MIHINGO 5
5
Ananiyasi naSafira
1Kwakati umwe nlume unoyi Ananiyasi nemfumakadzi uwe unoyi Safira, bakatengesa bo tjabaka banatjo. 2Bakatjengelana nemfumakadzi uwe kuti basumbike imwe mari yabakawana, akalesi imwe, akayibiga pamakumbo ebapositoli. 3Koga Phethiro wakati kuwunli, “Ananiyasi, kungentha yeni Satane alawula moyo uwo kuti unyepele Meya Yakayengemala usumbike imwe mari yawawana pakutengesa minda? 4Kati pawabe usanhu wayitengesa yabe isi iyo? Pawayitengesa, yaka isimumasimba awo? Kwakungina tjini ikoku mumoyo uwo? Awuzonyepela banhu, koga wanyepela Ndzimu.” 5Ananiyasi wakati ewha matama iyawa, akawila pasi akafa. Luhlo gukulukulu gukawila bose bakakuwha. 6Bahhuhha bakamilika bakapetelela mbili uwe bakawunsengela kuhhe bakanowumbiganya.
7Hule kwema awa angaba matatu mfumakadzi uwe wakangina asingazibe tjayetikala. 8Phethiro wakawumbhuzwa eti, “Undibudze, ndiwo ntengo wamakatengesa nawo minda?”
Wakahandula eti, “Ee ndiwo.”
9Ndizo Phethiro wakati kuwunli, “Matilani kuti mulangane kudze mulike Meya yaHe? Linga! Makumbo ebanhu bayenda kunobiganya nlume uwo abe pankoba, nawebo banowhokusengela kuhhe.” 10Tjinyolotjo wakawila pasi pamakumbo awe akafa. Bahhuhha bakangina bakawuwana afa bakawunsenga bakanowumbiganya ntome kwenlume uwe. 11Kwakaba nekuhla kukulu mugubungano lose, nemubanhu bose bakawha zwinhu izwezwi.
Bapositoli Banotjidza Banji
12Bapositoli bakayeta zwilakidzilo nemakaabadzo pakati kwebanhu. Bagalimoyo bose baka bali panhu pan'ompela mugutukutu laSolomoni. 13Akuna wakayedza hanganyila nabo, koga baka belingigwa pehhugwi nebanhu. 14Koga ke banogalamoyo baka bepamhidzilika kunaHe nebunji, lukawu gwebalume nebafumakadzi, 15kwakayeta kuti banhu bahhise banogwala mudzizila bakabaladzika pamibhetha nedzinhobo kuti ntuzi waPhethiro, epindazwe, ube pehhugwi kwebamwe babo. 16Banhu bakakubungana bebva kumizi yakakombeledza Jerusalema, behhisa banogwala nebanodziyidziwa nemeyambi, bose bakanaya.
Bapositoli Banodziyidziwa
17Koga mphirisiti nkulu wakamilika nebamwe bose baaka anabo, baka bali bamwe bebaSadusi, balihhele fupa, 18bakasunga bapositoli bakabasa mujele lebanhu bose. 19Koga busiku ntumwa waHe wakahhula mikoba yejele akabadusa, eti, 20“Yendani munoma muthempeli mubudze banhu matama ose ebutjilo igogu.” 21Bakati bewha ikoku, mangwanana ngwanana bakamukila kuthempeli bakanodiya banhu sekwabakalayiwa.
Mphirisiti nkulu nebaaka enabo bakati beswika bakadana lubahhe nemakulukota ose eIsirayeli, bakati bapositoli banotogwa kujele babuyiwe nabo. 22Koga bahingi bakawana jele lakaberabegwa koga abazobawana, bakabgwilila benobudza bakababatuma, beti, 23“Jele taliwana lakaberabegwa kwemalebeswa ose, balindi bakalinda mikoba; koga patahhula mikoba tawana kusina nhu mukati.” 24Nkulu webalindi bethempeli nemphirisiti nkulu nebamwe baphirisiti baka kaabala pabakabikigwa matama akajalo, bakahaya kuti ini tjinowhoyetikala. 25Kukaswika umwe akati, “Lingani! balume bamakamasa mujele bamile muthempeli banodiya banhu.” 26Nkulu webalindi wakayenda nebalindi bakanobuya nabo, besingahingise masimba, nekuti baka behla kuti banhu bangabakhikhitidza nemabgwe.
27Hule kwekusinobe babuya nabo, bakabagadza mbeli kwelubahhe, mphirisiti nkulu akababhuzwa, 28eti, “Atizomukowhomesedza kuti musidiye ngezina ileli, koga imwi mahhadza Jerusalema nezwidiyo zwenyu, kakale mohaka kuti malopa enlume iwhoyu abe pehhugwi kwedu.”
29Phethiro nebamwe bapositoli bakahandula beti, “Takafanila whilila Ndzimu pana kuti tiwhilile banhu. 30Ndzimu wabotate bedu wakamusa Yesu kubafi, wamakabulaya ngekuwunlembeledza patjileyanyo. 31Ndzimu wawumilidzila kuludli gugwe seNtungamili neNtjidzi; kuyetila pa banhu bekuIsirayeli nkoba wehanduka neyetigwa mazwibhatigwa matjinyo. 32Iswi neMeya Yakayengemala Ndzimu yaakapa banhu banoyiwhilila, tibasupi bayizwezwi zwinhu.”
33Bakati bekuwha ikoku bakamon'wa kwazo bekayemula kuti bababulaye. 34Koga umwe Mfarisi waka eyi Gamaliyeli, ali ndhiyi wenlayo, waka elingigwa pehhugwi kwazo nebanhu bose, wakamilika pakati kwabo mulubahhe akalaya kuti balume ibaba badusigwe kuhhe kwelubakanyana. 35Akati kubali, “Balume beIsirayeli, ibani nenjele muna tjamunohaka thama kubalume ibaba. 36Mumahhuba akapinda kwakaba newumwe nlume unoyi Thediyasi, wakazwithama nhu wakwako, banhu bangaba makulu mana bakabhatana naye. Wakabulawa, banhu baka bewuntobela bakapalala, kose kukafuba. 37Hule kukwe kwakabayapo Judasi wekuGalile, mumahhuba ebagwa kwebanhu, akatjebela banhu kuti bawuntobele. Nayiye bo wakabulawa, nebatobeli babe bakapalala. 38Ndizo ke muna iyeyi ndebo yangwenuwali ndomupa mano ekuti; siyanani nebalume ibaba! Mubaletje bayende! Nekuti hapa kuli kuti ndongoloso yabo kene tjabanothama tjobva mubanhu, tjowhokona. 39Koga hapa kuli kuti ndetjeNdzimu, amungabakunde. Mungangozwiwana mugwisana neNdzimu!”
40Bakabvumilana naye. Bakadana bapositoli bakati basukutigwe. Bakababudza kuti basitongolebeleka nekwezina laYesu, bekabaletja bakayenda zwabo. 41Bapositoli bakamilika palubahhe, bakahanha kuti bawanikwa bakafanila kuti babhatisiwe honi nentha yezina laYesu. 42Hhuba nehhuba, baka besingaletje diya nesumikila muthempeli nemudzin'umba kuti Yesu ndiye Khirisitu.
ទើបបានជ្រើសរើសហើយ៖
MIHINGO 5: KTP
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The Word For The World International
