Luuka 17
17
Leifyi, Gaiciyaganunui, Tnutnuzhni
1Yeisu wa gna əwo amwutuyi: “Anya ń ɓa zhni aza ɓa knyiabwonyi, ɓəshishi nu ɓa ɓe, ama owii n zahozahoyii ń wo nu zhni zokwo dna ń anya yi ɓe ncei nyi. 2Kwo ɓə ɓaa wo du aa wyigwokwuta gyidna wo ń bəgye, aa wo sheya dna ń shikwo, à fa ədo ń wo ɓa zhni zaknayi ń aɓyi ye wa cebwonyi nyi. 3Ntulonu fye kwu əwyewna əfyehni.
“Ngye əhozado kwo əho mapwi, wa zhni ho leifyi, gnaknyi wo, jesnu n wa yeabwi, kwu abwizo wo. 4N wa bwu ho aɓwa ngwnu-tnaaba nu n nyipyei gbmanyi, jesnu aɓwa tnaaba wa jezeɓe da ho woi gna, ‘Mi la yeabwi,’ ɓəshishi nu ha zo wo abwi.”
5Atnutnuloyi ɓa gna Dagayi, “Ɓe yi gaiciyaganunui!”
6Wa dnaɓəgbe, “Ngye fye n gaiciyaganunui lo n ɓwasnu cewyi ngye musta byegye, fye ɓa myi fya gna gbaayi shnuwna ye, ‘La shiya jesnu haa shidna n shikwo,’ kwo ɓa vyi əfye ɓəgbetu.
7“Kwo ń a gna nge zaknayi ń əfye wo ń fyenui tu lo woi nu ofwa, kwo woi kna wo aknyi. Əsa ń wa zhi ofwa ncei, wo ɓa gna fyenu, ‘Ɓe ha sasetu ya kwnu nyagyi gyi’? 8Wo taa gna wo nu, ‘Zhni mi wyeshenyagyi, la əhohni ye nabai ha vyi mi ɓo ma gyi nyagyi jesnu ma sni; ń əkwo avnu hoi kpé nyagyi gyi jesnu hoi sni m’? 9Wo ɓa sá fyenu ami ntuge wo kwu əɓo zhni ń a gna wo nge wo zhni nyi? 10Ntulonu əfyehni ce, əsa n fye kwu ɓəhoɓəhoi zhni ń a gna fye nge fye zhni nyi, fye gna, ‘Yi zhni atnutnuyi nu ń yi to kwnuce lo m; ya ɓwa əyi tnutnu nu zhni.’ ”
Yeisu ga anayiwnu nyasnayi ngwnu-awo kágna
11Nsayii, Yeisu wa znazna dnalo ń əknyigna Samariya nya n Gəlilii, woi wna zokwo lo Urishelima. 12Shi wo ɓə gnyi woi lodna ń zhigba, azanugbai ngwnu-awo ń ɓa ɓə ń nayiwnu nyasnai, ɓa ɓe da wo, ɓa kwu gnyiagnyi zhi n tagnyi 13jesnu ɓa yi wo n bəgye kalái, “Yeisu, Dagayi, gye yi snusnu!”
14Shi wo ɓə gye ɓa, wa gna, “Fye lo fyei wu əfyehni n apirisiti aba.” Nlonu shi ɓa ɓə lo, ɓa kwu kágna ɓwa.
15Zaknayi ń əɓa, shi wo ɓə gye wo la kágna ɓwa, wa jezeɓe, woi ci Shekwoyi n bəgye kalá nyai. 16Wa ɓe wa yashi ń Yeisu apita aba wa sa wo ami; wo ɓə zhni Samariyayi nu.
17Yeisu wa nyaɓo, “A to ká aza gna ngwnu-awo nu vnyanya m? Azaje ngwnu-ciwagbmanyi n zhi ń nanu a? 18Əzaho to jezeɓe wa ci Shekwoyi m, akpəge zhiɓeyi ye?” 19Nlonu wa gna wo, “Laka ha lo; əho gaiciyaganunui kwo la ho kágna.”
Shekwoyi əbemi əkwo ɓeɓe
20N əwyihoi, Afarisiyi ɓə nya wo əɓo, əsa ń Shekwoyi əbemi ɓə ɓe ncei. Yeisu wa dnaɓəgbe, “Shekwoyi əbemi to ɓə ɓe ai gye kwo əwye nu m, 21kwo nge aza ɓə gna, ‘Kwo gnyi nyi ń ya,’ kwo, ‘Kwo gnyi nu ń ɓwayi m,’ ntuge Shekwoyi əbemi dnalo ń əfye atasni nu.”
