युहन्ना 7
7
येसु सोनो ओभाइरं
1होकाम येसु गालीलयालंज़ उडुलिव, येसुये यहुडियाडे नाने युङ माडोवये, कडालेकं यहुडीराई येसुलाई सै:ने यापान्ज़्याव। 2नो बेलाकं यहुडीराई छाप्रा झैडे यामानिने यापर्ब नजिकज़ ओराज़्याव। 3हैजैडे येसुलो ओभाइराई येसुलाई हैयाडोव, “आव पो रा:डे यहुडिया गनानके, होकाम नङ नोडोज़्याव ये:नरं नसिसराई पनि गर:ङरंकं। 4जो मीये मिन कमैने युङ डोव, होये गुप्तलं ये:न माडोव। नङ आव ये:नरं नोडोज़्या नङ प्रिठीबीलाई सटन।” 5कडालेकं येसुलो ओभाइरं पनि येसुलाई बिस्वास यामडोज़्याव।
6येसुये नोरंलाई हैओडोवरं, “ङा अजं समं ठीकं ङाबेला माराटा, बुरु जेलागिटं के स्यान्टै बेलाज़ ठीकंज़ लिज़्या। 7प्रिठीबीये जेलाई हेला माडाच्योवये, बुरु ङालाई के हेला डाङो, कडावार्क प्रिठीबीये ओडोव ये:न माचाव लिज़्या वार्डे ओबारेलं हैङावार्ज़्या। 8जे आव पर्बलं गनाच्योके। ङा आव पर्बलं ङाम्ना, कडालेकं ङा ङाबेला अजं पुरा माटाटा।” 9नोरंलाई ऐडारंडे येसु गालीललंज़ ओलेव।
येसु छाप्रा बासला पर्बलं
10येसुलो ओभाइरं पर्बलं यानाव येसु पनि सतन्सिडे माङ्क, मो:सिडे ओनाव। 11पर्बलं यहुडी अगंवाराई येसुलाई याखिमज़्याव, होसोनो “येसु काङ लिज़्या?” वार्डे यापजैज़्याव।
12मीराई याखार्ल येसुलो ओबारेलं छलफल ओटारिव। कोइये हैयावार्ज़्याव, “नो चाव मीज़।”
उरुराई हैयावार्ज़्याव, “माङ्क, आव मीये मीरंलाई भ्रमलं पारैज़्यावरं।” 13हैनि पनि यहुडी अगंवाराई याछ्यासैये येसुलो ओबारेलं काङ्का पनि खुल्लालं याम्पाङज़्याव।
पर्बटं येसुलो उसिछ्या
14पर्ब खार्ल येसु प्रार्ठना डोने ज़ी:मलं उपसिव, होकाम सिछ्या ओयोवरं। 15यहुडी अगंवारं अचम्ब टाडे ऐयावारो, “कडिज़ मापरि:डे आवये कैजैडे आडङ बिड्या ओपैसिव?”
16होकाम येसुये नोरंलाई ऐवार्डे जबाफ ओयोवरं, “ङा ङासिछ्या ङामीज़ माङ्क, नोलो ची, जोये ङालाई उपरि:ङसोङो। 17कोइ मीये परमेस्वरलो उइछ्या मानिने युङ याडोवखे भने, ङासिछ्या परमेस्वरङाम सै ङा ङालेवङामज़ नो हो मीये सन्नेले। 18जोये ओल उयुङङाम पाङये, होये ओल ओमहिमा खेमोये, बुरु जोये ओललाई परि:ङनेलो ओमहिमा खिमो, हो सत्य मीज़, होसोनो नोसं छल कपट माटाये। 19कडा मोसाये जेलाई न्याम ओयाच्योव माङ्क डोरो? हैटानि पनि जे काङ्काये पनि नो न्याम जेममानिये। जे कडाने ङालाई सै:ने जेपानसङज़्याव?”
