Yohana 6
6
Yeisu ga aza dugwu-atnu nyagyi
1Dna n əsa ho n dəye avnu, Yeisu wa piyalo Gəlili Shikwo əkpma ń kpaai (əkwo nu zhni, Tiberiyas Shikwo), 2deeji yaakwo kwa vyi wo ntuge ɓa ɓə kwu aznù anyasnayi kágna nya gyewye n wo ɓəə kwu zhni nyi. 3Nlonu Yeisu wa gwnulo əpe waa sasetu n kwnusnu n əwo amwutuyii. 4Ayahudiyi awyefna Gnanaznu nya ɓə la wo vyivyiwyi.
5She Yeisu ɓə kpewyewu, wa gye deeji yaakwo kwoi ɓe da wo. Wa gna Fyilibwus, “Yi ɓa si nyagyi n nanu ntu n aza ye ɓo, ɓa gyi a?” 6Wo ɓə nyaɓo ye nabai wa mwi wo nu, ntuge wo ɓə kpe əɓo əye n wo ɓə ncei dna n bwugba wa zhni.
7Fyilibwus wa dna wo ɓəgbe, “Kwo ɓa lá gyiwye n du əye tokwnu tnutnu gyiwye ya, ya myi ya si nyagyi kwa kwnu zahozahoyi towo!”
8Əwo mwutuyi ho, Anduru, Sima Byitusu zado wa daɓo, 9“Əɓyinugbai ho gnyi nyi n biledi aknanai shi ngwnu-atnu n abmya aɓyii ngwnu-aba, ama kwo ɓa si knyiɓwai nu fyi ń bəgyé ye a?”
10Yeisu wa gna, “Fye gna aza ɓa kwu sase.” Agbegbe-pwutu ɓə nyi n abaayi, jesnu ɓa kwu sase zhi (azanugbai ngye adugwu ngwnu-atnu nu ɓə zhi n ɓo). 11Nlonu Yeisu wa kwu biledi aknana yii, wa sa Shekwoyi ami, jesnu wa gná kwo ya ga aza yi n ɓa ɓə sase zhi nyi, shi ɓa ɓə ɓá shni gyi. Wa je abmya gná ya nlonu ga ɓa.
12She ɓa ɓə kwu gyi, nubwo kwa kwu ɓa fwu, wa gna əwo amwutuyi, “Fye ye awyiwoi zhi n ɓa ce nyi. Fye to ye nyaho nge kwo zhniagbma m.” 13Ntulonu ɓa ye biledi awyiwoi zhi, n aza yi ɓə gyi kwa ce nyi, kwa kwu nu acekwnu ngwnu-awoceaba.
14Shi aza ɓə gye əznù n Yeisu ɓə zhni nyi, ɓa ya ɓəda, “Ɓəhnihni əza ye nu zhni Sheɓəgwognayi n wo ɓa ɓe dna n anyì nyi.” 15Yeisu, woi kpe nge ɓa n bwugbai dnalo ɓa dna wo əbe n akalá, wa wyiya lo əpe əwo gbmanyi.
Yeisu znazna tu n nuwna
16She wyeshe ɓə shé, əwo amwutuyi ɓa shnilo nuwna-znudna, 17aba n ɓa ɓə lofyi n əya nuwnanya ɓa pi nuwna-znudna ya lo Kapanam. N əsayii wyegbma ɓə la dna, to Yeisu woi jezeɓe da ɓa m. 18Əse ɓə gnyi kwoi ci n kalái, nuwna kwaa cenya. 19She ɓa ɓə dna əya ngye amyalu ngwnu-ata kwo ngwnu-anyi, ɓa gye Yeisu woi ɓe da əya nuwnanya, woi znazna tu ń nuwna; ədna kwa wo ɓa, ɓa fyiakwu. 20Ama wa gna ɓa, “Əmi nu; ədna to wo fye m.” 21Nlonu ɓa kwu ye ɓa gwo wo dna n əya nuwnanya, n əsagbmanyii əya kwa si nuwnagbe aba n ɓa ɓə lo nyi.
