అపొస్తుయఁ 9
9
సౌలు మారినయి
1సౌలు నీఎఁటి ప్రెబు సిసుయణి అజ్జికిహలితక్కి పాయలితక్కి ఏవణి జీవుతక్కి అజ్జికియలి కజ్జపూజెరతాణ హజ్జహఁ 2ప్రెబు జియ్యుత తాకిని ఆబెలంగ జికెల అయ్యస్క జికెల తంగెకి పాటెహెఁ, ఏవరఇఁ దొస్సహఁ యెరుసలేముతక్కి తచ్చిహిఁ వాహఁ దమస్కు తాణ యూదుయఁ కూడఆని ప్రాతన టాయుగట్టరికి ఉత్రొమిక రాచ్చహియ్యము ఇంజిహిఁ వెచ్చెసి.
3సౌలు హజ్జిమచ్చటి దమస్కు దరి వాహిఁనటి, జిక్కినంగ హాగుటి రో ఉజ్జెడి ఏవణి సుట్టు డీంజితె. 4ఎచ్చెటిఎ ఏవసి తొజ్జొ రీహఁ “సౌలు, సౌలు, నీను ఏనఅకి నన్నఅఁ డొండొకిహింజది ఇంజిహిఁ రో సాడి జోలినయి వెచ్చెసి.”
5“ప్రెబు, నీను అంబఅతి?” ఇంజిహిఁ ప్రెబుఇఁ వెచ్చటి ఏవసి
నాను “నీను హింస కిహిమన్ని జీసుతెఎఁ. 6నింగహ గాడత హల్లము, ఎంబఅఁ నీను ఏనఅఁ కియ్యలి మన్నె ఏది నింగె పుఁణ్బికివిఆనె” ఇంజిహిఁ వెస్తెసి ఇంజిహిఁ రో సొరొ వాతె.
7ఏవణితొల్లె హన్ని మణిసియఁవ ఏ సోరొ వెచ్చెరి సమ్మ అంబఅరి తోంజఆఅతెరి ఇంజహఁ జోలనపల్లెఆతెరి. 8సౌలు తొజ్జొ రీహమచ్చి జాగటి నింగహఁ కణ్క దెత్తివ ఏనఅఁ మెస్సలి ఆడఅతెసి ఇంజహఁ ఏవరి ఈవణి కెయ్యు అస్సహఁ దమస్కుత తచ్చిహిఁ వాతెరి. 9ఏవసి తీని దిన్నతక్కి మెస్సలిఆడఅన కాణలెహెఁ రాంద ఏయు తిన్నఅన, ఏయు గొహఅన మచ్చెసి.
10దమస్కుత అననీయ ఇన్ని రో దోరుఆతి నమ్మకొముగట్టిసి మచ్చెసి. ప్రెబు హపణత అననీయ, ఇంజిహిఁ ఏవణఇఁ హాటలెఎ
ప్రెబు నాను మఇఁ ఇచ్చెసి.
11ఎచ్చెటిఎ ప్రెబు ఏవణితొల్లె ఇల్లెకీఁ ఇచ్చెసి నీను నింగహఁ, తియి మంజమన్ని ఏ సహ్డటి తెయరఆహఁ హల్లము, యూదా ఇన్నణి ఇల్లు తార్సుతసి ఆతి సౌలు పాయిఁ వెన్నము; ఏవసి ప్రాతన కిహీనెసి. 12ఏవసి అననీయ ఇన్ని రో మణిసి బిత్ర వాహఁ, ఏవసి మెస్తెసి త్రాయుఁ లెక్కొ కెస్క ఇట్టమన్నయి మెస్తెసి ఇంజిహిఁ వెస్తెసి.
13ఏదఅఁతక్కి అననీయ ప్రెబు, ఈ మణిసి యెరుసలేముత నీ మహపురు లోకుతక్కి ఎచ్చెక డొండొహిత్తెసి ఇంజిహిఁ హారెఎ లోకు వెస్తని వెచ్చెఎఁ. 14ఇంబఅఁ నీ దోరుత ప్రాతన కిన్నరఇఁ బర్రెతి ఏవసి కజ్జపూజెరంగతాణటి హుక్కొమి పాటహఁ వాతెసి ఇంజిహిఁ వెస్తెసి.
15ఏదఅఁతక్కి ప్రెబు నీను హల్లము, యూదుయఁఆఅతి లోకు నోకిత రజ్జయఁ నోకిత ఇస్రయేలు నోకిత నా దోరు పుఁణ్బికియ్యలితక్కి ఏవణఇఁ నాను హెర్సకొడ్డితెఎ. 16ఈవసి నా దోరు పాయిఁ హారెఎ డొండొయఁ ఓర్హినణి నాను ఏవణఇఁ తొహిఇఁ.
