Yohana 12
12
A la Yeisu pmya n Byetani
1Gnanaznu awyefna kwoi ce anyipyei tnanyi, Yeisu wa ɓe Byetani, aba n Liyazuru ɓə dna, n Yeisu ɓə la wo kala n əfyi nyi. 2N abaayi a kwu wyeshe nyagyi zhni ntu ń Yeisu ɓo, Mata wa gná nyagyi, jesnu Liyazuru ɓə dna n aza, n ɓa ɓə kwnu asese kpe n Yeisui n tebwul. 3Nlonu Mariyamwu wa la nardi əmisnidaí tnadodnai nakwoi, ngye lita gbmanyi; wa zè kwo kpe n Yeisu apita, wa wnu kwo ya n əwo tukwoyii. Pwuwa yi kwaa gwugnyi n əmisnidaí asnii.
4Ama zaknayi n əwo amwutuyi, Yahuda Iskariyoti, n əwo nu ɓə ye wa ɓwu wo ń abyeɓwa nyi, to wa ye m, 5“Knyiyi nu na zhni to a kwnu əmisnidaí ye jesnu a ga awyekwoyi gyiwye ma a? Kwo gbmi gwodogwo əye ɓwugyi gyiwye lo.” 6Wo to ɓə da ɓəye ntuge wo ɓə ye n awyekwoyii nu m, ama ntuge wo ɓə zhni əvyì nu; shi wo nu ɓə zhni gyiwye shiyi nyi, wo ɓə zhni wa dnaɓwa wa bma əwohni zhni n ənyai n kwo dnalo n lagyiita.
7Yeisu wa dnaɓəgbe, “La wo fa. A ɓə zhni əmisnidaí ye nge waa kwo soshi nu ntu ń əmi byibyi nyipyei ɓo. 8Awyekwoyii kwnusnu lo n fyei nsahosahoi, ama fye taa ɓwa əmi ciici m.”
9Aɓwazhilo Ayahudiyi deeji yaakwo ɓa kwu kpe nge Yeisu gnyilo n abaayi, ɓa ɓe toge n ɓwasnu ntu ń əwo ɓo nu m, ama ɓa gye Liyazuru cè, n wo ɓəə la wo laka n əfyi nyi. 10Ntulonu apirisiti atukwoda ɓa pyiɓo nabai aa Liyazuru wu ɓədo, 11ntu n əwo əɓo, Ayahudiyi bəgyé ɓə gnyi ɓai lo da Yeisu ɓai ga gaiciya n wo.
Yeisu lo ɓe Urishelima ngye əsu
12Əfye kwa gyi zhi, deeji yaakwo n ɓa ɓəə kwu ɓe awyefna nyi, ɓa wo nge Yeisu ɓe lo n zokwo woi ɓe Urishelima. 13Ɓa kwu abalá afnyitolo ɓa kwnuya lo ɓəə shegwnu wo, ɓai ɓəwyi,
“Hosana!”
“Anabəlikada nu n əzai n wo ɓe dna n Dagayi əye!”
“Anabəlikada nu n əsui Israila nya!”
14Yeisu wa gye zhagawyi snáyi wa sasetu n kwo, ngye shi kwo kafyilo:
15“To wodna m, Siyona Nyigwnu;
gye, əho əsu ɓe lo,
n sasetu n zhagawyi snáyi.”
16N kpmisnu, əwo amwutuyi to ɓə ɓwa aɓo ye vnyanya awyega m. N ɓwasnu she a ɓə la Yeisu latu nu, n ɓa ɓə kpe nge aɓo ye kafyilo da əwo əɓo jesnu nge a kwu aɓo ye zhni kpe wo.
17Nsayii deeji n kwo ɓə kwnusnu n woi əsa ń wo ɓə yi Liyazuru dna n vnyigwo, wa la wo kala n əfyi nyi, ɓa gwodu n ɓədagbma lapwii. 18Aza bəgyé, ntuge ɓa ɓəə kwu wo nge wo kwu əznù ye wu, ɓa kwnuya lo ɓəə shegwnu wo. 19Ntulonu Afarisiyi ɓa gna aje, “Yi gyewye, dəye taa lo n yii ń ɓwaho m. Fye gye shi anyì vnyanya lo ɓai vyi wo!”