22Shi əfye ɓə gyi zhi deeji n kwo ɓə zhi n nuwna-znudna əkpma dəyi nyi, kwa kwu kpe nge əya gbmanyi nu ɓə ɓwa ceshi n ɓo, jesnu nge Yeisu to ɓe lo kwo n kwnusnu n əwo amwutuyii m, ama nge ɓa ɓə kwuka ɓahniɓahni nu. 23Nlonu aya nuwnanya ho ɓai kwnu n Tiberiyas ɓa kpezhi vyivyiwyi n abaayii n aza ɓə gyi biledi n Dagayi ɓə sa Shekwoyi ami nyi. 24Shi deeji ɓə kwu kpe nge Yeisu kwo əwo amwutuyi to ɓə zhi n ɓo m, ɓa lofyi n aya nuwnanya ɓa lo Kapanam ɓai zna Yeisu shni.
Yeisu nu zhni biledi wyewyeyi nya
25Shi ɓa ɓə gye wo tu n nuwna-znudna əkpma dəyi, ɓa nya wo əɓo, “Rabyi, ha si n ya n knyisai nu a?”
26Yeisu wa dnaɓəgbe, “Ɓəhnihni əmi nu gna fye, fye ta zna mi shni, ntuge fye gyei aznù nu n mi zhnii nyi m, ama ntuge fye kwui biledi gyi nu, nubwo kwa kwui fye fu. 27Fye to zhni tnutnu ntu n nyagyi ɓo n kwo wnuya m, ama ntu n nyagyi ɓo n kwo ta wnuya m, n kwo ga wyewyeyi nyalonyalo nya, ədo ń Əza Nugwnu ɓa ga fye nyi. Ntuge n əwo nu n Shekwoyi Dada wo la əwo əznù gwogwoyi əɓwa tu.”
28Nlonu ɓa nya wo əɓo, “Knyi ɓəshishi nu lo ń yi ɓa zhni, nabai ya zhni atnutnu n Shekwoyi ncei znutu a?”
29Yeisu wa dnaɓəgbe, “Shekwoyi tnutnu nu nyi: fye ga gaiciya n əza n wo la tnu ncei nyi.”
30Ntulonu ɓa nya wo əɓo, “To, knyi əznùi nu n ho ɓa wu, nabai ya gye kwo jesnu ya ga ho gaiciya a? Knyiɓei nu n ho ɓa zhni a? 31Əyi azakwoi ɓə kwu manna gyi fyi n zhabwikawu; ngye shi a ncei kafyilo: ‘Wa ga ɓa biledi n kwo gbmi n əshemi nyi, ɓá gyi.’ ”
32Yeisu wa gna ɓa, “Ɓəhnihni əmi nu gna fye, Mwusa nu to ɓəə ga fye biledi n kwo gbmi n əshemi nyi m, ama əmi Dada nu ga fye biledi gaiciya nya, n kwa gbmi n əshemi nyi. 33Ntuge Shekwoyi biledi zhni nyagyi nu n kwa gbmi shnizhi n əshemi, kwoi ga wyewyeyi dna n anyì.”
34Ɓa gna, “Haamwasa, zhni ha ga yi biledi ye ciici.”
35Nlonu Yeisu wa znu ɓəda ya, “Əmi nu zhni biledi wyewyeyi nya. Əzadəhodəhoyi n wa ɓe əmi aba, myikwnu taa je wo gwnu m, kpeekpe, jesnu əzadəhodəhoyi n wa ga gaiciya n mi, nuwna myikwnu taa je wo wo m, nanyinanyi. 36Ama ngye shi mi ɓə gna fye nyi, fye kwu gye mi əwye, dudulonu fye too ga gaiciya m. 37Aza yi vnyanya ń Dada ga mi, ɓa ɓá ɓe da mi, jesnu əzadəhodəhoyi n wa ɓe da mi, mi taa nya wo ya m, nanyinanyi. 38Ntuge mi to gbmi shnizhi n əshemi, ma zhni əmihni ɓəye nu m, ama ma zhni əza ɓəye n wo ɓə tnu n mii nyi. 39Njesnu əza yi ɓəye nu nyi n wa tnu n mii nyi, nabai to ma ɓwu zahozahoyi nuwna n wo kwu ɓa ga mi nyi m, ama mi ɓə kwu ɓa kala, n nyipyei kpmaknayii. 40Ntuge əmi Dada ɓəye nu ge, əzahozahoyi n wo tuwye n Nugwnu nu jesnu woi ga gaiciya dna n wo, wo ɓə ɓwa wyewyeyi nyalonyalo nya; jesnu mi ɓə lá wo kala n nyipyei kpmaknayi.”
