र्वानान?”#मला ४:५; मत्ती ११:१४
12येसुई र्वाबो, “तेम्माई, एलिया ङू स्वानान, रे तैस्याङ पुरू ह्याङ दोङ्नान। जेङ्नै सिमिन ङोह्जोई लै तूरि कूकू यहूदीन खोलोःन सिमिवलम अस्वीकार राह्नान ङ्याह् र्वार्वा पबित्रसास्त्रग तैङ सर्पा ङ्याह् न? 13जेङ्नै ङा ङेनकाङ्मोः र्वाचे, कि एलिया ङूई स्वातपा ङ्याह्, रे पबित्रसास्त्रजै नुन भारेः र्वापालैम सिमिवजै नू जेँनै इच्छ्या अन्सार बेऊरा खेबो।”
येसुई मुन आत्मा ताह्पान चोलोङ्चाः ताःफाम्पा
(मत्ती १:१४-२१; लुक ९:३७-४३)
14ख्यु घङ चेलावन स्याह् होलहोल स्वातौ ख्युकाङ्मोः मोह्ङ किमदीजै क्योरक्योर नाम्पा रे ख्युन ङ्याबो कानुन लन्नान्न सिमिवजै खाथू खेपाई छ्युङ्पा ख्युई रङ्बो। 15जब सिमिवजै येसू रङ्बो, ख्यु मिह्दा हालाईबो रे नुन ङ्याबो धालैधालै होई येसू सिह्म ङिह्पाऊ र्वाबो। 16येसुई चेलाकाङ्मोः लोप्पो, “ङेनको अजोवन ङ्याबो ल्होई तैन भारेः खाथू खेनान?”
17मोह्ङलै सिमिदीजै येसू झब बिम्बो, “गुरुज्यू, ङन ङोह्जोः वाम्पा दोङ्नान्न मुन आत्मा ताह्पा ङ्याह्, रे ङेन स्याह् सप्पा ङिह्पा। 18जब अनजै ङन ङोह्जोः जुङ्ङ, तब नू साः दिम्फाङ्ङ, आलै नुई ङुरलै भ्वा छ्यूङ, सो चह्ङ्ङ, रे ख्याःङ। ङै ङेन चेलाकाङ्मोः मन मुन आत्मा छ्यूयाःयो र्वार्वा छ्याःफुल्पा, जेङ्नै ख्युई मतैबो।”
19तब येसुई ख्युकाङ्मोः झब बिम्बो, “ए अबिस्वासी सिमिव, ङा हातौन बेर ङेनकोन ङ्याबो लुईदरा? ङेनकाङ्मोः ङा हाति कूचे? चोलोङ्चाः ङन रह्म्म सह्रा।” 20ख्युई मन चोलोङ्चाः नुन रह्म्म सप्पो। येसू रङ्लुङ्मीम मन मुन आत्माई चोलोङ्चाः काङ्क्याल सुमक्याल धेफाम्बो, रे नु साः दिमदिम ङुरलै भ्वा छ्युईछ्युई काङ्क्याल सुमक्याल धेम जाःबो। 21नुई अन्न पाः लोप्पो, “हातौलै अनग झाःम रह्पा जेङ्पा?” नुई र्वाबो, “वैचान भेलालै।” 22“मुई नू घरीघरी मेह् रे त्यू पप्पे सच्चे फाङ्ङ। गुरु! नाई तैङिन ङी दिसासा भलो ख्या।”
23येसुई नू र्वाबो, “ङेनजै तैनौ र्वार्वा तै र्वानान? बिस्वास खेनान्न सिमिन भिह्तु ल्होई पुरू रा तैनान।” 24तब तुरुन्तै चोलोङ्चान पाई दादा र्वाबो, “ङा बिस्वास खेचे, जेङ्नै ह्याल्म मह्या। ङा ह्याजन बिस्वास देम्म फुरी ख्या।”
25तब मोह्ङ ङ्याबो धालैधालै स्वापा रङरङ येसुई मन मू झाःम र्वाबो, “ए वाम्पा रे नाज्योवा मताह्नान्न मुन आत्मा, ङा नाः र्वाचे, नुन स्याह्लै गेग्गे स्वा, रे ह्याङ हातौयै नुन झिङ नजा।” 26आलै आत्मा फाईरा खेखे अन चोलोङ्चाः मिह्दा काङ्क्याल सुमक्याल धेफानफान मन आत्मा गेप्पो, रे अन चोलोङ्चा सिह्पा लैम रह्बो, सिथाल कि पुरूजै अन सिदँ र्वार्वा छुबो। 27जेङ्नै येसुई नुन ल्हा जुङजुङ नू जुरुक्क सोल्बो, रे नु च्याङ्बो।
28आलै जब येसु यिम वैपा तब नुन चेलावजै फाक नु झाःम र्वार्वा लोप्पो, “ङ्योअजै आत्मा तैङ छ्यु मतैबो?”