22Nlonu wa gna əwo amwutuyi, “Əsa ɓe lo ń a ɓə wo fye əpwa ngye fye gye nyipyei gbmanyi n Əza Nugwnu anyipyei, ama fye to ɓə gye kwo əwye m. 23Aza ɓə gna fye, ‘Wo gnyi nu ń ɓwaayi!’ Kwo, ‘Wo gnyi nyi ń ya!’ Fye to ɓə bwusi fyei vyi ɓa lo m. 24Ntuge Əza Nugwnu dna ń əwo nyipyei; kwo ɓə wu ngye əgbmanabmya nu, ń kwo bmyana manaa jesnu kwa la əná ya ń anyìbmana; kwa ya ń səpa gbmanyi kwaa gwoya lo ń səpa dəyi. 25Ama n kpmisnu, ɓəshishi nu, wo ɓə kwu azhnìgye, aɓo bəgyé nya kpa, jesnu cala ye kwoi la əwo aɓo na.
26“Ń ɓwasnu shi kwo ɓə nyì, fyi ń Nuhu anyipyei nyi, nlonu cè n kwo ɓə zhni fyi ń Əza Nugwnu anyipyei. 27Aza ɓə laɓa ɓai gyi, ɓai sni, ɓai pa amwula jesnu ai ga ɓa ń amwula, nya nyipyei ń Nuhu ɓə lodna ncei n əya nuwnanya. Nlonu nuwna kwa kwnu-akpma jesnu kwa kwu ɓa wu vnyanya.
28“Kwo ɓə ɓwa wu nlai nu fyi ń Lotu anyipyei. Aza ɓə laɓa ɓai gyi, ɓai sni, ɓai si anya jesnu ɓai kwnu anya, ɓai bye anya jesnu ɓai mi anyakwnu. 29Ama n nyipyeii ń Lotu ɓə fa Sodom nyi, əná n solufoi kwa kwnuɓe ń əshemi kwa wu ɓa vnyanya.
30“Kwo ɓə ɓwa wu nlai nu ń nyipyeii ń Əza Nugwnu ɓə kpeya ɓe ncei nyi. 31Dna n əwyi yi, əza ń wo tu lo ń əwo nyakwnusni, n nyaɓwai yafyi n əmi, wo to ɓə kashi lo nabai wo kwu ɓa m. N ɓwajesnu nlonu, əza n wo dnalo ń zhabwi wo to ɓə jezelo apyi ntu nyaho ɓo m. 32Pa Lotu nyikwo ɓo! 33Əza ń wo ye wa shi əwohni wyewyeyi, wo ɓa ɓwu kwo nuwna, jesnu əza ń wa ɓwu əwo wyewyeyi nuwna, wo ɓə la kwo wnakna shi nu. 34Mi gna fye, dna ń sukwoi, aza ngwnu-aba ɓə kpe ɓai wnagye kpe n gədo gbmanyi; ai shni zaknayi jesnu ai fa zaknayi tu. 35Anyikwoza ngwnu-aba ɓə fyi ɓai gwo əwyi n kwnusnu, a ɓə la zaknayi ai fa gbmanyi dna. [36Azanugbai ngwnu-aba ɓə fyi ń bmana, ai la zaknayi jesnu ai fa zaknayi gnyi.”]
37Ɓa nyaɓo, “Ń knyi ɓwayi nu a, Dagayi?”
Wa dnaɓəgbe, “Aba ń nayi fyifyiyi shi, abaayi nu ń agwulu yezhi.”
ទើបបានជ្រើសរើសហើយ៖
Luuka 17: OGNB
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Biblica® Open Gbagyi Nyizeyenya Baibwulu: Shekwoyi Ɓədagbma™, Ɓəgbeshì Woiwoyi
© 1997, 2025 Biblica, Inc.
Biblica® Open Gbagyi Contemporary Bible™, New Testament
Copyright © 1997, 2025 by Biblica, Inc.
“Biblica” ɓədo n Biblica əznù zhazhai, ɓa zhni aɓwaze aznù nu n a cei kafyilo n United States Patent and Trademark Office (Amerika əznù aɓwaze nya ɓədo n nyazhnizhni ofyisii) n Biblica, Inc. ncei yafyi. Apmazhni n gbegai nu.
“Biblica” is a trademark registered in the United States Patent and Trademark Office by Biblica, Inc. Used with permission.
See promoVersionInfo in metadata.xml for Creative Commons license.
