Luuka 19
19
Zaka, gədu gwoyi
1Yeisu wa lodna ń Jerikwo woi duya. 2Zanugbai ɓə gnyi n ɓo ai yi wo ge Zaka; wo ɓə zhni gədu gwoyi tukwoda nu, jesnu wo ɓə n nyaɓwai. 3Wo ɓə ncei pma wa gye əza ń Yeisu zhni, ama ntuge wo ɓə zhni əza kpekpegyei nu, to wa myi m, ntu deeji ɓo. 4Ntulonu wa bwusi waa gyilo ń abye wa gwnutu ń gbaayi shnuwna nabai wa gye wo əwye, shikwonyi Yeisu ɓə ye wa duya ń zokwo yi nu.
5She Yeisu ɓə si abaayi, wa kpewyewu ń əshe jesnu wa gna wo, “Zaka, kashi ɓe nsaiye. Ɓəshishi nu mi ɓa shnidna ń əho pwuwa ń naiye.” 6Ntulonu wa kashi ɓe n əsagbmanyii, wa gwo wo n agbmadai.
7Shi aza vnyanya ɓə gye dəye, ɓa ya aɓəsnaanya da, “Wo dù wo shnidna n leifyizhniyi pwuwa.”
8Ama Zaka wa laka gnyiagnyi wa gna Dagayi, “Dagayi, gyewye! Gnyi n abaye jesnu nsaiye, mi ɓa ga awyekwoyi əmi nyaɓwa tokwnu, jesnu ngye mi la əzaho gyifyi n nyahonyahoii, mi ɓa gba wo kwo əta aɓwa ngwnu-anyi shikwonyi nsnu.”
9Yeisu wa gna wo, “N naiye, gnyignyi kwo la lo ɓe pwuwa ye, ntuge əza ye cè, wo zhni Ibrahim nugwnu nu. 10Ntuge Əza Nugwnu ɓə ɓe nabai wa zna ənya ɓwuɓwui shni nu jesnu wa gnyi kwo.”
Ɓəsisi amyinas ngwnu-awo nya
11Əsa n ɓa ɓə zhi ɓai kna ɓəda ye tnubwa, wa gwodu wa gna ɓa ɓəsisi, ntuge wo ɓəə la wó vyivyiwyi n Urishelimai jesnu aza ɓə zhninubwo nge Shekwoyi əbemi ɓə ye kwa kpeya ɓe n əsagbmanyii nu. 12Wa gna, “Əbegyiyi ɓə lo əknyido n kpaai nabai a lo ai dna wo əbe jesnu woi jezezhi. 13Ntulonu wa yì əwo atnutnuyi zhi ngwnu-awo, wa ga ɓa amyinas ngwnu-awo. Wa gna, ‘Fye zeaɓwa n gyiwye yei nya əsa ń mi ɓə jezeɓe ncei.’
14“Ama əwo aknyida ɓə zhi n nuwnui nu n woi, ɓa tnu n azai ɓa vyi wo lo ɓa lo ɓə gna wo, ‘Yi to ncei pmalo əza ye wa gyibe tu ń yi m.’
15“Dudulonu, a ɓə la əbe dna wo, jesnu wa jezezhi apyi. Nlonu wa tnu əwo atnutnuyi ɓo, aza n wo ɓə kwu gyiwye ga ɓa, nabai wa gye gyiba ń ɓa ɓəə kwu gyi n kwoi.
16“Əza kpmisnuyi wa ɓe wa gna, ‘Haamwasa, mi kwu gyiba gyi n əho myinai, amyina ngwnu-awo.’
17“Əwo dagayi wa dnaɓəgbe, ‘Ho kwu zhni n bmya, əmi tnutnuyi manai! Ntuge ho la kwnuce a kpema ho ń əɓo ɓyiyi, gyibe tu ń azhi ayaakwo ngwnu-awo.’
18“Əzabaayi wa ɓe wa gna, ‘Haamwasa, mi kwu gyiba gyi n əho myinai, amyina ngwnu-atnu.’
19“Əwo dagayi wa dnaɓəgbe, ‘Ho ɓa gyibe tu ń azhi ayaakwo ngwnu-atnu.’
20“Nlonu tnutnuyi ədo wa ɓe wa gna, ‘Haamwasa, əho myina n hoi shi nyi; mi ɓə la kwo pa dna ń əjeɓyii maa kwo soshi. 21Əho ədna ɓə wo mi, ntuge əho əɓo n dnaɓo. Ho gbmi ənya aba ń ho to ɓə ya kwo dna m, jesnu ho dò ənya ń ho to ɓə bye m.’
22“Əwo dagayi wa dnaɓəgbe, ‘Mi ɓa da ho owa n əɓoi nu n kwa gbmi n əho əgbe, əho tnutnuyi əkpizhniyi! Ho ɓə kpe ho nya, nge mi zhni əza ɓədnai nu, mii gbmi ənya aba ń mi to ɓə ya kwo dna m, jesnu mii dò ənya ń mi to ɓə bye m? 23To knyiyi nu ɓə zhni to ha ya əmi gyiwye dna ń agyiwye dobwi, nabai əsa ń mi ɓə jezeɓe; n mi ɓə ɓa gwo kwo n gyibai tu ma a?’
24“Nlonu wa gna aza n ɓa ɓə gnyiagnyi zhi vyivyiwyi n ɓo, ‘Fye la əwo myina gwo wo njesnu fyaa kwo ga əza ń wo ń amyinai lo ngwnu-awo nyi.’
25“Ɓa gna, ‘Haamwasa, wo ń amyinai shnisnu lo ngwnu-awo!’
