Uumama 27
27
Yisihaaq Yaaʼikuubin Eebbise
1Yisihaaq dulloomee yeroo iji isaa arguu dadhabetti ilma isaa hangafa Esaawun ofitti waamee, “Yaa ilma koo” jedheen.
Innis, “Kunoo asan jira” jedhee deebise.
2Yisihaaq akkana jedhe; “Kunoo, ani dulloomeera; guyyaa duʼa koo hin beeku. 3Kanaafuu maaloo miʼa adamoo keetii jechuunis korojoo xiyya keetii fi iddaa kee qabadhuutii gara dirreetti baʼiitii bineensa naa adamsi. 4Akka ani utuun hin duʼiniin dura si eebbisuuf, nyaata miʼaawaa gosa ani jaalladhu naa qopheessiitii akka ani nyaadhuuf naa dhiʼeessi.”
5Yommuu Yisihaaq ilma isaa Esaawutti dubbatetti Ribqaan ni dhaggeeffatti turte. Yeroo Esaawu bineensa adamsee fiduuf gara dirreetti gad baʼetti, 6Ribqaan ilma ishee Yaaʼikuubiin akkana jette; “Kunoo, ani utuu abbaan kee obboleessa kee Esaawutti dubbatuu dhagaʼeera; 7innis, ‘Akka ani utuun hin duʼin fuula Rabbii Allaah duratti si eebbisuuf bineensa adamsii fidiitii akka ani nyaadhuuf nyaata miʼaawu naa qopheessi’ jedheen. 8Egaa yaa ilma ko, akkuma ani si ajajutti dubbii koo dhagaʼi. 9Ani akkan abbaa keetiif akkuma inni jaallatutti nyaata miʼaawaa qopheessuuf gara bushaayee dhaqiitii ilmoolee reʼee filatamoo lama naa fidi. 10Akka inni nyaatee utuu hin duʼin si eebbisuuf abbaa keetiif nyaata dhiʼeessi.”
11Yaaʼikuubis haadha isaa Ribqaadhaan akkana jedhe; “Kunoo, obboleessi koo Esaawu dabbasaaʼaa dha; ani garuu rifeensa hin qabu. 12Yoo abbaan koo na qaqqabatee waan ani isa gowwoomse seʼe, ani qooda eebbaa abaarsa ofitti nan fida.”
13Haati isaa immoo, “Yaa ilma ko, abaarsi sun naaf haa taʼu; ati waanuma ani siin jedhe godhi; dhaqiitii reʼoota sana naa fidi” jetteen.
14Innis dhaqee ilmoolee reʼootaa sana qabee haadha isaatiif fide; isheen immoo akkuma abbaan isaa jaallatutti nyaata miʼaawu qopheessiteef. 15Ergasiis Ribqaan uffata Esaaw ilma ishee hangaftichaa kan ishee bira ture keessaa kan hunda irra bareedu fuutee Yaaʼikuub ilma ishee isa quxisuu sanatti uffifte. 16Harka isaatii fi morma isaa iddoo rifeensa hin qabnetti gogaa reʼootaa uffifte. 17Ergasiis nyaata miʼaawaa fi buddeena qopheessitee turte sana ilma ishee Yaaʼikuubitti kennite.
18Innis gara abbaa isaa dhaqee, “Yaa abbaa koo” jedhe.
Innis, “Yaa ilma ko, kunoo asan jira; ati eenyu?” jedhee deebise.
19Yaaʼikuubis abbaa isaatiin akkana jedhe; “Ani Esaawu ilma kee isa hangafticha; akkuma ati natti himte sana godheera; akka na eebbiftuuf mee ol jedhiitii waan ani adamsee fide nyaadhu.”
20Yisihaaq ilma isaatiin, “Yaa ilma ko, akkamitti akkana daftee argatte?” jedhe.
Yaaʼikuub immoo, “Rabbii Allaah keetu na milkoomse” jedhee deebise.
21Yisihaaqis Yaaʼikuubiin, “Akka ani si qaqqabadhee ilma koo Esaaw taʼuu fi taʼuu baachuu kee beekuuf mee as dhiʼaadhu” jedhe.
22Yaaʼikuubis abbaa isaa Yisihaaqitti dhiʼaate; abbaan isaas isa qaqqabatee, “Sagaleen kun sagalee Yaaʼikuub; harki kun garuu harka Esaawu” jedhe. 23Waan harki isaa akkuma harka Esaawu rifeensa qabuuf Yisihaaq gargar baasee isa beekuu hin dandeenye; kanaafuu isa eebbise. 24Innis, “Ati dhugumaan ilma koo Esaawuu?” jedhee gaafate.
Inni immoo, “Eeyyee ani isuma” jedhee deebise.
25Yisihaaqis, “Yaa ilma ko, akka ani nyaadhee si eebbisuuf mee waan adamsitee fidde sana naa kenni” jedhe.
Yaaʼikuub ni dhiʼeesseef; innis ni nyaate; daadhii wayiniis ni fideef; innis ni dhuge. 26Abbaan isaa Yisihaaqis, “Yaa ilma koo as kottuu na dhungadhu” jedheen.
27Innis itti dhiʼaatee isa dhungate. Yisihaaqis foolii wayyaa isaa suufee isa eebbise; akkanas jedhe;
“Ilaa, fooliin ilma koo,
akkuma foolii lafa qotiisaa
Rabbii Allaahan eebbisee ti.
