Luuka 8
8
Ɓəsisi nyabyeyi nya
1Ń dəye avnu, Yeisu wa zna laɓa woi gbmi ń zhimi gbmanyi n zhigbai, woi lo aje, woi zhni waazi nabagyi manai Shekwoyi əbemi nya. Atnutnuloyi Awoceaba ɓə kwnusnu n woi, 2ɓədo n anyikwoza hoi ń Yeisu ɓə kwnu ɓa azafnu nukwoi ya nyi, ɓədo n anyasnai: Mariyamwu (ń a ɓə yi wo ge Magadalayi nyi) əza ń azafnu nukwoi ngwnu-tnaaba ɓə kwnuya n wo; 3Jowana, Kwuza nyikwo, Hiridusu pwuwa aknawnayi; Suzana; ɓədo n azajei bəgyé. Anyikwoza ye ɓə laɓa ɓai ceɓwa jesnu ɓai bmazhni n ənyai ń kwo ɓə kwnu ń əɓa ajegwu.
4Deeji yaakwo ye gnyi kwoi yezhi jesnu aza ɓai ɓe da Yeisu, ɓai kwnu ń azhi gbowogbowo, wa ga ɓa ɓəsisi ye: 5“Fwanuyi ho ɓə gbmiya lo wo bye əwo nyabye, adəho ɓa kaya zhi lo ncei ń zokwoi; a kpe kwo apita, jesnu alú ɓaa ɓa zo tnu. 6Adəho ɓa kaya kpe ń apmatala, shi ɓa ɓə pa, ɓa kwu woakawu ntuge ɓa to ɓə n wyetoi m. 7Nyabye dəho kwa kaya fyi ń aknawui, aknawuyi ɓa mwa ɓaa kwo gyice. 8Dudulonu nyabye dəho kwa kaya fyi ń əknyi manai. Kwa mwa jesnu kwa fyiawye, n du ənya ń a ɓə bye, aɓwa tagyi.”
She wo ɓə kwu dəye da nlonu, wa la bəgye tu wa gna, “Zahozahoyi ń wo n atnubwai lo, akpəge wo wo.”
9Əwo amwutuyi ɓa nya wo nabagyi ɓəsisi ye awyega. 10Wa gna ge, “Ɓəyekpe aɓo aɓwuɓwui Shekwoyi əbemi nya, a kwu ga fye; ama n azaje aba, mi daɓo n ɓai n nabagyi ɓəsisii nu, ntuge,
“ ‘Kwo shikwonyi ɓa shiawye lo,
ama ɓa taa gyewye lo m;
kwo shikwonyi ɓa knatnubwa lo, ɓa taa ɓwa əkwo awyega m.’
11“Dəye nu zhni ɓəsisi ye awyega: Nyabye nu zhni Shekwoyi ɓədagbma. 12Ado ń ɓa ɓə kaya zhi n zokwo nyi, aza nu ń ɓa wo Shekwoyi ɓəda, jesnu əzanukwoyi wa ɓe waa ɓədagbma kwnu ɓa ń əɓa adu, nabai n ɓa taa ga gaiciya ɓa pwo m. 13Adəyi ń ɓa ɓə kpe ń apmatala nyi, əɓa nu zhni aza ń ɓa ɓə gwo ɓədagbma n agbmadai she ń ɓa ɓə wo, ama ɓa to ɓə n gbegyei m. Ɓa kwu gaiciyaga əsa fyewyi, ama shi mwumwu ɓe, ɓa myiya. 14Nyabye ń kwo ɓə kaya fyi ń aknawui nyi, əkwo nu wu aza yi ń ɓa ɓə wo, ama əsa ń ɓa fyilo ɓai gyianyì, aɓəsa anyìgyi nya, nyaɓwa ɓədo n agbmada-yei ɓaa ɓa gyice jesnu to ɓa kwó m. 15Ama nyabye fyi ń əknyi manai əkwo nu wu aza yi ń ɓa fyi ń ofye jesnu n ədu manai, n ɓa wo ɓədagbma ɓaa kwo shiɓwa, jesnu ntu n bwugbaɓwa ɓo, ɓa ga gyigyi.
Pyitila tu n əkwo kwnuyi
16“Əzaho to lo n wo wna pyitila əná waa kwo sodna ń nyikwnu kwo dna ń gədo snuta m. Ama a ya kwo tu ń əkwo kwnuyi nu, nabai aza ń ɓa lo ɓe nyakwnu nyi, ɓa gye bwuznagna. 17Ntuge nyaho to ɓwushi lo ń a to ɓə gbmi kwo wu m, jesnu nyaho to pwuanya shi lo, ń a to ɓə gye kwo əwye m, kwo n a to ɓə kpeanyaya wu m. 18Ntucenu fye zhni ɓənubwo pəceye she fye kna aɓo tnubwa n wu. Əza ń wo ncei lo, a ɓə la ɓə wo; zahozahoyi ń wo to ncei lo m, kwo ədo n wo zhninubwo nge wo ncei lo nyi, a ɓə la gwo wo.”
