Yelemiya 9
9
1Nenga mtwi wangu nee ni kishima cha mazi,
na mesho yangu nee ni shoko ya meshozi
nangakema kio na mshii,
kwa mbuli ya wantu wangu wakomighwewo.
2Nenga nee niina hantu ha kuikala uko kwe ughongo
ambaho ni hale na wantu wangu.
Shiyo wakweli,
ni wantu wena lufyo.
3Kia mshi wafanyanya kulonga mbuli za lufyo,
watozeshe mbuli za lufyo hewawelela mbuli za kweli.
Zumbe Mulungu aghamba ivi,
“Wantu wangu wataghoshola uhuza kia mshi
na hewakunda kuti imi ni Mulungu lwawe.”
4Kia mng'we aikale na ng'wiae kwa akii,
kwa kuti kia mndughu shiyo mkweli,
kia mntu ana lufyo
na kia mntu ni mmambeza.
5Kia mntu atamuufya ng'wiae,
hekuna hata mng'we mwelonga ukweli,
vyanwa vyawe vihinyighwe kuonga lufyo,
wakitibua wenye kwa kughoshola uhuza.
6Zumbe Mulungu aghamba,
“Waufyana wenye kwa wenye,
na mwe kuufyana kwawe,
wataemela kunitaila imi.”
7Kwa ivyoho Zumbe Mulungu mwena ufung'wa woshe aghamba ivi,
“Neniwang'aze wantu wangu
na kuwazisa mwe mighezo.
Wantu wangu wazaghoshola uhuza
nenighoshole mbwai na awa wantu?
8Vyanwa vyawe ni sa maosa yena sumu,
hevishiwa ni lufyo.
Kia mng'we ashimoea vitana na ng'wiyae,
miya mwe moyo wakwe afanyanya kumuikia mtegho.
9Nishewatoe kwa mbuli ya izi mbuli wazeghoshola?
Nisheihiize nkuu kwe mbali sa inu?
Ni miyo Zumbe Mulungu nilongiewo.”
10Nenikeme na kusininika kwa mbuli ya miima,
nenisininikie hantu hakuishiiza mwe nyika,
kwa kuti yazakaaghaa,
hekuna mwezinkia aho hantu.
Ng'ombe heziivikana vingi zikikema,
madeghe na vizama vizaghuuka hevioneka.
11Zumbe Mulungu aghamba ivi, “Mzi wa Yelusalemu neniugheushe mahuzu,
neniugheushe hemelo ja mbweha
na mizi ya Yuda neniigheushe ughongo,
hantu hashiikalwaho ni mntu yoyoshe.”
12Nee niheuza, “Ivi kweli kuna mntu mwena viugho mwedaha kuzitaila izi mbuli? Zumbe Mulungu amhinyize ndai kunga adahe kubiikila iyo mbuli? Kwai shi izabanighwa na kugheushwa sa ughongo hekuna mntu mwezinka uko?”
13Zumbe Mulungu akahisa, “Ivi vilawiye kwa kuti awa wantu wazaemela kutoza mulomo wangu nawainkawo na kuiva nichelonga, wakaghoshola wavyekunda wo. 14Miya waitile kwa kuwelela fanyanyi ze mwe myoyo yawe, wakaita kwevika mulungu ya Baali sa baba zawe waghosholavyo.” 15Kwa ivyoho, Zumbe Mulungu mwena ufung'wa woshe, Mulungu wa Izilaeli aghamba ivi, “Awa wantu neniwainke nkande zenyeghea waje na mazi yena sumu wavate. 16Neniwaasakanye na mwe mbali washitailazo wo na baba zawe, neniwadughanye na nkondo mpaka niwakome woshe.”
Wantu wa Yelusalemu wataombeza uwambizi
17Zumbe Mulungu mwena ufung'wa woshe aghamba ivi,
“Ntongonyezai mbuli zeita kwelawiya,
muwaitange wavyee wesigiiya waize,
ehe, wavyee wedaha imba maimbo ya ndiyo.”
18Muwaghambe kuti,
“Waize nguzu watiimbile maimbo ya ndiyo,
mesho yeshu yalavye meshozi
na meshozi yaikie mwe nkumbiti zeshu sa mazi.”
19Kwaivikana nkoo uko kwe mzi wa Yelusalemu,
“Welelai, tikomighwevyo!
Tizagewa shoni!
Shuti tiishame inu shi,
kwa kuti nyumba zeshu zizakinywa.”
20Nee niheghamba,
“Teghelezai mbuli ya Zumbe Mulungu ivywi wavyee,
ikalai washu mutegheleze avyelonga.
Wahinyei wandee wenyu kusigiiya,
kia mng'we amhinye ng'wiaye imbo ja ndiyo.
21Kifa chizaingila mwe madiisha yeshu,
na mwe nyumba zeshu,
chizawakoma wana weshu mwe sia
na wabwanga weshu mwe vyengo vya mzi.
22Wantu wafiewo waaiasakane kia hantu,
sa kiugha cha mbolea che mwe ubuwa,
sa mafumba ya mahaagi yaekighweyo ni mweshuma,
hekuna mweyakunganya.
Nee Zumbe Mulungu anighambilevyo nilonge.”
23Zumbe Mulungu aghamba ivi,
“Mwena viugho ashekikombe kwa viugho vyakwe
na mwena nguvu ashekikombe kwa nguvu zakwe
na mwena kiiko ashekikombe kwa mbuli ya icho kiiko chakwe.
24Miya mwekikomba, akikombe kwa kuti aanitaila imi,
kuti imi Zumbe Mulungu nina ukundisho ushinawo kihituhitu,
nighoshola mbuli za kweli na za utaanda.
Kwa kuti, wantu weivyoho nee wenitamila.
Ivyo nee nivyelonga imi Zumbe Mulungu.”
25Zumbe Mulungu aghamba ivi, “Mishi yaaiza ndiho niwatoe woshe wagezighwewo vionda king'wii du, 26yani, Wamisii, Wayuda, Waamoni, Wamoabu na wantu woshe weikala mwe ughongo wemoa madenge. Kwa kuti awa wantu wa izi mbali zoshe hang'we na Waizilaeli hewajiye shogha na imi mwe myoyo yawe.”
ទើបបានជ្រើសរើសហើយ៖
Yelemiya 9: SHBV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The Old Testament in Shambala, @The Word for The World International, and Shambala Language translation. All rights reserved.