Joni 8
8
Mase de Su Keyi Azina
1Anya ni se konwawa te a gizi yi. Sede Yesu te a kiya ogbo ni ntasi zetu. 2Nsasape Yesu kwa yuru a siki Laki Mirikisi, ntani nyowa su tala gyewe Yesu, e zunwa e ma kokoyi su. 3Ayan male kokoyi doka Musa nja Parisiyawa su keyi mase daa de su keyi kwana ni minzi de ma na yi ba. Su sa yi sakisi a geba ntani. 4Su gye Yesu nkye, <<Male, mase mu mu keyi de kwana nja minzi de ma na yi ba. 5Doka Musa kokoyi mu nkye mu ribi yiri mata worosu mu ndunsi. Mina e ke ka pala?>> 6Su minya Yesu yomuna de su gwade yi, ko sua keyi ni lepi de su te nkara yi.
Sede Yesu dunkye a kisi yaa yi rubutu ni yaa nani yi. 7De su sigeba ni minya Yesu, se Yesu dege sakisi a bisi gye su nkye, <<Nde nseda a siki aku taba yi lepi ba, e para ribi mase mu ndunsi.>> 8Yesu kwa dunkye a kisi yi rubutu a kisi.
9De su zi yomu, ntani su para beeta bila ayan daa daa, dege kiya tolense zo a kiya yaa dende, su bila Yesu e shi dandaa e yi nja mase ni sakisi anya ni. 10Ayan Yesu dege a bisi minya mase ni nkye, <<Mase, su managa? nseda rigye de poro bo?>>
11Mase ni keleba nkye, <<Tonse, Nseda yi ni poro ni ba.>>
Yesu gye yi nkye, <<Eni ma Ni yi ke shiriya ba,>> <<Ki te ma ke sede kede ki sakye yi lepi.>>
Yesu Nama Asikye Durinya
12Se Yesu kwa yi beta nja ntani nkye, <<Eni na ni ma asikye durinya. Guru nsude biya ni yaa taba yi tepiya a siki dopuwa ba, sede yaa ma asikye nleyi.>>
13Anya ni Parisiyawa su gye Yesu nkye, <<Ki beyi sheeda kiya ke; sheeda ake e ma gaskye na ba.>> 14Yesu keleba nkye, <<Ko Ni beyi sheeda kiya na, sheeda na e ma gaskye la, sobon Ni shina anya de Ni butu nja anya de Na te. Sede oku ku shina anya de Ni butu zo ko anya de Na te ba. 15Ku meyi ntani shiriya yiri ni tunani nsebeki; Eni ni yi nseda shiriya ba. 16Sede nde Na yi shiriya, shiriya Na e ma gaskye la, sobon E ni ndandaa na ba. Sede Adaa na de saka ni e meyi shiriya nja ni.>> 17A siki doka aku su rubuta nkye, nde ntani bi beyi sheeda yiri daa, sheeda asu e ma gaskye. 18Yomuna mma beyi sheeda sobon kiya na; sheeda na ni bi e shiya ma Adaa na de saka ni.>>
19Se su Minya Yesu nkye, <<Adaa ke manga?>> Yesu keleba nkye,
<<Ku shina ni ba ku kwa shina Adaa na ba>> <<Nde ku shina ni, kwa shina Adaa na du.>> 20Yesu gye su beta mu a kwanki de ema kokoyi su a siki Laki Mirikisi kusa ni anya de su ma boyi beiko. Sede nzun yomu nseda keyi ba sobon kwanki yi yi woba.
Kwa te Anya de Ni ma Ba
21Yesu sakye gye su nkye, <<Mma te mina, kwa bila Ni, kwa muntu a siki lepi ku. Anya de Na te kwa yi yaa zo anya ni ba.>> 22Beta de Yesu pala sa Yawudawa su nkye, <<Yaa kisa kiya yi na de e pala nkye, <Anya de Na te kwa yi yaa zo anya ni ba>?>>
23Sede Yesu sigeba ni gye su nkye, <<Oku kuma ntani durinya mu la; E ni ni butu dege bisi. Ni ma ni durinya mu na ba. 24Mbode sa Ni gye ku nkye kwa muntu a siki lepi ku. Nja kwa muntu a siki lepi ku nde ku yeda nkye, E ni na ni ma nsude Ni ma ba.>>
25Su minya Yesu nkye, <<Waa ma e ke?>> Yesu keleba nkye, <<E ni na ni ma nsude ni gye ku tun mpari. 26Ni ma ni mbo nyowa de Na pala a kiya ku. mbode sua poro ku, Sede mma gye ntani durinya mbode Ni zi dege anya nsude saka ni na kede, kuma yaa pala gaskye la.
27Yawudawa su gane nkye e mayi beta a kiya ni Adaa yi na ba. 28Sobon yomuna Yesu gye su nkye, <<A kwanki de kwa dege E ni Yaa nsebeki a bisi, a kwanki ni na kwa shina ko Waa ma E ni kuma Ni mayi mbodaa nkiya na ba sede mbode Adaa na gye ni. 29Adaa na de saka ni e ma nja ni; e bila ni e ni dandaa ba, sobon kowon nana ni meyi mbode e ma so Yaa taba bilani ba.>> 30Ntani nyowa de su zi Yesu ma pala yomu su yeda nja shi.
