Johane 13
13
Yesu Unongudza Makumbo eBadiyiwa Babe
1Kwakati hhuba lenzano wePhasika lisanhu laswika, Yesu waka eziba kuti lubaka gugwe gwaswika gwekuti atjibva muhango ayende kunaTate, sekwaaka ada babe baka bali muhango, wakabada kuswika kubupelo.
2Kwakati nelubaka gwetjilayilo, Satane paakabe atjikulonga mumoyo waJudasi Isikariyoti, nkololo waSimoni Isikariyoti kuti awuntengese, 3Yesu, eziba kuti Tate bakawumpa masimba pehhugwi kwezwinhu zose, nekuti wakabva kuNdzimu kakale unowhobgwilila kuNdzimu, 4wakamilika patjilayilo, akambula tjimwe tjezwiyambalo tjapehhugwi akatjibiga ntome, akazwisunga munhunji nejila. 5Eba esa vula mutjidla, akatangisa ngudza makumbo ebadiyiwa babe, ebabuhika nejila laaka akazwisunga nalo. 6Wakaswika kunaSimoni Phethiro, Phethiro akati kuwunli, “He, mondingudza makumbo angu?”
7Yesu wakahandula eti, “Tjandinothama awutotjiziba sangwenu, koga hule kwayikoku unowhotjiwhisisa.”
8Phethiro wakati kuwunli, “Amutowhongudza makumbo angu kene lini.”
Yesu wakawun'handula eti, “Hapa ndisakungudza awuna gobe mundili.”
9Simoni Phethiro wakati kuwunli, “He, kusibe makumbo angu woga, koga mundingudze kose nemaboko nen'holo wangu!”
10Yesu wakati kuwunli, “Wangula haazofanila ngula tjimwe kuhhe kwemakumbo awe, ngobe wakatjena mbili wose, namwi bo makatjena, koga kusi mose.” 11Ngobe waka eziba kuti ndiyani unowhowuntengesa, ndizo akati, “Amuta mose makatjena.”
12Wakati atjibangudza makumbo, atjimbala tjiyambalo tjitje, kakale abgwilila kubugalo gugwe, wakati kubali, “Moziba kuti ndathamani kumuli? 13Mondidana muti Ndhiyi nekuti He, kwakatambunuka, nekuti ndiko kwandili iko. 14Hapa imi, He wenyu neNdhiyi wenyu, ndamungudza makumbo, namwi bo makafanila ngudzana makumbo. 15Ngobe ndamulakidza, kuti namwi bo muyete sekwandayeta kumuli. 16Ndolebesa, ndolebesa, ndoti kumuli, nlanda haata pehhugwi kwabatezi babe, kene iye ntumwa haata pehhugwi kwewakawuntuma. 17Sangwenu meeziba zwinhu izwezwi, makakombolegwa hapa muzwithama.”
18“Anditoleba nekwenyu mose, ndoziba bandakahala. Whoku ndekwekuti whalo dzihhadzisike, ‘Iye wadla tjinkwa tjangu wandihandukila.’ 19Ndomubudza ikoku sangwenu, kusanhu kukayetika, kuti hapa koyetika mugalemoyo kuti Ndimi Iye wandili Iye. 20Ndolebesa, ndolebesa, ndoti kumuli, unowamutjila kene yani wandatuma unowamutjila imi; ne unowamutjila imi unowamutjila wakandituma.”
Yesu Unolebesambeli nekweTengesewa kukwe
(Matewu 26.20-25; Mako 14.17-21; Luka 22.21-23)
21Yesu wakati aleba ejalo, akadziyidzika mumeya, akapa busupi eti, “Ndolebesa, ndolebesa, ndoti kumuli, umwe wenyu unowhonditengesa.”
22Badiyiwa bakalingana, basina lebeswa lekuti unoleba nekwayani. 23Umwe webadiyiwa babe, Yesu waaka eda, waka akanayila pafuba tjaYesu, 24ndizo Simoni Phethiro wakawunkwenya eti, “Utibudze kuti ndiyani waanoleba nekukwe.”
25Ndizo ndhiyiwa iwhoyo wakasedzela pedlo naYesu, akawumbhuzwa eti, “He, ndiyani?”
26Yesu wakahandula eti, “Ndiye iwhoyo wandinowhopa bhemu letjinkwa hapa ndaliseba.” Wakati atjiseba bhemu letjinkwa, akaliswiswa Judasi, nkololo waSimoni Isikariyoti. 27Hule kwetola bhemu letjinkwa, Satane wakangina muwunli. Yesu akati kuwunli, “Tjawunonothama, utjithame nekulibilidza.” 28Sangwenu akuna nhu ipapo wake eziba kuti walebelani ejalo kuwunli. 29Bamwe bakabekumbula kuti, nentha yekuti Judasi waka etjengeta kwama tjemari, Yesu waka ewumbudza kuti, “Tenga zwinhu zwinohakika panzano” kene, kuti ape tjimwe tjinhu kubahayi.
30Ndizo, hule kwewamutjila bhemu, wakabhuda tjinyolotjo, guli busiku.
Nlayo Ntshwa
31Judasi wakati atjibhuda, Yesu akati, “Sangwenu Nkololo weNhu wekudziwa, kakale muwunli Ndzimu unokudziwa, 32hapa Ndzimu ekudziwa muwunli, Ndzimu unowhokudza Nkololo weNhu muwunli tjekukwe, kakale unowhowunkudza tjinyolotjo. 33Ngawana dzangu, ndowhobe namwi kwelubakanyana. Mowhondihaka, sekwandakaleba kubatungamili bemaJuta ngwenu ndoti kumuli, ‘Kwandinoyenda amungahhe ko.’ 34Ndomupa nlayo ntshwa, kuti mudane, sekwandakamuda, namwi bo mudane. 35Banhu bose banowhoziba kuti mubadiyiwa bangu, hapa mudana.”
Yesu Unolebesambeli Landugwa kukwe ndiPhethiro
(Matewu 26.31-35; Mako 14.27-31; Luka 22.31-34)
36Simoni Phethiro wakati kuwunli, “He, moyenda poni?”
Yesu wakahandula eti, “Kwandinoyenda awunganditobele sangwenu, koga mowhonditobela hule kwelubaka.”
37Phethiro wakati kuwunli, “He, nentha yeni ndisingake amutobela sangwenu? Ndowhopila butjilo gwangu ndiyetila imwi.”
38Yesu wakahandula eti, “Unowhopila butjilo gugo uyetila imi? Ndolebesa, ndolebesa ndoti kukuli, gukurume lisanhu lalila, nowhoba wandilandula katatu.”
ទើបបានជ្រើសរើសហើយ៖
Johane 13: KTP
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The Word For The World International
