मर्क 14
14
येसू सच्चेन सदेन्त्र
(मत्ती २६:१-१६; लुक २२:१-६)
1अन्न ङितौन ङिक निस्तार रे सोरा मकानान्न रोतान तेवर ङ्याह्। ङोत्वा पुजारीव रे कानुन लन्नान्न सिमिव येसू कुजुई छकाई पप्पे जुङजुङ सच्चेन दाउग ङ्याह्।#प्रस १२:२-२७ 2तैङर्वाङिन ख्युई र्वापा ङ्याह्, “तेवरन भेला नङ्पा, तेमन्ता सिमिकाङ्मोः फाईराकुईरा मच्ची र्हदरा।”
बेथानियाग येसू दुईपा
(मत्ती २६:६-१३; यूह १२:१-८)
3येसु बेथानियाग सिमोन कोरन नाह्जा ताह्पान सिमिन यिम झाम छ्युङ्तौ चिमिचादी मिह्दा छाङ्म जतामसीन मकेकुकेन कुम्म अत्तर सिङ्गमरमरन बोतलग सस्सै स्वाबो, रे अन बोदल तिलतिल अन र्हिस्याम जतामसीन मकेकुकेन कुम्म अत्तर येसुन थोप्पा हाल्बो।#लुक ७:३७-३८ 4जेङ्नै कान-कानजै सुतुतु राह्ङराङ्साः र्वामः जाःबो, “अन र्हिस्याम मकेकुकेन कुम्म अत्तर तैङ झाम पाह्दुर खेपा? 5तैङर्वाङिन अन मकेकुकेन कुम्म अत्तर क्यामसुम मुलन सिक्का खेरे ह्याल्म र्युर्यु बिखारीवग अन सोङ भिन तैनन।” आलै ख्युई मन चिमिचा ङार्बो।
6जेङ्नै येसुई ख्युकाङ्मोः र्वाबो, “फेरा, तैङ ङेनकाङ्मोः अजोव तूरि बिन्नान? अनजै ङन भिह्तु धोन ल खेपा ङ्याह्। 7तैङर्वाङिन बिखारीव ता ङेनकाङ्मोः ङ्याबो एकुरो राह्नान, रे सम्म छ्युपा कन्न भेला ङेनकाङ्मोः ख्युन भलाइ खेतैनन। जेङ्नै ङा ता एकुरो ङेन ङ्याबो मराह्नान।#कानुन १५:११ 8अन चिमिचाई तै खेतैनन अन खेपा ङ्याह्। अनजै ङन ल्हो दुन्नान्न भिह्तु ङूलै र्हिस्याम मकेकुकेन कुम्म अत्तर दुद्दुई तयार खेपा ङ्याह्। 9तेम्माई, ङा ङेनकाङ्मोः र्वाचे, पुरू सन्सारग खाः-खाः अन ल्होन् लः ताह्फेङ्ङ, अन चिमिचाई तै खेपा ङिह्पा नुन चिन्चेन भिह्तु अन धोन्न बर्नन खेनान ङ्याह्।”
यहूदा येसू घात खेमः दीपा
(मत्ती २६:१४-१६; लुक २२:३-६)
10तब चेला च्योङेपावन बर्ग तीपा यहूदा इस्करियोत चन येसु ख्युन ल्हाग च्योल्चेन भिह्तु ङोत्वा पुजारीव ङ्याबो होई। 11ख्यु अन ताह्ताह् स्याङ्बो, रे नू सोङ बिन्च्योवा र्वार्वा रेनरुबो। आलै यहूदाई येसू कुजुई जुङ्फान्चे र्वार्वा र्वापालैमन मौका फाम्मः जाःबो।
येसु जेँन चेलाव ङ्याबो निस्तार तेवरन भत्यार झाँ
(मत्ती २६:१७-३५; लुक २२:७-२३)
12सोरा मकपान रोता झानान्न तेवरन ङूस्योवान ल्हा, जब ख्युई निस्तार-तेवरन लूचा भोका फुल्ङ, नुन चेलावजै नू लोप्पो, “ङेन इच्छ्या तै ङ्याह्? ङि खाः वैवै ङेन भिह्तु निस्तार-तेवरन भत्यार तयार खेचे?”#प्रस १२:६; १२:१५