41N ɓəyei, Ayahudiyi ń ɓa ɓə zhi n abaayi, ɓa ya gwunugwunu da tu n əwo tukwo ntuge wo ɓə gna, “Əmi nu zhni biledi n kwa gbmi shnizhi n əshemi.” 42Ɓa gna, “Yeisu nu to gnyi nyi, Yusufu nugwnu, əza n yi kpe əwo dada əye lo, n əwo əyai m? Kwo ɓa zè n wunanu nsaiye wa gna, ‘Ma gbmi shnizhi n əshemi nu a’?”
43Yeisu wa dnaɓəgbe, “Fye kwu fa gwnunugwnunu daɓo fyehnifyehni. 44Zaho to lo ń wo ɓa ɓe da mi m, akpəge Dada ń wo ɓə tnu n mii nyi, wa gnyi wo ɓe ncei, jesnu mi ɓə la wo kala gnyi n nyipyei kpmaknayii. 45A ncei kafyilo dna n Sheɓəgwognayi nyaka: ‘Əɓa vnyanya, Shekwoyi nu ɓəə wu ɓa əwo ɓəda.’ Əzahozahoyi n wo kwu wo n Dada əgbe jesnu wonyi lá tumwi n wo, wo ɓa ɓe da mi. 46Əzaho too lo n wo shni Dada wyegye m, akpəge əza n wo gbmi n Shekwoyi aba nyi; əwo nu ɓwasnu n wo kwu Dada gyewye. 47Ɓəhnihni əmi nu gna fye, əza n wo ga gaiciya, wo n wyewyeyi nyalonyalo nyai lo. 48Əmi nu zhni biledi wyewyeyi nya. 49Əfye azakwoi ɓə kwu manna gyi fyi n zhabwikawu, dudulonu ɓa kwu fyí. 50Ama biledi nu gnyi nyi, n kwa gbmi shnizhi n əshemi, ədo n zahozahoyi ɓa myi wa gyi to wa fyí m. 51Əmi nu zhni biledi wyewyeyi nya n kwa gbmi shnizhi n əshemi. Əzadəhodəhoyi n wo gyi biledi ye, wo ɓa ɓwa wyewyeyi nyalonyalo. Əmi nayi nu zhni biledi ye, ədo n mi ɓə ga ntu anyì wyewyeyi ɓwa ɓo.”
52Nlonu Ayahudiyi ɓa ya aɓənakpeaje n əwyei bmyibmyiyi, “Kwo ɓa zè n wunanu əza ye wa ga yi əwo nayi nge yi gyi a?”
53Yeisu wa gna ɓa, “Ɓəhnihni əmi nu gna fye, akpəge əza wa gyi Əza Nugwnu nayi jesnu waa sni əwo ami, wo too n wyewyeyii dnalo n əwo mi m. 54Əzadəhodəhoyi n wa gyi əmi nayi, waa sni əmi ami, wo n wyewyeyi nyalonyalo nyai lo jesnu mi ɓə la wo kala n nyipyei kpmaknayii. 55Ntuge əmi nayi zhni nyagyi hnihnii nu jesnu əmi ami zhni nyasnisnii hnihnii nu. 56Əzadəhodəhoyi n wa gyi əmi nayi jesnu wa sni əmi ami, wo dnalo n əmi, əmihni ce mi dnalo n wo. 57N ɓwasnu shi Dada wyewyeyida ɓə tnu mi tnutnu jesnu minyi gyianyì ntu n Dada ɓo nyi, ntulonu əza n wa gyi əmi nayi, wo ɓa gyianyì ntu n əmi ɓo. 58Dəye nu zhni biledi n kwa gbmi shnizhi n əshemi. Əfye azakwoyi ɓə gyi manna jesnu ɓa kwu fyí, ama əza n wa gyi biledi ye wo ɓa gyianyì nyalonyalo.”
