Balomɛ́ŋ 9
9
Na Gieyide na gilɔga giá Íslayɛ́l
1Yɔɔ́guɔya hómohómue gá giagiá yɔɔ́guɔ́bɔnɛn na Klístus, ndiásúŋan, Gileénde giá Budányɛ na manɔ́ŋ mámɛ múɔ́guɔya buónyi ubuɔ́ múényénú gámɛ gá busió. 2Ŋŋódi giod giá mesígíl na giod giá giɔ́bíga binɛŋ bim agámɛ gá ɔdɛ́m. 3Ɛɛ́ɛ, yaáguamba mbánan áneé mbá ɔlɔmɔ́n, ndándúgan na Klístus gá busió buá beseé wa beliméen bámɛ bá manɔ́ŋ ɔbɔɔ́ dímebíbíén uguá buán búmomi. 4Búnyɛ baán bá Íslayɛ́l, abánya baán bá uhan, bɔ́ bɔ́bɔninaá na nigúmi, na agál, na gigodi na dumába Uhaluá na ndán. 5Na ndíndíl, uguɔ́b Klístus woólonineé uguá búnyɛ mɔndɔ, Klístus ugányɛ waádúmban buá gidigid, unyɛ Uhaluá usayanɔ́ gá binɛŋ bim. Anagányɛ. 6Búdiɔ́guɔya gɔg áneé nugálɔ nuá Uhaluá numasɔl, ɛ́ɛɛ́, banana bá Íslayɛ́l gidigid bádibá mbanda siá baán bá Íslayɛ́l bámuanyɛ gidigid. 7Na guond banana bá Áblahám bádibá baán bá Áblahám bámuanyɛ gidigid. Gá giagiá Uhaluá umɔyídɛ́n yɔ́ áneé: «Búnyɛ uguá Isák ánábianɔ́ banana ɔbɔɔ́ mmádánɛ́n.» 8Anagányɛ gúnya áneé, búdibá baán abánya gubíén guá bandɔ bábánya baán bá Uhaluá. Gɔgaá, uguá banana, pɛ́ŋ baán bá ndán bɔ́ báhananɔ́ hana baán bá Uhaluá. 9Ndénu gɔg nugálɔ nuá ndán unuɔ: «Uguá ginɛŋ giáguɔ́ igiɛ, yonógósiond, Sála wanábia muɔ́n ɔnúmɔndɔ.» 10Búmésésúgie agányɛ, búnyɛ súsɔ́n gá Lebéka, pɛ́ŋ síe wasɔ Isák úmaág yɔ́ nihum. 11Henyé agányɛ, nibásia niég nímabá nímanyɛ nídibíbíén, bámaságagual ta beseé ta gilɔga, Uhaluá umabá umaman guɔyɛd, gá gueleé gugisɛd guég guídan uguá busió, gugisɛd guég uguɔ́ úmuanyɛ mbánan údɔ́búnɔnɔ́ gég gá guɔyɛd, 12gúdiábíyigan melélíe, gɔgaá mɔndɔ udɔ́ŋɔ́naá. Uwɔyidɛn Lebéka áneé: «Muɔ́n wa busió wɔnɔ́ɔ́bɔnɛn wa gáandɛ.» 13Haná búnya ubúɔ́ŋɔ́n áneé: «yaábia ginɔ́nɛ́n na Yɔ́kɔba, iyabɛn Esó.» 14Diɔyɛd gɔg áneé giagɛ? Bumbágía búnyɛ agá Uhaluá a? Ɛ́ɛɛ́. 15Gá giagiá, umɔyidɛn Mɔ́sɛsa áneé: «Yanán bulɔ́b uyɔɔ́ yɔ́yɔnɔ́ guán bulɔ́b, yond nnyibinen uyɔɔ́ yámbanɔ́ guyibinɛn.» 16Ubugányɛ búdióguólonin gɔg ta gá guɔyɛd ta gá bínuanan guá mɔndɔ, gɔgaá gá guánanɛn bulɔ́b guá Uhaluá. 17Anagányɛ gɔg Bidányidányɛ biá Ŋŋɔ́ŋɛ bíɔ́yɔnaá Falaɔ́ŋ áneé: «Mmaguág ofuŋ gá gueleé ndíye buŋaŋa buámɛ uguáhɔ, na gueleé ɔhɛ́n huámɛ húsegidinye uguá guísi gidigid.» 18Agányɛ gɔg, yánánánɔ́ bulɔ́b uyɔɔ́ yámbanɔ́ guán bulɔ́b, gulundíe idɛ́m siá ɔbɔɔ́ yámbanɔ́ gulundíe.
