यहुन्ना 4
4
येशु सनर सामरी मेएमा
1यहुन्नातन भ्या येशुले आ सिइयाङ भ्याई आजाएज्यान्या सनर बप्तिस्मा बै यांज्याऔ ऐलेन्या फरिसीयाङै राथटौ। 2(खासल येशुले ओलजै माङडी, तर सिइयाङै बप्तिस्मा रांयोवाङ।) 3जब येशुले ईका आथटौ, ओलं यहूदियाङन फरि गालील वलस्यु रांऔ। 4ओलं सामरीयाला यम ताइस्यु हिनन्या ताहा। 5ओटन ओ सामरीयाला सुखार ऐराढान्या सहरल ताप्रा:औ, ईका सहर याकूबले आज़ा योसेफजन आयांन्या पोल नेराकै परिया।#उत्पत्ति ३३:१९; यहोशू २४:३२ 6ओलं याकूबल भिगोरेई लेऊ। येशु बाकंबाकं थाकिस्यु नका भिगोरेईल वङल आचुङज्याऔक। छ्योअ लाअ ताइस्यु लेऊ।
7ओटन नवाए बेला तोलोअ सामरी मेएमा नल री रेंपरांऔ, येशुले नका मेएमाजन ऐआढोव, “ङाजन री ओव यांङते।” 8नवाए बेला येशुल सिइयाङै सहरल ज्यान्या जन्तु लङनास्यु लेवाङ।
9तब सामरी मेएमाले येशुजन ऐआढोव, “नङ यहूदी ताइस्यु बै ङा सामरी मेएमाल कुईतन कढाई री ओन?” (यहूदीयाङ सामरीयाङस नैज सम्बन्द मानाएरदी।)#एज्रा ४:१-५; नहेम्याह ४:१-२
10येशुले नकाजन ऐआढोव, “नङ परमेस्वरलं बरदान ओटन नङसं री नीन्या रुजन नशईन्या ताहकन नङ नका ल्योङ नीना होला, ओटन नकाले नङजन जिङदा री#4:10 जिबन मारुकिसिन्या बान्या री यांन्वा होला।” 11नका मेएमाले येशुजन ऐआढोव “ओहो गुरु, नङसं री क्योअन्या जा चोखाइ माल्दी, ओटन भिगोरेई बै भ्याई घोलोमन्या लेया। ओटन नङ काङन ना जिङदा री होनन्? 12नैति नङ गे शाखा याकूबतन घिन्या नल्नु? ओले गेजन ईका भिगोरेई आजाएस्यायिउ, ओटन ओलं ओलजै, आदरसन्तान सनर आहार भैसाङ, आभेडा बाख्राङ सोगलै जन्तुले ईकाइ भिगोरेईल री राऔ।” 13येशुले नकाजन जबाक आयोव, “ईका री ओन्या स्वाट्टै रुयाङ फरि ओइन्या लेरा, 14तर जोले ङा ङायान्या री ओव, नका खकै ओइन्या माल्दी। ङा जो री नाजन योंङ, ना नकाल अनन्त जिबनल नाल्ट परिइज्यान्या रील मुलमन ताइन्यालेया!”
