Uumama 32
32
Yaaʼikuub Esaawuun Wal arguuf Qophaaʼe
1Yaaʼikuubis karaa isaa itti fufe; malaʼikkoonni Allaahas isatti dhufan. 2Innis yommuu isaan argetti, “Kun buufata Allaaha ti” jedhe; iddoo sanas Mahanayiim jedhee moggaase.
3Yaaʼikuubis gara obboleessa isaa Esaawu kan biyya Edoom lafa Seeʼiir jedhamu keessa jiraatuutti ergamoota of dura erge. 4Innis akkana jedhee isaan ajaje: “Isin gooftaa koo Esaawuun akkana jedhaa: ‘Garbichi kee Yaaʼikuub akkana jedha; ani Laabaa bira jiraadhee hamma ammaattis isuma biran ture. 5Ani loonii fi harroota, hoolotaa fi reʼoota, hojjettoota dhiiraatii fi dubartootas qaba. Ammas ani fuula kee duratti surraa akkan argadhuuf ergaa kana gooftaa kootti nan erga.’ ”
6Ergamoonni sunis gara Yaaʼikuubitti deebiʼanii, “Nu obboleessa kee Esaawu bira dhaqneerra; innis si simachuuf dhufaa jira; namoonni dhibba afur isa wajjin jiru” jedhaniin.
7Yaaʼikuubis akka malee sodaatee dhiphate; namoota isa wajjin turanis garee lamatti qoode; bushaayee, loowwanii fi gaalawwan illee akkasuma garee lamatti qoode. 8Innis, “Yoo Esaawu dhufee garee tokko dhaʼe, gareen kaan jalaa baʼa” jedhee yaade.
9Yaaʼikuub akkana jedhee duʼaa godhe; “Yaa Allaah abbaa koo Ibraahim, Allaah abbaa koo Yisihaaq, yaa Rabbii Allaah, isa ‘Ati gara biyya keetii fi gara firoota keetiitti deebiʼi, ani waan gaarii siifin godhaa’ naan jette sun, 10ani gaarummaa fi amanamummaa ati ana garbicha kee argisiifte kana hundaaf hin malu. Ani yeroo Yordaanos kana ceʼetti ulee koo qofa qaban ture; amma garuu garee lama taʼeen jira. 11Ani akka ati harka obboleessa koo Esaawu jalaa na baastu duʼaa nan godha. Ani, ‘Inni dhufee na ajjeesa; haadhotas ijoollee isaanii wajjin ni ajjeesa’ jedhee sodaadheeraatii. 12Ati garuu, ‘Ani dhugumaan waan gaarii siifin godha; sanyii kees akka cirracha galaanaa kan lakkaaʼamuu hin dandeenye sanaa nan godha’ jetteerta.”
13Inni halkan sana achuma bule; waan of biraa qabu keessaas kennaa obboleessa isaa Esaawuuf kennu filate; 14isaanis reʼoota dhaltuu dhibba lama, korbeeyyii reʼee digdama, hoolota dhaltuu dhibba lama, korbeeyyii hoolaa digdama, 15gaalawwan dhalaa soddoma ilmaan isaanii wajjin, saawwan afurtama, jiboota loonii kudhan, harroota dhaltuu digdama, wadala harrootaa kudhan turan. 16Innis karra karraan addaan baasee tajaajiltoota isaatti kennee, “Na dura darbaa deemaa; karrawwan horii gidduuttis lafa hambisaa” jedhee tajaajiltoota isaa ajaje.
17Namicha fuula duraan jiru sanaanis akkana jedhe: “Yoo Esaaw obboleessi koo sitti dhufe, ‘Ati kan eenyuu ti? Eessa dhaqxa? Horiin fuula kee dura jiru kun kan eenyuu ti?’ jedhee si gaafate, 18ati, ‘Kan garbicha kee Yaaʼikuub. Isaanis kennaa gooftaa koo Esaawuuf ergamanii dha; kunoo, Yaaʼikuubis nu duubaan dhufaa jira’ jechuu qabda.”
19Namicha lammaffaa, sadaffaa fi warra karrawwan sana faana deeman hundas akkana jedhee ajaje; “Isinis yoo Esaawun argitan waanuma kana isatti himaa. 20Akkasumas, ‘Kunoo garbichi kee Yaaʼikuub nu duubaan dhufaa jira’ jedhaa.” Inni, “Ani kennaa of dura ergeef kanaan isa nan araarfadha; ergasii immoo ani yommuun isa argutti tarii inni na simata taʼa” jedhee yaadee tureetii. 21Kennaan Yaaʼikuubiis isa dura darbe; Yaaʼikuub garuu halkan sana qubata sana keessa bule.
Yaaʼikuub Allaah Walʼaansoo Qabe
22Halkanuma sana Yaaʼikuub kaʼee niitota isaa lamaan, xomboreewwan isaa lamaanii fi ilmaan isaa kudha tokko fudhatee malkaa Yaaboq ceʼe. 23Innis erga laga isaan ceesisee booddee qabeenya isaa hunda erge. 24Yaaʼikuub immoo kophaa isaa hafe; namichi tokkos hamma lafti bariitutti walʼaansoo isa qabe. 25Namichis yommuu akka Yaaʼikuubin moʼachuu hin dandeenye argetti, buusaa luqqeettuu Yaaʼikuub tuqe; yeroo inni namicha wajjin walʼaansoo qabettis luqqeettuun Yaaʼikuub ni adoode. 26Namichis, “Waan bariʼuu gaʼeef gad na dhiisi” jedhe.
Yaaʼikuub garuu, “Yoo ati na eebbifte malee ani gad si hin dhiisu” jedhee deebise.
27Namichis, “Maqaan kee eenyu” jedhee isa gaafate.
Inni immoo, “Yaaʼikuub” jedhee deebise.
28Namichis, “Ati sababii Allaaha fi namoota wajjin walʼaansoo qabdee moʼatteef siʼachi Israaʼel jedhamta malee Yaaʼikuub hin jedhamtu” jedhe.
29Yaaʼikuubis, “Maaloo maqaa kee natti himi” jedheen.
Inni garuu, “Ati maaliif maqaa koo gaafatta?” jedheen. Ergasiis inni achumatti isa eebbise.
30Yaaʼikuubis, “Ani ifaan ifatti Allaah argeeraatii; lubbuun koo garuu oolfamteerti” jedhee iddoo sana Pheniiʼeel jedhee moggaase.
31Akkuma inni Phenuuʼeelin darbeen aduun isatti baate; innis sababii luqqeettuu isaatiif okkolaa ture. 32Kanaafuu Israaʼeloonni hamma harʼaatti ribuu tafaa hin nyaatan; inni buusaa luqqeettuu Yaaʼikuub kan tafaan wal qabatu tuqee tureetii.
ទើបបានជ្រើសរើសហើយ៖
Uumama 32: KQTAB
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Biblica® Katabbiiwwan Qulqulluu, Turjumaana Ammayyaa Banamaa™
Mirgi seeraan eegama © 2024 Biblica, Inc.
Biblica® Open Oromo Contemporary Scriptures™
Copyright © 2024 by Biblica, Inc.