युहन्ना 13
13
येसुये उसिसराई याखङ हुर्डेओयोवरं
1निस्तार पर्बलो ओङा:डेज़ आव प्रिठीबीलाम भासिडे बाबु लेवडे नाने बेला रा वार्ने येसुये ठा ओसोनो, प्रिठीबीला लिज़्याव उमी भरिरंलाई मया डारंडे येसुये आखिर समंज़ मया ओडोवरं। 2होकाम रि:म्डेका ज़्याव ज़्याने बेलाकं सैतानये सिमोनलो ओज़ा यहुडा इस्करियोतलो उयुङलं येसुलाई सक्यो:ने बिचार ङाडेकामज़ झाडे ओनैड्योज़्याव। 3बाबुये स्यान्टै रो: ओल उकुइटं सुम्पिडेनैड्योव, होसोनो ओल परमेस्वरलो ओतराफङामज़ ओराव ची, होसोनो परमेस्वर लेवडेज़ नारिज़्या वार्ने रो: येसुये सन्डे ओनैज़्याव। 4होकाम येसु ज़्याव ज़्याने पोलाम च्याङसिडे, ओतर्टा ओक्वा पि:डे टोबोकं नैडे टोबो टौल्या ओवाङलं ओमन्ठैसिव। 5होकाम येसुये पराटलं रि: ओठोरो, होकाम उसिसराई याखङ हुर्ने सुरु ओडोव, होकाम ओवाङलं मन्ठैसिडे उलिज़्याव टौल्याये उसिड्योवरं। 6सिमोन पत्रुस लेवकं येसु ओकेरिकं, नोये येसुलाई हैओडोव, “प्रभु, होकाम नङ ङाखङ नुहुर्रिज़्याव रो?” 7येसुये नोलाई जबाफ ओयोव, “ङा कडि ङाझैज़्या नङ आर्क नमसंन, बुरु नङ छिन्डे बुझिनेनले।” 8पत्रुसये येसुलाई हैओडोव, “नङ खर्कज़ ङाखङ हुर्ने माटाये।” येसुये जबाफ ओयोव, “ङा नखङ ङामहुर्ड्यान्खे भने झिन्डे समं नङ ङासिस नम्टाडु।” 9सिमोन पत्रुसये येसुलाई हैओडोव, “ए प्रभु, ङाखङया मान्त्रा माङ्क, ङाकुइ सोनो ङाङै: पनि हुर्ड्याङ।” 10येसुये नोलाई हैओडोव, “हुर्सिव मीलाई ओखङयाज़ हुर्ड्यानि पनि टाये, नो स्यान्टै चोखोज़ ले। जे चोखोज़ जिलिज़्या, हैनि पनि स्यान्टैरंके माङ्क।” 11कडालेकं येसुलाई ढोका यानेलाई येसुये सरे:डे ओनैज़्याव। हैजैडे येसुये हैओवार्ज़्याव, “जे स्यान्टै चोखो जेम्ले।” 12नोराई याखङ हुर्डे खेम्डे ओतर्टा ओक्वा क्वाइसिडे येसु फरि उचुङो। होकाम येसुये नोरंलाई हैओडोवरं, “जे जेसन, ङा जेलागिटं कडि ये:न ङाडोव? 13जे ङालाई ‘गुर सोनो प्रभु’ जेडाङये, नो जे ठीकंज़ हैजेवार्ज़्या, कडालेकं ङा होज़।” 14ङा जिगुरबा सोनो जेप्रभु टाडे पनि जेखङ ङाहुर्ज़्या जे पनि टोबोये छुटंलाई ओखङ हुर्ड्याच्यो, 15कडालेकं ङा जेलाई टोबो ये:न डाडे पैडे ङानैच्यो, होकाम ङा जोस्याव जेलागिटं ङाडोव, जे पनि हैटावज़ डाच्यो। 16सत्य रो: ङा जेलाई हैङाडाच्यो, नौकर ओसाहु भन्डा घ्योव माटाये, होसोनो सोर सठैने सोर परि:ङने भन्डा घ्योव माटाये। 17होकाम जे आव रो: जेसनखे भने सोनो नो जेडोखेभने, जे बनै चाव ये:न डाने मीरं टानेजेले।
18“ङा जे स्यान्टैराई जेबारेलं हैङावार्ज़्याव माङ्क, ङा जोलाई रुजिडेङानै होलाई ङा ङासरे। बुरु सास्त्रता रो: पुरा गटाकं वार्डे आव ओटाव, ‘ङाबरे ज़्यानेयज़ ङालाई लाटैये उठिन्सोङो।’ 19आव टाने भन्डा ङा:डे आर्कज़ ङा जेलाई हैङाडाच्यो, कडालेकं नो ओटारिकं ङा होज़ वार्डे जेलाई बिस्वास गलागिकं। 20डस्साज़ ङा जेलाई हैङाडाच्यो, ‘जोलाई ङा ङापरि:ङज़्या, होलाई ग्रहन डानेये ङालाई पनि ग्रहन डानेले, होसोनो ङालाई ग्रहन डानेये ङालाई परि:ङनेलाई पनि ग्रहन डोवये’।”
येसु ओल ओक्योसिने बारेलं भबिस्यबानी
मत्ती २६:२०-२५; मर्कुस १४:१७-२१; लुका २२:२१-२३