15ना मेएमाले ओलजन ऐआढोव, “औ गुरु, ङाजन नाइ री यांङते, ओटन ङा री ताओहङत्या, ओटन इल री रेंप रांन्या ताटाइत्या।” 16येशुले नाजन ऐआढोव, “हिनन्ते, नयोजन खुल्स्यु आङ होन्ते।” 17नका मेएमाले ऐलेऊ, “ङा यो माल्दी।” येशुले नाजन ऐआढोव, “ङा यो माल्दी ऐलेस्यु ठिकै नपान्नु ज्या, 18दानाङभन्या नमी पास गोटा नयो ताइस्यु लेरा, ओटन जो आकअ नङसं लिज्याऔ, ना ब नयो माङडी। नङ ईका सत्य नछ्योङनु।”
19ओटन नका मेएमाले येशुजन ऐआढोव, “औ, नङ अगमबक्ता ज्या ऐलेस्यु ङा ऐसन्ङा। 20ओटन गे पुर्खाङै ईका डान्डाल परमेस्वरलं आराधना रांढोव, ओटन जे यहूदीयाङ ऐलेच्या, कि परमेस्वरलं आराधना ढान्या पो यरुशलेम ज्या।”#ब्यबस्था ११:२९
21येशुले नाजन ऐआढोव, “ऐ मेएमा, ङाजन बिस्वास ढाङते, ना बेला रांज्याया, जब जे न त ईका डान्डाल, न यरुशलेमल बौल आराधना ढान्यालेच्यो। 22जे सामरीयाङ जो आराधना ढोच्यो, ना मासन्चिदी। गे जो आराधना धोई ना गे ऐसन्या दानाङभन्या मुक्ति ता यहूदियाङन रांया।#यशैया २:३ 23तर ना बेला रांज्याया ओ बेला आकाई ज्या, जब मछ्युका आराधना ढान्याङै बौजन आत्मा सनर सत्यतात आराधना धोर। दानाङभन्या ऐटाइन्याई आराधना ढान्या आराधकयाङ झन्जै बौले रोंकौरा। 24परमेस्वर आत्मा हो, ओटन ओलं आराधना ढान्याङै आत्मा सनर सत्यतात आराधना ढान्या ताहा।” 25नका मेएमाले येशुजन ऐआढोव, “ङा ऐसन्ङा, कि मसीह रांन्यालेया (जोजन ख्रीस्ट ऐढासिया), ओटन जब ओ रां तब ओले गेजन सोगलै छेन पानस्याइवा।” 26येशुले नाजन ऐआढोव, “नङसं छ्योङन्या, ङा ओइ ज्या।” 27नवाए बेलाई आ सिइयाङ सहरङन वलस्यु रांवाङ, ओटन ओलं तोलोअ मेएमासकाए आछ्योङज्यान्या रङस्यु अचम्म ताइवाङ। तर नकाङ काङ्काईले ओलजन रामागिन्दुऊ, “नङ नै नरोअनु?” अथाबा “नङ ना मेएमासकाए दानाङ छ्योङज्यान?”
28तब ना मेएमाले आगाग्री बनाएस्यु नङ्गर देए हिनौ, ओटन नाले रुयाङजन ऐआढोवाङ, 29“रांचिते, तोलोअ रुजन खिम्चिते, जोले ङा ङाढान्या सोगलै काम ङाजन आपानस्याङु। नका ख्रीस्ट ता माङडी?” 30तब रुयाङ सहरलन पलिईस्यु येशु ल्योङ हिन्वाङ। 31नवाए बेला सिइयाङै ओलजन ऐढास्यु बिन्ति रांढोव, “रब्बी, कोबाअ ज्यान्या ज्योते।” 32तर येशुले नकाङजन ऐआढोवाङ, “ङासं ज्याऔ नाल्ट ऐटाइन्या ज्यान्या जन्तु लेया, जो जे मासन्चिदी।” 33नैताइस्यु आसिइयाङै रारांल गिन्सिवाङ, “काङ्काङै आकाजन ज्यान्या जन्तु राहोनस्यौ सन् नैति?”
34येशुले नकाङजन ऐआढोवाङ, “ङाजन परिङन्याल इच्छ्या अनुसार ढान्या, सनर बौले ङाजन आयांन्या काम पुरा ढान्या जै ङा जेए हो। 35नैति जे ऐजेमाल्चिऊ, ‘अझै मीनन्या चार मैना बाङ्की लिज्याया, तर ङा जेजन ऐढाच्या, जे जेयेङदेए ब्याएचिते, आब बाली खानन्या बेला रांदा?’ बाली मीन्दा नैताइस्यु खानौ नाल्ट तयार ताइचिते। 36जोले अन दुकौ नकाले ध्यारी डोएवा, ओटन अनन्त जिबनल नाल्ट जाए दुउवा, ओटन वाइन्याङ सनर दुउन्याङ तचोएकै हेसाङरा। 37दानाङभन्या ‘तोलोअले वाइवा, ओटन छुट्टैले खान्वा,’ ऐलेन्या बचन इकातै सत्य ताहा।#मीका ६:१५ 38ङा जेजन ओङ खानौ ङापरिङचिऊ, जोङ जे परिस्रम ढास्युई माल्चिदी अपुऱ्याङै परिस्रम ढास्यु लेरा, ओटन नकाङल परिस्रमला जाए जे डोएस्यु लेच्या।”
