Luka 11
11
Yesu Unodiya Tembezela
(Matewu 6.9-13; 7.7-11)
1Limwe hhuba Yesu waka etembezela ali pagumwe bugalo, akati apedza, umwe webadiyiwa babe wakati, “He, tongotidiyani tembezela, saJohane bo akadiya badiyiwa babe.”
2Akaba eti kubali, “Hapa mutembezela, muti.
“ ‘Tate,
zina lenyu ngaliyengemadziwe.
Bumambo gwenyu ngaguhhe.
3Mutipeni zodliwa zwedu zwemisi nemisi,
4mutiyetileni mazwibhatigwa matjinyo edu, ngobe iswi tjekwedu toyetila mazwibhatigwa ibabo bana milandu naswi; musitinginise mukulikwa.’ ”
5Kakale wakati kubali, “Ndiyani wenyu unankwinya waanganda kuwunli pakati kwebusiku akaswika kuwunli eti, ‘Nkwinya, undi adzime zwinkwa zwitatu; 6ngobe kwaswika nkwinya umugwendo, andina kene zodliwa zwandingawumpa’; 7Iye ekohandula ali mukati eti, ‘Usindidziyidze; nkoba wahhaligwa, imi nebana tatjibelele, andingamuke ndikakupa tjinhu’? 8Ndomubudza kene akalamba muka nentha yekuti unkwinya uwe, koga nentha yekuti unohwelela ekumbila unowhomuka akawumpa tjaanohaka. 9Ndomubudza, kumbilani, mowhopiwa, hakani mowhowana; kokodzani mowhohhuligwa. 10Nhu wose unokumbila unowamutjila, unohaka unowana, newunokokodza unowhohhuligwa. 11Nditate bakatini, pakati kwenyu, bangati mwana wabo ebakumbila whobe, bakawumpa nyoka; 12kene akati ekumbila bumbulu, ibo bakawuwamutjidza mhani? 13Hapa imwi ke, babi, muziba pa bana benyu zwipo zwibuya, ngono Tate benyu bakudzimu banowhopa nebunji gungapani Meya Yakayengemala kuna banokumbila!”
Yesu naBhalazebhule
(Matewu 12.22-30; Mako 3.20-27)
14Wakati etata meyambi yaka ili mbebebe; meyambi ikati yabhuda, nlume umbebebe akalebeleka, banhu bakatjenama. 15Koga bamwe babo bakati, “Unotata meyambi naBhelezebhule, he wemeyambi.”
16Bamwe, bewunlika, bakahaka tjilakidzilo tjinobva kudzimu, kubva kuwunli. 17Koga iye, eziba mikumbulo yabo wakati kubali, “Bumambo gose gwakathubukana gopalala, nen'ha wakathubukana unokolomoka. 18Ngono hapa kuli kuti Satane bo wakathubukana pakati, bumambo gugwe gungama tjini? Ndoleba nentha yekuti mati ndotata meyambi ndihingisa masimba aBhelezebhule. 19Kakale hapa imi nditata meyambi ndihingisa Bhelezebhule, bakololo benyu banodzitata behingisa yani? Ndizo banowhoba batongi benyu. 20Koga hapa kuli lunyala gweNdzimu gwandinohingisa tata meyambi, kobva kuti bumambo gweNdzimu gwatjihha kumuli.”
21“Hapa nlume wakasima, ana mathumo awe ose, edzibilila nzi uwe, nhundu dzidze dzakatjengeteka. 22Koga hapa kubuya wakasima kuwumpinda ewugwisa akawunkunda, unowuntolela mathumo awe aanogalabgwe, ekokuba fumwa iye yose.”
23“Usi kuntha yangu unogwisana nami, usingakubunganye nami unopaladza.”
Bgwilila kweMeyambi
(Matewu 12.43-45)
24“Hapa meyambi yabhuda munhu, inopalama muhango pasina vula ihaka nyaluluka; iti yakuhaya ikoti, ‘Ndowhobgwilila kun'umba yangu kwandakabva.’ 25Hapa ibuya inowana n'umba yakatshwayigwa kakale yakabaakanyiwa. 26Inokotjiyenda inobuya nedzimwe meya dzili kutondeka dzakayipa kuyipinda, dzihha dzingina dzigala mukati; mamo ebupelo enhu iwhoyo anowhoyipa kupinda ekutanga.”
Hanha Kwelebeswa
27Atjalebeleka ikoku, umwe nkadzimayi mubunga wakamilidza whi lile akati kuwunli, “Wakakombolegwa ntumbu wakakusenga nehhamu lawakamwa!”
28Koga iye wakati, “Koga bakakombolegwa banowha dama leNdzimu bekolitjengeta!”
