Joni 6
6
Yesu Ba Ntani Dupu Biyari Mbosi
Mat 14.13-21; Mk 6.30-44; Lk 9.10-17
1A beyi da mu, Yesu nyenteri totolo riki ni Galili, woto totolo riki ni Tiberiya, 2Se ntani nyowa biya yi sobon su geni mbo mamanki de Yesu yaa worikye nsu suwo. 3Se Yesu nunwa kiya ogbo te zunwa nja yayagizi e yi. 4Kwanki Buki Nyenteri ni Yawudawa yi kusa.
5De Yesu dege ndani a bisi e geni ntani nyowa su ma zo anya e yi, Yesu minya Pilibu nkye, <<Anga na mua see mbosi nyowa de ntani mu sua si?>> 6Yesu minya Pilibu beta mu de e gwada yi la, sobon Yesu rigye shina mbode yaa yi a dishiya e yi.
7Pilibu keleba nkye, <<kee! ko gyolo aziripa deri bi yaa deta see mbosi nyowa de konwawa yaa samu piri ba!>>
8Anya ni daa a siki yayagizi yi, nsu seni Anduru, yayiwa ni Sima Biturusu, gye Yesu nkye, 9<<Yaa dende daa aka anya mu e ma ni mbosi piri nja buredi biyari ni gari bale nja gunda bi, sede mbosi biyari nja gunda bi mu sua deta ntani nyowa mu?>>
10Yesu gye yayagizi yi nkye, <<Ku gye ntani de su zuzunwa a kisi.>> Sanwa ma ayan nyowa, guru ntani de su zuzunwa su keyi menza dupu biyari. 11De Yesu la mala mbosi ananiyi, e gbede Mirikisi, se e laba ba ntani de su zuzunwa ayan e ba su guru mbode deta su. Yomu na Yesu kwa yi ni gunda.
12De guru asu si mbosi koshi, Yesu gye yayagizi yi nkye, <<Ku tala worede su rigye de kede su bebeta.>> 13Se yayagizi yi tala mala mbosi de ntani si rigye sika totolo obubu gom sha bi ni buruburu mala de rigye dege siki mala buredi ni gari bale biyari nja gunda bi de ntani suku.
14De ntani geni mbo mamanki de Yesu yi, su nkye, <<Da mu na e ma Anebi ni gaskye de yaa zo asiki durinya.>> 15De Yesu shina nkye ntani su ma so de su sa yi de e ma seleki nsori, se e sakye kuma mbayi te a kiya totolo ogbo e shi ndandaa yi.
Yesu Yi Tepiya A kiya Riki
Mat 14.22-33; Mk 6.45-52
16De nyema yi se yayagizi Yesu su sonka te atotolo riki, 17A kwanki ni anya para dopuwa, Yesu tuku zo anya su woba. Anya ni yayagizi yi su nyunwa kwanto de su nyenteri te a Kapanawu. 18Totolo riki para somiya sobon akusuka nsu sori e ma pula. 19A beyi de yayagizi yi su tunkwa kwanto a kiya riki ni meli biyari ko sheeda, se su geni Yesu meyi tepiya a kiya riki; e ma zo kusa ni kwanto asu, se su zi womba. 20Sede Yesu gye su nkye, <<E ni la; kede ku zi womba.>> 21Anya ni su yeda Yesu e yuru a siki kwanto nja su, dandani kwanto keyi su te a keteri anya de ntani sua sonka kesa.
Ntani Sua Bila Yesu
22De geri shekeri ntani nyowa de su tala a keteri ni riki su gane nkye kwanto daa kin na ma anya ni, su kwa shina nkye Yesu tuku te nja yayagizi yi woba, sede su te dandaa su na. 23Worosu kwanto de ma dege Tiberiya, ma a baki riki mala anya de ntani nyowa si mbosi a beyi de Yesu gbede Mirikisi. 24De ntani nyowa geni Yesu ma anya ni ba ko yayagizi yi, se su yuru worosu su kwanto de su te Kapanawu sua bila Yesu.
Yesu ma kankye Mbosi ni Leyi
25De ntani san Yesu a keteri riki, su pala nkye, <<Male, woshe na ki zo anya mu?>>
26Yesu keleba nkye, <<Na gye ku gaskye: kwa bila Ni sobon de ku si mbosi la nja ku samu guru mbode kwa bila, ba nkye sobon ku gane mbo mamanki de ni yi naba. 27Kede ku yi ANKI sobon ni mbosi de yaa bebeta; sede ku yi ANKI sobon ni mbosi de e mani leyi ni gbogbo. Nsu mu na ma mbosi de Yaa nsebeki yaa ba ku, sobon Mirikisi, Adaa, rigye sa atimi ni yeda ashi.>>
28Se ntani minya Yesu nkye, <<Mina mua yi de mu yi ANKI de Mirikisi yaa bila de mu yi?>>
29Yesu keleba, <<Mbode Mirikisi yaa bila de ku yi e shiya de ku yeda ni nsude e saka yi.>>
30Su minya Yesu nkye, <<Woni mbo mamanki na ka yi de mu geni de mu yeda nke? Mina ka yi? 31Nsu adaatolo mu su suku maana a siki denka, yiride beta Mirikisi pala nkye, < Mirikisi ba su mbosi dege bisi de su suku,>>>
32Yesu gye su nkye, <<E ni mma gye ku gaskye,>> <<Mbode Musa ba ku ma mbosi dege bisi na ba, e ma Adaa na la e ba ku anihi mbosi dege bisi. 33Sobon mbosi de Mirikisi beyi e shiya e ma nsude zo a kisi dege bisi de yaa ba ntani durinya leyi.>>
34Nkayomu Su nkye, <<Tolense>> <<ba mu yiri mbosi mu ko nana.>>
