Joni 9
9
Yesu Bure Ndani Nseminji De Su Yapu yi Makapi
1De Yesu ma bise, e geni nseminji daa de su yapu yi makapi. 2Yayagizi yi minya Yesu nkye, <<Male, lepi nseminji mu naba ko nsu adaa yi la, de su yapu yi makapi?>>
3Yesu keleba nkye, <<Nseminji mu ko nsu adaa yi su yi lepi ba,>> <<Sede su yapu yi makapi de Mirikisi e nana sori ANKI yi a kiya e yi la. 4E ma dole na de ni yi ANKI ni Mirikisi de saka ni, tunde tuku nnana, Dederi yaa zo de nseda yaa yi yaa yi ANKI gagaba. 5Tunde Ni ma a siki durinya mu, E ni la ni ma asikye durinya.>>
6A beyi de Yesu pala yomu, e nya anyanya a kisi, e dama anyanya ni kesa, e shapa nseminji makapi ni nshi a ndani. 7Yesu gye nseminji makapi ni nkye, <<Te,>> <<Ki wonkye ndani ke a siki romu riki ni Silom>> de mane yi ma <<Saka.>> Anya ni nseminji ni te wonkye ndani yi, anya ni e kuma ta gizi ndani yi bure e ma geni.
8Dengeri yi nja worede su ma geni Saba zunwa ma pata gyolo, su minya nkye, <<Nseminji mu la de ma zuzunwa ma pata gyolo na bo?>>
9Worosu nkye, <<Ema e shiya,>> sede worosu nkye, <<Yi, e ma e shina ba.>>
Nseminji ni nkye, e ni la ni ma nse ni.>>
10Se su minya yi nkye, <<Ki yi woni na de ndani ke bure de ki ma geni?>>
11Nseminji makapi ni pala nkye, <<Nseminji de su ma sukwa yi Yesu la dama kesa shapa ni nshi a ndani se e gye ni nkye ni te wonkye ndani a riki ni Silom. Ni te wonkye, na ni ma geni anya.>>
12Su minya makapi ni nkye, <<Nseminji ni managa?>>
Makapi ni keleba nkye, <<Ni shina Anya de ma ba,>>
Parisiyawa Sua Binshikye A kiya Ni Worikye Ni Makapi Ni
13Se ntani la nseminji makapi ni te nshi anya Parisiyawa. 14A nana Asibi la Yesu dama kesa de e bure ndani makapi. 15Nkayomu Parisiyawa su minya yi yiride su yi de e ma geni. Nseminji ni nkye,<<E dama kesa la e shapa ni nshi a ndani na ni wonkye se kuzukam ni ma geni.>>
16Worosu su Parisiyawa su nkye, <<Nsude yi mbo mu e butu dege anya Mirikisi naba, sobon e ma kiyaye nana Asibi ba.>>
Sede worosu su minya nkye, nsu lepi yaa yi yaa yi mbo mamanki yomu?>> Su laba keshi bi.>>
17Parisiyawa su sakye minya nseminji makapi ni nkye, <<Mina ka pala a kiya nseminji mu tunde e ke na e bure ke ndani?>>
Nseminji ni pala nkye, <<E ma anebi la.>>
18Toree ni Yawudawa su ki beigaskye a kiya nkye nseminji ni e ma makapi la kuzukam e ma geni anya. Su sukwa nsu adaa yi su minya su nkye. 19Se minya su, damu e ma yaa ku la?>><<E shiya na ku nkye ku yapu yi e ma makapi? Ku yi woni na e ma geni anya?>>
20Nsu adaa yi su keleba nkye, <<Mu shina e ma yaa mu la,>> <<Su yapu yi makapi la. 21Sede Mu shina yiride e yi de e ma geni anya kuzukam ba, mu kwa shina ko waa bure yi ndani ba. Ku minya yi Maana e ma yaa dende na ba; e yaa yi beta nkiya yi.>> 22Nsu adaa yi su pala yomu la sobon sua womba toree Yawudawa, sobon Yawudawa su shiriya nkye guru nsude pala nkye Yesu ma Kiristi la sua kula yi bila kolonwa su. 23E shiya sa nsu adaa yi su pala nkye, <<E ma yaa dende naba ku minya yi.>>
24Ayani toree Parisiyawa su sakye sukwa nseminji de yapu makapi. <<Ki gbede Mirikisi, pala gaskye sobon Mirikisi>> Omu de mu shina nseminji mu e ma nsu lepi la.>>
25Nseminji makapi ni pala nkye, <<Ko e ma nsu lepi la eni shina ba. Mbo ndandaa de ni shina e shiya ma Ni ma makapi la kuzukam ni ma geni anya!>>
26Se su minya e yi nkye, <<Mina na yi ke nshi? Yaya na na de ki ma geni anya?>>
27E pala gye su nkye, <<Ni rigye pala gye ku wo ku ki de ku zi ni. Mina sa de kwa bila de ku zi jaja? Ko kwa bila de ku ma yayagizi yi la?>>
28Ayan toree Yawudawa basi nseminji ni soseyi nkye, <<E ke la ki ma yaagizi yi! Omu muma yayagizi Musa la! 29Mu shina nkye Mirikisi yi beta nja Musa, sede nseminji mu, mu shina ko dege Angala e butu ba.>>
30Nseminji mu pala nkye, <<E ma mbo mamanki la! De ku shina anya de nseminji mu butu ba, nzun yomu e shiya e bure ni ndani na. 31Mu shina nkye Mirikisi e ma zi nsu lepi ba. Sede e ma zi guru nsude e ma bowuta yi ni dishiya gangasi. 32Tunde su yi durinya mu ntaba zi nkye nseda bure ndani nsude su yapu yi makapi ba. 33Nde nseminji mu butu dege anya Mirikisi na ba yaa taba yi mbo mu ba.>>
34Toree Yawudawa su keleba yi nkye, <<E ke de su yapu ke a siki lepi, ki meyi kokori de ki kokoyi mu!>> Anya ni su kule yi bila kolonwa.
Makapi A siki Aworo
35De Yesu zi nabari nkye Yawudawa kula nseminji de e bure yi ndani ni, de e gomu ni shi, Yesu minya yi nkye, <<Ki beigaskye nja Yaa Nsebeki?>>
36Nseminji ni keleba nkye, <<Tolense, waa ma Yaa nsebeki?>> <<Gye ni de ni beigaskye nshi.>>
37Yesu pala nkye, <<E shiya ki geni yi mu; gaskye, e shiya ma nsude yaa beta nja ke.>>
38Anya ni nseminji ni nkye, <<Obagizi, Ni beigaskye,>> Se e dure guyam a kisi e bowuta yi.
39Yesu pala nkye, <<Ni zo a durinya mu sobon de ni yi shiriya la, de worede su ma makapi su geni worede su ma geni su ma makapi.>>
40Se worosu su Parisiyawa de su ma anya ni nja shi su zi mbode Yesu pala su nkye, <<Ki ma pala nkye omu ma muma makapi aka du?>>
41Yesu gye su nkye, <<Nda kuma makapi na ba, de sua ka ku ni lepi ni mungu mbode ku yi ba; sede kuzukam tunde kwa pala nkye kuma geni, puari tala ni mungu mbo aku e ma a kiya ku.
ទើបបានជ្រើសរើសហើយ៖
Joni 9: Gaa
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The Word for the World International and The Word for the World Nigeria
