युहन्ना 19
19
येसुलाई क्रुसटं टाङ्गिने डन्ड आग्या
मत्ती २७:१५-३१; मर्कुस १५:६-२०; लुका २३:१३-२५
1होकाम पिलातसये येसुलाई लाङडे कोर्राये पो:वो उपरि:ङोरं। 2होसोनो सिफाइँराई ज़ुलाई गुठैडे पगरि झैडे येसुलाई ओङै:टं यासजाव, होसोनो येसुलाई निलल्याव रङ्गला क्वा याक्वायो, 3होकाम येसुलो ओछ्योकं राडे हैयाडोव, “जडं, यहुडीराई याराजा!” होकाम नोराई येसुलाई लपंटाये झाडे यायोव। 4फरि पाखाडे पुलुडे पिलातसये नोरंलाई हैओडोवरं, “र:ङच्यो, ङा आवलाई पाखाकं जे लेवकंज़ ङारैज़्या, जेलाई हैङाडाच्योज़्या, ङा आवलो ओगल्ति कडिज़ ङाम्डैये।” 5होकाम ज़ुलो पगरि सोनो निलल्याव रङ्गला क्वा क्वाइसिव येसु पाखाडे ओराव, होकाम पिलातसये नोरंलाई हैओडोवरं, “गर:ङच्योके, आव मीलाई!” 6मुख्या सेवा डोने मीरं सोनो चौकिडारराई येसुलाई यारो:ङो, नोराई ऐवार्डे याकि:व, “नोलाई क्रुसटं टाङ्गि, नोलाई क्रुसटं टाङ्गि!” पिलातसये नोरंलाई हैओडोवरं, “जेज़ आवलाई लाङडे क्रुसटं टाङगिच्यो, कडालेकं ङा आवलो कडि ओगल्ति ङामडैये!” 7यहुडीराई नोलाई जबाफ यायोव, “गे टोबो गेन्याम ले, हो न्यामये ओवारो मान्टि आव सिवज़ परिये, कडावार्क आवये ओललाई परमेस्वरलो ओज़ा हैवार्ज़्या।” 8आव रो: ठैडे पिलातस झनज़ बनै ओछेव। 9नो फरि ज़ी:मलं उपसिव होकाम येसुलाई ओपजोयो, “नङ काङा?” येसुये नोलाई कडि जबाफ ज़ मायोवये। 10हैजैडे पिलातसये येसुलाई हैओडोव, “कडा नङ ङासं नम्पाङ? नङलाई रा:ने अढिकार ङाकुइटंज़ ले, होसोनो नङलाई क्रुसटं टाङ्गिने पनि ङाकुइटंज़ले वार्ने नङ नमसंनये?” 11येसुये जबाफ ओयोव, “नङलाई रोटाम मायासिव टावसं ङातर्ट कडि नअढिकार टाने मालेव। हैजैडे ङालाई नकुइटं सुम्पिने मीरं अजं भ्या पापलो डोसि टारंये।” 12होकाम पिलातसये येसुलाई रा:ने बनै कोसिस ओडोव। यहुडीरं ऐवार्डे याकिव, “नङ आव मीलाई नरा:खे भने नङ कैसरलो ओनै माङ्कची। ङा के राजा ची वार्नेरं स्यान्टै कैसरलो उबिरोडलं टारंये।” 13पिलातसये आव रो: ठैडे येसुलाई पाखाडे ओरोयो, होकाम नो “लुङलो पल्याटा” याडोज़्याव (नोलाई हिब्रुङाम गब्बठा डोरंये) निया डोने पोलं उचुङो। 14नो बेला निस्तार पर्बलो तयार टाने डिन लेव। लाका ठोकै बारं बजिव लेव। पिलातसये यहुडीरंलाई हैओडोवरं, “जेराजालाई गर:ङच्योके!” 15नोरं ऐवार्डे याकिव, “नोलाई सै:, नोलाई सै:, नोलाई क्रुसटं टाङ्गि!” पिलातसये नोरंलाई ओपजोयोरं, “कडा ङा जेराजालाई क्रुसटं ङाटाङ्गि?” मुख्या सेवा डोने मीराई जबाफ यायोव, “कैसरकाम उरु गेराजा माले।” 16होकाम नोये येसुलाई क्रुसटं टाङ्गिने नोराई याकुइटं सुम्पिडे ओयोवरं।