35Yesu gye su nkye, <<E ni la ni ma mbosi de yaa beyi leyi,>> <<Du nsude zo anya na yaa taba zi nyunwa ba; nsude yeda nni yaa taba zi kishi ruwa ba. 36Kuzukam, yiride Ni rigye gye ku nkye ku geni Ni wo sede ku yeda ni ba. 37Du worede Adaa na ba ni sua zo anya na. Na taba kula worede zo anya na ba, 38Sobon Ni zo a kisi dege bisi de ni yi nupi kiya na naba sede nupi ni Adaa de saka ni la. 39Nupi nsude saka ni e shiya ma de kede Ni lesa guru worede e ba ni ba, sede ndege su guru nleyi a nana karishe. 40Nupi ni Adaa na e shiya ma nkye guru nsude geni Yaa nja e yeda nshi yaa man leyi ni dindindin. Nja E ni ma dege su leyi a nana karishe.>>
41Se ntani Yawudawa de su ma anya ni para mungu beta a kiya Yesu, sobon e pala nkye, <<Ni ma buredi de zo dege bisi.>> 42Se ntani minya nkye, <<Nseminji mu e shiya ma Yesu yaa ni Yusupu bo? Mu shina adaa yi nja amaa e yi, Yaya, na kuzukam yaa pala nkye ni zo a kisi dege bisi?>>
43Yesu keleba nkye, <<Ku bila mungu beta a sisika ku. 44Nseda yaa yi yaa zo anyana ba se Adaa nsude saka ni jaa su zo anyana; nja E ni kuma Na dege su ni leyi a nana ni karishe. 45Anebi rubuta nkye, <Mirikisi yaa kokoyi konwawa.> dun nsude yaa zi Adaa nja yaa kokoyi dege anya yi yaa zo anya na. 46Ba nsude taba geni Adaa ba se daa ni de zo dege anya Mirikisi; e shi na kede e geni Adaa. 47Mma gye ku gaskye: nsude yeda nni yaama leyi ni dindindin. 48E ni mma mbosi ni leyi. 49Nsu adatoloku suku maana adenka, sede su muntu. 50Sede mbosi de zo dege bisi e ma yiride du nsude si yaa taba muntu ba. 51E ni na ni ma mbosi ni leyi de zo dege bisi. Nsude si mbosi mu, kama ni leyi ni gbogbo, mbosi de na ba ku e shiya ma nki na, nsude Na beyi de ntani durinya su samu leyi.>>
52Se ntani Yawudawa para musu ni anwashi nja nkiasu. Su minya nkye, <<Yaya na nseminji mu yaa ba mu nki yi de mu suku?>>
53Se Yesu gye su nkye, <<Na gye ku gaskye, nde ki suku nki ni Yaa nsebeki nja sha zini yi ba, ka taba ma ni leyi a siki ke ba. 54Worede su suku nki na nja sha zini na sua mani leyi ni gbogbo, na dege su nleyi a nana karishe. 55Sobon nki na e shiya ma mbosi ni gaskye; zini na e ma mbo sha ni gaskye. 56Du nsude suku nki na nja sha zini na yaa zunwa a siki na E ni ma na zunwa a siki yi. 57Yiride Adaa nsu leyi saka ni, sobon nshi la ni ma leyi du. Ta turiki mu la du nsude suku nkina yaa ma leyi sobon ni. 58Nsu mu e shiya ma mbosi de zo dege bisi. Nsu adaatolo ku suku maana su muntu, sede nsude si mbosi mu yaa mani leyi ni gbogbo.>> 59Yesu pala mbo mu de tukuna kokoyi ntani a siki kolonwa ni Kapanawu.
Kelima Leyi Ni Dindindin
60De yowa yayagizi Yesu sua zi mbo mu su pala nkye, <<Kokoyi mu e man wuya soseyi. Waa yaa yiya keleba yi?>>
61Yesu rigye shina nkye yayagizi sua yi mungu beta a kiya mbo mu, se e gye su nkye, <<mbo mu na sa ku butu dishiya? 62Kwa geni yaama nkye kona, nde ku geni Yaa Nsebeki kuma ta bisi anya de butu? 63Mbode yaa beyi leyi e shi ma Aworo Mirikisi; sori nsebeki e mani moriya ba ko piri. Kelima de Ni gye ku e ma aworo la e kwa ma leyi adu. 64Nzun yomu worosu su ku ki yeda ni kokoyi na.>> sobon Yesu shina dege pari worede sua yeda nshi ba nja worede sua butu yi a beyi. 65Yesu kwa sigeba ni gye su nkye, <<Nsu mu na e ma delili de Ni gye ku nkye ba nsude yaa zo anya na se Adaa na sa yi de e ma yomu.>>
66Sobon mbo mu, yowa yayagizi Yesu de sua biya e yi su kuma mbayi sua te nja Yesu gagaba. 67Se Yesu minya yayagizi gom sha bi nkye <<Oku ma kwa te yiride su te du bo?>>
68Se Sima Biturusu keleba nkye, <<Obagizi, anya waa mua te? e ke la ki ma kelima de yaa beyi leyi dindindin. 69Nja kuzukam mu yeda nja mu shina nkye e ke la ki ma Nsuseki Daa de zo dege Mirikisi.>>
70Yesu keleba nkye, <<Ni zabi ku kuma gom sha bi na bo? Nzun yomu daa ku ma obiri. 71Yesu yaa nupi Yawuda yaa ni Sima Isikariyoti, kode nkye e shi e ma a siki yayagizi Yesu gom sha bi, e shiya yaa butu Yesu a beyi.
ទើបបានជ្រើសរើសហើយ៖
Joni 6: Gaa
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The Word for the World International and The Word for the World Nigeria