20माहुले मीराई जबाफ यायोव, “नङलाई ज़्या: लागिडेले। काङ्काये नङलाई सै:ने ओपान्सन्ज़्याव?”
21येसुये नोरंलाई जबाफ यारंडे हैओडोवरं, “ङा टोबो अचम्बला ये:न ङाडोव, होकाम जे स्यान्टै आव रो:टं छक्क जिपरिज़्या। 22मोसाये जेलाई खतनालो न्याम याडे नैचेव (हो के, नो मोसाङामके माङ्क, बुरु साखा पुर्खाङाम ची), होटानि पनि जे ना:सिने डिन छ्याम पनि जे मीरंलाई खतना जेजैरंये। 23मोसालो ओन्याम भङ्ग टाटाकं वार्डे कोइ मीये ना:सिने डिनछ्याम खतना याडोवखे भने, ङा टोबो मीलाई यहुडीरं याना:सिने डिनछ्याम पुरा ङाससोमो वार्डे जे ङासं रिस जेडोज़्याव? 24मी र:ङडे माङ्क बुरु चावसं निया डोच्यो।”
होकाम नो ख्रीस्ट रो
25यरुसलेमला कोइ-कोइये मीराई हैयावारो, “होकाम आव नो मी माङ्कडोरो, जोलाई यहुडी अगंवाराई सै:ने यापान्ज़्याव? 26रङ:च्योखेने आवके स्यान्टै मीराई याङा:कंज़ ची पाङज़्या, हैनि पनि नोराई आवलाई कैज़ माडोरंये! सै आवज़ ख्रीस्ट वार्डे यहुडी से:रराई डस्साज़ ठा यासोनो? 27बुरु गेलाई ठा ले, आव मी काङाम ओराव। डस्साका ख्रीस्ट ओराव बेलाकं, नो काङाम ओराव वार्डे काङ्कायेज़ ठा सन्नेमाले।”
28होकाम येसुये प्रार्ठना डोने ज़ी:मलं ओपैज़्यारंकं, कस्सिडे कि:डे हैओडोवरं, “होकाम जे ङालाई डस्साज़ जेसरे:सङ? होसोनो ङा काङाम ङाराव नो पनि जेसन? ङा ङाइछ्याये ङाराव माङ्क ची, बुरु जोये ङालाई उपरि:ङसोङो नो सत्यले। जे नोलाई जेमसरेये, 29बुरु ङा नोलाई ङासरेये, कडालेकं ङा नो लेवङामज़ ङाराव ची, होसोनो नोये ङालाई उपरि:ङसोङो ची।”
30हैजैडे नोराई येसुलाई क्यो:ने यापानो, हैनि पनि काङ्कायेज़ माक्योडुरंये, कडालेकं येसुलो ओबेला अजं ओमराटाव। 31हैनि पनि नला लिज़्याव माहुले मीरं काम भ्या मीराई येसुलाई बिस्वास याडोव। नोराई हैयावारो, “जो बेलाकं ख्रीस्ट रा, होकं आवये ओडोव भन्डा भ्या चिन्नरं होये डोवके डोरो?”
येसुलाई क्यो:ने वार्डे सिफाइँरंलाई यापरि:ङोरं
32माहुले मीराई येसुलो ओरो: याडोज़्याव फरिसीराई याठोयो। होकाम मुख्या सेवा डोने मीराई सोनो फरिसीराई येसुलाई क्यो:ने मन्डिरला पालेरंलाई यापरि:ङोरं।
33येसुये हैओडोवरं, “अजं जामा समं ङा जेसंज़ ङाले, होकाम ङा ङालाई परि:ङने लेवङ नानेङाले। 34जे ङालाई खिम्नेजेले, हैनि पनि ङालाई डैने जेम्ले, होसोनो जोङ ङा ङाले होङ जे जेमराडु।”
35होकाम यहुडीराई या-याज़ हैयावारो, “आव कान्डे नाने ओपान्ज़्याव, होकाम गे आवलाई माडैनेगेले? सै आवये ग्रीकराई याखार्ल चित्राङ पुत्राङ टाडे लिज़्याव यहुडीरं लेवकं नाडे ग्रीकरंलाई पैनेरं ओपान्ज़्याव? 36आवये हैओवार्ज़्याव रो:लो ओमाने कडि? ‘जे ङालाई खिम्ने जेले, हैटानि पनि ङालाई डैने जेम्ले, होसोनो जोङ ङा ङाले, जे जेमराडु’?”
