Atnutnu 8
8
1Njesnu Soolu ɓə n əɓwai tu n əwo wuwu.
Ikilisiya wyenashe n kwo gnamyii
Dna n əwyi yii, wyenashe yaakwo kwa laka gnyi tu n Ikilisiya dna n Urishelima, jesnu aza vnyanya akpəge atnutnuloyi ɓaa gnamyi fyi laɓa n Yahuda əknyi n Samariyai. 2Shekwoyi-adnawoi ɓa byi Istifanus jesnu ɓa zhni bwugbazhii yaakwo ntu n əwo ɓo. 3Ama Soolu wa ya ikilisiya agbmazhni. Woi vyi apwuwa n apwuwai, wa kwnu azanugbai n anyikwozai wa kwu ɓa fyi n zhalu.
Fyilibwus dna n Samariya
4Aza yi n ɓa ɓəə la gnamyi nyi, ɓa zhni ɓədagbma waazi n ɓwahoɓwahoi n ɓa ɓə kwu lo. 5Fyilibwus wa shnilo əzhiyaakwo n Samariya jesnu wa da Masifu əɓo n abaayi. 6She deeji ɓə wo Fyilibwus ɓəda jesnu ɓa gye aznù n wo ɓə wu nyi, əɓa vnyanya ɓa kwu tnubwakna dəidəi n əɓo n wo ɓə da nyi. 7Ntuge ǹ akwufyii nu n abəgyei kwuwu ń azafnu ajegbmiyi ɓə kwnuya n aza bəgyé, jesnu bəgyé n ɓa ɓə n anayii fyífyii ɓədo n azabmazhii, ɓa kwu kágna ɓwa. 8Ntulonu agbmada yaakwo ɓə nyi dna n əzhiyaakwo yi.
Sima zokwusheyi
9Kwo ɓə la mwasa əzaho ai yi wo ge Sima, wo ɓə zhni woi she zokwu nu dna n əzhiyaakwo, jesnu wo ɓə kwu aza bwugba vnyanya wna n Samariya; wo ɓə myi woi zhni aɓo wowo gbowogbowo. Wo ɓə gyigbe nge wo zhni əzayaakwo ho nu, 10jesnu aza vnyanya, awyekpmiwuyi n azasukwui, ɓa kwu əɓa abwugba ga wo jesnu ɓa gna, “A ɓə lá əye kpe əza ye tu nge, Kalá Yaakwo Shekwoyi nya.” 11Ɓa ɓə kwu vyi wo ntuge əsa ɓə la mwa woi zhni aɓo wowo ga ɓa n əwo zokwushei. 12Ama she ɓa ɓe kwu gaiciyaga Fyilibwus, shi wo ɓə da nabagyi manai, Shekwoyi əbemi nya ɓədo n Yeisu Kirisiti əyei, a kwu batizima zhni ɓa, azanugbai n anyikwozai. 13Sima n əwohni tukwoi ce, waa gaiciyaga jesnu a kwu batizima zhni wo. Jesnu wa vyi Fyilibwus lo ɓwahoɓwahoi, aznù yaakwo əɓo, ɓə wo wo ɓədo n aɓo awowoi n wo ɓə gyewye nyi.
14She atnutnuloyi n ɓa ɓə fyi n Urishelima nyi, ɓə wo nge Samariya kwo la Shekwoyi ɓədagbma gwo, ɓa tnu Byitusu tnutnu ɓədo n Yohanai, ɓa lo Samariya. 15Əsa n ɓa ɓə si əzhi yi, ɓa zhniaduwa ga agaiciyagayi awoiwoyi n abaayi, nabai n ɓa ɓa myi ɓai gwo Zafnu Gyigyiyi, 16ntuge Zafnu Gyigyiyi to ɓəə ɓe kpe n zahozahoyi n ɓa kpa m; a ɓəə ɓwa ɓa batizima nu zhni dna n Dagayi Yeisu əye. 17Nlonu Byitusu n Yohanai ɓa kpe ɓa əɓa aɓwa, jesnu ɓa gwo Zafnu Gyigyiyi.
18She Sima ɓə gye aza ɓai gwo Zafnu Gyigyiyi ntu atnutnuloyi aɓwa kpekpe ɓo, wa ga ɓa gyiwye 19wa gna, “Fye ga mi ikwo ye cè, nabai zahozahoyi n ma kpe wo əmi aɓwa, n wo ɓa myi wa gwo Zafnu Gyigyiyi.”
20Byitusu wa dnaɓəgbe: “Fa əho gyiwye kwo shni n hoi, ntuge ho zhninubwo nge ho ɓa myi ha si Shekwoyi nyaga nu n gyiwyei! 21Ho to n aɓwadnabai lo kwo nyaho n ho ɓa toɓwa n ɓəvyitnutnu ye m, ntuge əho ədu to bmyalo n Shekwoyi awye m. 22Yeabwi n əkpizhni ye jesnu ha zhniaduwa ga Dagayi n awyetui nge wo ɓa ye wa zo əho aleifyi ntu ɓənubwozhni ye pya ɓo, əho ədu nya. 23Ntuge mi kwu gye nge ho nunui lo n bwugbalilii, jesnu leifyi n hoi papai lo.”
