लुका 24
24
सिवलाम येसु ज्युङडा ओटाव
मत्ती २८:१-१०; मर्कुस १६:१-११; युहन्ना २०:१-१०
1साताका पैला डिन छ्याम छकाल्ने घग्ग नो मेमाराई तयार याझोयो चाव मङ-मङ बासिने बस्त रैडे नोरं खाडरलं याराव। 2नोराई खाडर तर्टाम लुङ फैसिव यारो:ङो। 3हैनि पनि खाडरलं यापसिकं नोराई प्रभु येसुलो ओक्याङ माडैरंये। 4नोरं नो रो:टं अलमल टाडे यालिज़्याव हो बेलाकं मीलङ्ज़ खोर झीने क्वा क्वाइसिव नेबऱ्याङ मीनि नोराई याछ्योकं नेच्याङसिरिव। 5नोरं याछेव, होकाम याछ्यासैये याङा:कं नामलं बलाङ याफुलुप्सिव, होकाम नो मीनी नोरंलाई हैनेडोवरं, “जे ज्युङडा मीलाई सिवराई याखार्ल कडाने जिखिम्ज़्याव? 6नो आलं माले, ज्युङडा टाडे सोडेले। गालीललं ओलेकं येसुये जेलाई कै ओडाच्योव नो चेटैच्यो, 7मानवालो ओज़ा पापी मीराई याकुइटं सुम्पीसिने सोनो क्रुसटं टाङ्गिसिने होकाम सोङलाका ज्युङडा टाडे सोनेज़ ले।” 8नोराई येसुये ओपाङो रो: याचेटोयो।
9होकाम खाडरलाम वोल्डे नोराई नो स्यान्टै टाव रो: एघारजना उसिसरासं सोनो उरुका स्यान्टै मीरंलाई हैयाडोवरं। 10नो मेमारं मरियम मग्डलिनी, योअन्ना सोनो याकुबलो वामा मरियमरं लेवरं। नोरासं लेव उरु मेमाराई पनि आव रो: प्रेरितरंलाई हैयाडोवरं। 11हैनि पनि नोराई आव रो: सोझोज़ हैयावार्ज़्याव ची यावारो होकाम नोराई मापतिरंये। 12हैनि पनि पत्रुस ठर-च्याङसिडे खाडर पो लेवडे ज़ो:नाडे ओर:ङनाव। होकाम घोम लेडे ओर:ङकं मा: पोसिव सुति क्वालो उकुत्रारं याज़ ओरो:ङो। नो घटना र:ङडे नो अचम्ब टाडे ओनाव।
येसु इमाउसला येमलं
मर्कुस १६:१२-१३
13हो छ्याम येसुलो उसिसरंलाम नेबऱ्याङनि यरुसलेमकाम ठोकै एघार किलो मिटर टाडाङ इम्माउस यावारज़्याव नाङ्खारडे नेनाव। 14टाडेखेमो स्यान्टै घटनालो ओबाट्रा नोराई याडोज़्याव। 15नोरं पाङडे छलफल याडोज़्याकं येसु ओल्ज़ नजिकं राडे नोनिसं ओनाव, 16हैनि पनि नोराई यामिलङ येसुलाई मासरे:ने झैसिव लेव।
17येसुये नोरंलाई हैओडोवरं, “जे बावग्यान जेडोकं कडिलो ओबात्रा जेडोज़्याव?”
नोनि जामा डुखि टाडे ठन नेअडीव। 18नो नेबऱ्याङनिलाम क्लोओपासये येसुलाई जबाक ओयोव, “यरुसलेम डुलिडे राडे पनि नला रो: नङ ठा नमसन?”
19येसुये नोनिलाई ओपजोयोनी, “कडि रो:?” नोनि जबाक नेयोव, “नासरतला येसुलो ओबारेलं, येसु टोबो अगमबक्ता लेव परमेस्वरलो सोनो यहुडीरंकाम उरुका मीराई याङाकं ये:न्त सोनो पाङनेटं बनै सक्तिसाली लेव। 20हैनि पनि मुख्या सेवा डोनेरं सोनो गेनेताराई येसुलाई सै:ने डन्ड याने यासुम्पिव होकाम नोलाई क्रुसटं याटाङगिव। 21इस्राएललाई छुट्कारा झैने आवज़ वार्डे गे आस डोडे गेनैज़्याव। आव स्यान्टै रो:रं रा:डे आव घटना ओटाव आछिम सोङला याटा। 22नो बाहेक गेसंका कोइ-कोइ मेमाराई गेलाई अचम्ब झैडे नैसिरं नोरं आछिम छकाल्ने घग्ग खाडरलं यानाव, 23होलं येसुलो ओक्याङ माडैरंये। नोरं राडे गेलाई हैयाडोसिव, ‘गे स्वर्गटा कटंवालरंलाई गेरो:ङोरं, नोराई येसु ज्युङडा याटाडु यावारो।’ 24गेलाम पनि कोइ-कोइ गेनैरं खाडरलं नाडे यार:ङनाव, नलं हो मेमाराई जो स्यानाव हैयावारो हो स्यानावज़ याडैनाव, हैनि पनि येसुलाई मार:ङरंये।”
25येसुये नोनिलाई हैओडोवनि, “ए रो: माबुझिने मीरं जे जियुङ आढङ कम्जोर टाडेले अगमबक्ताराई हैयावारो रो:रं बिस्वास जेम्डोये। 26होकाम ख्रीस्टये आव डुखं डैने सोनो ओमहिमालं नाने आवस्यकमा लेव डोरो?”
