Yohana 10
10
Knyiknayi manai n əwo aknyii
1“Ɓəhnihni əmi nu gna fye Afarisiyi, zahozahoyi n wo to lodna ń aknyigbe ń abwokwnumi m, ama wa gwnugyi wa lodna n zokwodo, wo zhni əvyì nu jesnu zokwojei. 2Əza n wo lodna lo ń abwokwnumi, əwo nu zhni aknyiknayi. 3Abwokwnumi gwuyi gwú kpakwo ya ga wo, jesnu aknyi ɓa knà əwo bəgye tnubwa. Wo yi əwo aknyi n əɓa ayei, jesnu wa sabye lo n ɓai n əbmyi. 4She wo la əwo anya kwnuya zhi vnyanya, wa sabye n ɓai, jesnu əwo aknyi vyi wo ntuge ɓa kwu əwo bəgye kpeye. 5Ama ɓa taa vyi zhiɓeyi m, nanyinanyi; ɓəhnihnii ɓa ɓá bwusi n əwo aba, ntuge ɓa too shni zhiɓeyi bəgye wo m.” 6Yeisu wa zhni apma n ɓəda bmapmyi yei, ama to Afarisiyi ɓa ɓwa əɓo awyega n wo ɓə gnyi woi da ɓa m.
7Ntucenu Yeisu wa je gna, “Ɓəhnihni əmi nu gna fye, əmi nu zhni abwokwnumi aknyi nya. 8Aza vnyanya n ɓa ɓə kwu ɓe n əmi abye, ɓa zhni avyì nu, n azajeyii, ama aknyi too kna ɓa tnubwa m. 9Əmi nu zhni abwokwnumi; əza n wa lodna n abwokwnumi ye, wo ɓaa pwo. Ɓa ɓá lo ɓe, ɓa je kwnuya, jesnu ɓa ɓwa anyagyigyiba. 10Əvyì ɓwa ɓe nabai wa wyi ənya nu, wa wu jesnu wa zhniagbma; ma ɓe nabai ɓa ɓwa wyewyeyi nu, jesnu ɓa ɓwa kwo n nunui.
11“Əmi nu zhni knyiknayi manai. Knyiknayi manai ga əwo wyewyeyi ntu n aknyi ɓo. 12Gwodogwoyi wo to zhni knyiknayi nu m, jesnu aknyi to zhni əwo anya nu m. Ntulonu shi wo gye camcam kwoi ɓe, wa ya aknyi zhi wa bwusi. Nlonu camcam kwa ya aknyi wna n gəluce jesnu kwaa ɓa gnamyi. 13Əza ye bwusi ntuge wo zhni gwodogwo tnutnuzhniyi nu, jesnu wo ta gye əwo anuwna n aknyi yi m.
14“Əmi nu zhni Knyiknayi manai; mi kpe əmi aknyi əye lo, jesnu əmi aknyi ɓa kpe mi əye; 15n ɓwasnu shi Dada kpe mi əye nyi, əmihni ce kpe Dada əye lo; jesnu mi ga əmi wyewyeyi ntu n aknyi ɓo. 16Mi n aknyi ajei lo n ɓa to fyilo n aknyigbe ye m. Ɓəshishi nu ma ɓe n ɓai ce. Əɓahni ce ɓa ɓə wo əmi bəgye, ɓa ɓə kwu zè gəluce gbmanyi jesnu n əknyiknayii gbmanyi. 17Əɓo n kwo zhni əmi Dada woi ye mi nyi, əkwo nu ge, mi la əmi wyewyeyi ya ga, mii je kwo lá njesnu. 18Əzaho taa gwo kwo n mi m, ama əmi nu ya kwo ga n əmihni ɓəyei. Mi n ikwoi lo ma ya kwo ga, mii n ikwoi lo ma gwo kwo njesnu. Ma gwo ɓəgbetu ye n əmi Dada nu.”
19Ayahudiyi n ɓa ɓə wo aɓədagbma ye nyi, ɓaa je ajegna njesnu. 20Bəgyé n ɓa, ɓa gna, “Wo n asei fyilo jesnu wo da nyace ɓəda nu. Knyiyi nu zhni fyei kna wo tnubwa a?”
21Ama azaje ɓa gna, “Aɓəda ye to zhni ase nya nu m. Ase ɓa myi ɓa kpe wyebwayi awyeya?”
Aɓənakpeaje ntu n əza ɓo n Yeisu gna nge wo zhni.
