Luuka 6
6
Yeisu nu zhni Dagayi Sibyiwyi nya
1N Sibyiwyi hoi, Yeisu woi duya dnalo n alikamazhni, əwo amwutuyi ɓa ya alikama atukwo bma ɓai wu abyegye ya kpe n əɓa aɓwada, ɓai gyi. 2Afarisiyi ho ɓa nyaɓo, “Knyiyi nu zhni fyei zhni əɓo n kwo zhni owa gnanaznu n Sibyiwyi a?”
3Yeisu wa dna ɓa ɓəgbe, “Fye too shni ba, ənya n Dawuda ɓə zhni əsa ń myikwnu ɓə gwnu wo n əwo anugwnudoi nyi m? 4Wa lodna ń Shekwoyi pwuwa wa shni biledi pmyapmyai, wa gyi, ənya ń owa ɓə zhni kwoi ɓwa apirisiti nu ye nge ɓa gyi. Nlonu wa kwu adəho ce ga əwo anugwnudo.” 5Nlonu Yeisu wa gna ɓa, “Əza Nugwnu nu zhni Dagayi Sibyiwyi nya.”
6N Sibyiwyi hoi jesnu, wa lodna ń Ayahudiyibwokwnu, woi wunya, jesnu əzaho ɓə dna n abaayi ń əwo ɓwaizhe ɓə sháshái. 7Afarisiyi n owa anyawuyii, ɓə zna əɓo nu shni n ɓa ɓá ɓwa nabai ɓa tu Yeisu, ntulonu ɓa dna wo əwye byiwuu, nabai ɓa gye kwo wo ɓa ká wo gna n Sibyiwyii. 8Ama Yeisu ɓə kpe əɓo əye n ɓa zhni əkwo nubwo, wa gna əɓwa sháshaída, “Laka gnyiagnyi jesnu haa gnyi ń zahozahoyi abye.” Ntulonu wa laka gnyiagnyi jesnu waa gnyi ń abaayi.
9Nlonu Yeisu wa gna ɓa ge, “Mi nya fye əɓo, knyiɓei nu owa ncei ye a zhni n Sibyiwyi a: a zhni əɓo manai nu kwo a zhni əɓo nukwoi, a gnyi wyewyeyi nu kwo a wu kwo a?”
10Wa shi ɓa awye laɓa n shegwnu vnyanya, nlonu wa gna əza yi, “Ta əho əɓwa ya.” Wa zhni lonu jesnu əwo əɓwa kwaa tace n nunui. 11Ama Afarisiyi n owa anyawuyii, ɓa kwu zhi n pwukpe jesnu ɓa ya ɓai daɓo n ajei ənya n ɓa ɓá zhni Yeisu.
Atnutnuloyi ngwnu-awoceaba
12Fyi n anyipyei yi, Yeisu wa gbmiya lo əpe səpa wa lo wo zhniaduwa, jesnu waa gyifye dna n aduwazhni ga Shekwoyi. 13She əfye ɓə gyi, wa yì əwo amwutuyi zhi ga əwohni, jesnu wa tnu ɓa zhi ngwnu-awoceaba, aza n wo ɓə je ɓa əye tu nge atnutnuloyi:
14Sima (əza n wo ɓə tu əye, Byitusu) əwodo Anduru,
Jemyis,
Yohana,
Fyilibwus,
Batolomyi,
15Matiyu,
Toma,
Jemyis Alfyis nugwnu,
Sima n a ɓə yi wo Ziloti nyi,
16Yahuda Jemyis nugwnu,
n Yahuda Iskariyotii n əwo nu ɓə ɓwu Yeisu nyi.
Anabəlika n owii
17Wa shnilo n ɓai, ɓa kwu zhi n aba apatayi. Deeji yaakwo əwo amwutuyi ɓə zhi n ɓo jesnu aza bəgyé ɓai kwnu ń Yahudiya əknyi vnyanya, n Urishelimai, jesnu ɓai kwnu ń shikwogbe Taya nya, n Sidonii, 18aza n ɓa ɓə ɓe ntuge ɓa kna əwo ɓəda tnubwa, jesnu ɓa gwo kágna ń əɓa anyasna. Aza yii n azafnu ajegbmiyi ɓə kwu gna ɓa gnagna, aa ɓa kwnuya. 19Aza vnyanya ɓaa ɓahni yi ɓa to wo əɓwa, ntuge kalá ɓə zhni kwoi kwnuɓe n wo, jesnu kwoi ga ɓa kágna vnyanya.