17ఏదఅఁతక్కి అననీయ హజ్జహఁ ఏ ఇల్లు హోడహఁ, ఏవని లెక్కొ కెస్క ఇట్టహఁ సౌలు, తయ్యి నీను వాతి జియ్యుత నింగె తోంజఅయ్యతి ప్రెబు జీసు, నీను కణ్క మెస్సహఁ సుద్దుజీవు పూరఆనిలెహెఁ నన్నఅఁ నీ తాణ పండాంజనెసి ఇంజిహిఁ వెస్తెసి. 18జిక్కిఎ ఏవణి కణ్కటి హిప్పియఁ లెహెఁతఅ రీతు ఎచ్చెటిఎ ఏవసి మెస్తెసి, ఇంజహఁ ఏవసి నింగహఁ బాప్తిసొమి ఓతెసి. 19ఓడె రాంద తింజలిఎ బల్మి పాటెసి.
సౌలు దమస్కుత వెహ్నయి
ఓడె ఏవసి సౌలు దమస్కు తాణ సిసుయతొల్లె కొచ్చెక దిన్నయఁ మచ్చెసి. 20జిక్కి యూదుయఁ కూడఆని ప్రాతన టాయుత జీసు మహపురు మీరెఎసి ఇంజిహిఁ ఏవణఇఁ వెస్సీహిఁ వాతెసి.
21వెచ్చి బర్రెజాణ కబ్బఆతెరి యెరుసలేముత జీసు దోరు పాయిఁ ప్రాతన కిన్నరఇఁ డొండొ కిత్తసి ఈవసిఎ మా? ఏవరఇఁ దొస్సహఁ కజ్జపూజెర దరితక్కి ఓహిఁ హజ్జలితక్కి ఇంబఅవ జికెఎల వాహానెసి ఇంజిహిఁ వెస్సకొడ్డితెరి.
22ఇచ్చిహిఁ సౌలు హారెఎ బల్మి పాటకొడ్డహఁ జీసుఎ క్రీస్తు ఇంజిహిఁ సాక్కి వెస్సీహిఁ దమస్కుత మచ్చి యూదుయఁణి గజిబిజి కిత్తెసి.
23గడ్డు దిన్నయఁ ఆతి డాయు యూదుయఁ ఏవణఇఁ పాయలితక్కి ఒణ్పితెరి 24ఏవరి ఒణ్పుయఁణి సౌలు పుచ్చెసి. ఏవరి ఏవణఇఁ పాయలి ఇంజిహిఁ గాడ దువ్వెరికాణ లాఅఁయఁ మద్దెన కాపు కాచ్చమచ్చెరి. 25ఇంజహఁ ఏవణి సిసుయఁ లాఅఁయ బేల ఏవణఇఁ ఓహి హజ్జహఁ దొడ్వత కుగ్గికిహఁ కోడ్డలెక్కొటి డోఇ రేప్హహఁ ఏవణఇఁ పిట్టొవికిత్తెరి.
సౌలు యెరుసలేముత హన్నయి
26ఏవసి యెరుసలేము వయ్యలిఎ సిసుయతొల్లె కల్హలి ఒణ్పితెసి సమ్మ, ఏవసి సిసు ఇంజిహిఁ నమ్మఅన బర్రెజాణ ఏవణఇఁ అజ్జితెరి. 27ఇచ్చిహిఁ బర్నబా ఏవణఇఁ ఓపకొడ్డహఁ అపొస్తుయఁ తాణ తచ్చిహిఁ వాహఁ, “ఏవసి జియ్యుత ప్రెబుఇఁ మెస్తెసి ఇంజిహిఁ, ప్రెబు ఏవణితొల్లె జోలితెసి ఇంజిహిఁ, ఏవసి దమస్కుత జీసు దోరుత బ్డాయు తొల్లె వెస్తెసి” ఇంజిహిఁ, ఏవరఇఁ నెహిఁకి పుఁణ్బికిత్తెసి. 28సౌలు ఏవరితొల్లె మంజహఁ యెరుసలేము బర్రె రేజిహిఁ ప్రెబు పాయిఁ బ్డాయుతొల్లె వెస్సీహిఁ మచ్చెసి. 29ప్రెబు దోరుత బ్డాయుతొల్లె వెస్సీహిఁ గ్రీసు బాసగట్టి యూదుయఁ జోలిహిఁ మచ్చెరి. ఏవరి ఏవణఇఁ పాయలితక్కి సినికిహిఁ మచ్చెరి. 30నమ్ముగట్టరి ఇదఅఁ పుంజహఁ సౌలుఇఁ కైసరయ ఓహిఁ హచ్చెరి. ఎంబటి తార్సు గాడత పండితెరి.