13आलै येसुई जेँन चेलाव बर्ग ङेपा झाःम र्वार्वा फेप्पो, “सहरग वया, रे गाःरी त्यु हुरहुर वन्नन सिमि तीपाई ङेनकाङ्मोः दोनन ङ्याह्। नुन ङिक जा। 14अन सिमि खाः जाःङ मन यिमन तापो र्वा, ‘गुरुज्यू र्वाङ, ङन चेलाव ङ्याबो निस्तार-तेवरन भत्यार झानन ङन दम्पु कोठा खाः ङ्याह्?’ 15आलै नुई ङेनकाङ्मोः लखे दोङदोङ तयार खेपा रुजान कोठा किमदी थन्नन ङ्याह्, रे स्याह्ई ङेनजै ङिन भिह्तु भत्यार तयार ख्या।”
16तब मन चेलाव होई, रे सहरग जाःबो, आलै नुई ख्युकाङ्मोः र्वापालैम धोबो, रे ख्युई निस्तार-तेवरन पुरू तयार खेबो।
17ङ्याजे रातौ येसु चेला च्योङेपा ङ्याबो स्वाबो। 18ख्यु छ्युङछ्युङ झातौ येसुई र्वाबो, “तेम्माई ङा ङेनकाङ्मोः र्वाचे, ङेनकाङ्मोः बर्ग ङन ङ्याबो झानन तीपाई ङा बैरीन पक्राउ थेप्नान ङ्याह्।”#भजन ४१:९
19ख्यु तुँलाक्या रह्बो, आलै पालिपालि येसू “तै अन ङा जेङ्पौ?” र्वार्वा लोम्म जाःबो।
20येसुई ख्युकाङ्मोः र्वाबो, “च्योङेपान बर्ग तीपा, सुई ङन ङ्याबो तेर्माः रोता सुप्पा ङ्याह्। 21तैङर्वाङिन पबित्रसास्त्रग सर्पान अन्सार ङा सिमि ङोह्जो जेङ्पा, ङा सित्वानान, जेङ्नै धिक्कार बैरीन ल्हाग पक्राउ थेप्नान मन सिमि सुलम सिमिन ङोह्जो दुङाल राँ। मन सिमि ता मकेह्पा राङिन ल राह्नान ङ्याह्।”
चेलावन ङ्याबो प्रभु भोज
(मत्ती २६:२६-३०; लुक २२:१४-२०; १ कोर ११:२३-२५)
22आलै झातौ येसुई रोतादी वव्वै परमेस्वरग असिका तोलतोल क्युप्पो रे चेलाकाङ्मोः बिन्तौ र्वाबो, “होरा, अन ङन ल्हो जेङ्पा।”
23आलै खोरे वव परमेस्वरग मया रह्बो र्वामी नुई ख्युकाङ्मोः बिम्बो, रे ख्यु पुरूजै मनलै थुङ्बो। 24आलै येसुई ख्युकाङ्मोः र्वाबो, “अन रेनरुपा सार्बान ङन कह जेङ्पा, कन पापीवन तीपा माफ खेचेन भिह्तु फ्यानान। ङन कह सुई परमेस्वरन रेनरुग कप्नान।#प्रस २४:८; यर ३१:३१-३४ 25तेम्माई, ङा ङेनकाङ्मोः र्वाचे, ङा अङ्गुरन खुलम अन दिन्न बेर थुङ्नान मह्या, हातौन बेर परमेस्वरन राज्यग अन सार्बा खेखे मथुङ।” 26आलै भजन्न धेनदी धेधे ख्यु गेग्गे जैतून धुरीक्याँ होई।
येसुई पत्रुसन अस्वीकारन भबिस्यबानी खेँ
(मत्ती २६:३१-३५; लुक २२:३१-३४; यूह १२:३६-३८)