24Nlonu Sima wa dnaɓəgbe, “Zhniaduwa ga Dagayi ga mi nabai n nyahonyahoi n ho kwu da nyi, n kwo taa zhni mi m.”
25She ɓa ɓə kwu pwo Dagayi ɓədagbma waazizhni, jesnu ɓai la əɓo gbmitu n Yeisu tukwo, Byitusu n Yohanai ɓa jezelo Urishelima, ɓai zhni waazi nabagyi manai nya fyi n azhigba bəgyé Asamariyayi nya.
Fyilibwus n Etiyopyiyayii
26Nsayi maləka Dagayi nya wa gna Fyilibwus, “Shnilo snuta lo zokwo, zhabwikawu nya, n kwo gbmi n Urishelima kwoi shnilo Gaza nyi.” 27Ntulonu wa wna əzna, jesnu lo ń zokwo wa gye Etiyopyiyayi zakakayi tukwoda yaakwo; əsu nyikwoza Kandake nya, ń nyaɓwasofyi vnyanya ɓə fyi n əwo akwnu nu nyi. Əza ye ɓə lo mwamwaga nu n Urishelima, 28jesnu dnalo n zokwo woi jezelo apyi, n sasetu n əwo snukna-dokwo woi ba Pafyi sheɓəgwognayi Ishaya nya. 29Zafnu wa gna Fyilibwus, “Lo da snukna-dokwo yi haa wo vyivyiwyi n kwoi.”
30Nlonu Fyilibwus wa bwusi lo da snukna-dokwo, wa wo əza yi woi ba sheɓəgwognayi Ishaya. Fyilibwus wa nyaɓo, “Ho ɓwa awyega lo ənya n ho ba nyi?”
31Wa gna, “Mi ɓa ɓwa awyega n wuna, n əzaho nu to wu mi əkwo awyega ma a?” Ntulonu wa yì Fyilibwus nge wo gwnutu waa sasetu n kwnusnu n woi.
32Əɓwi nu nyi n Nyakagyigyiyi n zakakayi ɓə dna woi ba:
“A ɓə lo n woi ngye əknyi nu a znu əsha,
jesnu ngye kwugyasnáyi, n əkwo əyi mwayi aba, n gnyi pyi,
ntulonu wo to ɓə kpe əwo əgbe ya m.
33Dna n əwo snuwna a ɓə la ɓəda wo woɓyi.
Nyika nu ɓa da əwo ayawyi ɓo a?
Ntuge a ɓə la əwo wyewyeyi gbmi n anyì.”
34Zakakayi wa nya Fyilibwus əɓo, “Sukwu, gna mi, nyika nu n sheɓəgwognayi ɓə da əwo ɓo a, əwohni nu kwo əzado nu gbowo a?” 35Nlonu Fyilibwus wa ya n əɓwùyi ń nyaka yi ɓə gbmi n Nyakagyigyiyi nyi, wa gna wo nabagyi manai Yeisu nya.
36Shi ɓa ɓə fyilo n əzna lo n zokwoi, ɓa si nuwna aba jesnu zakakayi wa gna, “Shiawye, nuwna fyi nyi. Knyiɓei nu ɓa kpma mi batizima zhni a?”
[37Fyilibwus wa gna, “Ndəi ho la gaiciyaga n əho ədui vnyanya, a ɓa myi a zhni ho batizima.”
Zakakayi wa dnaɓəgbe, “Mi la gaiciyaga nge Yeisu Kirisiti nu zhni Shekwoyi Nugwnu.”] 38Njesnu wa ga əgbe nge a la snukna-dokwo kpegnyi. Nlonu Fyilibwus n zakakayii ɓa kafyi n nuwna jesnu Fyilibwus wa zhni wo batizima. 39Əsa n ɓa ɓə kwnuɓe n nuwna, Zafnu Dagayi nya wa la Fyilibwus n əsagbmanyii, jesnu to zakakayii wa shna wo wyegye m, ama wa gwodu lo n zokwoi woi dagbma. 40Ama Fyilibwus wa kpeyagnyi n Azotus jesnu wa zna laɓa woi zhni waazi nabagyi manai nya n azhi vnyanya nya əsa n wo ɓə la si Kaisariya.
ទើបបានជ្រើសរើសហើយ៖
Atnutnu 8: OGNB
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Biblica® Open Gbagyi Nyizeyenya Baibwulu: Shekwoyi Ɓədagbma™, Ɓəgbeshì Woiwoyi
© 1997, 2025 Biblica, Inc.
Biblica® Open Gbagyi Contemporary Bible™, New Testament
Copyright © 1997, 2025 by Biblica, Inc.
“Biblica” ɓədo n Biblica əznù zhazhai, ɓa zhni aɓwaze aznù nu n a cei kafyilo n United States Patent and Trademark Office (Amerika əznù aɓwaze nya ɓədo n nyazhnizhni ofyisii) n Biblica, Inc. ncei yafyi. Apmazhni n gbegai nu.
“Biblica” is a trademark registered in the United States Patent and Trademark Office by Biblica, Inc. Used with permission.
See promoVersionInfo in metadata.xml for Creative Commons license.