येसु क्रुसटं
मत्ती २७:३२-४४; मर्कुस १५:२१-३२; लुका २३:२६-४३
हैजैडे सिफाइँराई येसुलाई जिम्मा यारोयो।
17येसुये उक्रुस ओलज़ घुर्डे खप्परे वार्ने डान्डाटं ओनाव, (जोलाई हिब्रुङाम “गलगठा” डोरंये)। 18नटं नोराई येसुलाई क्रुसटं याटाङ्गिव होसोनो येसुसं उरु नेबऱ्याङनिलाई पनि याटाङ्गिव, टोबोलाई टफडे सोनो टोबोलाई छुटंडे, मान्झलं येसुलाई। 19पिलातसये टोबो डोस चिठी पनि ओसोरो, नो क्रुसटं टाङगिडे ओयोव। नटं एटाव सर्सिव लेव, “नासरतला येसु यहुडीराई याराजा।” 20आबो भ्या यहुडीराई नो यापरिव, कडालेकं येसु क्रुसटं टाङगिसिव पो सहरकाम नजिकंज़ लेव। आव हिब्रुङाम, ल्याटिनङाम सोनो ग्रीक पाङङाम सर्सिव लेव। 21यहुडीराई मुख्या सेवा डोने मीराई पिलातसलाई हैयाडोव, “‘यहुडीराई याराजा’ वार्ने माङ्क, ‘आवये ङा यहुडीराई याराजा ओवारो’ वार्डे सर।” 22पिलातसये जबाफ ओयोवरं, “ङा जो ङासर्खे, ङासर्खे।” 23होकाम सिफाइँराई येसुलाई क्रुसटं याटाङगिरं, होकाम नोराई येसुलो ओक्वा रैडे स्यान्टै सिफाइँरंलाई टभाग टभाग टाने झैडे चार भाग याजोयो। येसुलो ओतर्टा ओक्वा पनि यालाङो, नो क्वा सिउनि मालेव रोङाम मेङा समंज़ र:सिव लेव। 24हैजैडे नोराई या-याज़ हैयावारो, “आव माचीने, होकाम आव काङ्कालो टाने वार्डे गोला गेझाके।” चोखो सास्त्र पुरा गटाकं वार्डेज़ आव ओटाव। “नोराई ङाक्वा या-याज़ याभारं, होसोनो ओतर्टा क्वाटं गोला याझाव।” 25हैजैडे सिफाइँराई आव ये:न याडोव। येसुलो उक्रुसलो ओछ्योकं येसुलो वामा, सोनो वामालो ओबैनी, क्लोपासलो ओज्या मरियम सोनो मरियम मग्डलिनी च्याङसिडे यालिज़्याव। 26येसुये वामालाई सोनो ओल मया ओडोज़्याव उसिसलाई ओछ्योकं च्याङसिडे निलिज़्याव ओरो:ङोनि, होकाम येसुये वामालाई हैओडोव, “आमा, गर:ङके नज़ालाई!” 27होकाम नो उसिसलाई पनि येसुये हैओडोव, “र:ङ, नामा!” नो बेलाकामज़ येसुलो नो उसिसये होलाई उज़ी:मकं ओलाङो।
येसु उसिव
मत्ती २७:४५-५६; मर्कुस १५:३३-४१; लुका २३:४४-४९
28होकाम येसुये स्यान्टै रो: याखेम वार्ने सन्डे चोखो सास्त्र पुरा ओटाकं वार्डे ऐओवारो, “ङालाई रि: याछो।” 29नकं टोबो जालं स्युरो सिर्का नैसिव लेव। होकाम स्युरोलं छिमसिव रुइलो टोबो भु़टुने हिसपलो ओहाङ्गाटं झाडे नोराई येसुलो ओयाकं यालाङड्योव। 30येसुये स्युरो सिर्का ओओँव, होकाम येसुये हैओवारो, “आबो याखेम,” होकाम येसुये ओङै: उझुन्डोयो होकाम ओसं ओफ्याव।