Yeisu pma əwo əfyi əɓo da
20Nsayii Agirikiyi ho ɓə fyi n aza yi n ɓa ɓə lo mwamwaga dna n awyefna əsa nyi. 21Ɓa ɓe da Fyilibwus, n wo ɓə gbmi n Betsaida dna n Gəlili n ɓənyai. Ɓa gna, “Haamwasa, yi ncei pmalo ya gye Yeisu əwye.” 22Fyilibwus wa lo wa gna Anduru; Anduru n Fyilibwusii ɓa lo ɓa gna Yeisu.
23Yeisu wa dnaɓəgbe, “Əsa kwo la si ń Əza Nugwnu ɓa ɓwa latu. 24Ɓəhnihni nu n mi gna fye, akpəge alikama byegye kwa kaya dna n əknyi kwaa fyí, kwo ɓwasnu byegye gbmanyi nu. Ama n kwaa fyí, kwo ga alikama abyegye n mwa bəgyé. 25Əza n wo ye əwohni wyewyeyi, wo ɓə ɓwu kwo nuwna, jesnu əza n wo wnu əwohni wyewyeyi aɓo dna n anyì ye, wo ɓə la kwo shiɓwa nya wyewyeyi nyalonyalo. 26Əzadəhodəhoyi n wo zhni əmi tnutnu, ɓəshishi nu wa vyi mi, jesnu aba n mi dna nyi, əmi tnutnuyi ɓə dna n abaayi ce. Əmi Dada ɓa ga əza mwamwa n wo zhni əmi tnutnu.
27“Ńsayi əmi wyewyeyi dnalo n azhnìgye, jesnu mi ɓa gna nge nanu a? ‘Dada, gnyi mi ya ń əsa ye’? Aawo, ntu n əɓətukwo ye nu n ma ɓe dna n əsa ye. 28Dada, la əho əye latu!”
Nlonu bəgye kwa gbmi n əshemi, “Mi la kwo latu, jesnu mi ɓa je kwo latu.” 29Deeji n kwo ɓə zhi ń abaayi, kwaa wo ce nyi, kwa gna, əgbma la əwyisa; azaje ɓa gna maləka kwu əɓo da n woi.
30Yeisu wa gna, “Bəgye ye, kwa ɓe ntu n əfye bmazhni əɓo nu, toge əmi nya m. 31Nsaiye nu zhni anyì ye owada əsa; nsaiye a ɓa nya anyì ye əsuɓyi ya. 32Jesnu əsa ń a ɓə la mi lágwnu tu ń əknyi əshe, mi ɓə gnyi aza vnyanya ga əmihni.” 33Wo ɓə da ɓəye nabai wa wu əfyi pya nu əɓo n kwo ɓə wna wo.
34Deeji kwa daɓo, “Yi kwu wo n owa nge Kirisiti ɓə la gnyi nyalonyalo, nlonu ho ɓa gna n wunanu ge, ‘Ɓəshishi nu a la Əza Nugwnu gwnu’? Nyikanu zhni, ‘Əza Nugwnu a’?”
35Nlonu Yeisu wa gna ɓa, “Fye ɓa ɓwa bwuznagna kwa ɓwasnu n əsai fyewyi nu. Fye znazna fye yee n bwuznagnai, ntuge əsa ɓə lo n wyegbma ɓə la lapwi fye. Əzadəhodəhoyi ń wa znazna dna ń wyegbma wo ta kpe aba əye lo ń wo lo m. 36Fye la gaiciya ga dna n bwuznagna, fyei ye n əsai ɓwa, nabai n fye ɓa kwu zè bwuznagna aɓyi.” Shi Yeisu ɓə kwu ɓəda ye zo da, wa laka waa əwohni so, to ɓa gye wo əwye m.