29येसुई चेलाकाङ्मोः र्वाबो, “अन लैम आत्मा चन सोअतापजै नङ्म घङ मेसो तैजै छ्यु मतैनान।”
येसुई जेँन सिचेन भारेः ङेरेप र्वापा
(मत्ती १७:२२-२३; लुक ९:४३-४५)
30आलै स्याह्लै गेग्गे ख्यु गालील राह्राह् होई। अन ल्होई सुई क्युई नराःयो र्वानान नुन सम ङ्याह्, 31तैङर्वाङिन येसुई जेँन चेलाकाङ्मोः लनयङ ङ्याह्। नुई ख्युकाङ्मोः र्वाबो, “सिमिन ङोह्जो ङा सिमिवन ल्हाग थोन्नान ङ्याह्, रे ख्युई ङाः सन्नान ङ्याह्, रे ङा सिह्पान सुमङीन ङिक ह्याङ सम्पु राह्राह् च्याङ्नान ङ्युँ।”
32जेङ्नै चेलावजै अन ल्होईन अर्थ हामकोबो, आलै येसू लोच्चे ङिह्म्बो।
पुरून खेरे किम सु जेङ्पा?
(मत्ती १८:१-५; लुक ९:४६-४८)
33येसु रे नुन चेलाव कफर्नहुम स्वाबो, रे यिम ताप्मी येसुई ख्युकाङ्मोः लोप्पो, “लमग ङेनकोजै तैन ल्होई र्वापा?” 34जेङ्नै ख्यु तै मर्वारे छ्युङ्बो, तैङर्वाङिन लमग ख्युई “ङ्योअग पुरून खेरे किम सु जेङ्पा?” र्वार्वा राह्ङराङ्साः ल्होई र्वापा ङ्याह्।#लुक २२:२४
35तब नु छ्युङ्बो, रे च्योङेपाः घ्वाबो, रे ख्युकाङ्मोः र्वाबो, “कान सिमि ङूस्योवा राचेन सम खेङिन, अन पुरून खेरे ङीस्योवा रे पुरून राङ्पा रा त्वानान।”#मत्ती २०:२६-२७; २३:११; मर्क १०:४३-४४; लुक २२:२६ 36आलै वैचा छ्युमदी वव्वै येसुई नू ख्युन घूँ नाह्म्बो, रे नू खोलग वव्वै नुई ख्युकाङ्मोः र्वाबो, 37“सुई झाःम छ्युम वैचावन बर्ग तीपा ङन मिह्नग स्वीकारी खेँ नुई ङाः स्वीकारी खेनान, रे सुई ङा स्वीकारी खेँ नुई ङाः नङ्पा, जेङ्नै ङाः फेन्नानग स्वीकारी खेनान।”#मत्ती १०:४०; लुक १०:१६; यूह १३:२०
सु ङिन बिरोधग मह्या नु ङिन भिह्तु जेङ्पा
(लुक ९:४९-५०)
38यूहन्नाई नू र्वाबो, “गुरुज्यू, सिमिदीजै ङेन मिह्नग मुव छ्यूपाई छ्युङ्पा ङी रङ्पा। ङी नू उजु खे मफाम्पा, तैङर्वाङिन मन ङिन मोह्ङन नङ्पा।” 39येसुई ख्युकाङ्मोः र्वाबो, “नू नकाः, तैङर्वाङिन ङन मिह्नग ताईलुवान धोन खेनान सुई र्वार्वा हतपत ङन बिरोधग अलः ल्होईव र्वा मतैनान। 40तैङर्वाङिन सु ङिन बिरोधग मह्या, नु ङिन पछेग ङ्याह्।#मत्ती १२:३०; लुक ११:२३ 41तैङर्वाङिन सुई ङेनकाङ्मोः मसिहन जेङ्पा र्वार्वा ङेनकाङ्मोः ङन मिह्नग त्यु खोरेदी थुङ् फान्दरा, तेम्माई ङा ङेनकाङ्मोः र्वाचे, नुई तै खेखेई जेँन इनाम मोल्नान मह्या।”#मत्ती १०:४२