22Nlonu Awyefna Gbegyishi nya kwa ɓe dna n Urishelima. Vnyinyikwo əsa nu ɓə gnyi, 23Yeisu ɓə dna n Dagayipwuwa ashilagyí woi znazna dna n Sulemanu azhigwo ofye. 24Ayahudiyi ɓə yezhi n ɓo n shekna wo zhi, ɓai gna, “Nya knyisai nu n ho ɓa fa yi fyi n jeje n anyiɓəyeɓwi a? Ngye əho nu zhni Kirisiti, gna yi n səsəiya.”
25Yeisu wa dnaɓəgbe, “Mi kwu gna fye, ama fye too ga mi gaiciya m. Atnutnu n mi zhni dna n əmi Dada əye nyi, kwo gbmi mi əɓo lo, 26ama fye ta ga gaiciya lo m, ntuge fye to zhni əmi aknyi nu m. 27Əmi aknyi kna əmi bəgye tnubwa; mi kpe ɓa əye lo, jesnu ɓa vyi mi. 28Mi ga ɓa wyewyeyi nyalonyalo nya, ɓa to ɓə fyí m, nanyinanyi; əzaho taa myi wa fna ɓa n əmi akwnu m. 29Əmi Dada, n wo kwu ɓa ga mi nyi, wo du aza vnyanya lo n ikwo; əzaho taa myi wa fwna ɓa n əmi Dada akwnu m. 30Əmi n əmi Dadai yi zhni gbmanyi nu.”
31Njesnu əwo anuwnui, Ayahudiyi, ɓa kwu akwuta nabai ɓa knyi wo, 32ama Yeisu wa gna ɓa, “Mi kwu atnutnu amanai wu fye ń ɓa kwnu n Dada aba. Ntu n knyidei ɓo nu ń fye ye fya knyi mi akwuta a?”
33Ɓa dnaɓəgbe, “Yi ta ye ya knyi ho akwuta ntu ń tnutnu manai ho ɓo nu m, ama ntu ń atukwopmi ɓo nu, ntuge əho, zanyikwoci azanga, ho gna nge ho zhni Shekwoyi nu.”
34Yeisu wa dna ɓa ɓəgbe, “Kwo to kafyilo ń fye Owa, ‘Mi kwu gna nge fye zhni “ashekwoyi” nu m’? 35Ngye wo ɓə yi ɓa nge ‘ashekwoyi’ nu, aza n Shekwoyi ɓədagbma ɓə ɓe da ɓa nyi, shikwonyi a taa Nyakagyigyiyi pmyima m; 36to a ɓa gna nge nanu, ntu ń əza ɓo n Dada ɓə knyishi nge əwohni nya, jesnu wa tnu n woi dna n anyì a? Knyiyi nu zhni fyei tu mi atukwopmi əɓo, ntuge ma gna, ‘mi zhni Shekwoyi Nugwnu nu a’?
37“Fye to ga mi gaiciya m, akpəge ngye mi zhni əmi Dada tnutnu nu. 38Ama ngye əɓa nu n mi zhni, kwo shikwonyi fye ta ga mi gaiciya lo m, fye ga atnutnu gaiciya, nabai n fye ɓa myi fya kpe jesnu fya ɓwa awyega nge Dada dnalo n mi, əmihni ce mi dnalo n Dada.” 39Njesnu ɓa zhnatna nabai ɓa wna wo, ama waa waya n əɓa akwnu.
40Ntucenu Yeisu wa jezelo Urudu kpma, aba n Yohana ɓəə dna woi zhni batizima n anyipyei sapa nyai nyi. Wa dna n abaayi 41jesnu aza n mwa bəgyé ɓa ɓe da wo. Ba gna, “Kwo shikwonyi Yohana to ɓə zhni əznù m, aɓo vnyanya n Yohana ɓə da tu n əza ye tukwo nyi, ɓa zhni gaiciya nu.” 42Njesnu gnyi n abaayi nu aza bəgyé ɓa kwu gaiciyaga fyi n Yeisu.
ទើបបានជ្រើសរើសហើយ៖
Yohana 10: OGNB
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Biblica® Open Gbagyi Nyizeyenya Baibwulu: Shekwoyi Ɓədagbma™, Ɓəgbeshì Woiwoyi
© 1997, 2025 Biblica, Inc.
Biblica® Open Gbagyi Contemporary Bible™, New Testament
Copyright © 1997, 2025 by Biblica, Inc.
“Biblica” ɓədo n Biblica əznù zhazhai, ɓa zhni aɓwaze aznù nu n a cei kafyilo n United States Patent and Trademark Office (Amerika əznù aɓwaze nya ɓədo n nyazhnizhni ofyisii) n Biblica, Inc. ncei yafyi. Apmazhni n gbegai nu.
“Biblica” is a trademark registered in the United States Patent and Trademark Office by Biblica, Inc. Used with permission.
See promoVersionInfo in metadata.xml for Creative Commons license.
