लुका 14
14
येसुये टोबो ठलिव मीलाई ओसोसोमो
1ना:सिने डिन छ्याम येसु टोबो फरिसीराई यासे:रलो उज़ी:मकं काङ ज़्याने ओनाव। मीरं येसुलाई बनै ढ्यान याडे यार:ङज़्याव। 2जलग्रहये ठलिव टोबो मी येसुलो ओङा:कं लेव। 3येसुये न्याम पैने मीरंलाई सोनो फरिसीरंलाई ओपंजोयोरं, “ना:सिने डिन छ्याम याजोर रावरंलाई ससम्ने न्याम अनंसार चाव, सै माचाव?” 4हैनि पनि नोरं गाइगुइज़ मालेरंये, होकाम येसुये नो रोगीलो ओक्याङटं उकुइये छुडे ओसोसोमो होकाम नो मीलाई उपंरिङो। 5होकाम येसुये नोरंलाई हैओडोवरं, “जेकाम काङ्काये कि ओज़ा, कि उयि:ङ ना:सिने डिन छ्याम कुवालं याटे:खे भने होलाई चानोज़ माहायो?” 6होकाम नोराई आव रो:लो ओजंबाकज़ मायोडुरंये।
बुजाउ मी सोनो पाहुना पर्बैने
7भट्यारला राव पाहुनाराई यामान लेवरं चुङने पोटं बिनिडे याचुङज़्याव र:ङडे येसुये नोरंलाई टोबो सात्रो हैओडोवरं 8“बिहेँला भोजलं नङलाई कोइये याखुल्सोनो भने मान डैने पोटं टाचुङङंन। नङ भन्डा घ्योव से:र मीलाई नलं खुल्सिव याले हो। 9नङलाई सोनो हो मीलाई खुल्ने मुख्या मीये राडे हैवार्नेले, ‘आवलाई चुङने पो गोयोके,’ होकाम नङ लाजंमोरनो टाडे स्यान्टैराई भन्डा याछिन्ङ चुङ्नेनंले। 10नङलाई याखुल्सोनो भने नाडे झिन्ङ चुङसिन, होकाम भोजला मुख्या मीये राडे नङलाई हैडानेले, ‘ए ङानै, रोटं नाडे चुङनान।’ नो बेलाकं नङसं ज़्याव ज़्योज़्यावराई याङाकं नमान टानेले। 11कडावार्क जोये ओललाई घ्योव झोयो, नो आलिज़ा टानेले, होसोनो ओललाई आलिज़ा झैने घ्योव टाने ले।” 12होकाम येसुये ओललाई खुल्नेलाई पनि हैओडोव, “नङ री:म्डे सै छकाल्नेका भोजलं नखुलरंकं, ननैरंलाई, नडाज्यु भाइरंलाई, नकुटुमबंरंलाई सोनो ढनी नछिमेकिरंलाई टाखुलरं, मानिके नोराई पनि ओपैचा खुल्डे नङलाई पनि नडोव गुन सोवोल्ड्याने लेर। 13नङ भोजलं नखुलरंकं, गरिब, लुला, लङगरा, अन्डलारंलाई खुलरं, 14होकाम नङ आसिक डैने नले, कडावार्क नोराई नङलाई नडोव गुन मासोवोलडुरं। सहि मीरं सिवलाम ज्युङडा याटाकं नङ आव ये:नलो इनाम डैने नले।”
घ्योव भट्यारलो ओसात्रो
मत्ती 22:1-14
15येसुसं ज़्याव ज़्योज़्यावरंकाम टोबोये येसुलाई हैओडोव, “नो मीके बनै चाव ची, जोये परमेस्वरलो ओराज्यलं भोज ज़्यानेले!” 16होकाम येसुये नोलाई हैओडोव, “टोबो मीये बनै घ्योव रि:म्डेका भट्यार तयार ओझोयो, होकाम भ्यारंलाई उखुलोरं। 17नोये ओनौकरलाई काङ ज़्याने बेलाकं खुल्सिव मीरंलाई ऐ डोर वार्डे हैडाव उपरि:ङो, ‘गराच्योके आबो स्यान्टै तयार लिज़्या।’” 18“हैनि पनि नोराई स्यान्टैये टोबो नास्याव बाहाना याझोयो। पैलाकाये नोलाई हैओडोव, ‘ङा टोबो ये:ङ ल:ङडेङानै, ङा नो र:ङने नाने ची। ङा बिन्ती ङाडो, ङालाई माफ ओटाकं।’” 