59Wo ɓə da ɓəye woi gnyi woi wunya nu dna n Ayahudiyibwokwnu n Kapanam.
Amwutuyi bəgyé ɓaa bwusi n Yeisu aba
60She ɓa ɓə wo ɓəye, əwo amwutuyi n mwa bəgyé ɓa gna, “Nyawu ye dnaɓo lo. Nyikanu ɓa gwo kwo a?”
61Woi kpe nge əwo amwutuyi da gwnunugwnunu lo tu n ɓəye, Yeisu wa gna ɓa, “Dəye kwo la fye bwu nu? 62Nlonu, ngye fya gna fya gye Əza Nugwnu woi gwnulo aba n wo ɓə shni dna nu ma! 63Zafnu nu ga wyewyeyi; nayi to n apmai m. Aɓədagbma n mi kwu gna fye nyi; ɓa nunui lo n Zafnui jesnu n wyewyeyii. 64Dudulonu azaho lo n fye, n ɓa too n gaiciyai ga lo m.” Ntuge Yeisu ɓə kpe, n aɓoyaba, əza n ɓa, n wo to n gaiciyai ga lo m, jesnu n əzai n wo ɓa ɓwu wo. 65Wa gwodu wa gna, “Dəye nu zhni mii gna fye nge zahozahoyi to lo n wo ɓa ɓe da mi m, akpəge n Dada wa bma wo zhnii.”
66Ənya n kwo laka nsayii, əwo amwutuyi bəgyé ɓa pmyiavnu wu wo, to ɓa je wo vyii m.
67Yeisu wa nya Awoceaba yi, “Fye to ncei pmalo fya fa əmi vyi ɓo m, kwo fye ɓa lo ce a?”
68Sima Byitusu wa dna wo ɓəgbe, “Dagayi, ya lo da nyika a? Əho nu n aɓədagbma wyewyeyi nyalonyalo nyai lo. 69Nsaiye yi kwu gaiciyaga, jesnu yi kpəlo nge əho nu zhni Gyigyiyi Shekwoyi nya.”
70Nsayi Yeisu wa dnaɓəgbe, “Əmi nu to ɓə knyí fye, əfye Awoceaba m? Dudulonu zagbmanyi n fye, wo zhni Shetam nu!”
71(Wo ɓə da Yahuda nu ɓo, Sima Iskariyoti nugwnu, əza, kwo shikwonyi wo ɓə zhni gbmanyi nu n Awoceaba yi, əwo nu ɓə ye wa ɓwu wo.)
ទើបបានជ្រើសរើសហើយ៖
Yohana 6: OGNB
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Biblica® Open Gbagyi Nyizeyenya Baibwulu: Shekwoyi Ɓədagbma™, Ɓəgbeshì Woiwoyi
© 1997, 2025 Biblica, Inc.
Biblica® Open Gbagyi Contemporary Bible™, New Testament
Copyright © 1997, 2025 by Biblica, Inc.
“Biblica” ɓədo n Biblica əznù zhazhai, ɓa zhni aɓwaze aznù nu n a cei kafyilo n United States Patent and Trademark Office (Amerika əznù aɓwaze nya ɓədo n nyazhnizhni ofyisii) n Biblica, Inc. ncei yafyi. Apmazhni n gbegai nu.
“Biblica” is a trademark registered in the United States Patent and Trademark Office by Biblica, Inc. Used with permission.
See promoVersionInfo in metadata.xml for Creative Commons license.
