Yelemiya 7
7
Yelemia atabilikila mwe nyumba ya Zumbe Mulungu
1Inu nee mbuli yamuiiziayo Yelemia kulawa kwa Zumbe Mulungu ikighamba, 2hita ukagholoke mwe zuvi kulu ja kuingila mwe nyumba ya kunighoshoela mviko ukabiikile ivihi, “Teghelezai mbuli ya Zumbe Mulungu inywi wantu wa Yuda mweingila aha na kumvika Zumbe Mulungu. 3Zumbe Mulungu mwena ufung'wa woshe, Mulungu wa Izilaeli aghamba ivi, ‘Ekai mbuli zenyu mbada muzeghoshola, nee ndiho nimieke muikale haha.’ 4Ekai kualila mbuli za lufyo mukighamba kuti, ‘Kuihozie, inu ni nyumba ya Zumbe Mulungu, inu ni nyumba ya Zumbe Mulungu, ehe ni nyumba ya Zumbe Mulungu!’ ”
5“Kati kwei mukieka sia zenyu mbada na mbuli zenyu mbada na kughoshoeana mbuli ntana sa avyekunda Zumbe Mulungu kia mng'we na nyiae, 6kati mukieka kuwazuumu wagheni, wana wafiiwewo ni wavyazi, wavyee wafiiwewo ni waghoshi wawe na kueka kuwakoma wantu washinawo masa mwe inu shi na mukieka kuvika mulungu mituhu yemibana inywi, 7mukihituka, nenimieke muikale mwe inu shi nawainkayo baba zenyu ighaluke yawe kale na kale.”
8“Welelai ushe, mualila mbuli za lufyo zishimiambizazo. 9Mwaabawa, mwaakoma, mwaaghoshola ukilanga, mwaaghoshola mlape wa lufyo, mwamtutuishiza ubani zumbe Baali na kuvika mulungu mituhu mushitailayo. 10Mughoshola izo mbuli zoshe zeniihiza imi Zumbe Mulungu, vikibinda mutaiza kwegholoka mwe nyumba yangu mukighamba, ‘Hetibulwe ni mbuli mbada yoyoshe.’ 11Ivi, inu nyumba yangu izaghaluka mpanga ya wabavi? Tailai kuti, naaona mbuli zosheni muzeghoshola. 12Hitai kuja Shilo, mwe mzi nashaghulawo aho kale nivikwe, mukawelele icho kihii nawazisacho, kwa mbuli ya uhuza wa wantu wangu wa Izilaeli. 13Muhezaituka mwaaghoshola uwo uhuza wosheni, naalonga na inywi kwa kangi miya hemunitegheleze. Nihezamiitanga hemuniivile. 14Kwa ivyoho, icho nighosholecho kwe mzi wa Shilo, nee ndicho niighoshole nyumba muyevikia na kuialila, nee hantu niminkileho inywi na baba zenyu. 15Nenimighuushe muite na hale sa via nawaghuushavyo wandughu wenyu wa Efulaimu.”
Wantu wataituka watii
16Zumbe Mulungu aanighamba kuti, “Yelemia, ushewavikile awa wantu, usheniiye wala ushenivike kwa mbuli yawe, kwa kuti senikutegheleze. 17Ivi iwe huona mbuli zeghoshoka mwe mizi ya Yuda na mwe sia za Yelusalemu? 18Wana watadodoeza nkuni, waghoshi watasha moto na wavyee watakanda unga kunga wadike mikate kwa mbuli ya mulungu wayeitanga malikia wa kwe lwingu. Vingi waaigeea divai mulungu mituhu kunga wanikweze maya. 19Ivi wamkweza ndai maya? Ivi hemukiumiza wenye na kukigea shoni? 20Kwa ivyoho, imi Zumbe Mulungu mwena ufung'wa woshe naghamba ivi, maya yangu makai neyaituke aha hantu kwa mbuli ya awa wantu na vizama na miti ye nkoi na mbeyu ze mwe shi. Neyaituke sa moto ushidahawo kuzimighwa.”
21Zumbe Mulungu mwena ufung'wa woshe, Mulungu wa Izilaeli aghamba ivi, “Haya ongezai ntogoo zenyu za kuoka ulanga ya ntogoo za kughubika uhuza na nyama zakwe mje wenye. 22Kwa kuti, nihezawalavya baba zenyu mwe shi ya Misii, saawainkile mulomo wowoshe kwa mbuli ya ntogoo za kuokwa na ntogoo ntuhu, 23miya nawaghambila du kuti, wategheleze nivyelonga, nee ndiho niituke Mulungu wawe, wohena waituke wantu wangu. Vingi waghoshole mbuli zoshe sa niwaghambilevyo, kunga mbuli zawe ziite vitana. 24Miya hewanitegheleze wala kuniiva miya wakaituka na utii, wakauya mghongo badala ya kuita mbele. 25Kuanduka mishi baba zenyu wahelawa mwe shi ya Misii mpaka ivi lelo, siteiya kueka kumiaghiziiza watung'wa wangu wateghanyi. 26Miya hewanitegheleze wala kuniiva nichelonga, wakaituka watii na wenihituka kuiko baba zenyu.”
27“Miya ushe iwe Yelemia, ukizawaghambila izo mbuli zoshe, hewakutegheleze, neuwaitange hewakuzumiye. 28Kwa ivyoho waghambile kuti, inywi mumbali mushimuivawo Zumbe Mulungu, Mulungu wenyu wala hemkunda kushundwa. Ukweli heumo mwe vyanwa vyenyu.”
Uhuza utaghoshoka mwe Koongo ja Hinomu
29“Moai sui zenyu inywi wantu wa Yelusalemu, muziashe,
iyai inywi wantu wa Yelusalemu,
imbai maimbo ya ndio mwe miima,
kwa kuti, imi Zumbe Mulungu nizakwewa ni maya,
nizamiemela vigima inywi wantu wangu.”
30“Wantu wa Yuda wazaghoshola uhuza mwe mesho yangu. Wazaika mulungu yawe yeniihia mwe nyumba yangu, waieka ishetame kwa mviko. 31Wazazenga hantu hakulaviiza ntogoo heitangwa Tofesi kwe kitui che mwe koongo ja Hinomu, kunga wawalavye wana wawe wa kibwanga na wa kindee ntogoo mwe moto. Imi sitaila kuwaaghiiza waghoshole ivyoho, wala siifanyanye iyo mbuli mwe mtwi wangu. 32Kwa ivyoho ushe, mishi yaaiza, ijo koongo hewajiitange vingi Tofesi wala Koongo ja Hinomu, newajiitange Koongo ja kuchinjiiza. Newazikiye wantu uko, kwa kuti hekuituke na hantu hatuhu hakuzikiya. 33Maiti zawe neziituke nkande za madeghe ya uko ulanga na vizama vya tundui, hekuoneke mweyashaka. 34Iyo shi neighaluke ughongo. Hekuivikane vuzo jojoshe ja kisheko wala ja nyemi, nyemi za mweteghua wala mweteghulwa mwe mizi ya Yuda na mitaa ya Yelusalemu, kwa kuti shi neiituke heina kintu.”
ទើបបានជ្រើសរើសហើយ៖
Yelemiya 7: SHBV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The Old Testament in Shambala, @The Word for The World International, and Shambala Language translation. All rights reserved.