यूह 8
8
व्यभिचारग जुङ्पा चिमिचा
1जेङ्नै येसु जैतून धुरग होई। 2नु नापपर्मै ह्याङ यरूसलेम आराधनालयग होई, रे सिमिव पुरू नुन स्याह् स्वाबो, रे नु छ्युङ्बो, रे ख्युकाङ्मोः लह्म्बो। 3कानुन लन्नान्न सिमि रे फरिसीवजै ब्यभिचारग जुङ्पा चिमिचादी सप्पो, रे नू घूँ सोल्बो। 4ख्युई येसु र्वाबो, “गुरुज्यू, अन चिमिचा ब्यभिचार खेतौ जुङ्पा। 5कानुनग मोसाई झाःम चिमिचाः लुङ्जै फ्याँ र्वार्वा ङी आग्या बिम्पा ङिह्पा। ङेन अन्न भिह्तु तै र्वानान?”#लेवी २०:१०; कानुन २२:२२-२४ 6जेङ्नै ख्युई नुन छोए सेन्चेन भिह्तु, रे नू आरोप खेतैङिम कि र्वार्वा झाम र्वापा ङ्याह्। येसुई खल्बु क्यापक्याप लाह्ःजुपजै साः सर्बो।
7जेङ्नै जब ख्यु च्याङच्याङ नू लोप्पाई छ्युङ्बो, तब येसुई ख्युकाङ्मोः र्वाबो, “ङेन ङ्याबो सु तीपा मीपा ङिह्पा, नुई अन चिमिचा पहिली लुङ फ्याँयो।” 8आलै ह्याङ खल्बु क्यापक्याप नुई लाह्ःजुपजै साः सर्बो। 9जेङ्नै जब ख्युई अन ताह्बो, तब किमलै वव्वै छ्युम थाल ती-ती खेखे होई, रे येसु मन चिमिचा ङ्याबो तितिमाई लुईबो, आलै अन चिमिचा चन नुन ङू च्याङ्पाई छ्युङ्बो। 10येसुई मन चिमिचा सेनसेन र्वाबो, “ए चिमिचा, ख्यु खाः होई? तै सुई ना धल मबिम्पाऊ?”
11येसुई र्वाबो, “प्रभु, सुई मबिम्बो।” नुई र्वाबो, “ङा यङ ना धल मबिन। वया, आलै ह्याङ तीपा नख्या।”]
येसु, सन्सारन साल्म
12येसुई ह्याङ फरिसीकाङ्मोः र्वाबो, “ङा सन्सारन साल्म जेङ्पा। ङन ङिक जाःनान नातुमा आउजाउ खेनान मह्या, जेङ्नै नुई जिन्दगीन साल्म देन्नान ङ्याह्।”#मत्ती ५:१४; यूह ९:५ 13तब फरिसीवजै नू र्वाबो, “ना जेँनै भिह्तु बयान बिम्पाई ङ्याह्। नान साँचि तेम्मा मराह्नान।”#यूह ५:३१
14येसुई झब बिम्बो, “ङा जेँनै भिह्तु बयान बिन्चे, जेङ्नै ङन साँचि तेम्मा ङिह्पा। ङा स्योःनान, ङा खालै स्वापा जेङ्पा, रे ङा खाः वैपाई ङिह्पा। जेङ्नै ङेन मस्योनान, ङा खालै स्वानान, आथबा खाः वैपाई ङिह्पा। 15ङेन सिमिन सेन्ताँलै न्याय खेनान। ङा सुई न्याय मखेनान। 16ङै न्याय खेङिनै, ङन न्याय तेम्मा राह्नान। तैङर्वाङिन न्याय खेनान ङा तितिमाई मीपा, जेङ्नै ङा ङिह्पा, रे ङा फेन्नान पा ङिह्पा। 17ङेन कानुनगै ङे सिमिन साँचि तेम्मा राह्नान र्वार्वा सर्पा ङिह्पा।#कानुन १९:१५ 18जेँन भारेः ङह् साँचि बिन्नान, रे ङा फेन्नान पाई ङन भारेः बयान बिन्नान।” 19ख्युई नू र्वाबो, “नान पा खाः ङिह्पा?” येसुई झब बिम्बो, “ङेन न ता ङा स्योःनान न पा। ङेनजै ङा स्योपा राङिन ङन पाः र्वार्वा स्योःनान ङ्याह्।”
20अन ल्होईव येसुई यरूसलेमन आराधनालयग लन्तौ भेती काह्नान बकासन रह्म्म र्वापा जेङ्पा। आलै सुई येसू मजुङ्बो, तैङर्वाङिन नुन भेला हेँ स्वापा मह्या।
ङा खाः वैनान ङेन वै मतैनान
21येसुई ह्याङ ख्युकाङ्मोः र्वाबो, “ङा वैचे, रे ङेनजै ङा फान्नान ङ्याह्, रे ङेन जेँन तीपा सिह्नान ङ्याह्। खाः ङा वैनान, ङेन स्वा मतैनान।”