तीपान लोभव
(मत्ती १८:६-९; लुक १७:१-२)
42“यदि कानजै अन छ्युमवन बर्ग कानग ङन ङ्या खेनान्न बिस्वासलै फाफा तीपा खेफाङ्ङिन, मन सिमिन होलाः ल्हाकोर किमन लुङ चुनचुन समुन्द्रग पच्चे लः राह्नान। 43अन्नकारन यदि नान ल्हाजै नाः तीपा खेफाङ्ङिन मनग थुमा। ल्हा ङेह् राह्राह् ङ्यालान मसिह्नान्न मेह्ग वैचेन पूँ दुर्या राह्राह् झुनी जाचे ङेनकोन भिह्तु लः जेङ्पा।#मत्ती ५:३० 44[ङ्यालाः ता न भु सिह्नान, न मेह्ई सिह्नान।] 45आलै नान ल्हेजै नाः तीपा खेफाङ्ङिन मनग थुमा। ल्हे ङेह् राह्राह् ङ्यालाः पच्चेन खेरे ता खोर्या राह्राह् झुनी जाचे नान भिह्तु लः जेङ्पा। 46[ङ्यालाः ता न भु सिह्नान, न मेह्ई सिह्नान।] 47यदि नान मीजै नाः तीपा खेफाङ्ङिन मनग छ्यूछ्यू पह्रा। मी ङेह् राह्राह् ङ्यालाः पच्चेन खेरे ता काना राह्राह् परमेस्वरन राज्य जाचे ङेनको भिह्तु लः जेङ्पा।#मत्ती ५:२९ 48ङ्यालाः ता न भु सिह्नान, न मेह्ई सिह्नान।”#यसै ६६:२४
49बलिदान चाई छाङ्म दोङ्पा लैम पुरू मेह्लम छाङ्म राह्नान ङ्याह्। 50“चा लः जेङ्पा, जेङ्नै चान ङम्नान वैङिन, अन तैजै ङम्नान दोङ्चे? ङेनको राह्ङराङ्साः चा नाह्ना, रे राह्ङराङ्साः सान्तिग छ्योवा।”#मत्ती ५:१३; लुक १४:३४-३५
ទើបបានជ្រើសរើសហើយ៖
मर्क 9: NTKST25
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The New Testament Books in Kaike Language © The Word for the World International and Kaike Translation Project, Nepal, 2025
मर्क 9
9
1आलै येसुई ख्युकाङ्मोः र्वाबो, “तेम्माई, ङा ङेनकाङ्मोः र्वाचे, स्यीह् थाङथाङ छ्युङ्पावन बर्ग कान-कान ङ्याह्, सुई परमेस्वरन राज्य सक्तिग स्वापा मरङ्न बेर तै खेखेई सिह्नान मह्या।”
येसुन खरि फिप्पो
(मत्ती १७:१-१३; लुक ९:२८-३६)