27येसुई ख्युकाङ्मोः र्वाबो, “ङेनकाङ्मोः पुरू छान ङा ख्योवाख्योवा ज्यार्नान ङ्याह्, तैङर्वाङिन झाम पबित्रसास्त्र सर्पा ङ्याह्, ‘परमेस्वरजै ग्वाल्या सन्नान ङ्याह्, रे लूपाव खातत्त्याग वैनान ङ्याह्।’#जक १३:७ 28जेङ्नै सम्पु राह्राह् च्याङ्मी ङा ङेनकाङ्मोः खेरे ङू गालील वैनान ङ्याह्।”#मत्ती २८:१६
29पत्रुसजै येसू र्वाबो, “पुरूजै ना ख्योवानै बर्ग ङा हातौयै ख्योवानान मह्या।”
30तब येसुई पत्रुसग र्वाबो, “तेम्माई, ङा ना र्वाचे, त्यानै छानजे काःपा ङेरेप तर्चेन ङू नाई ङा मस्योनान र्वार्वा सुमरेप र्वानान ङ्याह्।”
31जेङ्नै पत्रुसजै झन तोप खेखे र्वाबो, “नान ङ्याबो ङा सिचेरानै कानि ङा ना मस्योनान र्वार्वा हातौयै लबर मर्वा।” आलै पुरू चेलावजै झाम र्वाबो।
गेतसमनीग येसुन सोअताप
(मत्ती २६:३६-४६; लुक २२:३९-४६)
32आलै येसु रे नुन चेलाव गेतसमनी मिह्न्न ठाउँग होई, रे नुई जेँन चेलाकाङ्मोः र्वाबो, “ङा सोअताप्चेन बेर ङेनकाङ्मोः स्यीह्ई छ्योवा कोई।” 33तब नुई पत्रुस, याकूब रे यूहन्ना ङ्याबो वप्पो, रे नू लै आत्ति रह्बो रे मिह्दा तुँलाक्या राम जाःबो। 34नुई ख्युकाङ्मोः र्वाबो, “ङन आत्मा सिनैथाल सम्तुइ आत्ति रह्पा ङ्याह्। ङेनकाङ्मोः सि छ्योवा, रे सापसाप छ्योवा।”#भजन ४२:५
35आलै ङाइ धेरा वैवै येसू सा पो जुबो, रे रातैङिन अन भेला ङनलम ग्याङम रायो र्वार्वा सोअताप्पो। 36आलै नुई सोअताप्पो, “अब्बा, पा, नानलम तैस्याङ पुरू राह्नान। अन दुङालन खोरे ङनलम पह्रा। जेङ्नै ङै सम खेपालैम नङ्पा, नाई सम खेपालैम रायो।”
37येसु ह्याङ स्वातौ चेलाकाङ्मोः आःपा धोबो। नुई पत्रुसग र्वाबो, “सिमोन, तै ना आःपाई छ्युङ्पा ङिह्पाऊ? तै घन्तादी यङ मिबा सास्सै छ्युङ मतैबो यौ?” 38आलै ख्युकाङ्मोः र्वाबो, “सापसाप छ्योवा, आलै सोअताप्चे ख्या, रे ङेनकाङ्मोः छोए सेन्चेग नथेबा। आत्मा ता तेम्माई तयार ङ्याह्, जेङ्नै ल्हो ङारमछेःपा ङ्याह्।”
39येसु ह्याङ ङेरेप वैवै अनै ल्होईव र्वातौ सोअताप्पो। 40ह्याङ स्वास्वा नुई चेलाकाङ्मोः आःपा धोबो, तैङर्वाङिन ख्युन मी मिबाई चुम्पा ङ्याह्, रे नु तै झब बिन्चे, अन मरह्बो।
41येसु सुमरेप स्वाबो, रे ख्युकाङ्मोः र्वाबो, “तै ङेनकाङ्मोः हेँ आःआः किम्म खेपा ङिह्पाऊ? ता रह्बो, भेला स्वातबो। सेह्ना, सिमिन ङोह्जो पापीवन ल्हाग पक्राउ थेम्मः जाःपा ङ्याह्। 42च्याँ, वया। सेह्ना, ङा जुङ्मः थेप्नान सिमि स्यीह् रह्म्मै स्वातपा ङ्याह्।”
प्रभु येसु पक्राउ थेम्नन