26“Wa dnaɓəgbe, ‘Əmi nu gna fye nge, əza ń wo ncei lo, a ɓə ga wo ɓe, ama əza yi ń wo to n nyahoi lo m, kwo ənya n wo ncei lo a ɓə la kwo gwo wo. 27Ama əmi anuwnuyii n ɓa nu, n ɓa to ɓə ncei pma ma gyi əbe tu ń əɓa nyi m; fye ɓe n ɓai ń ya, jesnu fya wu ɓa ń əmi awyeba.’ ”
Yeisu ɓe Urishelima n zhni əsu
28Shi Yeisu ɓə kwu ɓəye da, wa gyiabye, woi gwnulo Urishelima. 29Shi wo ɓə wo vyivyiwyi n Betifyeji ń Byetanii tu ń əpe kwnukwnù ń a yi kwo nge Zaitu əpe nyi, wa tnu əwo amwutuyi tnutnu əɓa ngwnu-aba woi gna, 30“Fye lo əzhi n kwo zhi ń əfye abye nyi, shi fye lofyi ń kwo, fye ɓə gye zhagawyi snáyi n gyignyi n ɓo, ədo ń əzaho too shni kwo gwnu m. Fye lo kwo fya ɓe n kwoi ń ya. 31Ń əzaho wa nya fye əɓo, ‘Knyiyi nu zhni fyei lo kwo a?’ Fya gna, ‘Dagayi n əkwo apmai lo.’ ”
32Aza yi ń a ɓə tnu ɓa tnutnu lo ń abye nyi, ɓa lo ɓa ɓwa wyegye shi wo ɓə gna ɓa nyi nu. 33Shi ɓa ɓə zhi ɓai lo zhagawyi snáyi, əkwo adagayi wa nya ɓa əɓo, “Knyiyi nu zhni fyei lo zhagawyi snáyi a?”
34Ɓa dnaɓəgbe, “Dagayi n əkwo apmai lo.”
35Ɓa ɓe n kwoi ń Yeisu aba, ɓa ta aje kpe ń zhagawyi jesnu ɓa la Yeisu tu ń kwo. 36Shi wo ɓə lo n əznai, aza ɓa ta əɓa aje zhi n zokwo.
37She wo ɓə wó vyivyiwyi n abai ń zokwo shnilo ń Zaitu əpei nyi, deeji əwo amwutuyi nya vnyanya, ɓa ya agbmada nya ɓai ci Shekwoyi n abəgyei kwu wu ntu aɓo awowoyi ɓo vnyanya ń ɓa ɓəə kwu gyewye nyi:
38“Anabəlikada nu n əsui ń wo ɓe dna ń Dagayi əye nyi!”
“Bwugbafu ń əshemi jesnu n latui ń aba asnadadudui!”
39Afarisiyi ho n fyi ń deeji ɓa gna Yeisu, “Nyawuyi, gnaknyi əho amwutuyi!”
40Wa dnaɓəgbe, “Əmi nu gna fye nge ń ɓa kwu cepyi, akwuta ɓa ɓəwyi.”
41Shi wo ɓə wó vyivyiwyi n Urishelimai, wa gye əzhiyaakwo yi, wa ciɓwi kpe kwo 42jesnu wa gna, “Ngye əfye, kwo əfyehni n mi daɓo n fyei nyi; fye ɓə gna fya kwu kpe, nnaiye, ənya ń kwo ɓa ga fye bwugbafu; ama nsaiye, kwo ɓwuɓwui lo ń əfye awyeba. 43Anyipyei ɓə ɓe kpe ń fye, əsa ń əfye anuwnuyi ɓə mi agəlu n shé fye gwnu ai znu fye fyi ń səpa dəhodəhoi. 44Ɓa ɓə lúfye ya zhi ń əknyi, əfye n əfye aɓyii ń ɓa fyilo n əfye gəlu mi. Ɓa to ɓə fa kwuta tu ń ədo əshe, ntuge fye to ɓə kpe əsa ye ń Shekwoyi ɓə ɓe əfye aba n gnyignyii m.”
Yeisu dna n Dagayipwuwa
45Shi Yeisu ɓə lodna ń Dagayipwuwa ashilagyí, wa ya aza yi nyaya ń ɓa ɓə fyi ɓai kwnu anya nyi. 46Wa gna ɓa, “A cei kafyilo, ‘Əmi pwuwa ɓaa zhni aduwazhni pwuwa nu,’ ama fye la kwo zè ‘azokwojeyi nyakwnu.’ ”
47Wyihowyihoi wo ɓə zhni woi wunya dna ń Dagayipwuwa. Ama apirisiti tukwoda, owa anyawuyi n aza atukwodai, ɓə zhi ɓai fa zhi nabai ɓa wu wo. 48Dudulonu to ɓa ɓwa zokwo ɓa zhni ce m, ntuge aza vnyanya ɓə kpmima n əwo aɓədagbma nu.
ទើបបានជ្រើសរើសហើយ៖
Luuka 19: OGNB
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Biblica® Open Gbagyi Nyizeyenya Baibwulu: Shekwoyi Ɓədagbma™, Ɓəgbeshì Woiwoyi
© 1997, 2025 Biblica, Inc.
Biblica® Open Gbagyi Contemporary Bible™, New Testament
Copyright © 1997, 2025 by Biblica, Inc.
“Biblica” ɓədo n Biblica əznù zhazhai, ɓa zhni aɓwaze aznù nu n a cei kafyilo n United States Patent and Trademark Office (Amerika əznù aɓwaze nya ɓədo n nyazhnizhni ofyisii) n Biblica, Inc. ncei yafyi. Apmazhni n gbegai nu.
“Biblica” is a trademark registered in the United States Patent and Trademark Office by Biblica, Inc. Used with permission.
See promoVersionInfo in metadata.xml for Creative Commons license.