2मन्न रुर्यान ङिक येसुई पत्रुस, याकूब रे यूहन्नाः नुन ङ्याबो वव्वै ला किमदीग वप्पो। स्याह् ख्यु मात्र ङ्याह्, ख्युई सेन्तौसेन्तौ येसुन खरि फिप्पो।#२ पत्र १:१७-१८ 3आलै नुन घोलाङ ताह्म रे मिह्दा पाह्ल्म रह्बो, झाःम कि पिर्थीबी सुई र्वार्वा थुथु अकेःन पाह्ल्म धोङ मतैनान। 4तब चेला सुमपाई एलिया रे मोसा येसुन ङ्याबो ल्होई र्वापाई छ्युङ्पा रङ्बो। 5पत्रुसजै येसू र्वाबो, “गुरुज्यू, ङि स्यीह् रह्पा लः रह्बो। ङि स्यीह् आति सुम दोङ्मता, ती नान भिह्तु, ती मोसान भिह्तु रे ती एलियान भिह्तु।” 6ख्यु यामयाम ङिन्पान कारनजै पत्रुसग तै र्वाचे र्वार्वा क्युई मरह्बो।
7आलै नमलूदी स्वास्वा ख्युकाङ्मोः कप्पो, रे नमलूलै झाःम केह्ःदी गेप्पो, “अन ङन स्याङ्पान ङोह्जो जेङ्पा, ङेनकोजै नुन ल्होई ङ्याना।”#मत्ती ३:१७; मर्क १:११; लुक ३:२२; २ पत्र १:१७; भजन २:७
8आलै हतपत धेँवछोँ सेन्तौ ख्युई जेँन ङ्याबो येसू नङ्म घङ सुई मरङ्बो।
9ख्यु लालै धुल्तौ येसुई ख्युकाङ्मोः “सिमिन ङोह्जो सिह्पालै सम्पु मग्युर्न बेर ख्युई तै रङ्पा ङ्याह् मन सुई नर्वा र्वार्वा आग्या बिम्बो।”
10ख्युई अन ल्होई समग नाह्म्बो, जेङ्नै सिह्पालै सम्पु ग्युर्नान र्वापा चन तै जेङ्पा र्वार्वा राह्ङराङ्साः ल्होई र्वामः जाःबो।
11आलै ख्युई नू झाःम र्वार्वा लोप्पो, “ङू एलिया स्वा त्वानान र्वार्वा कानुन्न कानुन लन्नान्न सिमिव तैङ र्वानान?”#मला ४:५; मत्ती ११:१४
12येसुई र्वाबो, “तेम्माई, एलिया ङू स्वानान, रे तैस्याङ पुरू ह्याङ दोङ्नान। जेङ्नै सिमिन ङोह्जोई लै तूरि कूकू यहूदीन खोलोःन सिमिवलम अस्वीकार राह्नान ङ्याह् र्वार्वा पबित्रसास्त्रग तैङ सर्पा ङ्याह् न? 13जेङ्नै ङा ङेनकाङ्मोः र्वाचे, कि एलिया ङूई स्वातपा ङ्याह्, रे पबित्रसास्त्रजै नुन भारेः र्वापालैम सिमिवजै नू जेँनै इच्छ्या अन्सार बेऊरा खेबो।”
येसुई मुन आत्मा ताह्पान चोलोङ्चाः ताःफाम्पा
(मत्ती १:१४-२१; लुक ९:३७-४३)
14ख्यु घङ चेलावन स्याह् होलहोल स्वातौ ख्युकाङ्मोः मोह्ङ किमदीजै क्योरक्योर नाम्पा रे ख्युन ङ्याबो कानुन लन्नान्न सिमिवजै खाथू खेपाई छ्युङ्पा ख्युई रङ्बो। 15जब सिमिवजै येसू रङ्बो, ख्यु मिह्दा हालाईबो रे नुन ङ्याबो धालैधालै होई येसू सिह्म ङिह्पाऊ र्वाबो। 16येसुई चेलाकाङ्मोः लोप्पो, “ङेनको अजोवन ङ्याबो ल्होई तैन भारेः खाथू खेनान?”