20Wa shi əwo amwutuyi awye, wa gna:
“Anabəlikada nu n əfyei, ń fye zhni awyekwoyi nyi,
ntuge Shekwoyi əbemi zhni əfye nya nu.
21Anabəlikada nu n əfyei ń fye wo myikwnu ń nsaiye nyi,
ntuge a ɓə fú fye nubwo. Anabəlikada nu n əfyei ń fye ciɓwi nsaiye nyi, ntuge fye ɓə masna.
22Anabəlikada nu n fyei əsa ń aza wnunu n fyei,
ɓai kna fye yazhi, ɓai knyi fye akpmi, jesnu ɓai na əfye aye ɓo ngye nyanukwoi,
ntu n Əza Nugwnu ɓo.
23“Fye zhni agbmada fyi ń nyipyei yi jesnu fya dagbma ntu dada ɓo, ntuge əfye gyiba zhni yaakwo nu dna ń əshemi. Ntuge nlonu nu n əɓa azakwoyi ɓə zhni kpe sheaɓəgwognayi.
24“Ama owii n fyei ń fye zhni anyaɓwayi nyi,
ntuge fye la əfye agbmada pmagwo.
25Owii n əfyei ń anubwo n fyei fufui lo nsaiye,
ntuge myikwnu ɓə gwnu fye. Owii n əfyei n fye má-asnaɓwugyi lo nsaiye, ntuge fye ɓə ɓwa bwugbazhii jesnu fyei ciɓwi.
26Owii n əfyei əsa n zahozahoyi da fye əɓo manai,
ntuge ń lai nu ń əɓa azakwoyi ɓə zhni kpe sheaɓəgwognayi katái.
Yeye wu ga anuwnuyi
27“Ama əfye ń fye zhi fyei kna ɓəda tnubwa nyi, mi gna fye: Fye ye n əfye anuwnuyii, fye zhni əɓo manai ga aza yi ń ɓa wnunu n fyei nyi. 28Fye kpe aza yi anabəlika n ɓa kpe fye aknyi nukwoi nyi, fye zhniaduwa ga aza n ɓa shé fye əwyena nyi. 29Ń zaho wa ce fye agnaipmi n səpa gbmanyi, fya pmyi səpa baayi wu wo ce. N əza wa gwo fye akwokwo, fye to wo wo əjekpe əmi nya əɓyi m. 30Ga zahozahoyi ənya n wa nya ho əkwo ɓo, jesnu n zahozahoyi n wa la ho ənya, to je əkwo əɓo nya ha gwo kwo m. 31Zhni ga aza aɓo n ho ncei pma aza ɓa zhni ga ho.
32“Ngye fye ye n aza yi nu ń ɓa ye fye nyi, knyi gyibai nu n fye ɓa ɓwa a? Kwo aleifyizhniyi ɓa ye aza yi nu ń ɓa ye ɓa. 33Njesnu ń ha ɓwa əɓo manai zhni ga aza yi nu n ɓa zhni ho əɓo manai nyi, knyi gyibai nu n ho ɓa ɓwa a? Kwo aleifyizhniyi ɓa zhni nlonu. 34Jesnu n ha ɓwa aza yi nu nyamwi ga ń ho əwyei tu lo ɓai gba ho əta, knyi gyibai nu n ho ɓa ɓwa a? Kwo aleifyizhniyi ɓa ga aje nyamwi n awyei tu ɓai gwo n nunui. 35Ama fye ye n əfye anuwnuyii, fye zhni əɓo manai ga ɓa, jesnu fye ga ɓa nyamwi ntna awyetu nge ɓa ɓə gba fye əta. Nlonu nu n əfye gyiba ɓə la mwa jesnu fyei kwu zè Duduyi aɓyi, ntuge wo zhni əɓo manai ga atna-agbmadawuyi n akpizhniyii. 36Fye kwu zhni asnusnugyei, shi əfye Dada zhni snusnugyeyi nyi.
Azaje owada
37“Fye to da aza owa m, a taa da əfyehni owa m. Fye to znu əza əknyi m, nlonu a taa znu əfyehni əknyi ce m. Fye zo abwi, jesnu a ɓa zo əfyehni abwi ce. 38Ga, n kasnu a ɓa ga fye. Nyamwinya manai, n shniada, ń nunui sululu jesnu kwoi gyiya, ń a ɓə mwu ga fye, a ɓə zè fyi fye ń əjepəlu. Ntuge nyamwinya n fya zhni apma ncei, əkwo nu n a ɓə mwu ga fye ncei.”