Yeisu əya n əwo amajeii
19Nsayii, Yeisu əya ɓədo ń əwo amajeii ɓa ɓe nge ɓa gye wo, ama to ɓa myi ɓa wo vyivyiwyi n woi m, ntu deeji ɓo. 20Əzaho wa gna wo, “Əho əya n əho amajei ɓa zhi lo ń əbmyi, ɓa ncei pmalo ɓa gye ho əwye.”
21Wa dnaɓəgbe, “Əmi əya ɓədo n əmi amajei nu nyi, ń aza yii ń ɓa wo Shekwoyi ɓədagbma jesnu ɓai shi kwo ɓwa.”
Yeisu la agbmaase nazhi
22N əwyihoi Yeisu wa gna əwo amwutuyi, “Yii piyalo nuwna-znudna əkpma dəyi.” Ntulonu ɓa lofyi n əya nuwnanya ɓa lo. 23Shi ɓa ɓə fyilo ncei ń əya nuwnanya, waa wnagye. Əse kaláda kwa ɓe kpe n nuwna-znudna, əya nuwnanya kwa tu lo kwoi snúawyé n nuwnai; ɓa ɓə fyilo ń azhnìgye yaakwo nu.
24Amwutuyi ɓa lo ɓa kwnu wo agyewyiya ɓa gna, “Dagayi, Dagayi, yi ye ya ɓwunuwna nuu!”
Wa laka wa gnaknyi əse n nuwna nyaceii; ase ɓa wnazhi, aɓo vnyanya ɓa kwu nazhi. 25Wa nya əwo amwutuyi, “Əfye gaiciyaganunui gnyi ń nanu a?”
Dna ń ədnawo n ɓəwowoi, ɓa nya aje, “Nyika nu gnyi əwoi a? Kwo ase n nuwnai ɓa vyi əwo ɓəgbetu lo.”
Yeisu ga əza n ase nyasnayi kágna
26Ɓa piyalo Ageraseniyi səpa, ń kwo kpe gaaga n əkpma dəyii, hoi gbmi ń Gəlili nuwna-znudna əkpma nyi.
27She Yeisu ɓə gbmitu n shikwogbe, əza n ase nyasnayi wa shegwnu wo, woi gbmi n zhimi. Əsa ɓəə la mwa to woi je aje kpe kwo wa dna ń apyi m, ama wo ɓe dna laɓa ń avnyigwo nu. 28She wo ɓə gye Yeisu, wa sakwu, wa myiya shi ń Yeisu apita aba, woi ɓəwyi n bəgye kalái, “Ho ye knyiɓei nu n mii a, Yeisu, Shekwoyi Duduyi Nugwnu? Mi gyi ho əwye, to tu mi azhnì m!” 29Ntuge Yeisu ɓə la əgbe ga əse yi nge kwo la gbmiya n wo. Kwo ɓə zhni kwa la wo kala n asai mwa bəgyé, kwo ń a ɓə n woi pa shi n agbmai nu n aɓwa n apitai, woi shi ai gwu wo, wo ɓə zhni waa agbma gbeya n əwo nayi, ase kwa lo n woi ń aba pyipyipyii.
30Yeisu wa nya wo əɓo, “A yi əho əye nge nanu a?”
Wa gna, “Bəgyé,” ntuge ase bəgyé ɓəə kwu lofyi ń wo. 31Nlonu ɓa ɓa Yeisu ɓai je ɓa, nge wo to tnu n ɓai ń əɓwo-tnaceshiba m.
32Abwulutu gəluce yaakwo ɓə lo ɓai gyi anyagyi ma ń əpe gnagna. Ase ɓa ɓa Yeisu ge wo fa ɓa lofyi ń abwulutu, jesnu waa ye ge ɓa lofyi. 33She ase ɓə kwnu ń əza yi, ɓa lofyi ń abwulutu gəluce, ɓa bwusi shnilo n agəgyigəgyi, ɓa kaya fyi ń nuwna-znudna, ɓa kwu ɓwunuwna.
34She abwulutu knayi ɓə gye əɓo n kwo kwu zhni nyi, ɓa bwusi ɓa lo ɓa wu anabagyi ń əzhimi ɓədo n azhigbai, 35jesnu aza ɓa kwnuɓe ɓa gye əɓo ń kwo ɓə kwu zhni nyi. She ɓa ɓə ɓe Yeisu aba, ɓa gye əza yi shi ń ase ɓə kwnu n wo nyi, n sase shi ń Yeisu apita aba, n ajei kpe jesnu n dna ń əwohni ací; ədna kwa wo ɓa.
36Aza yi ń ɓa ɓə kwu əɓo ye gyewye nyi, ɓa gna aza shi əza n ase ɓə fyi n wo ɓə ɓwa kágna n wu. 37Ntulonu, aza vnyanya n Geraseni səpa ɓa gna Yeisu nge wo la əɓa əknyi fa, ntuge ədna ɓə kwu wo ɓa. Wa lodna n əya nuwnanya wa lo wo nya.