21आव रो: हैओवारो मान्त्रा येसु ओआत्मालं बनै डुखं टाडे सोनो गोहाई याडे हैओवारो, “डस्साज़ ङा जेलाई हैङाडाच्यो, जेकाम टोबोये ङालाई सोक्यो:नेले।” 22येसुये काङ्कालो ओबारेलं हैओवार्ज़्याव वार्डे सङ्खा डाडे उसिसराई या-याज़ यार:ङसिव। 23येसुलो उसिसरं काम येसुये मया ओडोज़्याव उसिस येसुलो ओछ्योकं अडैसिडे चुङडे उलिज़्याव। 24होकाम सिमोन पत्रुसये नोलाई साहान डाडे ओपजोयो, “येसुये आव काङ्कालो ओबारेलं हैओवार्ज़्याव येसुलाई पजै?” 25येसुलो ओछातीटं ऐजैडे अडैसिडेज़ नोये येसुलाई ओपजोयो, “प्रभु, हो काङ्का?” 26येसुये जबाफ ओयोव, “जोलाई ङा बरेलो उकुत्रा छोयेडे ङायो, नो होज़।” होकाम येसुये बरेलो उकुत्रा ओछोयो होकाम नो सिमोनलो ओज़ा यहुडा इस्करियोतलाई ओयोव। 27बरेलो उकुत्रा ओज़्योव पाना सैतान नो लेवटं ओनाव। होकाम येसुये नोलाई हैओडोव, “नङलाई जो डोने लिज़्या, हो चानोज़ गोडोके।” 28येसुये नोलाई कडाने ऐओडोव वार्डे ज़्याव ज़्याने चुङोराई काङ्काये पनि माबुझिरंये। 29कडालेकं कोइ-कोइराई ऐटाव यासुन्चीव, यहुडासं पैसा नैने ठैली लिज़्या, हैजैडे येसुये नोलाई पर्बटा चाहिने सामान गलोङोकं, सै नोये गरिबरंलाई टिगिडा योरं हैओडोज़्याव वार्ने याबुझिव। 30होकाम बरेलो उकुत्रा ओज़्योव पाना यहुडा इस्करियोत होपानाज़ पाखाडे उपुलुव। नो बेलाकं रि टाडे उलिज़्याव।
सा:रौ आग्या
31होकाम नो पाखाडे ओनाव पाना येसुये हैओवारो, “आबो मानवालो ओज़ालो ओमहिमा टाडेले, होसोनो परमेस्वर नोलेवटं महिमीत टाडे ले। 32परमेस्वर मानवालो ओज़ाटं महिमा डैडे यानोयो खे भने परमेस्वरये ओल्सज़ नोलाई महिमीत झैनेले, होकाम परमेस्वरये आव ये:न चानोज़ डोनेले।” 33“ए ङाबाल्खरं, टडेसयाज़ ङा जेसं ङालिज़्या! जे आबो ङालाई खिम्नेजेले, होसोनो यहुडीरंलाई ङा हैङाडोवरं मान्टि, आबो जेलाई पनि हैङाडाच्यो, ‘जोङ ङा ङानाज़्या, जे जेमराडु।’ 34टोबो सा:रौ आग्या ङा जेलाई ङायाच्यो जे टोबोये छुटंलाई मया डाच्यो। जेलाई ङा जोस्यानाव मया ङाडाच्योज़्या, टोबोये छुटंलाई पनि हैटाव मयाज़ डाच्यो। 35होकाम जे टोबोये छुटंलाई मया जेडाखे भने, आवटाम ज़ स्यान्टैये सन्नेलेरं, जे ङासिसरंज़।”
पत्रुसये स्वीकार माडाने बारेलं येसुलो ओभबिस्यबानी
मत्ती २६:३१-३५; मर्कुस १४:२७-३१; लुका २२:३१-३४
36सिमोन पत्रुसये येसुलाई हैओडोव, “ए प्रभु नङ कान्डे नारिज़्याव?” येसुये जबाफ ओयोव, “ङा जोङ ङानारिज़्या, नङ आर्क ङाछिन्ट नमराडु, बुरु झिन्डेके नङ ङाछिन्टज़ रानेनले।” 37पत्रुसये येसुलाई हैओडोव, “प्रभु, ङा आर्कज़ कडा नछिन्ट ङामराडु? नलागिटं ङा ङाज्यु पनि झाने ङाले।” 38येसुये जबाफ ओयोव, “होकाम नङ ङालागिटं नज्यु पनि नजा? डस्साज़ ङा नङलाई हैङाडान, नङ ङालाई सोङखेप इन्कार नम्डाङया समं भाले कोँने माले।”
ទើបបានជ្រើសរើសហើយ៖
युहन्ना 13: NTWMK25
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The New Testament Books in Wale Magar Kham Language © The Word for the World International and Wale Magar Kham Translation Project, Nepal, 2025
