Luka 14
14
Yesu Unopodza Nlume Unogwala
1Umwe nsi wesabatha wakayenda kun'umba yewumwe ntungamili waka ali Mfarisi kunodla zodliwa, baka bakawunlinga. 2Kwaka kuna nlume mbeli kukwe waka akazwimba makumbo nemaboko. 3Yesu wakalebeleka nebazibi benlayo nebaFarisi, eti, “Kumunlayo podza munsi wesabatha, kene aa?”
4Koga bakanyalala. Akawuntola akawumpodza, akawunletja akayenda. 5Akaba eti kubali, “Ndiyani pakati kwenyu, una nkololo kene n'ombe ingati yawila mutshime munsi wesabatha, usingowhoyidusa nekulibilidza?”
6Abazotubula wun'handula ikoku.
Zwitebamisa Nebunhu
7Wakaleba tjifananidzo kubanhu baka bakokewa, paakabona hala kwabo bugalo gupehhugwi, eti kubali, 8“Hapa wakokewa kene nayani kunzano wepiza bukwe, usigale mubugalo gupehhugwi, swiyo kwakokewa nlume unokudziwa kupinda iwe, 9iye wamukoka bubili gwenyu unokohha kukuli eti, ‘Ipa bugalo kunlume whoyu,’ ukomilika wabe nehoni wonogala pabugalo gupasipasi. 10Koga hapa wakokewa, yenda unogala pabugalo gupasipasi, kuti hapa wakukoka ebuya akoti kukuli, ‘Nkwinya, milika unogala kubugalo gupehhugwi’; ndiko kwawunowhokudziwa pakati kwabo bose bagele nawe. 11Wose nhu unozwimilidza unowhotebamisiwa, unozwitebamisa unowhomilidziwa.”
12Wakati kuna baka bawunkoka, “Hapa unatjilayilo kene nzano, usikoke bakwinya babo kene hama dzidzo kene beludzi gugo kene babakidzani babo bakafuma, swiyo bangakokukoka bo, ukakobgwiliziwa zwawabapa. 13Koga hapa unanzano koka bahayi, nezwilema, nebanohudza, nemapofu. 14Nowhokombolegwa ngobe abatotubula kubgwiliza. Koga nowhobgwiliziwa muhhuba lemuka kwebakalulama.”
Tjifananidzo TjeNzano Nkulu
(Matewu 22.1-10)
15Umwe waka aligele ipapo pazodliwa ewha zwinhu izwezwi wakati kuwunli, “Wakakombolegwa nhu unowhodla tjinkwa mubumambo gweNdzimu!”
16Koga Yesu wakati kuwunli, “Umwe nhu wakathama nzano nkulu, akakoka banhu banjinji; 17akatuma nlanda uwe lubaka gwenzano gwatjiswika kuti anoti kubanhu baaka akoka, ‘Tjihhani kose kwalulama.’ 18Koga bose bakakumbila mazwibhatigwa, wekutanga wakati, ‘Ndatenga minda, nditjatongonoyibona; ndokumbila undiyetile mazwibhatigwa.’ 19Umwe akati, ‘Ndatenga n'ombe dzili gumi dzinolima, ndohaka nodzibona; ndokumbila undiyetile mazwibhatigwa.’ 20Umwe akati, ‘Ndatola nkadzi, ndizo andingatubule hha.’ 21Nlanda wakahanduka akalakidza he uwe kose ikoku. Mweni wenzi akamon'wa akati kunlanda, ‘Libilidza uyende mudzizila nemuzidlana dzenzi-nkulu ukoke bahayi nebanohudza nemapofu kose nezwilema, ubuye nabo.’ 22Nekulibilidza nlanda wakati, ‘Tate tjamatilaya tjayetiwa koga kutjina bugalo mun'umba.’ 23He wakati kunlanda, ‘Yenda mumagubhule, nemudziwhuta, mutetedze banhu kuti babuye, n'umba yangu ihhale. 24Ngobe ndomubudza, akuna umwe webalume ibaba bandakakoka unowholabila zodliwa zwangu.’ ”
Ntengo Kuti Ubendhiyiwa
(Matewu 10.37,38)
25Makubungano makulukulu akayenda naye; iye wakatjebuka akati, 26“Hapa nhu ehha kundili, asingaheme tatayi kene mayi, kene nkadzi uwe nebana babe, bakulu babe nebanun'una kene hazwadzi dzidze, ee, kene butjilo gugwe, haangabe ndhiyiwa wangu. 27Kene yani usingasenge tjileyanyo tjitje akanditobela, haangabe ndhiyiwa wangu. 28Ndiyani pakati kwenyu unoti eyemula baka dumba lefulefu lebalindi, akasatanga negala pasi elinga kuti kowundlila bungana, nekuti unanlipo wakalizana kuti ayipedze? 29Hapa atjiyibamba, asingatjatubule yipedza, bose banoyibona banotangisa wunseka, 30beti, ‘Nlume iwhoyu wakatangisa baka akasatubula pedza.’ 31Kene ndiyani mambo, unoti enogwa newumwe mambo, akasitange agala pasi akabhuzwa kuti nebagwi bali zwiwulu zwili gumi angatubula gwisana newunohha nezwiwulu zwili makumi mabili ehanganidzana naye? 32Hapa kusakajalo, unoti atjikulekule, akatumila bamilili benokumbila kunyalala. 33Ndizo ke, kene yani pakati kwenyu usingasiye kose kwaanako haangabe ndhiyiwa wangu.”
Munyu Usitjina n'hingo
(Matewu 5.13; Mako 9.50)
34“Munyu wakanaka; koga hapa walahikigwa nebumunyu gwawo, bumunyu gwawo gungamusidzigwa tjini wali? 35Unobe usakatjifanila mavu kene pakabutitikiwa mpfudze; banhu banowunlaha. Una zebe dzewha, ngaawhe.”
ទើបបានជ្រើសរើសហើយ៖
Luka 14: KTP
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The Word For The World International