31ఇంజహఁ యూదుయఁ, గలిలయ, సమరయ, రాజి బర్రె సఙొమి గడ్డు ఏపఆతె. ప్రెబు తాణ అజ్జి, సుద్దుజీవు పాటహఁ హిత్డి ఆహఁ ఏపఆతె.
లుద్ద ఓడె యొప్పె గాడత పేతురు
32ఏ డాయు పేతురు బర్రె గాడతాణ రేజిహిఁ, లుద్ద ఇన్ని నాయుఁత మన్ని మహపురు లోకు దరి వాతెసి. 33ఎంబఅఁ కెస్కకొడ్డయఁ అట్కితి ఆటొ బర్సటి కట్టెలి లెక్కొ ఐనెయ ఇన్ని మణిసి రొఒణఇఁ మెస్తెసి. 34పేతురు “ఐనెయాతొల్లె,” జీసు క్రీస్తు నిన్నఅఁ నెహిఁకియ్యతెసి, నీను నింగహఁ నీ కట్టెలి పర్పుతి పాహ్ము “ఇంజిహిఁ ఏవణితొల్లె వెస్తెసి.” రేటుఎ ఏవసి నింగితెసి. 35లుద్దత, సారోనుత మంజీని లోకు బర్రెజాణ ఏది మెస్సహఁ ప్రెబుఇఁ నమ్మితెరి.
36యొప్పేత తబిత ఇన్ని రో దోరుగట్టి అయ్య మన్నె. దోర్క ఇచ్చిహిఁ “హిఎణి” ఇన్ని అర్దొమి, ఇది ఎచ్చెలవ నెహిఁకమ్మయ కిహిఁ, కర్మగట్టి లోకుణి సయొమి కివితె. 37ఏ బేలత ఏది అంగతక్కి రోగొఆహఁ నెహిఁ హిల్లఅన హాతె. ఏ అయ్యని అంగతి ఏయుతొల్లె నొర్హఁ మేడ గదిత లెక్కొ ఇట్టితెరి. 38లుద్ద యొప్పేతక్కి దరి మన్నె ఇంజహఁ యొప్పేత నమ్ములోకు పేతురు ఎంబఅఁ మన్నెసి ఇంజిహిఁ పుంజహఁ, “బేగి” మా దరి వాము ఇంజిహిఁ రీ మణిసిఇఁ కబ్రు పండ్డితెరి. 39పేతురు నింగహఁ ఏవరితొల్లెవ హచ్చెసి. ఎంబఅఁ హచ్చెటి, మేడగద్దిత ఏవణఇఁ తచ్చిహిఁ వాతెరి. ఎంబఅఁ మన్ని రాండెణి డీహిఁ, దోర్క తమ్మితొల్లె మచ్చటి కుత్తినటి హెంబొరి, తోసిహిఁ ఏవణి దరి నిత్తెరి. 40పేతురు బర్రెజాణతి పంగత పండహఁ మెండకుత్తహఁ ప్రాతనకిత్తెసి. డాయు ఏ పిల్గు బకి వెండహఁ, “తబితా, నింగము!” ఇంజిహిఁ వెస్సలెఎ కణ్క మెస్సహఁ పేతురుఇఁ మెస్సలెఎ నింగహఁ కుగ్గితె. 41ఏవసి ఏదని కెయ్యు అస్సహఁ లెక్కొ నిక్హెసి. ఎంబఅఁ కిత్తి మహపురు లోకు, రాండెణిస్కణి హాటహఁ ఏదని జీవుతొల్లె ఏవస్కకి హిత్తెసి. 42ఈ కబ్రు యొప్పే రాజి బర్రె పుచ్చెరి, హారెఎ గడ్డుజాణ ప్రెబుతాణ నమ్మితెరి. 43పేతురు యొప్పేత సీమోను ఇన్ని తోల్క డాచిహిఁ నెహిఁ కిన్నణి దరి హారెఎ గడ్డు దిన్నయఁ మచ్చెసి.
ទើបបានជ្រើសរើសហើយ៖
అపొస్తుయఁ 9: JST25
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The Jathapu Bible © The Word for the World International and Jathapu Translation Project, Andra Pradesh 2025