(मत्ती २६:४७-५६; लुक २२:४७-५३; यूह १८:३-११)
43येसु र्वातौर्वातौ चेला च्योङेपावन बर्ग तीपा यहूदा इस्करियोत तैमेग स्याह् रङ्बो। ङोत्वा पुजारीव, कानुन लन्नान्न सिमिव रे अगुवावजै फेप्पान मोह्ङदी तरवाली रे पेर्गा सस्सै नुन ङ्याबो स्याह् स्वाबो। 44नु पक्राउ थेप्नानजै ख्युकाङ्मोः झाम ती त्हा बिम्पा ङ्याह्, “सू ङा मोई खेनान, अन सिमि नुई येसु जेङ्पा, नु पक्री ख्या रे ल खेखे होरा।”
45आलै यहूदा स्वाबो, रे तुरुन्तै येसु रह्म्म वैवै र्वाबो, “हे रब्बी,” रे नू मोई खेबो। 46तब ख्युई येसू जुङ्बो रे गिरफ्तार खेबो। 47स्याह् रह्म्म थाङ्थाङ् छ्युङ्पाकाङ्मोः बर्ग कान तीपाई तरवाली छ्युछ्यु प्रधान पुजारीन राङ्पा फ्याङ्बो रे नुन ती नाम्ज्योवा च्वात्त थुम्बो।
48येसुई ख्युकाङ्मोः र्वाबो, “तै ङेनकाङ्मोः च्यापादीग लैम तरवाली रे पेर्गा यङ सस्सै जुङ्मः स्वापा जेङ्पौ? 49एकुरो आराधनालयग लन्तौ ङा ङेनकाङ्मोः ङ्याबो ङ्याह्, रे ङेनजै ङा पक्री मखेबोयौ। जेङ्नै पबित्रसास्त्रन केह्ः पुरा राःयो।”#लुक १९:४७; २१:३७
50आलै चेलाव पुरू येसू ख्योवाख्योवा ज्यार्बो।#भजन ८८:१८
51आलै ती छबा जेँन चत्यापा ल्होग ती सुतीन घोलाङ गोन्तौ नुन ङिक जाःबो। रे सिमिवजै नु जुङ्बो, 52जेङ्नै घोलाङ ख्योवाख्योवा अन चत्यापा ज्यार्बो।
येसु यहूदी महासभान ङू
(मत्ती २६:५६-६८; लुक २२:६६-७१; यूह १८:१२-१३; १८:१९-२४)
53तब ख्युई येसु प्रधान पुजारीन ङ्याबो वप्पो; रे स्याह् पुरू ङोत्वा पुजारीव, कानुन लन्नान्न सिमिव रे अगुवाव जोम्पा ङ्याह्। 54पत्रुस चन ग्याङमलै प्रधान पुजारीन यिमन ख्यामन झिङ नुन ङिङि जाःबो, आलै स्याह् सिपाहीकाङ्मोः ङ्याबो छ्युङछ्युङ नु मेह् धेम जाःबो। 55ङोत्वा पुजारी रे यहूदी जोम्पा पुरूजै येसू सच्चेन भिह्तु नुन बिरोध साँचि फाप्पो, जेङ्नै तये मदेप्पो। 56लैजे नुन बिरोध लबारन साँचि बिम्बो, जेङ्नै ख्युई बिम्पा बयान च्योआलैम मरह्बो।
57कान-कानजै च्याङच्याङ नुन बिरोध झाम लबारन बयान बिम्बो, 58“अनजै झाम र्वापा ङ्योअग ताह्बो, ‘सिमिन ल्हाई दोङ्पा अन आराधनालय ङा फ्वानन ङ्याह्, रे बिना ल्हाई दोङ्पा घङ आराधनालय ङा सुमङीग दोङ्नन ङ्याह्’।”#यूह २:१९
59जेङ्नै अनगै ख्युन साँचि च्योआलैम मह्या।
60तब प्रधान पुजारीजै घूँ च्याङच्याङ येसू लोप्पो, “तै नान ङ्याबो तये झब मीपाऊ? अन सिमिवजै नान बिरोध बयान बिम्पा तै जेङ्पा?”