17मोह्ङलै सिमिदीजै येसू झब बिम्बो, “गुरुज्यू, ङन ङोह्जोः वाम्पा दोङ्नान्न मुन आत्मा ताह्पा ङ्याह्, रे ङेन स्याह् सप्पा ङिह्पा। 18जब अनजै ङन ङोह्जोः जुङ्ङ, तब नू साः दिम्फाङ्ङ, आलै नुई ङुरलै भ्वा छ्यूङ, सो चह्ङ्ङ, रे ख्याःङ। ङै ङेन चेलाकाङ्मोः मन मुन आत्मा छ्यूयाःयो र्वार्वा छ्याःफुल्पा, जेङ्नै ख्युई मतैबो।”
19तब येसुई ख्युकाङ्मोः झब बिम्बो, “ए अबिस्वासी सिमिव, ङा हातौन बेर ङेनकोन ङ्याबो लुईदरा? ङेनकाङ्मोः ङा हाति कूचे? चोलोङ्चाः ङन रह्म्म सह्रा।” 20ख्युई मन चोलोङ्चाः नुन रह्म्म सप्पो। येसू रङ्लुङ्मीम मन मुन आत्माई चोलोङ्चाः काङ्क्याल सुमक्याल धेफाम्बो, रे नु साः दिमदिम ङुरलै भ्वा छ्युईछ्युई काङ्क्याल सुमक्याल धेम जाःबो। 21नुई अन्न पाः लोप्पो, “हातौलै अनग झाःम रह्पा जेङ्पा?” नुई र्वाबो, “वैचान भेलालै।” 22“मुई नू घरीघरी मेह् रे त्यू पप्पे सच्चे फाङ्ङ। गुरु! नाई तैङिन ङी दिसासा भलो ख्या।”
23येसुई नू र्वाबो, “ङेनजै तैनौ र्वार्वा तै र्वानान? बिस्वास खेनान्न सिमिन भिह्तु ल्होई पुरू रा तैनान।” 24तब तुरुन्तै चोलोङ्चान पाई दादा र्वाबो, “ङा बिस्वास खेचे, जेङ्नै ह्याल्म मह्या। ङा ह्याजन बिस्वास देम्म फुरी ख्या।”
25तब मोह्ङ ङ्याबो धालैधालै स्वापा रङरङ येसुई मन मू झाःम र्वाबो, “ए वाम्पा रे नाज्योवा मताह्नान्न मुन आत्मा, ङा नाः र्वाचे, नुन स्याह्लै गेग्गे स्वा, रे ह्याङ हातौयै नुन झिङ नजा।” 26आलै आत्मा फाईरा खेखे अन चोलोङ्चाः मिह्दा काङ्क्याल सुमक्याल धेफानफान मन आत्मा गेप्पो, रे अन चोलोङ्चा सिह्पा लैम रह्बो, सिथाल कि पुरूजै अन सिदँ र्वार्वा छुबो। 27जेङ्नै येसुई नुन ल्हा जुङजुङ नू जुरुक्क सोल्बो, रे नु च्याङ्बो।
28आलै जब येसु यिम वैपा तब नुन चेलावजै फाक नु झाःम र्वार्वा लोप्पो, “ङ्योअजै आत्मा तैङ छ्यु मतैबो?”
29येसुई चेलाकाङ्मोः र्वाबो, “अन लैम आत्मा चन सोअतापजै नङ्म घङ मेसो तैजै छ्यु मतैनान।”
येसुई जेँन सिचेन भारेः ङेरेप र्वापा
(मत्ती १७:२२-२३; लुक ९:४३-४५)
30आलै स्याह्लै गेग्गे ख्यु गालील राह्राह् होई। अन ल्होई सुई क्युई नराःयो र्वानान नुन सम ङ्याह्, 31तैङर्वाङिन येसुई जेँन चेलाकाङ्मोः लनयङ ङ्याह्। नुई ख्युकाङ्मोः र्वाबो, “सिमिन ङोह्जो ङा सिमिवन ल्हाग थोन्नान ङ्याह्, रे ख्युई ङाः सन्नान ङ्याह्, रे ङा सिह्पान सुमङीन ङिक ह्याङ सम्पु राह्राह् च्याङ्नान ङ्युँ।”
32जेङ्नै चेलावजै अन ल्होईन अर्थ हामकोबो, आलै येसू लोच्चे ङिह्म्बो।
पुरून खेरे किम सु जेङ्पा?
