Yelemiya 11
11
Kilagha chitabanighwa
1Izi nee mbuli Zumbe Mulungu amghambilazo Yelemia, 2“Tegheleza ichi kilagha chivyekunda waghoshole. Vikibinda, uite ukawashimoeze wantu wa Yuda na wa Yelusalemu. 3Ukawaghambile kuti, Zumbe Mulungu, Mulungu wa Izilaeli, aghamba ivi, mntu yoyoshe ashitozaye ichi kilagha chivyekunda, nealanwe. 4Ichi nee kilagha nawainkacho baba zawe nihezawalavya mwe shi ya Misii, shi imemieyo sungu. Naawaghamba waniive na kughoshola mbuli zoshe niwaaghiizezo. Kuti wakighoshola ivyoho, newaituke wantu ywangu, naimi neniituke Mulungu wawe. 5Wakighoshola ivyo niwaaghiizevyo, nenibontoe kilagha nawainkacho baba zawe, kuti neniwainke shi yeozoka kia kintu na yetama kwa kuishiiza, sa viivyo mpaka ivi lelo.”
Nee niheghamba, “Neviituke ivyoho Zumbe Mulungu.”
6Zumbe Mulungu akanighambila, “Bilikila mbuli zoshe nikughambilezo mwe mizi ya Yuda na mwe sia za Yelusalemu. Waghambile wantu wazitegheleze izo mbuli za ichi kilagha na kuzighoshola. 7Kuanduka mishi iyo nihezawalavya baba zawe mwe shi ya Misii, nikakihima kuwakanya wanitegheleze mpaka iji jecha. 8Wo hewaniivile wala kuona kuti iyo mbuli ni yedi, miya wateisiiza kuituka watii na kutongela fanyanyi zawe mbada. Hata ivyoho, naawatoa kwa kushetoza kilagha changu, miya hewachitozize.”
9Zumbe Mulungu akanighambila vingi kuti, “Wantu wa Yuda na wa Yelusalemu wana fanyanyi za kunihituka. 10Wazaughiiza kughoshola uhuza waghosholwawo ni wababa zawe waemelawo kutegheleza mbuli zangu, wazavika mulungu mituhu na kuitumikila. Wantu wa Izilaeli na wantu wa Yuda wazabana kilagha naikacho na baba zawe. 11Kwa ivyoho ushe imi Zumbe Mulungu nitawashunda kuti, neniete vifa washidahavyo kuvinyiika. Hata wanikemee zeze, seniwategheleze. 12Aho nee ndiho wantu wa Yuda na wa Yelusalemu waite kweikemea mulungu yawe wayeokea ubani. Miya iyo mulungu yawe heidahe kuwaambiza mwe iyo mishi ya sungu. 13Wantu wa Yuda wana mulungu yeghenea sa mizi yawe ivyeghenea, waizengie kwa kulaviiza ntogoo kweghenea sa ziivyo sia za Yelusalemu, kangwe wamuokee ubani mulungu Baali mwegea usei. 14Ushe iwe Yelemia, ushewavikile awa wantu, ushewaiiye wala kunisigiiya kwa mbuli yawe, kwa kuti hata wakiniiya wai mwe sungu, seniwaambize.” 15Zumbe Mulungu aghamba ivi, “Wantu niwekundisha hewadaha kuingila mwe nyumba yangu viikituka ni wahuza, mpaka wataghua nyama zilavighwezo kwa mbuli ya ntogoo za kuoka. Nikizawatoa newaniihiwe.” 16Zumbe amiitanga inywi mti wa mzaituni wena mahungo maishi, mzaituni mtana wevyaa matunda yedi, miya ushe, nizawaetea maya ya wankuu wawe kunga waikale sa kintu chihyeecho na kubanika.
17“Zumbe Mulungu mwena ufung'wa woshe amihandieye azamieka mubulwe ni ntogho, kwa kuti inywi wantu woshe wa Izilaeli na wa Yuda muzaghoshola mbuli mbada na kumkweza maya Zumbe Mulungu kwa kumuokea ubani Baali.”
Fanyanyi za kumkoma Yelemia
18Zumbe Mulungu aanighambila fanyanyi zawe kwa kunionyesha ndicho wakighoshola, naimi nikazitaila. 19Nee ni mhozu sa ngoto yeighalwa kwechinjwa, sitaile kuti ubada wefanyanywa ni kwa mbuli yangu. Waghamba kuti, “Netiushenge mti hang'we na matunda yakwe, timkome auke mwe wantu wemoyo, ashefukilwe kale.”
20Nee nihevika, “Zumbe Mulungu mwena ufung'wa woshe, mwelaha kwa kweli, mweighanya myoyo na fanyanyi za wantu, uniambize nione uvyewazisa kihii, kwa kuti masa yangu nizayaeta kwako.”
21Kwa ivyoho, Zumbe Mulungu ana cha kulonga na wantu wa Anasosi wekunda kunikoma na watanighamba, “Usheteghanye kwa zina ja Zumbe Mulungu, tishezakukoma.” 22Zumbe Mulungu mwena ufung'wa woshe aghamba ivi, “Neniwalahe awo wantu! Wabwanga wawe newafiie kwe nkondo, wana wawe wa kibwanga na wa wakindee newafe kwa saa. 23Nizaika mshi wa kuwakoma wantu wa Anasosi, mshi uwo ukibula newafe woshe.”
ទើបបានជ្រើសរើសហើយ៖
Yelemiya 11: SHBV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The Old Testament in Shambala, @The Word for The World International, and Shambala Language translation. All rights reserved.