Gaiciyaga ɓədo n tnagaiciyagai fyi n Ayahudiyi
37Kwo n aznù bəgye avnu n Yeisu ɓəə kwu wu n əɓa awyeba nyi, dudulonu ɓa to ɓə ga gaiciya dna ń wo m. 38Dəye ɓə ye kwa nu ɓədatnu nu n sheɓəgwognayi Ishaya ɓə da:
“Dagayi, nyikanu n la gaiciya ga n əyi ɓədatnu a,
jesnu n nyika aba nu n Dagayi ɓwagbma kwo la kpeyawu a?”
39Ntu n ɓəye ɓo, to ɓa ga gaiciya m, ngye shi Ishaya ncei da lo dna n abaho:
40“Wo kwu awye ɓwu ɓa
jesnu wo kwu əɓa adu kpakalá,
nabai to ɓa gyewye n əɓa awyei m,
kwo ɓa kpəgənyi n əɓa adui m,
kwo ɓa pmyiɓe jesnu ma ka ɓa gna.”
41Ishaya ɓə da əɓo ye ntuge wo ɓə kwu Yeisu latu gyewye nu jesnu wa daɓo ntu n əwo əɓo.
42Dudulonu dna n əsa yi bəgyé fyi n atukwoda ɓa kwu gaiciya ga n wo. Ama ntu n Afarisiyi ɓo, to ɓa ye ɓa wu əɓa gaiciyaganunui pəipəi m, ntuge ɓa ɓə zhi n ədnai nge a ɓa nya ɓa ya n Ayahudiyibwokwnu; 43ntuge ɓa ɓə ye zanyikwoci cici, n du cici n kwo gbmi n Shekwoyi aba.
44Nlonu Yeisu wa dnawyi, “Əzadəhodəhoyi n wo ga gaiciya dna ń mi, wo to ɓwa gaiciyaga n əmi nu m, ama dna n əza n wo ɓə tnu n mii nyi. 45Əza n wo shi mi awye lo, wo gye əza nu lo, n wo ɓə tnu n mii nyi. 46Mi la lo ɓe anyì n zhni bwuznagna, nabai n a taa ɓwa əza, n wo n gaiciyai ga n mi, n wo ɓaa dna n wyegbma m.
47“Zahozahoyi n wo wo əmi aɓədagbma, ama to wa shi əɓa ɓwa m, mi taa da əza yi owa m. Ntuge mi to ɓə ɓe ma da anyì owa nu m, ama ma gnyi anyì. 48Owadayi lo, ntu n əza ɓo n wa na əmi aɓo, jesnu to woi gwo əmi aɓədagbma m; aɓədagbma ye n mi kwu da nyi, əɓa nu ɓə znu wo əknyi dna n nyipyei kpmaknai. 49Ntuge mi to ɓə da əmihni ɓəda nu m, ama Dada n wo nu ɓə tnu n mii nyi, əwo nu ɓə ga mi ɓəgbetu nge mi da aɓo vnyanya, n mi kwu da nyi. 50Mi kpəlo nge əwo ɓəgbetu kwo lo n əzai n wyewyeyi nyalonyalo nya nu. Ntulonu, ɓəhoɓəhoi n ma da, əkwo nu ɓwa əɓo zhni n Dada wa gna mi nge mi da.”
ទើបបានជ្រើសរើសហើយ៖
Yohana 12: OGNB
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Biblica® Open Gbagyi Nyizeyenya Baibwulu: Shekwoyi Ɓədagbma™, Ɓəgbeshì Woiwoyi
© 1997, 2025 Biblica, Inc.
Biblica® Open Gbagyi Contemporary Bible™, New Testament
Copyright © 1997, 2025 by Biblica, Inc.
“Biblica” ɓədo n Biblica əznù zhazhai, ɓa zhni aɓwaze aznù nu n a cei kafyilo n United States Patent and Trademark Office (Amerika əznù aɓwaze nya ɓədo n nyazhnizhni ofyisii) n Biblica, Inc. ncei yafyi. Apmazhni n gbegai nu.
“Biblica” is a trademark registered in the United States Patent and Trademark Office by Biblica, Inc. Used with permission.
See promoVersionInfo in metadata.xml for Creative Commons license.