39“ङा जो ङाढोङु येशुले ङाजन सोगलै आपानस्याङु” ऐआलन्या नका मेएमाल बयनले गर्दा नका सहरला सामरीयाङ मध्य तबरले येशुल यर्त बिस्वास रांढोव। 40नैताइस्यु जब सामरीयाङ आल्योङ रांवाङ, तब नकाङै येशुजन गेसकाए चुङनते लेस्यु बिन्ति रांढोव, ओटन ओ नेंयोअ नङ चुङौ।
41ओटन येशुल बचनल कारनले अपुर बै भ्याईले ओजन बिस्वास रांढोव। 42रुयाङै ना सामरी मेएमाजन ऐराढोव, “आब नङ नपानन्या छेनले गर्दा गे बिस्वास गेढोयिउ माङडी, तर गे गेईज गेथएन्या कारनले मछ्यु येशु सङ्सारला मुक्तिदाता रैस लेस्यु गे गेसन्यिउ।”
येशुले तोलोअ अढिकारील ज़ाजन आसबेलन्या
43सामरील नेंयोअ आचुङौ छिन्ट येशु नङंन पलिईस्यु गालीलल हिनौ। 44(येशुले ओलजै, बयन आयोव, कि ज्योङ ज्योङमिई देसलं काङ्काई अगमबक्ताल आदर माताइदी।)#मत्ती १३:५७; मर्कुस ६:४; लूका ४:२४ 45जब ओ गालीलल रांऔ, तब येशुले यरुशलेमला निस्तार पर्बल बेलाक जो हादेए ढास्यु लेऊ, ना सोगल काम रांरङौकाले गालीलीयाङै येशुजन स्वागत रांढोव, दानाङभन्या नकाङ बै पर्बल हिनस्यु लेवाङ।#यहुन्ना २:२३
46ओलं छिन्ट येशु फरि गालीलला काना सहरल रांऔ, जोङ येशुले रीजन अङ्गुर रस आजाटौ। कफर्नहुमलं तोलोअ घिन्या हाकिम लेऊ, जोल ल्हेपाज़ा आनाएबोरस्यु लेऊ।#यहुन्ना २:१-११ 47येशु यहूदियालन गालीलल रा:स्यु लेऊ, ऐलेन्या थएस्यु नका येशु ल्योङ हिनौ, ओटन नकाले ङाज़ाजन रा:स्यु सबेलस्याङते ऐलेस्यु येशुजन कफर्नहुम हिनन्या लेस्यु बिन्ति आढोव, दानाङभन्या नकाल ल्हेपाज़ा सिङाई लिज्याऔ। 48येशुले नकाजन ऐआढोव, जे छक्कै ताइन्या सनर अचम्मला कामयाङ जेमारङौ समन काङन बै बिस्वास ढान्या माल्चिदी।#दानियल ४:२ 49ना घिन्या हाकिमले येशुजन ऐआढोव, “औ, ङाज़ा आमासिऊ हादेए जै ङासं रांन्ते।” 50येशुले नाजन ऐआढोव, “हिनन्ते, नज़ा जिङदाइ लिज्याया।” येशुले नकाजन आपानन्या बचन ना रुले बिस्वास आढोव, ओटन आयम लागिऊ। 51ओटन ना आहिनज्याऔक यमलै नकाल नोक्करयाङै नास डोएस्यु नज़ा बान्चिदा ऐलेस्यु रापानस्यौ।
52ओटन नकाले बान्दाङजन नका ख्वाए बेलाकन बेलौ तअसिऊ ऐलेस्यु आगिन्वाङ, नकाङै ऐराढोव, “ज्योलाअ लाअका एक बजेकन नाजन नाएबोरले आराहौ।” 53येशुले ङाजन “न ल्हेपाज़ा बान्चिदा” ऐआढान्या बेलाकन ज्यारैस ऐलेस्यु आबौले आसनौ। ओटन ओल सनर आझिमलाङ सोगलैले बिस्वास रांढोव। 54यहूदियालन गालीलल रा:स्यु येशुले आढान्या नका दोस्रा अचम्मला काम ताहौ।
ទើបបានជ្រើសរើសហើយ៖
यहुन्ना 4: NTSKm25
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The New Testament Books in Sheshi Kham Language ©The Word for the World International and Sheshi Kham Translation Project, Nepal, 2025