22यहूदी आङ खेनान्न सिमिवजै र्वाबो, “तै नुई जेँग सह्न्नौ? तैङर्वाङिन नुई ‘खाः ङा वैनान ङेन स्वा मतैनान’ र्वाङ।”
23आलै येसुई ख्युकाङ्मोः र्वाबो, “ङेन माह्ःन जेङ्पा। ङा तोन जेङ्पा। ङेन अन सन्सारन जेङ्पा। ङा अन सन्सारन नङ्पा। 24ङै ङेनकाङ्मोः र्वापा, ‘ङेन जेँन तीपा सिह्नान ङ्याह्,’ तैङर्वाङिन ङा नुई जेङ्पा र्वार्वा ङेनजै बिस्वास मखेङिन जेँन तीपा सिह्नान ङ्याह्।”
25ख्युई येसु लोप्पो, “ना सु जेङ्पा?” नुई ख्युकाङ्मोः र्वाबो, “ङा नुई जेङ्पा, कन ङै ङेनकाङ्मोः ङूलै र्वायङ स्वापा ङिह्पा। 26ङै ङेनकोन भारेः र्वाकोए रे न्याय खेकोए लै ङिह्पा। जेङ्नै ङाः फेन्नान तेम्मा ङिह्पा, रे नुनलम ङै तै ताह्पा अनै ल्होई ङा सन्सारग र्वानान।” 27पान भारेः येसुई र्वापा जेङ्पा र्वार्वा ख्युई हामकोबो। 28अन्नकारन येसुई र्वाबो, “जब ङेनजै सिमिन ङोह्जो तोह्ः सोल्नान ङ्याह्, ङा नुई जेङ्पा र्वार्वा ङेनजै हाकोनान ङ्याह्, रे ङा जेँनै आङग तये मखेनान, जेङ्नै पाई लम्पा ल्होईव र्वानान र्वार्वा स्योःनान ङ्याह्। 29ङा फेन्नान ङन ङ्याबो ङिह्पा। नुई ङा तितिमाई ख्योवापा मह्या, तैङर्वाङिन ङा एकुरो नू स्याङ्फान्चेन धोन खेनान।” 30येसुई अन ल्होई र्वातौ ङ्यान्नानव लैःजै नुन लाह्ः बिस्वास खेबो।
तेम्मा ङेनकाङ्मोः स्वतन्त्र खेनान
31येसुई जेँन लाह्ः बिस्वास खेनान यहूदीकाङ्मोः र्वाबो, “ङेन ङन बचनग लुईङिन ङेन तेम्माई ङन चेला जेङ्पा। 32तब ङेनजै तेम्मा तै जेङ्पा अन क्युई राह्नान ङ्याह्, रे तेम्माजै ङेनकाङ्मोः स्वतन्त्र दोङ्नान ङ्याह्।”
33ख्युई येसू झब बिम्बो, “ङ्योअ अब्राहामन सन्तान जेङ्पा, रे चोँन बेर सुई राङ्पा रह्पा मीपा। ‘ङेन स्वतन्त्र राह्नान ङ्याह्’ र्वार्वा कुजुई र्वानान?”#मत्ती ३:९; लुक ३:८
34येसुई ख्युकाङ्मोः झब बिम्बो, “तेम्माई, ङा ङेनकाङ्मोः र्वाचे, सुस्याङ तीपा खेनान नु तीपान राङ्पा जेङ्पा। 35राङ्पा एकुरोभरि यिम मलुईनान, जेङ्नै ङोह्जो चन एकुरो यिम लुईनान।#गला ४:३० 36अन्नकारन ङोह्जोई ङेनकाङ्मोः स्वतन्त्र दोङ्ङिन ङेन तेम्माई स्वतन्त्र राह्नान ङ्याह्। 37ङाः क्युई ङिह्पा, ङेन अब्राहामन सन्तान जेङ्पा। जेङ्नै ङेन ङाः सच्चे फाङ्ङ, तैङर्वाङिन ङन बचनजै ङेन ङ्याबो ठाउँ मदेङ्ङ। 38ङा ङन पाई थम्पा ल्होईन भिह्तु ल्होई र्वानान। जेङ्नै नान पाई र्वापा ल्होई ङेन खेनान।” 39ख्युई नू र्वाबो, “ङ्योअन पा ता अब्राहाम जेङ्पा।” येसुई ख्युकाङ्मोः र्वाबो, “ङेन तेम्माई अब्राहामन सन्तान राङिन ता, ङेनजै अनै धोन खेनान ङ्याह् कन अब्राहामजै खेबो। 40ङै परमेस्वरलम ताह्पा तेम्मा ङेनकाङ्मोः र्वापा ङिह्पा, जेङ्नै चोँ ङेन ङाः सच्चे फाङ्ङ। अब्राहामजै झाःम धोन मखेबो। 41ङेन पाई तै खेपा ङेन अनै धोन खेनान।” ख्युई नू र्वाबो, “ङ्योअग ङेलू केह्पा नङ्पा! ङ्योअन पा तीबाःदि ङिह्पा, नु परमेस्वर जेङ्पा।”
