Uumama 17
17
Kakuu Dhagna qabaa
1Yeroo Ibraam nama waggaa sagaltamii sagalii turetti Rabbii Allaahan isatti mulʼatee akkana jedheen; “Ani Allaah Waan Hundumaa Dandaʼuu dha; ati fuula koo dura amanamummaan deddeebiʼi; hirʼinas hin qabaatin. 2Ani kakuu koo anaa fi si gidduu nan dhaaba; guddaas sin baayʼisa.”
3Ibraamis adda isaatiin lafatti gombifame; Allaahanis akkana isaan jedhe; 4“Kunoo, kakuun ani si wajjin galu kana: Ati abbaa saba baayʼee taata. 5Ati siʼachi Ibraam jedhamtee hin waamamtu; waan ani abbaa saboota baayʼee si taasiseef maqaan kee Ibraahim taʼa. 6Ani akka ati guddaa baayʼattu nan godha; akka sabni hedduun si keessaa argamu nan godha; mootonnis si keessaa ni argamu. 7Ani Allaah keetii fi Allaah sanyii kee kan si duubaan dhufuu taʼuuf jedhee kakuu koo anaa, sii fi sanyii kee kan si duubaa, dhaloota dhufuuf jiru gidduutti kakuu bara baraa godhee nan dhaaba. 8Biyya Kanaʼaan guutuu lafa ati amma orma taatee jiraattu kana ani dhaala bara baraa godhee siʼii fi sanyiiwwan kee warra si booddeetiif nan kenna; anis Allaah isaanii nan taʼa.”
9Allaahan Ibraahimiin akkana jedhe; “Ati immoo kakuu koo eeguu qabda; ati, sanyiin kee warri si duubaas dhaloota isaanii keessatti kakuu koo eeguu qabdu. 10Kakuun koo kan isin anaa fi siʼi gidduutti, sanyii kee kan siʼi duubaan dhufu gidduuttis eeguu qabdan kanaa dha; innis isin keessaa dhiirri hundinuu dhagna haa qabatu. 11Qola keessan dhagna qabadhaa; kunis kakuu anaa fi isin gidduu jiruuf mallattoo taʼa. 12Isin keessaa dhiirri guyyaa saddeet guute dhagna haa qabatu; dhaloota keessan hunda keessatti dhiirri mana keetti dhalate yookaan kan nama biyya ormaa irraa maallaqa keetiin bitame hundi kan sanyii kee hin taʼin dhagna haa qabatu. 13Mana keetti dhalatanis yookaan maallaqa keetiin bitamanis isaan dhagna haa qabatan. Kakuun koo kan foon keessan irratti godhame kun kakuu bara baraa taʼa. 14Dhiirri dhagna hin qabatin, kan qola foon isaa dhagna hin qabatin kam iyyuu saba ofii isaa keessaa balleeffama; inni kakuu koo cabseeraatii.”
15Allaahan ammas Ibraahimiin akkana jedhe; “Ati siʼachi niitii kee Saaraahiidhaan, Saaraahii hin jettu; maqaan ishee Saaraa taʼa. 16Ani ishee nan eebbisa; ishee irraas ilma siif nan kenna. Akka isheen haadha sabootaa taatuufis ishee nan eebbisa; mootonni sabootaas ishee keessaa argamu.”
17Ibraahimis addaan gombifame; kolfees, “Nama waggaa dhibbaatiif ilmi ni dhalataa? Saaraanis waggaa sagaltamatti mucaa deessii?” jedhee yaade. 18Ibraahimis Allaahan, “Maaloo utuu Ismaʼiil fuula kee dura naa jiraatee!” jedhe.
19Allaahanis akkana jedhe; “Tole; garuu niitiin kee Saaraan ilma siif deessi; maqaa isaas Yisihaaq jedhii moggaasi. Anis kakuu koo sanyii isaa kan isa duubaan dhufuuf kakuu bara baraa godhee isa wajjin nan dhaaba. 20Waaʼee Ismaʼiil immoo ani si dhagaʼeera; kunoo ani, isa nan eebbisa; akka inni baayʼatu nan godha; guddaa isa nan baayʼisa. Inni abbaa bulchitoota kudha lamaa taʼa; anis saba guddaa isa nan godha. 21Kakuu koo garuu Yisihaaq isa Saaraan waggaa dhufu keessa yeroo kanatti siif deessu wajjin nan dhaaba.” 22Allaahan erga Ibraahim wajjin haasaʼee fixatee booddee isa biraa ol baʼe.
23Ibraahimis guyyuma sana ilmaan isaa Ismaʼiilii fi warra mana isaatti dhalatan yookaan warra maallaqa isaatiin bitaman hunda, dhiira mana isaa hundumaas fuudhee akkuma Allaahan isatti himetti dhagna qabe. 24Ibraahim yeroo dhagna qabatetti nama waggaa sagaltamii sagalii ture. 25Ilmi isaa Ismaʼiil immoo yeroo dhagna qabatetti nama waggaa kudha sadii ture. 26Ibraahimii fi ilmi isaa Ismaʼiil guyyuma sana dhagna qabatan. 27Dhiirri mana Ibraahim hundinuu, warri mana isaatti dhalatan yookaan warri orma irraa maallaqaan bitamanis isa wajjin dhagna qabatan.
ទើបបានជ្រើសរើសហើយ៖
Uumama 17: KQTAB
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Biblica® Katabbiiwwan Qulqulluu, Turjumaana Ammayyaa Banamaa™
Mirgi seeraan eegama © 2024 Biblica, Inc.
Biblica® Open Oromo Contemporary Scriptures™
Copyright © 2024 by Biblica, Inc.