39Wa ga ɓa ɓəsisi ye: “Wyebwayi ɓa wu wyebwayi ədo zokwo? Əɓa ngwnu-aba, ɓa taa kaya fyi n ɓwokwnu m? 40Nyamwutuyi to du əwo nyawuyi m, ama zahozahoyi ń a la wo ta ń nunui n nyawu, wo ɓə la zè ngye əwo nyawuyi.
41“Knyiyi nu zhni hoi gye shnuwna pisəloi n kwo dna ń əhozado əwye, ama to hoi zewye ń shnuwna kwnunù n kwo dna ń əhohni əwye ma a? 42Ho ɓa gna əhozado n wunanu ge, ‘Əmido, fa ma gbmi shnuwna pisəloi ya n əho əwye,’ Əsa ń əhohni ɓwugyi too gye shnuwna kwnunù n kwo dna ń əho əwye nyi ma a? Əho kwocednayi, kpmisnuyi la shnuwna kwnunu gbmiya n əhohni əwye kpa, nlonu ho ɓa gyewyeba dəidəi ha gbmi shnuwna pisəloi ya n əhozado əwye.
Shnuwna n əkwo gyigyiyii
43“Shnuwna manai dəhodəhoi to lo n kwo ga gyigyi nukwoi m, kwo shnuwna nukwoi dəhodəhoi n kwo ga gyigyi manai m. 44A kpé shnuwna dəhodəhoi əye n əkwo gyigyi nu. A ta ka əgbà ń knawui m, kwo anam gyigyi ń lagbaí m. 45Əza manai zhni wa kwnu anya amanai ɓe ncei ń anya manai nu n wo ncei sofyi ń əwo ədu, n kasnu əza nukwoi zhni wa kwnu anya nukwoi ɓe ncei ń anya anukwoi nu ń wo ncei sofyi ń əwo ədu nyi. Ntuge əgbe da ənya nu n kwo nu fyilo n ədu.
Anyamiyi acecei n amamai
46“Knyiyi nu zhni fyei yi mi, ‘Dagayi, Dagayi,’ ama to fyei zhni əɓo n mi gna fye nyi ma a? 47Zahozahoyi ń wo ɓe da mi, woi wo əmi aɓədagbma jesnu woi zhni apma n ɓai, mi ɓa wu fye shi ɓa wulo. 48Ɓa wulo ngye əza nu ń wo gnyi woi mi nyakwnu, ń wo ɓə la əkwo shnipa nyì n loloi, jesnu wa shì nyakwnu tu ń apma. She nuwna ɓeɓei ɓə kwnu-akpma n anuwnadokwoi, kwa sheknyi nyakwnu yi, ama to kwa jeashna m, ntuge kwo ɓə la bmya mi. 49Ama əza ń wo wo əmi aɓədagbma lo to woi shi ɓa ɓwa m, wo wulo ngye əza nu ń wo ɓə mi nyakwnu tu ń əknyi ntna shnipa shii. Əsa ń nuwna-adokwo ɓə sheknyi nyakwnu yi, kwaa vyiya jesnu əkwo agbmazhni ɓə nyi kpeekpe nu.”
ទើបបានជ្រើសរើសហើយ៖
Luuka 6: OGNB
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Biblica® Open Gbagyi Nyizeyenya Baibwulu: Shekwoyi Ɓədagbma™, Ɓəgbeshì Woiwoyi
© 1997, 2025 Biblica, Inc.
Biblica® Open Gbagyi Contemporary Bible™, New Testament
Copyright © 1997, 2025 by Biblica, Inc.
“Biblica” ɓədo n Biblica əznù zhazhai, ɓa zhni aɓwaze aznù nu n a cei kafyilo n United States Patent and Trademark Office (Amerika əznù aɓwaze nya ɓədo n nyazhnizhni ofyisii) n Biblica, Inc. ncei yafyi. Apmazhni n gbegai nu.
“Biblica” is a trademark registered in the United States Patent and Trademark Office by Biblica, Inc. Used with permission.
See promoVersionInfo in metadata.xml for Creative Commons license.