Na ilúnd na bulɔ́b buá Uhaluá
19Ahá gɔg, ányá únyá wa guɔyɛd áneé: «Uhaluá umanyɛ gá bidada gá giagɛ? Gɔgaá, ányá mbánan unyaá wa bídúdúle gég gá guɔyɛd.» 20Mɔndɔ, aŋuá anyaá gɔg wa gueleé eségenye na Uhaluá, ondól húnyɛ huá guɔyidɛn emuísi áneé: «Gá giagɛ igiɛ́ ámáŋal ana?» 21Emuísi unyɛ wa gual ubuɔ́ wɔ́yɔnɔ́ na numua, unyɛ wa guaŋan indól siá nigúmi na indól siá masɔ́m. 22Mmába Uhaluá úmambá gɔg gudíye ilúnd hiég, wond ulinsie buŋaŋa buég, henyé gɔg áneé umabá na nubídémbídínyi, webídémbenye ilúnd hiég gá abáganyaá mɔdɔg na guádɛ́ɛg. 23Búmabá gá gueleé udíye bunɛ́m buá nigúmi niég gá busió buá bómodi ɔbɔɔ́ wánanaá bulɔ́b, ɔbɔɔ́ úmebué gugisɛd gá dáŋáab nigúmi. 24Basuá ɔbɔɔ́ úmɔdɔ́ŋɛ́ɛn, búdíbá gɔg pɛ́ŋ uguá bayúdɛn, umɔdɔ́ŋɛ́ɛn súsɔ́n abádiabá bayúdɛn, 25Búnyɛ ubúɔ́ŋɔ́n uguá yubu hiá Osé áneé: «Buán ubúmábúdibá buámɛ, yɔnɔ́dɔ́ŋɛ́ɛn buɔ́ áneé buán buámɛ, ubuɔ́ mmándibia ginɔ́nɛ́n naá buɔ́, ndɔ́ŋɛ́ɛn buɔ́ áneé aŋúndága. 26Agaá bɔ́mɔ́yidɛn bɔ́ áneé: Nudibá buán buámɛ, bɔ́nɔ́dɔ́ŋɛ́ɛn buɔ́ áneé baán bá Uhaluá unyaá ɔgɔ́sɛ.» 27Ɔmbɔ́gɔmbɔ́g huá Esayí uwabídáyídɛn gá busió buá Íslayɛ́l áneé: «Ta búbá áneé baán bá Íslayɛ́l bábá gudeg hana ombúm uguá ŋŋɛnd ya máŋ, gidám igíénésíenénú gígíánábánɔ́ igíháŋánɔ. 28Gá giagiá, Ɔgúná wonóhónye nugálɔ nuég gidigid gunsáns uguísi. 29Buɔ́ Esayí úmebué guɔyɛd áneé: búamáabúdibá áneé Ɔgúná wa nsénsi umadíníhínɛ́n banana, késie dimond hana Sɔdɔ́m, mpónyé na Gɔmɔ́l.»
Gisódie giá Íslayɛ́l uguá guágɔdɛ́m
30Diɔyɛd gɔg áneé giagɛ? Abádiabá bayúdɛn abámabá bádiamba gindényé agá busió buá Uhaluá, bádáŋáab giɛ́, yɔɔ́guɔya agá gindényé, gɔgaá gindényé igíólonineé gá guágɔdɛ́m. 31Henyé gɔg, áneé Íslayɛ́l umambá gigodi gá giagiá gínyɛ giá guéŋin yɔ́ gindényé, uwadúmbɛ́n agá buáyɛ buá gigodi. 32Gá giagɛ? Gá giagiá bámaságigan giɛ́ uguá guágɔdɛ́m. Bégedenye áneé bányɛ bádáŋáab giɛ́ uguá melélíe. Ɔbɔ́bígɔd gɔg uguá nidányɛ inígusenyinyeé. 33Haná búnya ubúɔ́ŋɔ́n áneé: «Ndénu mmɔ́dɔ́bígɛ́n nidányɛ inígɔdɔnɔ́ Siyɔ́ŋ. Giandá giá nidányɛ igígusenyinyeé gɔgaá, uwaáganaá ɔdɛ́m udianáyɛ́n.»
ទើបបានជ្រើសរើសហើយ៖
Balomɛ́ŋ 9: EKM
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
