Uumama 11
11
Gamoo Baabel
1Bara sana addunyaan guutuun afaan tokkoo fi haasaa tokko qaba ture. 2Namoonni akkuma gara baʼa biiftuutti godaananiin, Shineʼaar keessatti lafa diriiraa argatanii achi qubatan.
3Isaanis, “Kottaa mee xuubii hojjennee ibiddaan gubnaa” waliin jedhan. Isaanis qooda dhagaa, xuubiitti fayyadaman; hapheedhaaf immoo leeleetti fayyadaman. 4Ergasii, “Kottaa mee akka ofii keenyaa maqaa argannuu fi akka addunyaa guutuu irra hin bibittinnoofneef magaalaa gamoon isaa shamaayʼun qaqqabu tokko ijaarrannaa” jedhan.
5Rabbii Allaahan garuu magaalaa fi gamoo isaan ijaaraa turan sana ilaaluuf gad buʼe. 6Rabbii Allaahanis akkana jedhe; “Erga isaan akka saba tokko kan afaanuma tokko dubbatuutti waan kana hojjechuu jalqabanii, yoos amma wanni isaan hojjechuuf karoorfatan kan isaaniif hin dandaʼamne tokko iyyuu hin jiraatu. 7Kottaa mee gad buunee, akka isaan wal hin hubanneef afaan isaanii waliin dhoofnaa!”
8Kanaafuu Rabbii Allaahan achii isaan baasee lafa hunda irra isaan bittinneesse; isaanis magaalaa ijaaruu dhiisan. 9Waan Rabbii Allaahan achitti afaan addunyaa hunda waliin makeef iddoon sun Baabilon jedhame; Rabbii Allaahan iddoo sanaa isaan baasee lafa hunda irra isaan bittinneesse.
Seemii Jalqabee Hamma Ibraamitti
11:10‑27 kwf – Uma 10:21‑31; 1Sn 1:17‑27
10Seenaan maatii Seem kana.
Bishaan badiisaa booddee waggaa lamatti Seem yeroo umuriin isaa waggaa 100 guutetti Arfaakshadin dhalche. 11Seem erga Arfaakshadin dhalchee booddee waggaa 500 jiraatee ilmaanii fi intallan biraa dhalche.
12Arfaakshad waggaa 35 jiraatee Sheelaa dhalche. 13Arfaakshad erga Sheelaa dhalchee booddee waggaa 403 jiraatee ilmaanii fi intallan biraa dhalche.
14Sheelaan waggaa 30 jiraatee Eeberin dhalche. 15Sheelaan erga Eeberin dhalchee booddee waggaa 403 jiraatee ilmaanii fi intallan biraa dhalche.
16Eeber waggaa 34 jiraatee Felegin dhalche. 17Eeber erga Felegin dhalchee booddee waggaa 430 jiraatee ilmaanii fi intallan biraa dhalche.
18Felegi waggaa 30 jiraatee Reʼuu dhalche. 19Felegi erga Reʼuu dhalchee booddee waggaa 209 jiraatee ilmaanii fi intallan biraas dhalche.
20Reʼuun waggaa 32 jiraatee Seruugin dhalche. 21Reʼuun erga Seruugin dhalchee booddee waggaa 207 jiraatee ilmaanii fi intallan biraa dhalche.
22Seruugi waggaa 30 jiraatee Naahoorin dhalche. 23Seruugi erga Naahoorin dhalchee booddee waggaa 200 jiraatee ilmaanii fi intallan biraa dhalche.
24Naahoor waggaa 29 jiraatee Taaraa dhalche. 25Naahoor erga Taaraa dhalchee booddee waggaa 119 jiraatee ilmaanii fi intallan biraa dhalche.
26Taaraan waggaa 70 jiraatee Ibraam, Naahoorii fi Haaraanin dhalche.
Maatii Ibraam
27Seenaan maatii Taaraa kana.
Taaraan Ibraam, Naahoorii fi Haaraanin dhalche. Haaraan immoo Luutin dhalche. 28Haaraan utuma abbaan isaa Taaraan jiruu Uuri biyya Kaldootaa keessatti lafuma itti dhalatetti duʼe. 29Ibraamii fi Naahoor niitii fuudhan. Maqaan niitii Ibraam Saaraa, maqaan niitii Naahoor immoo Miilkaa ture. Miilkaan intala Haaraan. Haaraan kun immoo abbaa Miikaatii fi Yiskaa ture. 30Saaraan dhabduu turte; ijoollees hin deenye.
31Taaraan ilma isaa Ibraamin, ilma ilma isaa jechuunis Luut ilma Haaraanii fi niitii ilma isaa jechuunis Saaraa niitii Ibraam fudhatee Kanaʼaan dhaquuf, Uuri biyya Kaldootaatii walii wajjin baʼan; garuu yeroo Kaaraan gaʼanitti achuma qubatan.
32Taaraan waggaa 205 jiraatee Kaaraanitti duʼe.
ទើបបានជ្រើសរើសហើយ៖
Uumama 11: KQTAB
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Biblica® Katabbiiwwan Qulqulluu, Turjumaana Ammayyaa Banamaa™
Mirgi seeraan eegama © 2024 Biblica, Inc.
Biblica® Open Oromo Contemporary Scriptures™
Copyright © 2024 by Biblica, Inc.