Yohana 12
12
A la Yeisu pmya n Byetani
1Gnanaznu awyefna kwoi ce anyipyei tnanyi, Yeisu wa ɓe Byetani, aba n Liyazuru ɓə dna, n Yeisu ɓə la wo kala n əfyi nyi. 2N abaayi a kwu wyeshe nyagyi zhni ntu ń Yeisu ɓo, Mata wa gná nyagyi, jesnu Liyazuru ɓə dna n aza, n ɓa ɓə kwnu asese kpe n Yeisui n tebwul. 3Nlonu Mariyamwu wa la nardi əmisnidaí tnadodnai nakwoi, ngye lita gbmanyi; wa zè kwo kpe n Yeisu apita, wa wnu kwo ya n əwo tukwoyii. Pwuwa yi kwaa gwugnyi n əmisnidaí asnii.
4Ama zaknayi n əwo amwutuyi, Yahuda Iskariyoti, n əwo nu ɓə ye wa ɓwu wo ń abyeɓwa nyi, to wa ye m, 5“Knyiyi nu na zhni to a kwnu əmisnidaí ye jesnu a ga awyekwoyi gyiwye ma a? Kwo gbmi gwodogwo əye ɓwugyi gyiwye lo.” 6Wo to ɓə da ɓəye ntuge wo ɓə ye n awyekwoyii nu m, ama ntuge wo ɓə zhni əvyì nu; shi wo nu ɓə zhni gyiwye shiyi nyi, wo ɓə zhni wa dnaɓwa wa bma əwohni zhni n ənyai n kwo dnalo n lagyiita.
7Yeisu wa dnaɓəgbe, “La wo fa. A ɓə zhni əmisnidaí ye nge waa kwo soshi nu ntu ń əmi byibyi nyipyei ɓo. 8Awyekwoyii kwnusnu lo n fyei nsahosahoi, ama fye taa ɓwa əmi ciici m.”
9Aɓwazhilo Ayahudiyi deeji yaakwo ɓa kwu kpe nge Yeisu gnyilo n abaayi, ɓa ɓe toge n ɓwasnu ntu ń əwo ɓo nu m, ama ɓa gye Liyazuru cè, n wo ɓəə la wo laka n əfyi nyi. 10Ntulonu apirisiti atukwoda ɓa pyiɓo nabai aa Liyazuru wu ɓədo, 11ntu n əwo əɓo, Ayahudiyi bəgyé ɓə gnyi ɓai lo da Yeisu ɓai ga gaiciya n wo.
Yeisu lo ɓe Urishelima ngye əsu
12Əfye kwa gyi zhi, deeji yaakwo n ɓa ɓəə kwu ɓe awyefna nyi, ɓa wo nge Yeisu ɓe lo n zokwo woi ɓe Urishelima. 13Ɓa kwu abalá afnyitolo ɓa kwnuya lo ɓəə shegwnu wo, ɓai ɓəwyi,
“Hosana!”
“Anabəlikada nu n əzai n wo ɓe dna n Dagayi əye!”
“Anabəlikada nu n əsui Israila nya!”
14Yeisu wa gye zhagawyi snáyi wa sasetu n kwo, ngye shi kwo kafyilo:
15“To wodna m, Siyona Nyigwnu;
gye, əho əsu ɓe lo,
n sasetu n zhagawyi snáyi.”
16N kpmisnu, əwo amwutuyi to ɓə ɓwa aɓo ye vnyanya awyega m. N ɓwasnu she a ɓə la Yeisu latu nu, n ɓa ɓə kpe nge aɓo ye kafyilo da əwo əɓo jesnu nge a kwu aɓo ye zhni kpe wo.
17Nsayii deeji n kwo ɓə kwnusnu n woi əsa ń wo ɓə yi Liyazuru dna n vnyigwo, wa la wo kala n əfyi nyi, ɓa gwodu n ɓədagbma lapwii. 18Aza bəgyé, ntuge ɓa ɓəə kwu wo nge wo kwu əznù ye wu, ɓa kwnuya lo ɓəə shegwnu wo. 19Ntulonu Afarisiyi ɓa gna aje, “Yi gyewye, dəye taa lo n yii ń ɓwaho m. Fye gye shi anyì vnyanya lo ɓai vyi wo!”