जीबनला भैये ओयोने रि:
37नो पर्ब ओखेमरिव बेलाकं, पर्बलो मुख्या डिनछ्याम, येसु च्याङसिडे कस्सिडे कि:डे ऐओवारो, “कोइ मी रि: याछो भने ङा लेवकं राडे रि: ओओँवकं। 38जोये ङालाई बिस्वास डाङो, सास्त्रये हैओवारो स्यानाव ‘नोलो उयुङलाम जीबन याने भैरं बगिडे पुलुने लेरं’।” 39आव रो: येसुये चोखो आत्मालो ओबारेलं हैओवारो, नो चोखो आत्मा येसुलाई बिस्वास डानेराई डैने लेव। कडालेकं आर्क समं चोखो आत्मा यासिव मालेव, कडालेकं येसुलो ओमहिमा ओमटाटाव।
40आव रो: ठैने कोइ-कोइ मीये हैयावारो, “आवके डस्साज़ अगमबक्ताज़ ओलेवलेव।”
41उरुराई हैयावारो, “आवके ख्रीस्ट ची।” होकाम कोइ-कोइराई हैयावारो, “कडा ख्रीस्ट गालीललाम राने माङ्क डोरो? 42ख्रीस्ट के डाउडलो ओसन्तानलाम सोनो डाउडलो ओनाङखार बेठलेहेमलाम रा वार्डे सास्त्रटं सर्सिव माले डोरो?” 43येसुलो ओकारंनये ऐजैडे मीराई याखार्ल फाटो ओटाव। 44नोरं काम कोइ-कोइराई येसुलाई क्यो:ने यापानो, हैनि पनि काङ्काये पनि येसुलाई माक्योडुरंये।
यहुडी अगंवाराई बिस्वास यामडोव
45होकाम मन्डिरला पालेरं सोनो मुख्या सेवा डोने मीरं फरिसीरं लेवकं याराव। नोराई आवरंलाई हैयाडोवरं “जे नोलाई कडा जेमरै?”
46पालेराई जबाफ यायोवरं, “आव मीये स्यावके खर्कज़ काङ्का मीये पनि मापाङये!”
47फरिसीराई नोरंलाई हैयाडोवरं, “जेलाई पनि मुर्ख ओझैच्योव सै कडि? 48कडा गेसे:ररं सोनो फरिसीरं कोइराई नोलाई बिस्वास डाडेयानैज़्याव डोरो? 49आव माहुले मीरं जोराई न्याम मासनरं, हैटानि पनि नोरं सराप लागिवरं ची।”
50नोरंकाम टोबो निकोडेमस, जो ङाडे टखेप येसुलाई डैने ओनाव, नोये हैओवारो, 51“कडा, गे गेन्यामये ङा:डे मीराई यागोहाई माठैडे, सोनो नोये कडि डाडेनोयो हो मासन्डे नोलाई डोसि ठहरैडुव?”
52नोराई नोलाई जबाफ यायोव, “कडा नङ पनि गालीलला रो? सास्त्र चावसं परि:न, होकाम नङ र:ङने नले, गालीललाम अगमबक्ता मारा।” 53होकाम स्यान्टै याज़ी:म-याज़ी:मडे यानाव।
ទើបបានជ្រើសរើសហើយ៖
युहन्ना 7: NTWMK25
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The New Testament Books in Wale Magar Kham Language © The Word for the World International and Wale Magar Kham Translation Project, Nepal, 2025