Gaskye la Sila Ni
31Se Yesu gye Yawudawa de su yeda nja shi nkye, <<Nde ku sigeba ni biya mbode ni ma kokoyi ku, kuma yayagizi na ni gaskye. 32E shiya kwa shina gaskye, gaskye ni yaa butu nku.>>
33Su keleba nkye, <<Muma zuriya ni Abireyi na mu taba ma bunwa nseda ba. Mina sa de ki nkye mua samu yenshi?>>
34Yesu keleba su nkye, <<Mma gye ku gaskye, guru nsude yi lepi e ma bunwa ni lepi la. 35Bunwa yaa zunwa a gizi ni nsu gizi yi ari gbogbo ba, sede yaa yaa zunwa a gizi adaa yi ari gbogbo. 36Sobon yomuna nde Yaa butu ke bila mumungu kama ni yenshi ni gaskye. 37Ni shina nkye kuma zuriya ni Abireyi la. Nzun yomu kwa bila de ku kisa ni, sobon ku ki keleba beta na. 38Mma gye ku mbode Ni geni anya ni Adaa na, sede oku kuma yi mbode adaa ku gye ku.>>
39Su keleba nkye, <<Muma yaya ni Abireyi la.>> Yesu nkye,
<<Nde kuma yaya ni Abireyi la, kwa yi mbode Abireyi yi. 40Ni gye ku manki gaskye de ni zi dege anya ni Mirikisi, nzun yomu ku meyi kokori de ku kisa ni. Abireyi yi yomuna ba. 41Sobon yomu ku meyi mbode adaa ku meyi aka.>> Yawudawa su keleba nkye,
<<Mirikisi na e ma Adaa mu.>>
42Yesu gye su nkye, <<Nde Mirikisi e ma Adaa ku, kwa so ni, sobon Ni zo dege anya Mirikisi la kuzukam eni naka anya mu nja ku. Ni zo ni sori kiya na naba; sede Mirikisi la saka ni. 43Mina sa de ku gane beta na ba? Sobon ku sa kuni kyakyawu a siki kokoyi na ba. 44Kuma yaya ni adaa ku, obiri la, yomuna kuma so de ku yi mbode adaa ku e ma so. E ma nsu kisa ntani la dege mpari, e meyi gaskye ba, sobon gaskye ma a siki yi ba. Nde e yi yaruwa, e meyi beta ni yare asu naka, sobon e ma nsu yaruwa la nja adaa ni guru nsu yaruwa. 45Nzun yomu Ni gye ku gaskye, yomuna ku yeda ni ba! 46Waa a siki ku yaa nana ni lepi de ni yi? Nde Ni ma pala gaskye na mina sa de ku yeda ni ba? 47Guru nsude ma ni Mirikisi yaa zi mbode Mirikisi ma pala. Sede oku kuma zi mbode Mirikisi ma pala ba sobon kuma ni Mirikisi na ba.>>
Yesu Nja Abireyi
48Ntani Yawudawa minya Yesu nkye, <<Mbode muma pala a kiya ke e ma gaskye la de mu pala nkye ki ma nseminji Samariya na de e mani arizeni?>>
49Yesu keleba.<<Ni mani arizeni ba,>> <<Ni ma ba Adaa na girima sede oku kuma nene ni. 50Ni ma bila girima ba kiya na ba; sede Mirikisi na ma bila de ntani su ba ni girima, e shiya yaa pala ko ni meyi kyakya. 51Ni ma gye ku gaskye, dun nsude biya kokoyi na yaa taba muntu ba kyashi.>>
52Ntani Yawudawa nkye, <<Kuzukam mu shina nkye ki ma ni arizeni! Abireyi muntu nja nsu anebi su muntu, sede e ke ki nkye guru nsude biya kokoyi ke yaa taba muntu ba kyashi. 53Ki pi adaa mu Abireyi naka bo? E muntu, yomuna nsu anebi. Waa ma ke?>>
54Yesu keleba nkye, <<Nde Ni yobo kiya na, yobo na e ma mbodaa naba. Adaa na, de kuma nkye e ma Mirikisi ku, e shiya yaa yobo ni. 55Ku shina yi ba, E ni ni shina yi. Nde Ni nkye ni shina yi ba, ni ma nsu yaruwa la kankye oku, sede Ni shina yi ni kwa biya beta e yi. 56Adaa ku Abireyi yi peri siki de e geni nana de Na zo; E geni kwanki ni e yi peri siki nshi.>>
57Ntani Yawudawa su nkye, <<Ki keyi shekera amisin ba ki ma nkye ki geni Abireyi?>> 58Yesu keleba nkye, <<Mma gye ku gaskye, tun kapi de su yapu Abireyi, Ni rigye ma!>> 59De Yesu pala yomu, su kwa yi dunsi sua bila de su ribi yi, sede Yesu boyi kiya yi, e butu bila siki Laki Mirikisi.
ទើបបានជ្រើសរើសហើយ៖
Joni 8: Gaa
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The Word for the World International and The Word for the World Nigeria