Tjilakidzilo tjaJona
(Matewu 12.38-42)
29Kwakati banhu bakubungana nekuwanda, akatangisa leba eti, “Itjetji tjizekugwana tjibi; tjohaka tjilakidzilo, koga akuna tjilakidzilo tjatjinowhopiwa kuhhe kwetjilakidzilo tjaJona. 30Ngobe saku Jona waka ali tjilakidzilo kubanhu bekuNiniva, Nkololo wenhu unowhoba tjilakidzilo bo kutjizekugwana itjetji. 31Mambokadzi wekuBurwa unowhomuka muhhuba letongewa ana tjizekugwana itjetji akatjiwana nlandu; ngobe wakabuya ebva kubupelo gwehango ewhowha butjenjebvu gwaSolomoni, tjikulu pana Solomoni tjipano. 32Banhu bekuNiniva banowhohha mbeli muhhuba letongewa bena tjizekugwana itjetji bekatjiwana nlandu; ngobe bakahanduka pakusumikila kwaJona, tjikulu pana Jona tjipano.”
Tjedza TjeMbili
(Matewu 5.15; 6.22,23)
33“Akuna nhu unoti abesedzela tjivoneko ekotjisumbika mun'umba ipasi mumavu kene kusi kwetundu, koga unotjitilika pehhugwi kwetjigadziko kuti unongina abone tjedza. 34Hhiho lilo litjivoneko tjembili uwo; hapa hhiho lilo lili bhenyu, mbili uwo wose uhhele tjedza; koga hapa lisi bhenyu, mbili uwo wose uhhele hhalima. 35Ndizo mube nenjele kudze tjedza tjimumuli tjisibve tjiba hhalima. 36Hapa mbili wose ulihhele tjedza, kusina pana hhalima, wose unopenya, sepenya kwetjivoneko tjinomupa tjedza.”
Yesu Unolonga Nlandu BaFarisi neBazibi Benlayo
(Matewu 23.1-36; Mako 12.38-40)
37Akati atjalebeleka umwe Mfarisi akawunkumbila kuti ayende naye kunzi uwe anodla zodliwa; wakayenda akanodla naye. 38Mfarisi iwhoyo wakatjenamisiwa nekuti azotongongula maboko asanhu adla zodliwa. 39Ndizo He wakati kuwunli, “Sangwenu imwi baFarisi mongudza kuhhe kwenkombe nakuhhe kwendilo, koga mukati muhhele kutjebela nebuyipi. 40Imwi zwilengwe! Iye wakayeta kukuhhe atayiye wakayeta kumukati? 41Koga ipani bahayi ikoku kumukati; kose kowhoba kubuyanana kumuli.”
42“Kwakamubangalalila imwi baFarisi! ngobe modusa tjegumi tjemilibo yenthariyo, inonga minti neruwe neyimwe milibo, koga amuna hanya nendulamo neludo gweNdzimu; yezwi ndizo zwamakafanila thama, musingasiye zwimwe zwisayetiwa.”
43“Kwakamubangalalila imwi baFarisi! ngobe moda zwigalo zwakanaka mumasinagogu, nebuyisiwa nelukudzo munhanga dzetengesela. 44Kwakamubangalalila! ngobe monga zwikumbu zwisingabon'we, banhu banoyenda pehhugwi kwazo basingazibe.”
45Umwe webazibi benlayo wakahandula eti, “Ndhiyi, hapa mujalo mobhatisa honi kose naswi bo.”
46Wakati, “Kwakamubangalalila imwi bazibi benlayo bo! nekuti mosengesa banhu mitolo inolema kuyisenga, koga imwi musingayikunhe kene nelunyala gwenyu gun'ompela. 47Kwakamubangalalila, ngobe mobakila zwikumbu zwebalebesambeli bakabulawa nabobatategulu benyu. 48Kubva kuti mubasupi kakale mobvumilana nezwiyeto zwabobatategulu benyu; ngobe bakababulaya, imwi mobakila zwikumbu zwabo. 49Ndizo ke Butjenjebvu gweNdzimu gwakati, ‘Ndowhobatumila balebesambeli nebapositoli, bamwe banowhobabulaya bamwe bakabadziyidza,’ 50kuyetila kuti malopa ebalebesambeli bose, akatebugwa kubva hango ibumbiwa, abhuzwiwe kutjizekugwana itjetji, 51kubvila kumalopa aAbheli kuswika kumalopa aZakhariya, iye wakafila pakati kwetjibeso tjepisila zwibhayilo nen'umba yethempeli. Ee, ndomubudza, anowhobhuzwiwa kutjizekugwana itjetji.”
52“Kwakamubangalalila imwi bazibi benlayo! makadusa tjihhuliso tjeluzibo; mukasangina imwi, mukadzibila ibabo baka bengina.”
53Wakati ebva ipapo, bakwali neBaFarisi bakatangisa wundziyidza zwakalema, bewuntanga kudze alebe zwinhu zwinjinji, 54bakawunteya, kuti bawumbhate muna tjaangaleba.
ទើបបានជ្រើសរើសហើយ៖
Luka 11: KTP
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The Word For The World International