27होकाम मोसा सोनो स्यान्टै अगमबक्तारं काम सुरु डाडे ओबारेलं सास्त्रता सर्सिव स्यान्टै रो:राई यामाने नोनिलाई हैओडोवनि
28नोरं जो नाङ्खारलं यानारिज़्याव हो नाङ्खारलो ओछ्योकं याकेनाव। येसु अजं नो नाङखारकाम पनि होडेज़ नाने स्यानाव ओझैसिव। 29हैनि पनि नोनि येसुलाई ऐ वार्डे कर नेडोव, “गिनसंज़ गलेनके, री:म्डे पनि याटारिडु, नम पनि यानुपरिडु।” होकाम येसु नोनिसं लेने वार्डे येसु पनि ज़ी:म्ल उपसिनाव।
30जब येसुये नोरासं ज़्याव याज़्योरिव होकाम येसुये बरे छेन्डे आसिक ओयोव होकाम बरे के:डे नोनिलाई ओयोवनि। 31होकाम नोनि निमिलंङ ओरो:नो, होकाम नोनि येसुलाई नेस:रेव। होकाम येसु नोनि नेङा:काम फ्वाङ ओमा:व। 32नोनि नेपाङ्सिव, “येसु येम्ट गिनसं ओपाङ्क गिनलाई सास्त्रता ओमाने खुलिडे ओयासिकं गियुङलं जोस ओराव माङ्क डोरो?”
33नोनि होपान्त्राज़ ठार-ठर च्याङसिडे यरुसलेमडे नेवोलो, होकाम एघार जना उसिसरं सोनो नोरासं टोबोकं डुप्सिवरंलाई नेडोयोरं, 34होकाम नोरंलाई ऐ नेडोवरं, “प्रभु के डस्साज़ ज्युङडा टाडे ओसोव ची ओलेव-लेव होकाम सिमोन लेवङ ओसतन्सिवज़ ओलेव-लेव।” 35नोनि येमयाला रो:रं सोनो बरे ओके:कं कैजैडे नोनि नेस:रेव हो रो: हैनेडोवरं।
येसु उसिसरं लेवकं ओरो:नो
मत्ती २८:१६-२०; मर्कुस १६:१४-१८; युहन्ना २०:१९-२३; प्रेरित १:४-८
36नोराई आव रो: याडोज़्याकंज़ येसु नोराई याखरलं नाडे ओच्याङसिनाव होकाम हैओडोवरं, “जेलाई सान्ति ओटाकं।”
37नोरं याछेव, होकाम याछ्यासैये याआतिव होकाम, “गे के भुतं आत्मा गेर:ङज़्या” वार्ने यासुन्चीव। 38हैनि पनि येसुये नोरंलाई हैओडोवरं, “जे कडाने छेडे जेआतिज़्याव, होकाम जियुङलं कडाने सङ्खा जेडोज़्याव? 39ङाखङरं, ङाकुइरं गर:ङच्योके, ङाज़ ची, ङालाई छुडे बिचार गोडोच्योके। कडालेकं भुतं आत्मालो ओस्यारं सोनो उरु:रं माटाये, हैनि पनि जे जेर:ङज़्या ङा के लिज़्या।”
40ऐ ओवारो पान्त्रा येसुये नोरंलाई ओखङरं, उकुइरं सतन्डे ओयोवरं। 41हैनि पनि रेङ्डे मापतिने स्यानाव टाडे छक्क याटाकं येसुये नोरंलाई हैओडोवरं, “जेसं आकं ज़्याने ज़्याव उलीज़्यावरो?” 42नोराई याफिनो ङा:लो टोबो उकरी येसुलाई यायोव। 43होकाम नो रैडे येसुये याङाकंज़ ओकोयो।
44येसुये नोरंलाई हैओडोवरं, “जेसं ङालेका ङापाङो पाङरं आवरंज़, होसोनो मोसालो ओसास्त्रटं अगमबक्तारं सोनो भजनलो उकितापटं ङाबारेलं सर्सिव स्यान्टै रो:रं पुराज़ टानेले।”
45सास्त्र गुबुझिरंकं वार्डे येसुये याबुड्डी फैडे ओयोवरं। 46येसुये नोरंलाई हैओडोवरं, “ऐटाव सर्सिवले, ख्रीस्टये डुखं डैने होकाम सोङलाका सिवलाम ज्युङडा टाव परिये, 47होकाम स्यान्टै मीरंलाई येसुलो उमिन्ट पापलाम वोल्ने सोनो पाप छेमालो प्रचार यरुसलेमलाम सुरु टाव परिये। 48जेज़ आव रो:राई यासाचीरं ची। 49ङा ङाबाबुये जेलाई ङायाच्यो वार्डे कबल ओडोवलाई जेलेवङं ङापरी:ङ हैनि पनि रोटं स्वर्गटाम सक्ति जेम्डैया समं जे आव सहरलंज़ लेच्यो।”
येसु याडे स्वर्गडे ओनाव
मर्कुस १६:१९-२०; प्रेरित १:९-११
50होकाम येसुये नोरंलाई बेठानिया समं ओलाङोरं, होकाम उकुइ छेन्डे नोरंलाई आसिक ओयोवरं। 51येसुये नोरंलाई आसिक झाडे ओयोज़्यारंकं येसु नोराईलेवकाम उछुटिव, होकाम रोटं स्वर्गटं ओलाङसिव। 52नोराई येसुलाई ढो डाडे बनै रेङये रेङये यरुसलेमडे यावोलो। 53होकाम नोरं परमेस्वरलो ओप्रसन्सा डाडे प्रार्ठना डोने ज़ी:मलं यालेव।
ទើបបានជ្រើសរើសហើយ៖
लुका 24: NTWMK25
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The New Testament Books in Wale Magar Kham Language © The Word for the World International and Wale Magar Kham Translation Project, Nepal, 2025