42येसुई ख्युकाङ्मोः र्वाबो, “परमेस्वर ङेन पा राङिन ता ङेनजै ङा मया खेनान ङ्याह्, तैङर्वाङिन ङा परमेस्वरलम स्वापा। ङा जेँनै समजे स्वापा नङ्पा, जेङ्नै नुई ङा फेप्पो। 43ङै र्वापा ङेन तैङ हामकोनान? तैङर्वाङिन ङेनजै ङन केह्ः ङ्यान मतैनान। 44ङेनको जेँन पा सैतान्न जेङ्पा, रे ङेन पान इच्छ्या पुरा खेचे ङन लछे ङ्याह्। मन ता सुरुलै सिमि सन्नान ङ्याह्, रे तेम्मान ङ्याबो नू वास्ता तये मह्या। तैङर्वाङिन नुन स्याह् तेम्मा तये मह्या। जब नुई लबार ल्होई र्वाङ, नु जेँनै स्वभाऊ अन्सार ल्होई र्वानान, तैङर्वाङिन अन लबर्खा जेङ्पा रे लबारन पा जेङ्पा।#प्रे १३:१० 45जेङ्नै ङा तेम्मा र्वानान, आलै ङेन ङा बिस्वास मखेनान। 46ङा तीपान दोसी ङिह्पा र्वार्वा ङेन बर्ग सुई पर्मानित खेतैनौ? तेम्मा ल्होई र्वानान र्वाङिन तैङ बिस्वास मखेनान? 47सु परमेस्वर लम स्वाङ, नु परमेस्वरन बचन ङ्यान्नान। ङेन परमेस्वर लम स्वापा नङ्पा, अन्नकारन ङेन मङ्याङ्ङ।”
येसु रे अब्राहाम
48यहूदीवजै येसू झब बिम्बो, “तै ङ्योअजै अन र्वापा तेम्मा नङ्पाऊ, कि ना सामरी जेङ्पा रे ना मुई सेम्पा ङ्याह्?” 49येसुई झब बिम्बो, “ङाः मुई सेम्पा मीपा, जेङ्नै ङा जेँन पान सम्मान खेनान, रे ङेन ङाः सम्मान मखेँ। 50जेङ्नै ङा ङनै सम्मान मफान्नान, तीपा ङिह्पा सुई महिमा फान्नान रे न्याय खेनान। 51तेम्माई ङा ङेनकाङ्मोः र्वाचे, यदि सुई ङन बचन ङ्याङ्ङिन नु हातौयै सिह्नान मह्या।” 52यहूदीवजै नू र्वाबो, “ता ङ्योअग तेम्माई क्युई रह्पा, नाः मुई सेम्पाई जेङ्पा। अब्राहाम सिह्बो, भबिस्यबक्ताव यङ सिह्बो, जेङ्नै ना र्वाङ, ‘सुई ङन बचन ङ्याङ्ङिन नु हातौयै सिह्नान मह्या।’ 53तै ङ्योअन खेपुल अब्राहामन खेरे ना महान जेङ्पौ? नु सिह्बो, आलै भबिस्यबक्ताव यङ सिह्पा। ना चन जेँगै सु जेङ्पा र्वार्वा दाबि खेनान?” 54येसुई झब बिम्बो, “यदि ङै जेँनै प्रसङ्सा खेङिन ङन प्रसङ्सा भाछ्योवा राह्नान। ङाः महिमा बिन्नान ङन पा ङिह्पा, सू ङेन ‘ङ्योअन परमेस्वर’ र्वाङ। 55ङेनजै नू स्योपा मह्या, जेङ्नै ङा नू स्योःनान। ङा नू मस्योनान र्वाङिन ङा ङेनलैम लबर्खा ठहरी राह्नान ङ्युँ। जेङ्नै ङा नू स्योःनान, रे नुन बचन ङ्यान्नान। 56ङेनकोन खेपुल अब्राहाम ङन दिन रङ्चेन भिह्तु मिह्दा स्याङ्पा ङ्याह्, रे नुई रङ्बो आलै स्याङ्बो।” 57अन्नकारन यहूदीवजै नू र्वाबो, “ना हेँ फेराङसुमथल परा ताप्पा मह्या, रे तै नाई अब्राहामग रङ्पा ङिह्पाऊ?” 58येसुई ख्युकाङ्मोः र्वाबो, “तेम्माई ङा ङेनकाङ्मोः र्वाचे, अब्राहाम केह्पान खेरे ङूलै ङा ङिह्पा।” 59तब ख्युई नू फ्याङ्चे र्वार्वा लुङ चाबो, जेङ्नै येसु पेरपेर आराधनालयलै खोलोः गेग्गे होई।
ទើបបានជ្រើសរើសហើយ៖
यूह 8: NTKST25
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The New Testament Books in Kaike Language © The Word for the World International and Kaike Translation Project, Nepal, 2025