38Əza ń a ɓə kwnu wo ase ya nyi, wa ɓa nabai wa kwnulo n woi, ama Yeisu wa je wo zeya wa gna ge, 39“Jezelo apyi, hoi da əɓo n Shekwoyi kwu zhni ga ho nsnu.” Ntulonu əza yi wa lo wa da ń azhimi vnyanya əɓo ń Yeisu ɓə kwu zhni ga wo nsnu.
Yeisu lá əɓyinyikwoi kala n əfyi
40Nsayii she Yeisu ɓə jezeɓe, deeji ɓa zhni wo amaabe, ntuge əɓa vnyanya ɓa ɓə zhi n əwo awyetui.
41Nlonu əzaho ai yi wo ge Yarus Ayahudiyibwokwnu tukwoda, wa ɓe wa taya shi ń Yeisu apitabwada aba, woi gyi wo əwye nge wo ɓe əwo pwuwa, 42ntuge əwo nyigwnu ɓyigba, ɓyinyikwoyi woi n ayei awoceaba, ɓə shi woi fyi.
Shi Yeisu ɓə lo ń zokwo, ca ce cewyi deeji ye kwa ye wo fnya. 43Njesnu, nyikwoza ho ɓə gnyi ń abaayi ń amizheya nyasnai, woi kwu aye ɓwa ngwnu-awoceaba, ama əzaho to ɓəə myi ń əwo kágna m. 44Wa ɓe gnyi ń Yeisu avnu, wa to əwo əjegbe əɓwa, nsayisayii əwo amizheya ɓa zna.
45Yeisu wa nyaɓo, “Nyika nu na to mi əɓwa a?”
She ɓa ɓə la aɓo na əɓa vnyanya, Byitusu wa gna, “Dagayi, deeji n mwalo ɓai ye ho fnya.”
46Ama Yeisu wa gna, “Əzaho n la mi toɓwa; mi kpəlo nge kalá la gbmiya n mi.”
47Nlonu nyikwoza yi, woi gye wo ta myi wa so əwohni to a kpe m, wa gbmiɓe woi vnyi, wa ceakwokwo shi n əwo apitabwada aba. Gnyi ń aza vnyanya abye, wa da ənya ń kwa zhni wo waa to wo əɓwa jesnu ngye shi wa ɓwa kágna nsayisayii.
48Nlonu wa gna wo, “Nyigwnu, əho gaiciyaganunui kwo la ho kágna, lo n bwugbafui.”
49Yeisu woi ye gnyi woi daɓo, əzaho wa ɓe woi gbmi ń Yarus pwuwa, Ayahudiyibwokwnu tukwoda. Wa gna, “Əho nyigwnu wo la fyí. To shna nyawuyi gnagna m.”
50Shi Yeisu ɓə wo ɓəye, wa gna Yarus, “To wodna m, la gaiciya nu ɓwa ga, wo ɓa ɓwa kágna.”
51Shi wo ɓə si Yarus pwuwa, to wa ye nge zahozahoyi wo lodna ń kwnusnu n woi m akpəge Byitusu, Yohana n Jemyisii, ń əɓyi dadai ɓədo n əyai. 52N əsayii, aza vnyanya ɓə zhi ɓai ciɓwi nu jesnu ɓai zhni bwugbazhiizhii ntu əwo ɓo.
Yeisu wa gna, “Fye kwu fa ɓwuci ɓo, wo too fyi m, ama wo wnagye nu.”
53Ba ma wo asna, ntuge ɓa ɓə kpe ge wo la fyí.
54Ama wa taɓwashi wo ń əɓwa wa gna, “Əmi əɓyi, laka!” 55Əwo zafnu kwa jezeɓe da wo, n əsagbmanyii wa laka gnyiagnyi. Nlonu Yeisu wa gna ɓa ge ɓa ga wo nyaho wa gyi.
56Ca wo əwo azamayi, ama wa tugbe nge, ɓa to gna zahozahoyi əɓo n kwo kwu zhni nyi m.
ទើបបានជ្រើសរើសហើយ៖
Luuka 8: OGNB
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Biblica® Open Gbagyi Nyizeyenya Baibwulu: Shekwoyi Ɓədagbma™, Ɓəgbeshì Woiwoyi
© 1997, 2025 Biblica, Inc.
Biblica® Open Gbagyi Contemporary Bible™, New Testament
Copyright © 1997, 2025 by Biblica, Inc.
“Biblica” ɓədo n Biblica əznù zhazhai, ɓa zhni aɓwaze aznù nu n a cei kafyilo n United States Patent and Trademark Office (Amerika əznù aɓwaze nya ɓədo n nyazhnizhni ofyisii) n Biblica, Inc. ncei yafyi. Apmazhni n gbegai nu.
“Biblica” is a trademark registered in the United States Patent and Trademark Office by Biblica, Inc. Used with permission.
See promoVersionInfo in metadata.xml for Creative Commons license.