Yeisu pma əwo əfyi əɓo da
20Nsayii Agirikiyi ho ɓə fyi n aza yi n ɓa ɓə lo mwamwaga dna n awyefna əsa nyi. 21Ɓa ɓe da Fyilibwus, n wo ɓə gbmi n Betsaida dna n Gəlili n ɓənyai. Ɓa gna, “Haamwasa, yi ncei pmalo ya gye Yeisu əwye.” 22Fyilibwus wa lo wa gna Anduru; Anduru n Fyilibwusii ɓa lo ɓa gna Yeisu.
23Yeisu wa dnaɓəgbe, “Əsa kwo la si ń Əza Nugwnu ɓa ɓwa latu. 24Ɓəhnihni nu n mi gna fye, akpəge alikama byegye kwa kaya dna n əknyi kwaa fyí, kwo ɓwasnu byegye gbmanyi nu. Ama n kwaa fyí, kwo ga alikama abyegye n mwa bəgyé. 25Əza n wo ye əwohni wyewyeyi, wo ɓə ɓwu kwo nuwna, jesnu əza n wo wnu əwohni wyewyeyi aɓo dna n anyì ye, wo ɓə la kwo shiɓwa nya wyewyeyi nyalonyalo. 26Əzadəhodəhoyi n wo zhni əmi tnutnu, ɓəshishi nu wa vyi mi, jesnu aba n mi dna nyi, əmi tnutnuyi ɓə dna n abaayi ce. Əmi Dada ɓa ga əza mwamwa n wo zhni əmi tnutnu.
27“Ńsayi əmi wyewyeyi dnalo n azhnìgye, jesnu mi ɓa gna nge nanu a? ‘Dada, gnyi mi ya ń əsa ye’? Aawo, ntu n əɓətukwo ye nu n ma ɓe dna n əsa ye. 28Dada, la əho əye latu!”
Nlonu bəgye kwa gbmi n əshemi, “Mi la kwo latu, jesnu mi ɓa je kwo latu.” 29Deeji n kwo ɓə zhi ń abaayi, kwaa wo ce nyi, kwa gna, əgbma la əwyisa; azaje ɓa gna maləka kwu əɓo da n woi.
30Yeisu wa gna, “Bəgye ye, kwa ɓe ntu n əfye bmazhni əɓo nu, toge əmi nya m. 31Nsaiye nu zhni anyì ye owada əsa; nsaiye a ɓa nya anyì ye əsuɓyi ya. 32Jesnu əsa ń a ɓə la mi lágwnu tu ń əknyi əshe, mi ɓə gnyi aza vnyanya ga əmihni.” 33Wo ɓə da ɓəye nabai wa wu əfyi pya nu əɓo n kwo ɓə wna wo.
34Deeji kwa daɓo, “Yi kwu wo n owa nge Kirisiti ɓə la gnyi nyalonyalo, nlonu ho ɓa gna n wunanu ge, ‘Ɓəshishi nu a la Əza Nugwnu gwnu’? Nyikanu zhni, ‘Əza Nugwnu a’?”
35Nlonu Yeisu wa gna ɓa, “Fye ɓa ɓwa bwuznagna kwa ɓwasnu n əsai fyewyi nu. Fye znazna fye yee n bwuznagnai, ntuge əsa ɓə lo n wyegbma ɓə la lapwi fye. Əzadəhodəhoyi ń wa znazna dna ń wyegbma wo ta kpe aba əye lo ń wo lo m. 36Fye la gaiciya ga dna n bwuznagna, fyei ye n əsai ɓwa, nabai n fye ɓa kwu zè bwuznagna aɓyi.” Shi Yeisu ɓə kwu ɓəda ye zo da, wa laka waa əwohni so, to ɓa gye wo əwye m.