19“छुटंये हैओवारो, ‘ङा पाँस हल यि:ङरं ल:ङडेङानै, ङा नोराई याये:न जान्चिने नाने ची। ङा बिन्ती ङाडो, ङालाई माफ ओटाकं’।” 20“टोबो छुटंये हैओवारो, ‘ङा बिह्याँ डाडेङानै। हैजैडे ङा ङामराडु।’” 21“होकाम नौकरये राडे ओसाहुलाई आव स्यान्टै रो:रं हैओडोव। होकाम साहुये रिसिडे नौकरलाई हैओडोव, ‘सहरला येमयालं सोनो गल्लियालं चानो नान, होकाम गरिबरं, लुलारं, लङ्गरारं, अन्डलारंलाई आलं ज़ी:मलं रैरं।’ 22होकाम नौकरये ओसाहुलाई हैओडोव, ‘अँ नङ हैनवारो स्याव ये:न टाडेले, अजं पनि पो रित्तो लिज़्या।’” 23“साहुये ओनौकरलाई हैओडोव, ‘मुल येमयालं सोनो गल्लियालं नाडे मीरंलाई कर डाडे ज़ी:मलं रैरं, होकाम ङाज़ी:मलं मीरं गब्यालरंकं। 24कडालेकं ङा जेलाई हैङाडाच्यो, खुल्सिव मी भरिरंलाम काङ्काये पनि ङाभट्यारला ज़्याव डारो डैनेमालेरं’।”
ख्रीस्टलो उसिस टाकं फोने ये:
25बनै भ्या मीरं येसुसं यानाज़्याकं, येसुये नोरंलाई वोल्डे ऐओडोवरं, 26“कोइ ङालेवकं राने युङ याडोव भने नोये ओबाबु, वामा, ओज्या, ओज़ारं सोनो ओडाज्युभाइ, ओनाना-बैनीरं सोनो ओल उज्युलो मया ङालाई भन्डा भ्या याडोवखे भने, नो ङासिस माटाडु। 27जो मी उक्रुस घुर्डे ङाछिन्ट मारा, नो ङासिस माटाडु।” 28“जेकाम कोइये टोबो ढरहरा झैने युङ याडोव भने, नो ढरहरा झैने खर्च ङासं लिज़्या सै माले वार्डे ङा:डेज़ चुङडे हिसाब माडोव डोरो? 29मानि नोये जग सुचुन्डे झैडे माखेम्डुवखे भने, र:ङनेराई स्यान्टैये ऐ वार्डे गिल्लैनेलेरं, 30‘आव मीये झैने के यापानो हैनि पनि माखेम्डुवखे।’” 31“काङ्का राजा ची टाकेडं जो छुटं राजासं खप्सिने ओनाकं ओल्स लिज़्याव डस हजार सिफाइँराई नोलो उबिरोडलं राने बीस हजाररासं खप्सिने ङाढु सै ङाम्ढु वार्डे ङाडेज़ चुङडे सल्ला माडोने? 32नोये माढुने यालेखे भने, नो ओझगर्या राजा टाडाङं उलिज़्याकंज़ कैजैडे मिलिने वार्डे ओकटंवाललाई पजोयो परिङने ले। 33हैजैडे जे मड्डे जोये ओल्स लेव स्यान्जाति मारा:व नो ङासिस माटाडु।”
माडारो सापि
मत्ती ५:१३; मर्कुस ९:५०
34“सापि के चाव बस्त ची, सापिलो ओडार मालेखे भने नो कैझैडे डारो टाने? 35नो न गमलाई चाहिये न मललो उठुप्रालाई चाहिये। मीराई नोलाई मील्कैड्योरंये। जोलो ठैने ओना ले, होये ओठोयोकं।”
ទើបបានជ្រើសរើសហើយ៖
लुका 14: NTWMK25
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The New Testament Books in Wale Magar Kham Language © The Word for the World International and Wale Magar Kham Translation Project, Nepal, 2025