येसुलो ओकोखालं भाला रुपिडे यायोव
31नो छ्याम तयार टाने डिन सुक्रबार लेव। हैजैडे यहुडीराई याना:सिने डिन छ्याम सिव मीराई याक्याङ क्रुसटं रा:ने चाव माटाये वार्डे पिलातसलाई बिन्ती याडोव, होसोनो नोराई याखङ के:ड्यारंडे नोराई यामोरो लाङने वार्डे यानि:व। 32होकाम सिफाइँरं राडे येसुसं क्रुसटं टाङ्गिसिवनि नेखङ याके:ड्योवरं, ङा:डे टोबोलो, होकाम फरि छुटंलो। 33नोरं येसु लेवकं राडे नोराई यारो:ङो, येसुलो ओसं ङा:डेज़ फ्याडे ओलेव होकाम येसुलो ओखङ माके:रये। 34सिफाइँरंकाम टोबोये येसुलो ओकोखालं भालाये ओघोचोयो, होपानाज़ झी सोनो ज़न्ज़ारी ओराव। 35जेलाई बिस्वास गटाकं वार्डे आव र:ङनेये घटना जोस्यानाव ओटाव हैटावज़ गोहाई पाङडेले होकाम नोये नपाङो सत्यज़ ले, होकाम सत्यज़ ङापाङज़्या वार्डे नोये सोनोये। 36“नोलो टोबो उरुज़ क्या:ने माले” वार्ने सास्त्रटा बचन पुरा गटाकं वार्डे आव ओटारिव।#भजनरं ३४:२० 37होकाम फरि छुटं टोठोकं सास्त्रये हैवार्ये, “जोलाई नोराई घोचैडे नैरं, नोराई होलाई र:ङने लेरं।”#जकरिया १२:१०
येसुलाई यागाडिव
मत्ती २७:५७-६१; मर्कुस १५:४२-४७; लुका २३:५०-५६
38होकाम अरिमाठियाला योसेफ, जो यहुडी अगंवाराई याछ्यासैये गुप्तलंया मान्त्रा येसुलो उसिस लेव, नोये पिलातसलाई येसुलो ओक्याङ लाङो ङाडैकं वार्डे बिन्ती ओडोव। पिलातसये गलाङके वार्डे हैओडोव। होकाम नोये राडे येसुलो ओक्याङ ओलाङो। 39ङा:डे रिलं येसुलाई डैनाने निकोडेमस पनि योसेफसं ठोकै तेत्तिस किलोया मुर्र सोनो एलवालो उसिङटाम झैसिव चाव बसैने अत्तर बराईसिव मसला डाडे नकं ओराव। 40ऐजैडे नोनि येसुलो ओक्याङ यहुडीराई गाडिने याचलन मान्टि मङ-मङ बसैने मसलासं सुति क्वाटं नेपोव। 41येसु क्रुसटं ओटाङगिसिव पोलं टोबो बाङ लेव। नो बाङलं खर्कज़ काङ्कालाईज़ मानैसिव टोबो सा:रौ खाडर लेव। 42कडावार्क यहुडीराई तयार टाने डिन लेव, होसोनो नो खाडर पनि नजिककंज़ लेव, होकाम नोराई येसुलाई नो खाडरलंज़ यानोयो।
ទើបបានជ្រើសរើសហើយ៖
युहन्ना 19: NTWMK25
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The New Testament Books in Wale Magar Kham Language © The Word for the World International and Wale Magar Kham Translation Project, Nepal, 2025