Gaiciyaga ɓədo n tnagaiciyagai fyi n Ayahudiyi
37Kwo n aznù bəgye avnu n Yeisu ɓəə kwu wu n əɓa awyeba nyi, dudulonu ɓa to ɓə ga gaiciya dna ń wo m. 38Dəye ɓə ye kwa nu ɓədatnu nu n sheɓəgwognayi Ishaya ɓə da:
“Dagayi, nyikanu n la gaiciya ga n əyi ɓədatnu a,
jesnu n nyika aba nu n Dagayi ɓwagbma kwo la kpeyawu a?”
39Ntu n ɓəye ɓo, to ɓa ga gaiciya m, ngye shi Ishaya ncei da lo dna n abaho:
40“Wo kwu awye ɓwu ɓa
jesnu wo kwu əɓa adu kpakalá,
nabai to ɓa gyewye n əɓa awyei m,
kwo ɓa kpəgənyi n əɓa adui m,
kwo ɓa pmyiɓe jesnu ma ka ɓa gna.”
41Ishaya ɓə da əɓo ye ntuge wo ɓə kwu Yeisu latu gyewye nu jesnu wa daɓo ntu n əwo əɓo.
42Dudulonu dna n əsa yi bəgyé fyi n atukwoda ɓa kwu gaiciya ga n wo. Ama ntu n Afarisiyi ɓo, to ɓa ye ɓa wu əɓa gaiciyaganunui pəipəi m, ntuge ɓa ɓə zhi n ədnai nge a ɓa nya ɓa ya n Ayahudiyibwokwnu; 43ntuge ɓa ɓə ye zanyikwoci cici, n du cici n kwo gbmi n Shekwoyi aba.
44Nlonu Yeisu wa dnawyi, “Əzadəhodəhoyi n wo ga gaiciya dna ń mi, wo to ɓwa gaiciyaga n əmi nu m, ama dna n əza n wo ɓə tnu n mii nyi. 45Əza n wo shi mi awye lo, wo gye əza nu lo, n wo ɓə tnu n mii nyi. 46Mi la lo ɓe anyì n zhni bwuznagna, nabai n a taa ɓwa əza, n wo n gaiciyai ga n mi, n wo ɓaa dna n wyegbma m.
47“Zahozahoyi n wo wo əmi aɓədagbma, ama to wa shi əɓa ɓwa m, mi taa da əza yi owa m. Ntuge mi to ɓə ɓe ma da anyì owa nu m, ama ma gnyi anyì. 48Owadayi lo, ntu n əza ɓo n wa na əmi aɓo, jesnu to woi gwo əmi aɓədagbma m; aɓədagbma ye n mi kwu da nyi, əɓa nu ɓə znu wo əknyi dna n nyipyei kpmaknai. 49Ntuge mi to ɓə da əmihni ɓəda nu m, ama Dada n wo nu ɓə tnu n mii nyi, əwo nu ɓə ga mi ɓəgbetu nge mi da aɓo vnyanya, n mi kwu da nyi. 50Mi kpəlo nge əwo ɓəgbetu kwo lo n əzai n wyewyeyi nyalonyalo nya nu. Ntulonu, ɓəhoɓəhoi n ma da, əkwo nu ɓwa əɓo zhni n Dada wa gna mi nge mi da.”
ទើបបានជ្រើសរើសហើយ៖
:
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Biblica® Open Gbagyi Nyizeyenya Baibwulu: Shekwoyi Ɓədagbma™, Ɓəgbeshì Woiwoyi
© 1997, 2025 Biblica, Inc.
Biblica® Open Gbagyi Contemporary Bible™, New Testament
Copyright © 1997, 2025 by Biblica, Inc.
“Biblica” ɓədo n Biblica əznù zhazhai, ɓa zhni aɓwaze aznù nu n a cei kafyilo n United States Patent and Trademark Office (Amerika əznù aɓwaze nya ɓədo n nyazhnizhni ofyisii) n Biblica, Inc. ncei yafyi. Apmazhni n gbegai nu.
“Biblica” is a trademark registered in the United States Patent and Trademark Office by Biblica, Inc. Used with permission.
See promoVersionInfo in metadata.xml for Creative Commons license.