(मत्ती १८:१-५; लुक ९:४६-४८)
33येसु रे नुन चेलाव कफर्नहुम स्वाबो, रे यिम ताप्मी येसुई ख्युकाङ्मोः लोप्पो, “लमग ङेनकोजै तैन ल्होई र्वापा?” 34जेङ्नै ख्यु तै मर्वारे छ्युङ्बो, तैङर्वाङिन लमग ख्युई “ङ्योअग पुरून खेरे किम सु जेङ्पा?” र्वार्वा राह्ङराङ्साः ल्होई र्वापा ङ्याह्।#लुक २२:२४
35तब नु छ्युङ्बो, रे च्योङेपाः घ्वाबो, रे ख्युकाङ्मोः र्वाबो, “कान सिमि ङूस्योवा राचेन सम खेङिन, अन पुरून खेरे ङीस्योवा रे पुरून राङ्पा रा त्वानान।”#मत्ती २०:२६-२७; २३:११; मर्क १०:४३-४४; लुक २२:२६ 36आलै वैचा छ्युमदी वव्वै येसुई नू ख्युन घूँ नाह्म्बो, रे नू खोलग वव्वै नुई ख्युकाङ्मोः र्वाबो, 37“सुई झाःम छ्युम वैचावन बर्ग तीपा ङन मिह्नग स्वीकारी खेँ नुई ङाः स्वीकारी खेनान, रे सुई ङा स्वीकारी खेँ नुई ङाः नङ्पा, जेङ्नै ङाः फेन्नानग स्वीकारी खेनान।”#मत्ती १०:४०; लुक १०:१६; यूह १३:२०
सु ङिन बिरोधग मह्या नु ङिन भिह्तु जेङ्पा
(लुक ९:४९-५०)
38यूहन्नाई नू र्वाबो, “गुरुज्यू, सिमिदीजै ङेन मिह्नग मुव छ्यूपाई छ्युङ्पा ङी रङ्पा। ङी नू उजु खे मफाम्पा, तैङर्वाङिन मन ङिन मोह्ङन नङ्पा।” 39येसुई ख्युकाङ्मोः र्वाबो, “नू नकाः, तैङर्वाङिन ङन मिह्नग ताईलुवान धोन खेनान सुई र्वार्वा हतपत ङन बिरोधग अलः ल्होईव र्वा मतैनान। 40तैङर्वाङिन सु ङिन बिरोधग मह्या, नु ङिन पछेग ङ्याह्।#मत्ती १२:३०; लुक ११:२३ 41तैङर्वाङिन सुई ङेनकाङ्मोः मसिहन जेङ्पा र्वार्वा ङेनकाङ्मोः ङन मिह्नग त्यु खोरेदी थुङ् फान्दरा, तेम्माई ङा ङेनकाङ्मोः र्वाचे, नुई तै खेखेई जेँन इनाम मोल्नान मह्या।”#मत्ती १०:४२
तीपान लोभव
(मत्ती १८:६-९; लुक १७:१-२)
42“यदि कानजै अन छ्युमवन बर्ग कानग ङन ङ्या खेनान्न बिस्वासलै फाफा तीपा खेफाङ्ङिन, मन सिमिन होलाः ल्हाकोर किमन लुङ चुनचुन समुन्द्रग पच्चे लः राह्नान। 43अन्नकारन यदि नान ल्हाजै नाः तीपा खेफाङ्ङिन मनग थुमा। ल्हा ङेह् राह्राह् ङ्यालान मसिह्नान्न मेह्ग वैचेन पूँ दुर्या राह्राह् झुनी जाचे ङेनकोन भिह्तु लः जेङ्पा।#मत्ती ५:३० 44[ङ्यालाः ता न भु सिह्नान, न मेह्ई सिह्नान।] 45आलै नान ल्हेजै नाः तीपा खेफाङ्ङिन मनग थुमा। ल्हे ङेह् राह्राह् ङ्यालाः पच्चेन खेरे ता खोर्या राह्राह् झुनी जाचे नान भिह्तु लः जेङ्पा। 46[ङ्यालाः ता न भु सिह्नान, न मेह्ई सिह्नान।] 47यदि नान मीजै नाः तीपा खेफाङ्ङिन मनग छ्यूछ्यू पह्रा। मी ङेह् राह्राह् ङ्यालाः पच्चेन खेरे ता काना राह्राह् परमेस्वरन राज्य जाचे ङेनको भिह्तु लः जेङ्पा।#मत्ती ५:२९ 48ङ्यालाः ता न भु सिह्नान, न मेह्ई सिह्नान।”#यसै ६६:२४
49बलिदान चाई छाङ्म दोङ्पा लैम पुरू मेह्लम छाङ्म राह्नान ङ्याह्। 50“चा लः जेङ्पा, जेङ्नै चान ङम्नान वैङिन, अन तैजै ङम्नान दोङ्चे? ङेनको राह्ङराङ्साः चा नाह्ना, रे राह्ङराङ्साः सान्तिग छ्योवा।”#मत्ती ५:१३; लुक १४:३४-३५
ទើបបានជ្រើសរើសហើយ៖
:
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The New Testament Books in Kaike Language © The Word for the World International and Kaike Translation Project, Nepal, 2025