61जेङ्नै येसुई तये मर्वारे छ्युङ्बो, रे झब तये मबिम्बो। ह्याङ प्रधान पुजारीजै नू लोप्पो, “तै ना परमधन्यन ङोह्जो मसिह जेङ्पौ?”
62येसुई र्वाबो, “ङा जेङ्पा, आलै ङेनजै सिमिन ङोह्जो पुरून खेरे सक्ति किम ङिह्पा प्रभुन ल्हा याईपाक्याँ छ्युङ्पा रे पान्नाङन नम्लुन ङ्याबो स्वापा रङ्नान ङ्याह्।”#दान ७:१३; भजन ११०:१
63तब प्रधान पुजारीजै जेँन घोलाङ छ्योनछ्योन र्वाबो, “ङी घङ साँचिव तै त्वाबो? 64ङेनजै लान ल्हुई झपा ता ताह्बो। ङेनकोन सोच तै ङ्याह्?” आलै ख्यु पुरूजै नु सच्चेन धलन स्योरस्योरलैम दोङ्बो।#लेवी २४:१; २४:१६
65ख्युन बर्ग कान-कानजै येसू छिमा पम्म जाःबो, रे नुन मी पत्ति खीखी नू फ्याङ्बो। ख्युई र्वाबो, “ना सुई फ्याङ्बो भबिस्यबानी न।” आलै सिपाहीवजै नु वव्वै ताप्पर फ्याङ्बो।
पत्रुसजै येसू अस्वीकार खेपा
(मत्ती २६:६९-७५; लुक २२:५६-६२; यूह १८:१५-१८; १८:२५-२७)
66पत्रुस पोँ ख्यामग रातौ प्रधान पुजारीन राङ्मावन बर्ग तीपा स्याह् स्वाबो, 67रे पत्रुसग मेह् धेपा रङरङ नु लखे सेनसेन र्वाबो, “ना र्वार्वा येसू नासरीन ङ्याबो ङ्याह्।” 68जेङ्नै नुई झाम र्वाईर्वाई अस्वीकार खेबो, “ना तै र्वानान झाम ल्होई ङा हाकोँ।” आलै नु खोलोः ताह्ङ्राक्याँ होई। आलै काःपा तर्बो। 69राङ्माई थाङथाङ छ्युङ्पावन ङ्याबो ह्याङ र्वाम जाबो, “अन ता ख्युन बर्गन ती जेङ्पा।” 70जेङ्नै पत्रुसजै ह्याङ अस्वीकार खेबो। आलै ङाइलै धेँवछोँ च्याङ्च्याङ छ्युङ्पावजै ह्याङ पत्रुसग र्वाबो, “तेम्माई, ना ख्यु बर्गन ती जेङ्पा, तैङर्वाङिन ना गालीलन सिमि जेङ्पा।”
71जेङ्नै नुई जेँग धिक्कारी खेबो रे रेनरुरु र्वामः जाःबो, “सुन भारेः ङेनकाङ्मोः र्वानान, मन सिमि ङा मस्योनन।”
72आलै तुरुन्तै काःपा ङेरेप तर्बो। रे पत्रुसग येसुई झाम र्वापा ल्होई ह्याका स्वाबो, “कापा ङेरेप तर्चेन ङू नाई ङा मस्योनान र्वार्वा सुमरेप अस्वीकार खेनान ङ्याह्।” आलै मन ल्होईन नावा खेखे नु दाबो।
ទើបបានជ្រើសរើសហើយ៖
मर्क 14: NTKST25
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The New Testament Books in Kaike Language © The Word for the World International and Kaike Translation Project, Nepal, 2025