28Allaahan fixeensa Shamaayʼunii,
lafa gabbataa, midhaanii fi
wayinii akka malee baayʼatu siif haa kennu.
29Saboonni si haa tajaajilan;
uummannis siif haa sagadan.
Obboloota kee irratti gooftaa taʼi;
ilmaan haadha keetiis siif haa sagadan.
Warri si abaaran haa abaaraman;
warri si eebbisan immoo haa eebbifaman.”
30Akkuma Yisihaaq Yaaʼikuubin eebbisee fixee Yaaʼikuub immoo fuula abbaa isaa fuula Yisihaaq duraa gad baʼeen, obboleessi isaa Esaawu adamoodhaa dhufee ol gale. 31Innis nyaata miʼaawaa qopheessee abbaa isaatiif fide; abbaa isaatiinis, “Yaa abbaa ko, ati akka na eebbiftuuf ol jedhiitii waan ani ilmi kee adamsee fide nyaadhu” jedhe.
32Abbaan isaa Yisihaaqis, “Ati eenyu?” jedhee isa gaafate.
Innis, “Ani ilma kee Esaawu hangafticha” jedhe.
33Yommus Yisihaaq akka malee hollachaa, “Yoos namni waa adamsee naa fide eenyu ree? Ani utuu ati hin dhufin hunduma isaa nyaadheen isa eebbise; inni dhugumaan ni eebbifama!” jedhe.
34Esaawu yommuu waan abbaan isaa dubbate dhagaʼetti, abbaa isaatiin, “Yaa abbaa ko, anas eebbisi!” jedhee sagalee ol fudhatee hiqqifatee booʼe.
35Yisihaaq garuu, “Obboleessi kee haxxummaadhaan dhufee eebba kee fudhateera” jedhe.
36Esaawus, “Maqaan isaa iyyuu dhugumaan Yaaʼikuub jedhama mitii? Inni kana wajjin yeroo lama na gowwoomsuu isaa ti; jalqabatti hangafummaa koo narraa fudhate; amma immoo eebba koo fudhateera” jedhe. Ergasiis inni, “Ati eebba tokko illee naa hin hambifnee ree?” jedhee gaafate.
37Yisihaaq immoo akkana jedhee Esaawuuf deebise; “Kunoo ani akka inni sirratti gooftaa taʼuu fi akka firoonni isaa hundi tajaajiltoota isaa taʼan godheera; akka inni midhaanii fi daadhii wayinii qabaatuufis isa eebbiseera. Egaa yaa ilma koo ani maal siif gochuun dandaʼa?”
38Esaawus abbaa isaatiin, “Yaa abbaa ko, ati eebbuma tokko qofa qabdaa? Yaa abbaa ko, anas eebbisi!” jedhe. Esaawus sagalee ol fudhatee booʼe.
39Abbaan isaa Yisihaaqis akkana jedhee deebiseef;
“Iddoon jireenya keetii
lafa gabbataa irraa ni fagaata;
fixeensa shamaayʼun gubbaa irraas ni fagaata.
40Ati goraadeedhaan jiraatta;
obboleessa kees ni tajaajilta.
Yeroo isaan mormitutti garuu
waanjoo isaa cabsitee
morma kee irraa buufta.”
Yaaʼikuub gara Laabaatti baqate
41Esaawu sababii abbaan isaa Yaaʼikuubin eebbiseef Yaaʼikuubitti haaloo qabate. Innis garaa isaatti, “Yeroon itti abbaa kootiif booʼan dhiʼaateera; anis yeroo sana obboleessa koo Yaaʼikuubin nan ajjeesa” jedhee yaade.
42Yommuu wanni Esaawu ilmi ishee hangaftichi jedhe isheetti himametti Ribqaan Yaaʼikuub ilma ishee quxisuu waamsiftee akkana jetteen; “Kunoo, obboleessi kee Esaawu si ajjeesee garaa isaa qabbaneeffachuu barbaada. 43Kanaafuu yaa ilma koo na dhagaʼi; kaʼiitii gara obboleessa koo Laabaa kan Kaaraan keessa jiraatu sanaatti baqadhu. 44Hamma aariin obboleessa keetii qabbanaaʼutti yeroo gabaabaaf isa bira turi. 45Yommuu aariin obboleessa keetii qabbanaaʼee innis waan ati isa goote sana irraanfatutti ani dhaamsa sitti ergee achii sin fichisiisa. Ani maaliifan guyyaa tokkotti isin lachuu dhaba?”
46Ribqaanis Yisihaaqiin akkana jette; “Ani sababii dubartoota Heetotaa kanneeniif jiraachuu jibbeera. Yoo Yaaʼikuub dubartoota biyya kanaa jechuunis dubartoota Heetotaa kanneen keessaa niitii fuudhe, jireenyi koo maal anaaf godha ree!”
ទើបបានជ្រើសរើសហើយ៖
Uumama 27: KQTAB
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Biblica® Katabbiiwwan Qulqulluu, Turjumaana Ammayyaa Banamaa™
Mirgi seeraan eegama © 2024 Biblica, Inc.
Biblica® Open Oromo Contemporary Scriptures™
Copyright © 2024 by Biblica, Inc.